Ẹyom Un̄wam Fo
1 “Ẹsọsọn̄ọ ke kpukpru se mbufo ẹnamde ke ufọn kpukpru nnyịn. Emi enen̄ede otụk nnyịn.” Ikọ emi owụt esịtekọm oro inyenede iban̄a utom oro mbiowo ye mme asan̄autom unamutom ẹnamde. Sia esop Abasi akade-ka iso nditara, ẹyom iren oro ẹkọride ẹsịm ọyọhọ idaha ẹnam utom ke se ikperede ndisịm esop 100,000 ke ofụri ererimbot. Ẹyom un̄wam fo edieke afo edide eyenete eren oro ama akana baptism.
2 ‘Ndinyanade Mbịne’: Didie ke afo ekeme ndinyanade mbịne mme ifetutom efen efen? (1 Tim. 3:1) Akpan usụn̄ kiet edi ndinịm eti uwụtn̄kpọ ke kpukpru ikpehe uwem fo. (1 Tim. 4:12; Titus 2:6-8; 1 Pet. 5:3) Sịn idem ọyọhọ ọyọhọ ke utom ukwọrọikọ, nyụn̄ n̄wam mbon efen ndinam ukem oro. (2 Tim. 4:5) Nen̄ede nyene udọn̄ ke idem ekemmọ mme andinịm ke akpanikọ. (Rome 12:13) Di eti eyen ukpepn̄kpọ Bible nyụn̄ nyene ‘usọ ke nte ọnọde ukpep.’ (Titus 1:9; 1 Tim. 4:13) Nen̄ede tịn̄ enyịn ke utom oro mbiowo ẹdọhọde fi anam. (1 Tim. 3:10) Edieke afo edide ibuot ufọk, ‘kama mbonufọk fo ke eti usụn̄.’—1 Tim. 3:4, 5, 12.
3 Utom ebiowo m̀mê asan̄autom unamutom edi ọkpọsọn̄ utom emi oyomde n̄waidem. (1 Tim. 5:17) Ke ntre, ke ini anyanarede ebịne ifetutom, nen̄ede sụhọde idem nam n̄kpọ nọ mbon efen. (Matt. 20:25-28; John 13:3-5, 12-17) Kere ban̄a edu Timothy, nyụn̄ domo ndikpebe enye. (Phil. 2:20-22) Nte ẹketorode Timothy, yak ẹtoro fi ke nti edu fo. (Utom 16:1, 2) “Kpukpru owo [ẹyekụt] n̄kọri fo,” nte enyenede nti edu oro ẹyomde man ese aban̄a ifetutom efen efen ye nte anamde item oro ẹnọde man an̄wam fi ndinam n̄kọri.—1 Tim. 4:15.
4 Mme Ete ye Eka, Ẹkpep N̄kpri Owo Ndin̄wam: Toto ke uyen, nditọwọn̄ ẹkeme nditọn̄ọ ndikpep nte ẹn̄wamde owo. Kpep mmọ ndinọ n̄kpan̄utọn̄ ke mme mbono esop, ndikwọrọ ikọ, nnyụn̄ nnịm nti uwụtn̄kpọ ke Ufọkmbono Obio Ubọn̄ ye ke ufọkn̄wed. Kpep mmọ ẹnam n̄kpọ ẹnọ mbon efen, utọ nte edin̄wam ke ndinam Ufọkmbono Obio Ubọn̄ asana, ndin̄wam mbonusọn̄, ye ntre ntre eken. Nam mmọ ẹkop inemesịt oro odude ke ndinọnọ. (Utom 20:35) Utọ ukpepn̄kpọ emi ekeme ndin̄wam mmọ ndikabade ndi mme asiakusụn̄, mme asan̄autom unamutom, ye mbiowo ke ini iso.