‘Ndida Ikọ Mbuọtidem Mbọk Idem Nnyịn’
1 Oyom ọkpọsọn̄ ukeme man idu uwem uten̄e Abasi. (1 Tim. 4:7-10) Nnyịn iyọsọp ndikpa mba inyụn̄ iduọn̄ọ edieke idomode ndidu utọ uwem oro ke odudu idem nnyịn. (Isa. 40:29-31) Usụn̄ kiet oro nnyịn ikemede ndibọ odudu nto Jehovah edi ‘ndida ikọ mbuọtidem mbọk idem nnyịn.’—1 Tim. 4:6.
2 Akpakịp Udia eke Spirit: Jehovah ọnọ akpakịp udia eke spirit ebe ke Ikọ esie ye “ofụn emi anamde akpanikọ onyụn̄ enyenede ọniọn̄.” (Matt. 24:45) Ndi nnyịn ke inam udeme nnyịn man idia udia emi? Ndi imesikot Bible kpukpru usen? Ndi imesisio ini inịm inọ ọkpọkpọ ukpepn̄kpọ ye editie n̄kere? (Ps. 1:2, 3) Utọ eti udia eke spirit oro ọsọn̄ọ nnyịn idem onyụn̄ ekpeme nnyịn ọbiọn̄ọ odudu ererimbot Satan oro ẹkemede ndinam idem emem nnyịn. (1 John 5:19) Edieke nnyịn idade nti n̄kpọ ibọk ekikere nnyịn, inyụn̄ idade mmọ isịn ke edinam ke uwem nnyịn, Jehovah oyodu ye nnyịn.—Phil. 4:8, 9.
3 Jehovah n̄ko esida mme mbono esop ọsọn̄ọ nnyịn idem. (Heb. 10:24, 25) Item eke spirit ye inem inem ebuana oro isinyenede ke mbono emi ẹsisọn̄ọ nnyịn idem ndiyọ mme idomo. (1 Pet. 5:9, 10) Uyen Christian kiet ọkọdọhọ ete: “Ami nsika ufọkn̄wed kpukpru usen, ndien enye anam idem emem mi. Edi mme mbono esop ẹtie nte ebiet ubọhọ ke desat, emi anamde mfiak n̄kop nsọn̄idem ndiyọ ke ufọkn̄wed ke usen efen.” Ẹdiọn̄ nnyịn didie ntem ke mme ukeme oro isịnde ndidụk mme mbono esop!
4 Ndikwọrọ Akpanikọ: Ndikwọrọ ikọ nnọ mbon en̄wen eketie nte udia ọnọ Jesus. Ukwọrọikọ ama esinọ enye odudu. (John 4:32-34) Kpasụk ntre, nnyịn imesifiak ikop odudu ke ini itịn̄de mme utịbe utịbe un̄wọn̄ọ Abasi inọ mbon en̄wen. N̄ko, ndisịn idem ke utom ukwọrọikọ esinam esịt ye ekikere nnyịn ẹwụhọ ke Obio Ubọn̄ ye mme edidiọn̄ emi ẹdinyenede ke mîbịghike. Enye ke akpanikọ esinọ nnyịn nduọkodudu.—Matt. 11:28-30.
5 Nso ifet ke inyene ntem ndida akpakịp udia eke spirit oro Jehovah ọnọde ikọt esie mfịn mbọk idem nnyịn! Nnyịn ikpakam ika iso ndikwọ ke idatesịt, idade itoro isọk enye!—Isa. 65:13, 14.