Obufa Ndutịm Usen Akpan Mbono

Edisana spirit ama onụk akpa mme Christian ndinen̄ede nsịn idem ke nditan̄a eti mbụk atara nte ẹkekeme. (Utom 1:8; Col. 1:23) Ndutịm usen akpan mbono eke isua 2007 emi ibuotikọ edide, ‘Sịn Idem Ọkpọsọn̄ ke Ikọ Emi,’ ayan̄wam nnyịn ndikpebe nti uwụtn̄kpọ mmọ.—Utom 18:5.

Edidem David eketịn̄ ntem aban̄a ikọ Abasi: “Ido Jehovah ẹfọn ẹma, ẹdemede ukpọn̄; item Jehovah edi akpanikọ, asian mme ọkọi.” (Ps. 19:7) Ndutịm usen akpan mbono oro ẹketịmde nte ọfọnde mi oyowụt ke N̄wed Abasi ekeme ‘ndinen̄ede mme n̄kpọ nnịm,’ oyonyụn̄ esịn udọn̄ ọnọ nnyịn ndikwọrọ Ikọ Abasi, nnyụn̄ nda enye n̄kpep mme owo n̄kpọ sia ifiọkde ke utịt enen̄ede ekpere. (2 Tim. 3:16, 17) Obufa ndutịm emi oyowụt nte nnyịn ikemede ndifep mme n̄kpọ iduọ ye nte idibọde ufọn ke ini idade mme edumbet Bible isịn ke edinam ke uwem nnyịn eke usen ke usen. Enye n̄ko ayan̄wam nnyịn ndida Ikọ Abasi n̄n̄wam mme uyen ye mbufa owo man mmọ ẹkeme ndinam n̄kọri ke n̄kan̄ eke spirit.

Kụt ete ke omodu ke ini ikpehe edinam ọtọn̄ọde, onyụn̄ enen̄ede akpan̄ utọn̄. Wet mme n̄kpọ oro afo ekemede ndida nsịn ke edinam. Wụt esịtekọm ban̄a item ye mme n̄kpọ oro ẹtide fi nyụn̄ tie kere nte edidade se ekpepde esịn ke edinam.

Ndutịm usen akpan mbono emi ayanam nnyịn idọdiọn̄ ima Ikọ Abasi, eyeti nnyịn ndika iso n̄kwọrọ eti mbụk Obio Ubọn̄ ifịk ifịk, oyonyụn̄ owụt nnyịn nte idin̄wamde mbon efen ẹnam kpasụk ntre. Ntem, biere ndidu ke mbono emi man ọbọ kpukpru ndausụn̄ eke spirit ye item oro Jehovah edinọde ke mbono emi!—Isa. 30:20b, 21.