Mbono Circuit Ndinam Ikpeme Nsọn̄idem Eke Spirit Nnyịn
1. Siak n̄kpọ kiet oro Jehovah ọnọde man an̄wam nnyịn isuan eti mbụk oro enye ọkọdọn̄de nnyịn?
1 Jehovah esitat ubọk ọnọ nnyịn item, ukpep, ye nsịnudọn̄ oro iyomde man ikeme ndisuan eti mbụk oro enye ọkọdọn̄de nnyịn. (Matt. 24:14; 2 Tim. 4:17) Mbono circuit oro isinyenede kpukpru isua edi kiet ke otu n̄kpọ emi. Obufa ndutịm eke 2010 ayatat ibuotikọ emi “Kpeme Nsọn̄idem Eke Spirit Fo,” ndien ẹda enye eto Rome 8:5 ye Jude 17-19. Ndutịm mbono emi editọn̄ọ ke January 2, 2010.
2. (a) Didie ke idibọ ufọn ito mbono circuit? (b) Didie ke mme mbono circuit oro ẹkebede ẹken̄wam fi ke utom ukwọrọikọ fo?
2 Ufọn Mbono Circuit: Ndutịm mbono emi ayanam idiọn̄ọ mme n̄kpọ oro ẹkemede ndisịn nnyịn ke fehesan̄, utọ nte mme n̄kpọ oro ẹkemede ndida ini nnyịn nnyụn̄ n̄n̄wọn̄ọde ntịn̄enyịn nnyịn n̄kpọn̄ mme n̄kpọ emi ẹdide akpan n̄kpọ. Iyekpep nte ikemede ndibiọn̄ọ ẹdu nnam-se-mmade, inyụn̄ ineme se ẹdade ẹdiọn̄ọ owo emi enyenede spirit Abasi. Utịn̄ikọ ikpehe ita oro ẹdinọde ke Sunday oyowụt nte owo kiet kiet ye nte ubon ẹkemede ndikpeme nsọn̄idem eke spirit mmọ ke ini ẹsobode mfịna ye mme idomo mbuọtidem. Ndutịm emi ayanam ikpeme esịt nnyịn, ika iso ise iban̄a nsọn̄idem eke spirit nnyịn, inyụn̄ iti akpakịp edidiọn̄ oro anade ebet mbon oro ẹkpemede nsọn̄idem eke spirit mmọ.
3. Ini ewe ke edinyene mbono circuit, ndien nso ke ekpebiere ndinam?
3 Ndondo oro okopde ini ye ebiet oro ẹdinịmde mbono circuit mbufo, tọn̄ọ ndinam ndutịm man odu do onyụn̄ akpan̄ utọn̄ ke se ẹdinemede ke kpukpru ikpehe ke usen iba oro. Fiọk ete ke Jehovah esidiọn̄ owo emi ‘esịnde ifịk’ m̀mê etịn̄de enyịn anam ndutịm.—N̄ke 21:5, NW.
4. Nso ufọn ke idinyene ke mbono circuit oro edide mi?
4 Ke akpanikọ, Jehovah edi Andinọ eti enọ emi. Ndutịm oro otu ofụn emi anamde akpanikọ anamde mi akam edi se iyomde man ika iso inam n̄kpọ nte mme Christian asan̄autom. Imọkọm Jehovah ke kpukpru nti ndutịm oro enye anamde ọnọ nnyịn man ikeme ‘ndisọn̄ọ ntan̄a idotenyịn nnyịn an̄wan̄wa, ikûyok.’—Heb. 10:23-25; Jas. 1:17.