Ukwọrọikọ An̄wam Nnyịn Ndime Ime
1 Ikọ Abasi eteme nnyịn ete “ifehe mbuba eke ẹnịmde nnyịn ke iso ye ime.” (Heb. 12:1) Kpa nte oyomde efehe itọk enyene ime man akan ke mbuba, ntre ke oyom nnyịn inyene ime man ibọ utịp nsinsi uwem. (Heb. 10:36) Didie ke utom ukwọrọikọ Christian ekeme ndin̄wam nnyịn ndiyọ tutu esịm utịt?—Matt. 24:13.
2 Ẹsọn̄ọ Nnyịn Idem ke N̄kan̄ eke Spirit: Nnyịn nditan̄a utịbe utịbe un̄wọn̄ọ Bible aban̄ade edinen obufa ererimbot esinam idotenyịn nnyịn ayama. (1 Thess. 5:8) Ke ini nnyịn ibuanade kpukpru ini ke utom ukwọrọikọ, nnyịn imesinyene ifet ndinam ẹfiọk akpanikọ emi ikekpepde ke Bible. Nnyịn imenyene ifet nditịn̄ mban̄a se nnyịn inịmde ke akpanikọ, ndien emi esisọn̄ọ nnyịn idem ke n̄kan̄ eke spirit.
3 Man ikeme ndikpep mbon efen n̄kpọ nte ọfọnde, ana nnyịn ke idem nnyịn itịm ifiọk akpanikọ Bible. Ana inam ndụn̄ọde inyụn̄ itie ikere se ikpepde. Ukeme ofụri esịt oro isịnde esinam ifiọk nnyịn otụn̄ọ, ọsọn̄ọ mbuọtidem nnyịn, onyụn̄ anam nnyịn ifiak ikop nsọn̄idem ke n̄kan̄ eke spirit. (N̄ke 2:3-5) Ntem, nte nnyịn idomode ndin̄wam mbon en̄wen, nnyịn ke isọn̄ọ idem nnyịn n̄ko.—1 Tim. 4:15, 16.
4 Ndibuana ke utom ukwọrọikọ ifịk ifịk edi ubak “ofụri n̄kpọekọn̄ Abasi,” emi edin̄wamde nnyịn ndisọn̄ọ nda n̄n̄wana ye Devil ye mme demon. (Eph. 6:10-13, 15) Nnyịn ndisịn ifịk ke utom Abasi an̄wam nnyịn ndiwụk ntịn̄enyịn ke mme n̄kpọ emi ẹbọpde-bọp inyụn̄ iyakke ererimbot Satan asabade ekikere nnyịn. (Col. 3:2) Nte nnyịn ikpepde mbon efen usụn̄ Jehovah, emi esiti nnyịn nte oyomde nnyịn ika iso inyene nti ido uwem.—1 Pet. 2:12.
5 Abasi Ọnọ Nnyịn Odudu: Ke akpatre, nnyịn ndibuana ke utom ukwọrọikọ ekpep nnyịn ndiberi edem ke Jehovah. (2 Cor. 4:1, 7) Nso edidiọn̄ ke emi edi ntem! Nnyịn ndikọri utọ mbuọtidem oro etịm nnyịn idem ndinam utom nnyịn mma nnyụn̄ nyọ idaha ekededi oro ikposobode ke uwem. (Phil. 4:11-13) Ke akpanikọ, ndikpep ndiberi edem ọyọhọ ọyọhọ ke Jehovah an̄wam nnyịn ndime ime. (Ps. 55:22) Utom ukwọrọikọ an̄wam nnyịn ndime ime ke ediwak usụn̄.