Obufa Ndutịm Usen Akpan Mbono

“Ẹkọri Ẹkabade Ikpọ Owo ke Ukeme Ufiọkn̄kpọ” edi ibuotikọ ndutịm usen akpan mbono oro editọn̄ọde ke March 2001. (1 Cor. 14:20) Ntak emi edifọnde nnyịn ndidụk? Nnyịn idu uwem ke ererimbot emi idiọkido ọyọhọde. Man ibiọn̄ọ emi, ana nnyịn ifori mme ukeme ufiọkn̄kpọ eke spirit nnyịn man ikeme ndida eti n̄kan idiọk. Oro edi se ndutịm usen akpan mbono edin̄wamde nnyịn ndinam.

Ke akpa ikpehe, esenyịn circuit eyeneme “Mme Un̄wam Ndikọri N̄kabade Akwa Owo ke Ifiọk Bible.” Enye oyowụt nnyịn nte ikemede ndidọn̄ n̄kam ke mbuọtidem Christian. Etịn̄ikọ oro otode-to edi oyowụt nte ata ata edida mme edumbet Bible nsịn ke edinam edide akpan n̄kpọ ke ndifori ata ikike, nte enye editịn̄de ikọ ke ibuotikọ oro “Kpeme Idaha eke Spirit ebe ke Ndinọ Mme Ukeme Ikike Fo Ukpep.”

Ana n̄kparawa owo n̄ko ẹfori ukeme ufiọkn̄kpọ. Ẹyeneme emi ke mme ikpehe oro “Ntak Ndidi Nsek Nditọ ke Edinam Idiọk” ye “Mme Uyen Emi Ẹnyenede Asian Idahaemi.” Kpan̄ utọn̄ nte mme uyen ẹtịn̄de se mmọ ẹsinamde man ẹsọn̄ọ idem ke n̄kan̄ eke spirit man mmọ ẹkeme ndikara ọkpọsọn̄ udọn̄ ekededi kaban̄a mme idiọk edinam ererimbot nnyụn̄ mfep mme afanikọn̄.

Didie ke nnyịn ikeme ndinyene akakan inemesịt ke uwem? Etịn̄ikọ oro otode-to edi ayanam emi an̄wan̄a ke ibuotikọ utịn̄ikọ ediberi oro “Bọ Ufọn to Edida Mme Edumbet Bible Nsịn ke Edinam ye Mbufiọk.” Enye ọyọnọ mme uwụtn̄kpọ ndiwụt nte ke edida Ikọ Abasi nsịn ke edinam an̄wam nnyịn ndise mban̄a mme mfịna, ndinam mme ubiere, ndinyụn̄ nnen̄ede mbọ ufọn nto se Jehovah ekpepde nnyịn.

Mbon oro ẹduakde ndiyarade uyakidem mmọ nnọ Abasi ebe ke baptism mmọn̄ ke mbono emi ẹkpenyene ndisian esenyịn oro etiede ibuot usọp usọp nte ẹkekeme. Nịm idiọn̄ọ ke n̄wed usenọfiọn̄ fo ke ndondo oro ẹtọtde usenọfiọn̄ usen akpan mbono, nyụn̄ nam mme akpan ndutịm ndibọ ufọn nto eti ndutịm emi. Kûtaba ikpehe usen akpan mbono emi ndomokiet! Enye ọyọsọn̄ọ fi idem ndiyọ idiọk editịm n̄kpọ emi nnyụn̄ nnam akpanikọ nnọ Jehovah.