Leta N̄kọk Itieutom

Ndima Mme Asuanetop Obio Ubọn̄:

Nnyịn imadat esịt ndikụt n̄kọri oro ẹkenamde ke efakutom n̄kọk itieutom Nigeria ke isua utom 2007! Ima inyene inem inem ifiọkutom ke an̄wautom. N̄ko, ẹma ẹbọp obufa Ọfis nnyịn ke Lagos ẹkụre. Itieutom emi ayanam n̄kọk itieutom nnyịn etịm ese aban̄a ediwak n̄kpọ. Ke ẹdiọn̄ akani Ọfis Lagos man ẹda ẹnịm Ufọkn̄wed Unọ Mme Asan̄autom Ukpep. Imenịm ke ufọkn̄wed oro ọyọtọn̄ọ ke ntọn̄ọ ntọn̄ọ isua 2008.

Ke ofụri efakutom n̄kọk itieutom Nigeria, ẹma ẹsuan Mbụk Obio Ubọn̄ Nọ. 37 emi ẹkekotde “Utịt Nsunsu Ido Ukpono Emekpere!” ẹbe miliọn ition. Eyenete an̄wan kiet oro mîkesiwọrọke an̄wautom aba ikekemeke ndide idap ke ama okokot n̄wed emi. Ke Sunday oro eketienede, enye ama odụk mbono esop onyụn̄ ọdọhọ ke imoyom ẹkpep imọ Bible. Mbon oro ẹnyenede udọn̄ ẹma ẹda ekebe oro odude ke edem Mbụk Obio Ubọn̄ emi ẹyom ediwak ediye uduot ekpri n̄wed Ẹdu ke Ukpeme! ẹnyụn̄ ẹdọhọ ẹdikpep mmimọ Bible.

Ẹsinam mme utọ ubịnikọt emi man ẹn̄wam mbon oro ẹnyenede esịt akpanikọ ẹfiọk se Bible enen̄erede ekpep. (Matt. 28:19, 20) Ke ini ẹkwọrọde ikọ, ẹti ndiwet udọn̄ ekededi oro ẹkụtde nnịm, ẹnyụn̄ ẹfiak ẹka man ẹketọn̄ọ ukpepn̄kpọ Bible. Nnyịn imenem esịt ndidiana ye mbufo nnam akpan utom emi, imonyụn̄ inọ mbufo ufiop ufiop ekọm Christian nnyịn.

Nditọete mbufo,

N̄kọk Itieutom Nigeria