Ndutịm Usen Akpan Mbono Eke 2010
1. (a) Mme ibuotikọ usen akpan mbono ewe ke ẹkeneme ke mme isua ndondo emi? (b) Ndi odu akpan n̄kpọ ekededi emi ẹkenemede ke usen akpan mbono oro akan̄wamde fi ke utom ukwọrọ ikọ fo?
1 “Ẹdomo Ẹfiọk Se Ifọnde Ikan,” “Ndisọn̄ọ Nda nte Otuerọn̄ Kiet,” “Ẹkaiso Nditie Ntiense Nnọ Akpanikọ,” ye “Nnyịn Idi Mbateso—Jehovah Edi Andibot Nnyịn.” (Phil. 1:9, 10, 27; John 18:37; Isa. 64:8) Emi edi ifan̄ ke otu ediwak ibuotikọ oro ẹkenemede ke mme usen akpan mbono oro ẹkebede. Ndi ọdọn̄ fi ndidụk usen akpan mbono eke 2010? Ẹyeneme ibuotikọ emi: “Ini Emi Osụhọde Iniọn̄ke Aba,” ndien ẹda enye ẹto 1 Corinth 7:29.
2. Didie ke ẹkeme ndidemede owo udọn̄ nnọ mbono emi?
2 Ke ndondo oro esop mbufo ọtọtde usenọfiọn̄ usen akpan mbono mbufo, ẹtọn̄ọ nditịn̄ nte mbono oro edinemde. Ndusụk mme ete ye eka ẹsinịm idiọn̄ọ ke n̄wed usenọfiọn̄ ubon, ẹwet se owo kiet kiet ediyomde, ndien ekem ẹtọn̄ọ ndibat usen tutu ẹsịm usen mbono oro. Ke usen Utuakibuot Ubon mbufo, ẹmekeme ndifiak ndụn̄ọde mme akpan n̄kpọ oro ẹkewetde ẹnịm ke mme usen akpan mbono oro ẹkebede. Ẹmekeme n̄ko nditịm esịt mbufo mben̄e mbono emi ke ndidụn̄ọde se idude ke Bọ Ufọn to Ukpepn̄kpọ Ufọkn̄wed Utom Ukara Abasi, page 13-16, man an̄wam fi ye ubon fo “ẹkpeme nte mbufo ẹkpan̄de utọn̄.”—Luke 8:18.
3. Didie ke ikeme ndibọ ufọn ọyọhọ ọyọhọ nto ndutịm mbono emi?
3 Da Se Okopde Sịn ke Edinam: Mbono ama asuana, mme owo esiwak ndidọhọ: “Mbono oro ama enem-e!” Oro edi akpanikọ koro mbono edi kiet ke otu nti n̄kpọ oro Jehovah ọnọde nnyịn. (N̄ke 10:22) Man se okopde on̄wụm mfri, ana etie ekere onyụn̄ omụm akama ke esịt. (Luke 8:15) Nte asan̄ade ọnyọn̄ ke mbono ama akasuana, neme se okokopde ye ubon fo m̀mê ye mbon oro ẹdụkde ubomisọn̄ ye afo. Ẹneme se owo kiet kiet ebierede ndinam ye mme akpan n̄kpọ oro ẹdin̄wamde mbufo ke an̄wautom. Emi ayanam ọbọ ufọn oto mme ntọt oro okokopde ke anyan ini idem ke mbono ama ekebe.—Jas. 1:25.
4. Ntak emi mbono emi edidide akpan n̄kpọ ọnọ nnyịn-e?
4 Esịt esinen̄ede enem nnyin ke ini ẹnọde nnyịn n̄kpọ oro iketiede-tie ibet. Nnyịn ikam itetie ye ọkpọsọn̄ udọn̄ ibet se Jehovah edinọde nnyịn ke usen akpan mbono emi. Imenen̄ede ifiọk ke enye ọyọfọn ke kpukpru usụn̄. Nnyịn imodori enyịn ke Jehovah, kpa Ete nnyịn eke heaven ọyọnọ nnyịn nsịnudọn̄ ye ukpep oro iyomde man inam utom oro enye ọdọn̄de nnyịn.—2 Tim. 4:2; Jas. 1:17.