“Enye Ọnọ Mbon Mba Odudu”
1 Kpukpru nnyịn imesikpa mba ke ini ke ini. Idịghe utom m̀mê mme edinam eken oro idade odudu nnyịn inam kpọt ẹkeme ndinam nnyịn ikpa mba, mme mfịna oro isobode ke “ndiọkeyo” emi n̄ko ẹsitịp ẹsịn. (2 Tim. 3:1) Nte mme asan̄autom Jehovah, didie ke nnyịn ikeme ndinyene ukeme eke spirit oro edin̄wamde nnyịn ikûtek ke ifịk ke utom ukwọrọikọ nnyịn? Imekeme ndinyene utọ ukeme emi ebe ke ndiberi edem ke Jehovah, kpa enye emi ‘ọsọn̄de odudu.’ (Isa. 40:26) Enye ọfiọk se nnyịn iyomde onyụn̄ enen̄ede ọdọn̄ enye ndin̄wam nnyịn.—1 Pet. 5:7.
2 Mme N̄kpọ Oro Jehovah Ọnọde: Jehovah ada edisana spirit esie ọsọn̄ọ nnyịn idem, kpa odudu oro n̄kpọ mîkemeke ndibiọn̄ọ, emi enye akadade obot ekondo. Edieke ikpọtde, edisana spirit Abasi ayan̄wam nnyịn ‘ikop obufa nsọn̄idem.’ (Isa. 40:31) Bụp idemfo ete, ‘Ini ewe ekedi akpatre ini oro n̄kọbọn̄de akam mben̄e edisana spirit ndisọn̄ọ mi idem man n̄keme ndinam mme utom Christian mi?’—Luke 11:11-13.
3 Ke ini ikotde inyụn̄ itiede ikere Ikọ Abasi eke odudu spirit kpukpru usen, inyụn̄ idiade mme udia eke spirit ebe ke ndikpep mme n̄wed Christian kpukpru ini, nnyịn iyetie nte “eto eke ẹtọde ke mben akpa mmọn̄, eke osion̄ode mfri esie ke ekem ini; ikọn̄ esie [mînyụn̄] iken̄eke.”—Ps. 1:2, 3.
4 Jehovah esida ekemmọ mme andinịm ke akpanikọ, oro ẹkemede ndikabade ndi “mme andin̄wam emi ẹsọn̄ọde” nnyịn idem, ọnọ nnyịn odudu. (Col. 4:10, 11) Mmọ ẹsisọn̄ọ nnyịn idem ke mme mbono esop ebe ke mme nneme, ibọrọ, ye utịn̄ikọ mmọ. (Utom 15:32) Mbiowo Christian akpan akpan ẹsinọ mme un̄wam eke spirit ye mme ikọ nsịnudọn̄ oro ẹnọde odudu.—Isa. 32:1, 2.
5 An̄wautom: Edieke akpade mba, kûtre ndikwọrọ ikọ! Ke mîbietke ediwak utom eken, ndibuana ke an̄wautom kpukpru ini eyenen̄ede ọsọn̄ọ nnyịn idem. (Matt. 11:28-30) Ndikwọrọ eti mbụk an̄wam nnyịn ndiwụk ntịn̄enyịn ke Obio Ubọn̄ Abasi nnyụn̄ n̄kere mban̄a nsinsi ini iso ye edidiọn̄ oro enye edidade edi.
6 Ediwak n̄kpọ ẹdu ndinam mbemiso ẹsobode idiọk editịm n̄kpọ emi. Nnyịn imenen̄ede inyene ntak ndisọn̄ọ nda ke utom nnyịn, ‘iberide edem ke ukeme emi Abasi ọnọde.’ (1 Pet. 4:11) Ke un̄wam Jehovah, nnyịn iyokụre utom nnyịn sia edide “enye ọnọ mbon mba odudu.”—Isa. 40:29.