Branch Letter

Ndima Mme Asuanetop Obio Ubọn̄:

Ke ẹnam akwa utom man ẹsuan eti mbụk ke Nigeria. Ke isua utom emi ekebede, ke un̄wam mbonutom ẹtode idụt itiaba, ẹma ẹwụk ukwak umịn̄n̄wed rotary. Ukwak umịn̄n̄wed rotary oro ẹkewụkde anam nnyịn ikeme ndisụhọde ibat mbonutom oro ẹyomde man ẹmịn̄ mme magazine. N̄ko, Otu Ukara ọnọ unyịme ete imịn̄ ndiye uduot n̄kpri n̄wed ye tract oro ẹyomde ke Nigeria sia nnyịn ikemede ndinam ntre idahaemi.

Isenowo ẹsidi ọkwọkudịm man ẹdise ukwak umịn̄n̄wed rotary emi. N̄kpọ kiet oro ukwak umịn̄n̄wed emi enyenede emi ediwak isenowo ẹmade edi ikpehe oro ẹkotde Quantum Pollution Control emi etrede edisabade ofụm. Ke ama akasan̄a ese ukwak umịn̄n̄wed emi ama, owo kiet ama obụp ete: “Ẹda utọ okụk emi ke m̀mọ̀n̄?” Ekem enye ama ọdọhọ ẹwụt imọ ekebe etịbe, onyụn̄ esịn okụk. N̄ko, enye ama ọdọhọ ke imọ iyesitịp okụk awak akan nte imọ ikesitịpde man ẹda ẹn̄wam ke utom ofụri ererimbot.

Nnyịn imesịn uyo ikot mbufo ite ẹdi ẹdise nte ẹdade mme etịbe oro mbufo ẹsinọde ẹnam n̄kpọ ke eti usụn̄ ke ndimịn̄ mme magazine ye ndiye uduot n̄kpri n̄wed man ikama ikwọrọ eti mbụk. Nnyịn imenịm ite ke mbufo ẹyema se ẹdikụtde!

Ndutịm otu ubọp Ufọkmbono Obio Ubọn̄ okụt ekese unen. Toto nte ẹketọn̄ọ ndutịm emi ke isua ition emi ẹkebede, ẹbọp se ibede Ufọkmbono Obio Ubọn̄ tọsịn kiet. Emi ada akwa itoro ọsọk enyịn̄ Jehovah nte ikọ prọfesọ ibọkusọbọ kiet emi okokụtde nte ẹbọpde Ufọkmbono Obio Ubọn̄ ke Ekiti State owụtde. Enye ọkọdọhọ ete: “Owo ndibọp ufọk emi ke utọ ekpri ini ntem owụt eti ndutịm ye edidianakiet. Emi owụt orụk ufọk emi ẹbọpde nte itie utuakibuot, onyụn̄ owụt orụk mbon emi ẹsituakde ibuot ke esịt ye eti ndutịm emi mmọ ẹnyenede.”

Kpukpru ifịk ifịk utom emi ẹnamde mi man ẹtat mme ufọn n̄kpọ Obio Ubọn̄ ẹdot itoro! Imọkọm mbufo etieti ke okụk oro mbufo ẹsitịpde ke ntatubọk man ẹda ẹnam utom emi. (N̄ke 3:9, 10) Jehovah akpakam aka iso ọdiọn̄ ukeme oro kpukpru nnyịn isịnde ‘nditoro ubọn̄ esie.’—Eph. 1:12.

Nditọete mbufo,

Ọfis N̄kọk Itieutom Nigeria