Ndikwọrọ Ikọ Ọsọn̄ọ Itie Ebuana Nnyịn ye Abasi
1. Nso ufọn ke utom ukwọrọikọ anam ọnọ nnyịn?
1 Ndibuana ifịk ifịk ke utom ukwọrọikọ ekeme ndisọn̄ọ itie ebuana nnyịn ye Abasi onyụn̄ anam inen̄ede ikop inemesịt. Nte ededi, akpan ntak oro ibuanade ke utom ukwọrọikọ edi man inem Jehovah esịt. Jehovah ọdiọn̄ nnyịn ke ‘ndikwọrọ ikọ’ nte ẹkewụkde nnyịn, nnyịn imonyụn̄ ibọ ufọn n̄ko ke mme usụn̄ en̄wen. (2 Tim. 4:2; Isa. 48:17, 18) Didie ke ukwọrọikọ akam ekeme ndisọn̄ọ nnyịn idem nnyụn̄ nnam nnyịn ikop inemesịt?
2. Didie ke utom ukwọrọikọ ọsọn̄ọ nnyịn idem?
2 Ọsọn̄ọ Nnyịn Idem Onyụn̄ Ada Edidiọn̄ Edi: Ukwọrọikọ esisịn udọn̄ ọnọ nnyịn ndiwụk ntịn̄enyịn ke mme edidiọn̄ Obio Ubọn̄ utu ke mme afanikọn̄ idahaemi. (2 Cor. 4:18) Ndinam se Bible ekpepde an̄wan̄a esisọn̄ọ mbuọtidem nnyịn ke mme un̄wọn̄ọ Jehovah onyụn̄ anam inen̄ede ima akpanikọ. (Isa. 65:13, 14) Nte nnyịn in̄wamde mbon en̄wen ẹsan̄a ẹkpere Jehovah man ‘ẹkûdi ubak ererimbot,’ ntre ke isọn̄ọ ubiere nnyịn nditre ndidi ubak ererimbot.—John 17:14, 16; Rome 12:2.
3. Didie ke utom ukwọrọikọ an̄wam nnyịn idọdiọn̄ inyene mme edu Christian?
3 Ndibuana ke an̄wautom an̄wam nnyịn idọdiọn̄ inyene mme edu Christian. Ke uwụtn̄kpọ, ndidomo ‘ndikabade ndi kpukpru n̄kpọ nnọ kpukpru orụk owo’ an̄wam nnyịn inen̄ede isụhọde idem. (1 Cor. 9:19-23) Nte nnyịn inyenede nneme ye mbon oro ‘ẹfiomode ẹnyụn̄ ẹsuande nte erọn̄ eke mînyeneke andikpeme,’ emi esinam nnyịn ikpep ndiwụt mbọm ye edikere mban̄a. (Matt. 9:36) Nnyịn imesikpep ime nte ikade iso iyọ kpa ye unana udọn̄ ye ubiọn̄ọ. Nnyịn imesinen̄ede ikop idatesịt ke ndida uwem nnyịn n̄n̄wam mbon en̄wen.—Utom 20:35.
4. Afo ada utom ukwọrọikọ fo didie?
4 Nso edidiọn̄ ke edi ntem ndibuana ke utom oro otorode n̄kukụre Owo emi odotde ndibọ utuakibuot nnyịn! Utom ukwọrọikọ ọsọn̄ọ nnyịn idem. Enye ada akpakịp edidiọn̄ ọsọk mbon oro ẹnyenede ọyọhọ ebuana ke “ndinọ ọyọhọ ikọ ntiense mban̄a eti mbụk.”—Utom 20:24.