Ini Editi—Ini Ndinam N̄kọri ke Utom Ukwọrọikọ
1. Nso odudu ke “edisana esop” ekenyene ke idem nditọ Israel emi ẹkebakde Abasi?
1 Nditọ Israel eset ẹma ẹsidụk “edisana esop” ke ini emi ẹkenịmde ẹnọ mme usọrọ oro ke isua. (Lev. 23:2) Ndida ini ntie n̄kere nte Abasi mmọ ọkọfọnde mmọ mfọn ama osụn̄ọ ke akwa idara onyụn̄ onụk mmọ ndisịn ifịk ke edisana utuakibuot.—2 Chron. 30:21–31:2.
2, 3. Ntak odotde nnyịn inam n̄kọri ke mme utom eke spirit nnyịn ke ini Editi, ndien ini ewe ke idinịm Editi?
2 Ke eyomfịn, idara idara utom ukara Abasi esisọn̄ ubọk kpukpru isua ke ini Editi. Enye edi ini emi nnyịn isitiede ikere ntotụn̄ọ ntotụn̄ọ iban̄a ọsọn̄urua enọ emi Jehovah ọkọnọde ke ibuot nnyịn—kpa ikpọn̄-ikpọn̄ edibon Eyen esie. (John 3:16; 1 Pet. 1:18, 19) Nte nnyịn itiede ikere iban̄a ima oro Abasi ye Eyen esie ẹkewụtde, emi esinụk nnyịn nditoro Jehovah nnyụn̄ nsịn̄ede idem nnyịn ke ndinam uduak esie.—2 Cor. 5:14, 15.
3 Isua emi, ẹdinịm Udia Mbubịteyo Ọbọn̄ ke Thursday, March 24, ke utịn ama okosụhọde. Didie ke nnyịn ikeme ndinam n̄kọri ke nte nnyịn ibuanade ke utom ukwọrọikọ ke ọfiọn̄ March, April, ye May?
4, 5. (a) Nso ikan̄wam ndusụk owo ndikwọrọ eti mbụk nnọ ediwak owo? (b) Nso ke afo okụt nte enyenede uforo ke n̄kann̄kụk mbufo?
4 Ndinọ Ediwak Owo Ikọ Ntiense: Yom usụn̄ ndinọ adan̄a ediwak owo nte ekekeme ikọ ntiense ke ini afo abuanade ke an̄wautom. Nte afo emekeme ndidiomi ndibuana ke utom eke enyịnusụn̄ ke enyịnusụn̄ ke ini ediwak owo ẹdude ke ufọk, utọ nte usụk usụk uwemeyo m̀mê mbubịteyo? Edieke ndusụk owo ke otu ukpepn̄kpọ n̄wed mbufo ẹdimade ndibuana ke an̄wautom mbemiso ukpepn̄kpọ, esenyịn ukpepn̄kpọ n̄wed ekeme ndinam ndutịm man ẹnyene ibio ibio mbono an̄wautom man ẹnam utom ke efakutom emi ekperede.
5 Usụn̄ efen ndisịm ediwak owo edi ndinọ ikọ ntiense ke itie emi ẹkemede ndikụt ediwak owo. Eyenete an̄wan kiet ke Japan ama oyom ndinam utom usiakusụn̄ unọ un̄wam idem okposụkedi oro enye akanamde utom idịbi udia uyọhọ ini. Ebiowo kiet ama ọnọ ekikere ete kpukpru usen mbemiso enye akade utom idịbi udia esie, ke enye ekeme ndinam utom unọ ikọ ntiense efak ekpere itie mbehe tren. Ke ama akakan bụt oro enye ekesikopde, mînyụn̄ idọn̄ke enyịn aba ke nsahi oro mme akaisan̄ ẹkesisakde enye, enye ama enyene owo 40 nte afan̄ magazine, esịnede mme akaisan̄, mme anam utom ke itie mbehe oro, ye mme andinyene ufọkurua n̄kpere do. Enye esinịm magazine 235 ke ọfiọn̄ ke ẹbaharede ukem ukem. Ke ndineme mme akpan n̄kpọ N̄wed Abasi ke ekpri ibio ini ye mme owo kpukpru usen, enye ama ekeme nditọn̄ọ ukpepn̄kpọ Bible itiokiet.
6. Didie ke mme uyen ẹkeme ndinam n̄kọri ke utom Abasi?
6 Mme Ifet Ndinọ Ikọ Ntiense: Ediwak mme asuanetop oro ẹdude ke isua uka ufọkn̄wed ẹsinyene mme ini nduọkodudu ke isua. Emi ekeme ndidi nti ini ndinam usiakusụn̄ unọ un̄wam. Ke adianade do, mme uyen Christian ẹkeme ndinam n̄kọri ke utom ukwọrọikọ mmọ ke ndinọ ikọ ntiense ke ufọkn̄wed. Idem ekeme ndikpa fi mban̄a adan̄a udọn̄ oro mme nsan̄a ubet ukpepn̄kpọ fo ẹkemede ndinyene mban̄a se afo enịmde ke akpanikọ. Ntak mûdaha ini nneme ke ubet ukpepn̄kpọ m̀mê ini uwet mbụk unọ ikọ ntiense? Mbon efen ẹma ẹkeme ndida mme vidio nnyịn nnam ntre. Ndusụk owo ẹma ẹtọn̄ọ ukpepn̄kpọ Bible ye nsan̄a ubet ukpepn̄kpọ mmọ ẹnyụn̄ ẹn̄wam mmọ ẹnam n̄kọri ẹkesịm uyakidem nnọ ye baptism. Nti usụn̄ ẹdi oro ‘nditoro enyịn̄ Jehovah.’—Ps. 148:12, 13.
7. (a) Didie ke eyenete kiet akada ifet oro enye ekenyenede ndinọ mbon en̄wen ikọ ntiense anam n̄kpọ? (b) Nte afo emenyene utọ ifiọkutom oro?
7 Ke mbubehe fo eke usen ke usen, yom usụn̄ ndineme ye mme owo mban̄a utịbe Abasi nnyịn ye mme utịbe un̄wọn̄ọ esie. Eyenete eren kiet emi esidụkde ukem tren kpukpru usen aka utom esinọ mbon emi ẹdude ye enye ke tren ikọ ntiense ke ini odotde. Ke uwụtn̄kpọ, ke adan̄aemi enye ekebetde tren ke itie mbehe kiet, enye ama ọnọ akparawa kiet ikọ ntiense ke n̄kpọ nte minit ition. Nte utịp, akparawa oro ye nsan̄a esie ẹma ẹnyịme ndikpep Bible. Mmọ ẹkesinịm ukpepn̄kpọ Bible oro ke tren nte mmọ ẹkade utom. Ke ndusụk ini ẹma ẹkebe, akanian̄wan kiet emi ekesikpan̄de utọn̄ ke nneme mmọ ama aka ebịne eyenete oro onyụn̄ ọdọhọ yak enye esikpep imọ n̄kpọ. Ke ẹkpep n̄kpọ n̄ko ye enye ke mme usen oro enye odụkde tren oro. Ke usụn̄ emi, eyenete emi emekpep nsio nsio owo duop n̄kpọ ke tren.
8. Nso usụn̄ utom an̄wautom ekeme ndin̄wam mbon oro ẹkemede ndinam ata esisịt ke ntak isua emana m̀mê unana nsọn̄idem ndinam n̄kọri ke ebuana mmọ ke utom ukwọrọikọ?
8 Nso edieke afo ekemede ndinam ata esisịt ke ntak isua emana m̀mê unana nsọn̄idem? Mme usụn̄ ẹkeme ndisụk ndu emi afo ekemede ndinam n̄kọri ke nditoro Jehovah. Nte afo ama odomo unọ ikọ ntiense urụk ukopikọ ese? Edieke mûdiọn̄ọke nte ẹkemede ndinam emi, tịn̄ nọ esenyịn ukpepn̄kpọ n̄wed fo. Enye ekeme ndidiomi mme asuanetop oro ẹsinamde emi ndisan̄a ye afo. Ke ndisan̄a kiet nnam utom, mbufo ẹmekeme ndikpep n̄kpọ nto kiet eken ẹnyụn̄ ẹn̄wam kiet eken ndinọ ikọ ntiense oro enyenede uforo. Emekeme ndikụt nti ekikere ke nte ẹkemede ndinam unọ ikọ ntiense urụk ukopikọ ke Utom Obio Ubọn̄ Nnyịn eke February 2001, page 5-6.
9. Didie ke nnyịn ikeme ndin̄wam nditọ ukpepn̄kpọ Bible ndidot ndibuana ke an̄wan̄wa utom ukwọrọikọ ye esop?
9 Ndidụk Editi ekeme ndidemede mbufa owo udọn̄ ndiyom ndinam n̄kọri ke nte mmọ ẹtorode Jehovah. Afo emekeme ndin̄wam mmọ ndikan ndịk ekededi oro mmọ ẹkemede ndinyene kaban̄a edibuana ke utom ukwọrọikọ ebe ke ndibụk nti ifiọkutom an̄wautom ye ke ndinọ mmọ ukpep sụn̄sụn̄ ndinam mme ukpepn̄kpọ Bible ẹn̄wan̄a owo nnyụn̄ ntịn̄ mban̄a se mmọ ẹnịmde ke akpanikọ. (1 Pet. 3:15) Edieke eyen ukpepn̄kpọ Bible oyomde nditọn̄ọ ntan̄a eti mbụk, tịn̄ nọ esenyịn oro etiede ibuot. Enye oyodiomi man ẹsobo ye eyen ukpepn̄kpọ oro ẹnyụn̄ ẹbiere m̀mê enye odot ndibuana ke an̄wan̄wa utom ukwọrọikọ ye esop. Emi edinam esịt Jehovah adat didie ntem ke okụtde nte mbufa owo ẹdade ke n̄kan̄ esie ke eneni oro abuanade ofụri ekondo!—N̄ke 27:11.
10. (a) Didie ke eti ndutịm ekeme ndin̄wam nnyịn ndinam usiakusụn̄ unọ un̄wam? (b) Nte afo ama ekeme ndidiomi ndinam usiakusụn̄ unọ un̄wam isua oko ke ini Editi? Okodiomi didie?
10 Nte Afo Emekeme Ndinam Usiakusụn̄ Unọ Un̄wam? Ẹkpenyene ndida hour 50 oro ẹyomde ẹto asiakusụn̄ unọ un̄wam ke akpan n̄kpọ. (Matt. 5:37) Emi ọwọrọ ke afo enyene ndidiomi ndisịn hour 12 ke an̄wautom ke ẹbaharede ukem ukem ke kpukpru urua. Nte kiet ke otu uwụtn̄kpọ mme ndutịm usiakusụn̄ unọ un̄wam oro odude ke page 5 odot ye mme idaha fo? Edieke mîdotke, nte afo emekeme ndinam ndutịm oro edin̄wamde fi ndinam usiakusụn̄ unọ un̄wam ke March, April, m̀mê May? Bọn̄ akam ben̄e Jehovah ete ọdiọn̄ mme ukeme oro afo esịnde ndinam n̄kọri ke utom an̄wautom fo.—N̄ke 16:3.
11. Didie ke mbiowo ye mme asan̄autom unamutom ẹkeme ndin̄wam mbon oro ẹdinamde usiakusụn̄ unọ un̄wam?
11 Mbiowo ye mme asan̄autom unamutom ẹyenọ fi ibetedem ọyọhọ ọyọhọ ke ukeme emi afo esịnde ndinam ini Editi emi edi kiet ke otu akpan ini nditoro Jehovah. Eyedi ediwak ke otu mmọ ẹyenam usiakusụn̄ unọ un̄wam. Nte oyomde, mbiowo ẹyediomi mme udiana mbono an̄wautom, utọ nte ke usụk usụk uwemeyo, ke mme mbubịteyo ufọturua, ye ke mme utịturua. Man ẹbiere ebiet ye ini emi ẹdinịmde mme utọ mbono oro ye owo oro edidade usụn̄, mbiowo ẹkeme ndinyene nneme ye mbon oro ẹdinamde utom usiakusụn̄ m̀mê oro ẹkerede ndinam ntre. Mbiowo ẹyedomo ndinam ndutịm man mme asuanetop efen ẹdu ndisan̄a ye afo ke mme usen ye ini oro afo osiode enịm ndiwọrọ an̄wautom. Ke usụn̄ emi, emekeme ndinam ndutịm oro enyenede iwụk omonyụn̄ ekeme ndinam ekese.—N̄ke 20:18.
12. Nso inụk nnyịn nditoro Jehovah kpukpru ini?
12 Nam Ofụri Se Ekemede: Edieke mme idaha fo mîyakke fi anam usiakusụn̄ unọ un̄wam, ti ete ke Jehovah enyịme mme ukeme ye mme n̄waidem nnyịn “nte ekemde ye se owo enyenede, idịghe se owo mînyeneke.” (2 Cor. 8:12) Nnyịn imenyene ekese n̄kpọ ndikọm Jehovah mban̄a. Ye eti ntak, David ekewet ete: “Nyọkọm Jehovah kpukpru ini: itoro esie oyosụk atak mi ke inua.” (Ps. 34:1) Oro akpakam edi ubiere nnyịn ke ini Editi emi.
[Ekebe ke page 3]
Didie ke Afo Edinam N̄kọri ke Utom An̄wautom Fo?
◼ Kwọrọ ikọ ke ini mme owo ẹdude ke ufọk
◼ Nọ ikọ ntiense ke itie emi ẹkemede ndikụt ediwak owo
◼ Nọ ikọ ntiense ke itie utom m̀mê ke ufọkn̄wed
◼ Nọ ikọ ntiense ke urụk ukopikọ
◼ Nam usiakusụn̄ unọ un̄wam
[Chart ke page 5]
Ndiwụt Mme Ndutịm Usiakusụn̄ Unọ Un̄wam—Nte Ẹkpesan̄ade Ẹnyene Hour 12 ke An̄wautom ke Urua Kiet Kiet
Usenubọk—Monday Esịm Saturday
Emekeme ndida Sunday n̄kpụhọ ye usen ekededi.
Usen Ini Hour
Monday Usenubọk 2
Tuesday Usenubọk 2
Wednesday Usenubọk 2
Thursday Usenubọk 2
Friday Usenubọk 2
Saturday Usenubọk 2
Ofụri Ibat Hour: 12
Ofụri Usen Iba
Emekeme ndimek usen iba ekededi ke urua. (Ọkọn̄ọde ke usen emi ẹmekde, ekeme ndidi ofụri ibat hour 48 kpọt ke ọfiọn̄ ke ẹdinyene ke ndutịm enye emi.)
Usen Ini Hour
Wednesday Ofụri Usen 6
Saturday Ofụri Usen 6
Ofụri Ibat Hour: 12
Mbubịteyo Usen Iba ye Utịturua
Emekeme ndimek mbubịteyo usen iba ekededi.
Usen Ini Hour
Monday Mbubịteyo 1 1⁄2
Wednesday Mbubịteyo 1 1⁄2
Saturday Ofụri Usen 6
Sunday Ubak Usen 3
Ofụri Ibat Hour: 12
Uwemeyo Usen Ita ye Saturday
Emekeme ndida Sunday n̄kpụhọ ye usen ekededi.
Usen Ini Hour
Monday Uwemeyo 2
Wednesday Uwemeyo 2
Friday Uwemeyo 2
Saturday Ofụri Usen 6
Ofụri Ibat Hour: 12
Ọkpọkpọ Ndutịm Utom An̄wautom Mi
Biere m̀mê hour ifan̄ ke edinyene ke ini kiet kiet.
Usen Ini Hour
Monday
Tuesday
Wednesday
Thursday
Friday
Saturday
Sunday
Ofụri Ibat Hour: 12