Nyene Nti Edu, Bọ Ekese Edidiọn̄
1. Ntak ọfọnde ndisifiak ndụn̄ọde mme edinam eke spirit fo?
1 Ke afo ama akakabade edi Christian, anaedi afo ama esịn ekese ukeme ndinam eti ndutịm kaban̄a mme edinam eke spirit emi ẹsịnede ukpepn̄kpọ Bible, edidụk mme mbono esop Christian, utom ukwọrọikọ, ye akam. Nte utịp edidiọn̄ oro Jehovah ọkọdiọn̄de ukeme fo, afo ama ọkọri ke n̄kan̄ eke spirit. Ekeme ndidi isua ifan̄ ẹbe tọn̄ọ nte akana baptism. Ndi afo ke aka iso enyene nti edu eke spirit oro ekenyenede ke ndondo oro akakabarede edi Christian?
2. Didie ke nnyịn ibọ ufọn ito edikot Bible eke usen ke usen?
2 Dụn̄ọde Ndutịm Fo: Ndi edi ido fo ndisikot Ikọ Abasi ke usen ke usen? Nso akpakịp edidiọn̄ ke nnyịn inyene ntem ke ndinam oro! (Josh. 1:8; Ps. 1:2, 3) Ke Israel eset, akana edidem kiet kiet okot Ibet “kpukpru usen uwem esie.” Nso ikedi ufọn? Man enye osụhọde idem onyụn̄ ekpep ndibak Jehovah, man okûwọn̄ọde ọkpọn̄ mbet Abasi. (Deut. 17:18-20) Ukem oro ke edi mfịn, edikot Bible ke usen ke usen an̄wam nnyịn ndinana nduduọhọ ye ndudue ke idiọk ye n̄kakwan̄a emana emi. Enye n̄ko an̄wam nnyịn iben̄e idem ọyọhọ ọyọhọ ndinam utom ukwọrọikọ.—Phil. 2:15; 2 Tim. 3:17.
3. Mme edidiọn̄ ewe ke nnyịn ibọ ke ndidụk mbono esop kpukpru ini?
3 Jesus ama esika synagogue, emi ẹkesinemede N̄wed Abasi. (Luke 4:16) Nte eyịghe mîdụhe, emi ama ọsọn̄ọ enye idem ndiyọ mme idomo oro enye ekenyenede ndisobo. Mme item eke spirit oro ẹsinọde ke mme mbono esop ye “nsịnudọn̄ eke otode edem mbiba” ẹsisọn̄ọ nnyịn idem n̄ko. (Rome 1:12) Ndisop idem ọtọkiet ye nditọete nnyịn an̄wam nnyịn iyọ nsọn̄ọn̄kpọ ke mme akpatre usen emi. (Heb. 10:24, 25) Ndi ke osụk ededi ido fo ndisidụk kpukpru mbono esop?
4. Didie ke ndibuana ke utom ukwọrọikọ ke urua ke urua enyene ufọn ọnọ nnyịn?
4 N̄wetnnịm n̄kpọ eke odudu spirit asian nnyịn ete ke mme apostle ẹkesikwọrọ eti mbụk “kpukpru usen ke temple ye ke ufọk ke ufọk.” (Utom 5:42) Ke adan̄aemi nnyịn mîdikemeke ndikwọrọ ikọ kpukpru usen, ndi nnyịn imekeme ndinam edi ido nnyịn ndibuana ke ndusụk ikpehe utom ukwọrọikọ kpukpru urua? Ke inamde ntre, nnyịn ke akpanikọ iyenyene usọ ke ndisiak Ikọ Abasi, ndien nnyịn iyenyene ndinem ifiọkutom ke ndibuana akpanikọ Bible ye mbon efen.
5. Ntak anade ibọn̄ akam inọ Jehovah kpukpru ini-e?
5 Ẹma ẹnen̄ede ẹdiọn̄ prọfet Daniel ke ndikanam n̄kpọ Jehovah “kpukpru ini” ke ofụri uwem esie. Emi ama esịne enye ndisibọn̄ akam kpukpru ini nnọ Jehovah. (Dan. 6:10, 16, 20) Kpasụk ntre, nte nnyịn ikade kpukpru ini ibịne Jehovah ke akam ofụri esịt, enye ọyọnọ nnyịn edisana spirit esie. (Luke 11:9-13) Ke adianade do, Jehovah ayasan̄a ekpere nnyịn, anamde nnyịn inyene n̄kpet n̄kpet itie ebuana ye enye. (Ps. 25:14; Jas. 4:8) Nso akwa edidiọn̄ ke emi edi ntem! Ke ntre, ẹyak nnyịn inam utom ọkpọsọn̄ ndika iso nnyene nti edu eke spirit nnyụn̄ mbọ akpakịp edidiọn̄ nto Jehovah.