Obufa Ndutịm Usen Akpan Mbono

Enyịn owo enyene ndyọ eti eti. (Ps. 139:14) Kpa ye oro, enye ekeme ndiwụk enyịn nse n̄kpọ kiet kpọt ke ini kiet. Ntre ke edi ke ata ata ye ke ndamban̄a usụn̄. Man enyịn eke spirit nnyịn ayama onyụn̄ enen̄ede ese, ana nnyịn iwụk ntịn̄enyịn ke ndinam uduak Abasi. Ke ikerede iban̄a nte mme n̄kpọ oro ẹwọn̄ọrede owo ntịn̄enyịn ẹkade iso ẹwak ke ererimbot Satan emi, odot didie ntem ndutịm usen akpan mbono eke 2006 nditat ibuotikọ oro “Nam Enyịn Fo Enen̄ede Ese”!—Matt. 6:22.

Didie ke nnyịn ikeme ndinam n̄kpọ man ibọ edidiọn̄ Jehovah? (N̄ke 10:22) Ẹyebọrọ mbụme emi ke ikpehe oro ibuotikọ edide, “Bọ Ufọn to Edinam Enyịn Fo Enen̄ede Ese.” Mme ndụn̄ọde oro ẹdinamde ẹyewụt nte nnyịn ikemede ndibọ ufọn nto edida mme edumbet N̄wed Abasi nsịn ke edinam. Akpa utịn̄ikọ oro etịn̄ikọ oro otode-to edi edinọde, emi ibuotikọ edide, “Ndinam Enyịn Nnyịn Ẹnen̄ede Ẹse ke Idiọk Ererimbot Emi,” ayanam nnyịn ifiọk mme n̄kpọ oro ẹkemede nditịmede uwem nnyịn nnyụn̄ mbaba n̄kọri eke spirit nnyịn sụn̄sụn̄ n̄wot. Nnyịn iyekpep n̄ko se ibuanade ke ndimek “eti udeme.”—Luke 10:42.

Didie ke mme ete ye eka ọkọrọ ye mbon efen ẹkeme ndisịn udọn̄ nnọ mme uyen Christian ndiwụk enyịn mbịne mme n̄kpọ eke spirit? Ẹyenam ndụn̄ọde ye mme ete ye eka ye mme uyen ẹban̄a akpan mbụme emi ke ikpehe oro, “Mme Ete ye Eka Oro Ẹtịmde Ẹket Idan̄ Mmọ” ye “Mme Uyen Oro Ẹnyanarede Ẹbịne Mme Utịtmbuba eke Spirit.” (Ps. 127:4) Akpatre utịn̄ikọ oro etịn̄ikọ emi otode-to edi edinọde eyeneme nte nnyịn ikemede ndisan̄a ikpat kiet ye esop Jehovah nte owo kiet kiet, nte ubon, ye nte esop.

Edide nnyịn ibọ akpanikọ ke ndondo emi m̀mê nnyịn imanam n̄kpọ Jehovah ke ediwak isua, edi akpan n̄kpọ nnyịn ‘ndinam enyịn nnyịn ẹnen̄ede ẹse.’ Ndutịm usen akpan mbono emi ayan̄wam nnyịn ndinam oro.