“Ẹnyene Esịtekọm”
1 Ẹkekpep ata ediwak nnyịn ke ini eyenọwọn̄ ndisidọhọ “mbọk” ye “sọsọn̄ọ” ke ini owo owụtde nnyịn eti edu m̀mê mfọnido. Paul ọnọ nnyịn item ete ‘inyene esịtekọm’ kpukpru ini, ndien nnyịn akpan akpan ikpenyene ndiwụt esịtekọm nnọ Jehovah. (Col. 3:15, 16) Edi didie ke nnyịn ikeme ndiwụt Akwa Andibot nnyịn esịtekọm? Ndien mme akpan ntak ewe ke nnyịn inyene ndiwụt enye esịtekọm?
2 Apostle Paul ekewet ete: “Yak ekọm enyene Abasi, emi ọnọde nnyịn edikan, oto ke Ọbọn̄ nnyịn Jesus Christ.” (1 Cor. 15:57) Ke ini Editi ke isua kiet kiet, ẹsiti nnyịn ẹban̄a akakan ima oro Abasi ye Christ ẹkewụtde ke ndinọ ufak oro anamde nnyịn inyene idotenyịn nsinsi uwem. (John 3:16) Sia ekperede ndidi kpukpru nnyịn imataba owo ima nnyịn ke n̄kpa, nnyịn iwụt esịtekọm didie ntem iban̄a un̄wọn̄ọ Jesus emi aban̄ade ediset ke n̄kpa! Esịt nnyịn ọyọhọ ye esịtekọm ke ini ikerede iban̄a idotenyịn edibọhọ utịt editịm n̄kpọ emi ye unana edikpa n̄kpa tutu amama. (John 11:25, 26) Ọsọsọn̄ ndikụt mme ikọ ndida ntịn̄ esịtekọm oro inyenede kaban̄a kpukpru utịbe utịbe edidiọn̄ oro nnyịn idibọde ke ubọk Jehovah ke Paradise isọn̄ oro edide. (Edi. 21:4) Mme ntak ewe ẹfọnde ẹkan ke owo ekededi ekpenyene ke ‘ndinyene esịtekọm’ nnọ Abasi?
3 Nte Ẹkpewụtde Abasi Esịtekọm: Edi se idotde kpukpru ini ndiwụt Jehovah esịtekọm ke akam kaban̄a mfọn esie. (Ps. 136:1-3) Onụk nnyịn, n̄ko, ndiwụt enye esịtekọm ke nti usụn̄ en̄wen. Ke uwụtn̄kpọ, nnyịn ke akpanikọ iyodu ke Sunday, March 23, kaban̄a Editi n̄kpa Christ. Man in̄wam ke ndisịm mme n̄kpọ obụkidem emi esop n̄kann̄kụk oyomde ye eke utom ofụri ererimbot, nnyịn ke idatesịt ‘imesida inyene nnyịn ikpono Jehovah.’ (N̄ke 3:9) Nnyịn imesinọ mbiowo ibetedem ọyọhọ ọyọhọ inyụn̄ idiana kiet ye mmọ, ntem iwụtde esịtekọm oro inyenede inọ Jehovah kaban̄a un̄wam oro enye ọnọde ebe ke mmọ. (1 Thess. 5:12, 13) Kpukpru usen, nnyịn imesidomo ndimụm edinen ido oro ọnọde enyịn̄ Abasi ubọn̄ n̄kama. (1 Pet. 2:12) Jehovah okop inemesịt ke kpukpru uyarade esịtekọm nnyịn ẹmi.—1 Thess. 5:18.
4 Mfọnn̄kan Ediwụt Esịtekọm Nnyịn: Ndinyene ebuana ofụri ukpọn̄ ke utom ukwọrọikọ Obio Ubọn̄, ndikpono enyịn̄ Jehovah, ndiwụt esịtekọm ke akam, ye edida nnọ akpanikọ ke edinam akpanikọ ẹdu ke otu mfọnn̄kan usụn̄ ndiwụt esịtekọm esịt akpanikọ oro nnyịn ikemede ndiwụt Andibot nnyịn ke kpukpru se enye anamde ke ibuot nnyịn. Jehovah esikop inemesịt ndikụt nnyịn inamde edisana utom inọ enye ke ndinọ ibetedem ke uduak esie oro nte “kpukpru owo ẹnyene edinyan̄a, ẹnyụn̄ ẹsịm ifiọk akpanikọ.” (1 Tim. 2:3, 4) Ntak edi oro ata ediwak asuanetop ẹmi ẹkemede ndinam ndutịm nnọ enye ẹyerede ikot oro okodude ke Utom Obio Ubọn̄ Nnyịn eke February ndisịn enyịn̄ nte mme asiakusụn̄ unọ un̄wam ke ọfiọn̄ kiet m̀mê awakde akan oro ke ọfiọn̄ March, April, ye May. Ndisịn ukeme efen efen ke utom ukwọrọikọ edi eti usụn̄ ‘ndiwụt ke imenyene esịtekọm’ inọ Abasi. Nte afo eyekeme ndidụk udịm mme asiakusụn̄ ke April? ke May?
5 Ẹmenọ nnyịn enyene-nsọn̄ọ idotenyịn eke edidu uwem ke nsinsi. Ke ini nnyịn ikụtde nte enye osude, nnyịn iyenyene akpakịp ntak en̄wen ndika iso n̄kọm Jehovah idara idara kpukpru usen.—Ps. 79:13.