Nditọete Iren Emi Ẹdide Uyen, Ndi Mbufo ke Ẹnyanade Ẹbịne Ifetutom?
1. Ini ewe ke eyenete emi edide uyen ọkpọtọn̄ọ ndinam se ẹtịn̄de ke 1 Timothy 3:1?
1 “Edieke owo ekededi anyanarede ebịne itieutom . . . , enye oyom eti utom.” (1 Tim. 3:1) Ikọ eke odudu spirit emi esịn udọn̄ ọnọ nditọete iren ndinam n̄kpọ man mmọ ẹdot ndinyene mme ifetutom ke esop. Ndi ana afo okpon ọwọrọ owo mbemiso anamde emi? Akam ọfọn ọtọn̄ọ ndinyanade mbịne ifetutom ke ini afo osụk edide uyen. Ntem, emekeme ndibọ ukpep onyụn̄ owụt ke emekeme ndidot ndinam utom nte asan̄autom unamutom ke ini okponde. (1 Tim. 3:10) Didie ke afo ekeme ndinyanade mbịne ifetutom edieke afo edide uyen emi ama akana baptism?
2. Owo akpanam didie enyene edu n̄waidem, ndien didie ke enye okpowụt ke imenyene edu emi?
2 Nyene Edu N̄waidem: Ti ete ke afo oyom ndinam eti utom, idịghe ndinyene udorienyịn̄. Mmọdo, nyene udọn̄ ndin̄wam nditọete fo iren ye iban. Ndikere mban̄a eti uwụtn̄kpọ Jesus edi usụn̄ kiet ndinam emi. (Matt. 20:28; John 4:6, 7; 13:4, 5) Ben̄e Jehovah an̄wam fi esinyene udọn̄ ke idem mbon en̄wen. (1 Cor. 10:24) Ndi emekeme ndin̄wam mbon oro ẹsọn̄de m̀mê mbon n̄kpọnnam ke esop? Ndi emesitiene etem mbiet, ọkpọri isọn̄, m̀mê anam n̄kpọ efen ekededi oro ẹsinamde ndise mban̄a Ufọkmbono Obio Ubọn̄? Ndi emekeme ndinọ utịn̄ikọ ke Ufọkn̄wed Utom Ukara Abasi edieke owo emi ekenyenede utịn̄ikọ oro mîdụhe? Afo oyokụt ete ke ndinam n̄kpọ nnọ mbon en̄wen ayanam fi okop idatesịt.—Utom 20:35.
3. Ndinyene spirit Abasi edi akpan n̄kpọ adan̄a didie, ndien didie ke owo ekeme ndinyene enye?
3 Nyene Spirit Abasi: Edi akpan n̄kpọ asan̄autom ke esop ndinyene spirit Abasi akan enye ndinyene akpan usọ m̀mê ndammana ukeme. Koro owo emi enyenede spirit Abasi esidomo ndise n̄kpọ nte Jehovah ye Jesus ẹsisede. (1 Cor. 2:15, 16) Enye esiwụt ke imenyene “mbun̄wụm spirit” Abasi. (Gal. 5:22, 23) Enye edi ifịk ifịk ọkwọrọ eti mbụk emi enịmde n̄kpọ Obio Ubọn̄ akpa. (Matt. 6:33) Afo emekeme ndikọri nti edu ke ndinam eti ndutịm nnọ ọkpọkpọ ukpepn̄kpọ. Emi esịne ndisikot Bible kpukpru usen, ndikot kpukpru nsiondi Enyọn̄-Ukpeme ye Ẹdemede!, nditịm idem nnọ mme mbono esop nnyụn̄ ntiene ndụk. (Ps. 1:1, 2; Heb. 10:24, 25) Ke ini Paul ekesịnde udọn̄ ọnọ ekpri Timothy ndinam n̄kọri ke n̄kan̄ eke spirit, enye ọkọdọhọ Timothy ‘ekpeme se enye ekpepde owo kpukpru ini.’ (1 Tim. 4:15, 16) Ntre tịm nam se ẹnọde fi anam ke Ufọkn̄wed Utom Ukara Abasi. Tịm idem nọ utom an̄wautom, nyụn̄ tiene buana kpukpru ini. Nịm mme utịtmbuba eke spirit, utọ nte utom usiakusụn̄, utom Bethel, m̀mê ndidụk Ufọkn̄wed Ukpep Bible Eke Nditọete Iren Emi Mîdọhọ Ndọ, nyụn̄ nam n̄kpọ bịne mmọ. Ndinyene spirit Abasi ayan̄wam fi ‘efehe ọkpọn̄ mme udọn̄ ini uyen.’—2 Tim. 2:22.
4. Nso idi ufọn edidi se ẹkemede ndiberi edem ye edinam akpanikọ?
4 Di Se Ẹkemede Ndiberi Edem Nyụn̄ Nam Akpanikọ: Mme apostle ikakpaha idem ndikere m̀mê ẹyenam utom ọfọn, koro nditọete oro ẹkemekde ẹte ẹdeme udia ẹnọ mme Christian akpa isua ikie ẹma ẹnyene “eti enyịn̄,” oro owụt ke ẹma ẹdiọn̄ọ mmọ nte mbon oro ẹkemede ndiberi edem ye mbon akpanikọ. Emi ama anam mme apostle emi ẹnọ ntịn̄enyịn ke mme akpan n̄kpọ eken. (Utom 6:1-4) Ntem, ke ini ẹnọde fi utom anam ke esop, sịn ofụri ukeme nam utom emi. Kpebe Noah emi ọkọbọpde ubom kpa nte ẹketemede enye. (Gen. 6:22) Jehovah ama owo emi anamde akpanikọ, edinam akpanikọ onyụn̄ owụt ke owo ọkọri esịm ọyọhọ idaha.—1 Cor. 4:2; se ekebe “Mme Ufọn Edinọ Mme Owo Ukpep.”
5. Ntak emi nditọete iren emi ẹdide uyen ẹkpenyanarede ẹbịne ifetutom?
5 Kpa nte ẹketịn̄de, Jehovah ke awara atan̄ mme andituak ibuot nnọ enye obok. (Isa. 60:22) Ke ẹbaharede ukem ukem, owo 250,000 ke ẹna baptism kpukpru isua. Sia ata ediwak owo ẹdụkde esop ntem, ẹyom nditọete iren oro ẹdotde ndise mban̄a mme ifetutom ke esop. Mfịn, nnyịn imenyene ekese ndinam ke utom Jehovah ikan nte akanam edide. (1 Cor. 15:58) Nditọete iren emi ẹdide uyen, ndi mbufo ke ẹnyanade ẹbịne ifetutom? Edieke edide ntre, ọwọrọ ke mbufo ẹmeyom ndinam ata eti utom!
[Se ẹwetde ke ikpọ abisi ke page 2]
Sia ata ediwak owo ẹdụkde esop ntem, ẹyom nditọete iren oro ẹdotde ndise mban̄a mme ifetutom ke esop
[Ekebe ke page 3]
Mme Ufọn Edinọ Mme Owo Ukpep
Nditọete emi ẹdotde, emi ẹdide uyen ẹsibọ ufọn ke ini mbiowo ẹnọde mmọ utom ẹnam ẹnyụn̄ ẹnọde mmọ ukpep. Esenyịn circuit kiet ama etie ke mbot utịn̄ikọ esịn udọn̄ ọnọ asuanetop kiet ke mbono esop ama akasuana. Enye ama okụt uyen kiet adade ekpere, onyụn̄ obụp enye m̀mê enye oyom ndinyene nneme ye imọ. Uyen oro ama ọdọhọ ke ẹkedọhọ imọ isikpọri mbot utịn̄ikọ ke mbono esop ama akasuana. Ete ye eka esie ẹma ẹben̄e idem ndinyọn̄, edi enye ikoyomke ndinyọn̄ ibọhọke enye anam utom oro ẹkenọde enye. N̄kpọ emi ama enem esenyịn circuit oro, ndien enye ama ọkpọn̄ itie oro. Enye ama ọdọhọ ete: “Mbiowo ke esop oro ẹma ẹsinọ nditọete iren emi ẹdotde, emi ẹdide uyen ukpep ke ndinọ mmọ utom ẹnam. Ntem, ke ini nsikade n̄kese esop oro, mmọ ikesitreke ndinyene eyenete emi edide uyen, emi mmọ ẹyomde ẹmek nte asan̄autom unamutom.”