Sịn Ifịk ke ‘Ndinọ Ọyọhọ Ikọ Ntiense’
1, 2. Nso ke afo ama ke nte Paul ekesede edikwọrọ eti mbụk, ndien didie ke nnyịn ikeme ndikpebe uwụtn̄kpọ esie ke ‘ndinọ ọyọhọ ikọ ntiense’?
1 Ukem nte Jesus ye ediwak mme anam-akpanikọ asan̄autom eset, apostle Paul ekedi ifịk ifịk ọkwọrọ eti mbụk, ‘ọnọde ọyọhọ ikọ ntiense’ inamke n̄kpọ m̀mê idaha eketie didie. Idem ke adan̄aemi okodude ke n̄kọbintem, enye ama “adara ndikụt kpukpru mmọ eke ẹkade ẹkese enye; enye ọkwọrọ Ubọn̄ Abasi, onyụn̄ ekpep mme owo aban̄a Ọbọn̄ Jesus Christ an̄wa-an̄wa.”—Utom 28:16-31.
2 Nnyịn n̄ko imekeme ndisịn ifịk ke ‘ndinọ ọyọhọ ikọ ntiense’ kpukpru ini. Oro esịne ndinọ mme owo oro nnyịn isobode ke ini ikade isan̄, ikọ ntiense.—Utom 28:23; Ps. 145:10-13.
3. Didie ke nnyịn ikeme ndifep ndinam ikọ ntiense ido nneme nnyịn akabade edi mbabuat ikọ ntiense?
3 Mbabuat Ikọ Ntiense m̀mê eke Ido Nneme? Nte ukpụhọde odu? Ih, odu. N̄kpọ oro edide mbabuat esitịbe ke unana idotenyịn m̀mê ye unana edibem iso ntie n̄kere, nte n̄kpọ eke owo mîketịmke idem m̀mê se mîdịghe akpan n̄kpọ. Ke akpanikọ, oro itịn̄ke iban̄a utom ukwọrọikọ nnyịn. Nte ekedide ye Paul, ndida unọ ikọ ntiense nnyịn nnọ Abasi ubọn̄ edi akpan n̄kpọ ọnọ nnyịn, ndien ekpedi uduak nnyịn ndinọ ikọ ntiense ke ebiet ekededi oro odotde ke ini nnyịn ikade isan̄. Nte ededi, ẹkeme nditịn̄ mban̄a usụn̄ oro nnyịn ikade ibịne mbon en̄wen nte enende ẹte ke edi ido nneme—oro edi, ke usụn̄ oro etiede ifụre ifụre, ufan ufan, ye ke ndammana usụn̄. Usụn̄ edisobo emi ekeme ndinyene nti utịp.
4. Nso ikanam Paul ekeme ndinọ ikọ ntiense ke ebiet emi enye akadan̄de?
4 Tịm Idem Ndinọ Ikọ Ntiense: Paul ekenyene ndiyom mme ifet ndinọ ikọ ntiense ke adan̄aemi okodude ke n̄kọbintem ke Rome. Ke itie emi enye akadan̄de, enye ama anam usio-ukot ndikot mme adaiso mme Jew n̄kann̄kụk ẹdi ufọk esie. (Utom 28:17) Idem okposụkedi esop Christian okodude ke Rome, Paul ama ọfiọk ete ke mme Jew ke obio oro ikenyeneke nnennen ifiọk oro ekemde iban̄a Ido Ukpono Christ. (Utom 28:22; Rome 1:7) Enye iketreke ‘ndinọ ọyọhọ ikọ ntiense’ mban̄a Jesus Christ ye Obio Ubọn̄ Abasi.
5, 6. Mme ifet ewe ke nnyịn ikeme ndinọ ikọ ntiense ido nneme, ndien nso ntịmidem ke nnyịn ikeme ndinam man inam oro uforo uforo?
5 Kere ban̄a adan̄a ediwak owo oro afo ekemede ndisobo ke ini akade isan̄, emi ẹnyenede esisịt ifiọk ẹban̄a Mme Ntiense Jehovah. Ekeme ndidi mmọ ikam ifiọkke ke nnyịn imesinịm mme ukpepn̄kpọ Bible mfọn. Sọp ndikụt mme ifet ndikwọrọ ikọ nnọ mbon oro afo osobode ke adan̄aemi akade isan̄, ọduọkde odudu, esịnde aran ke ubomisọn̄, edepde n̄kpọ, adan̄de ke ufọkisen, adiade udia ke itie unyamudia, asan̄ade ke n̄kpọisan̄ ofụri owo, ye ntre ntre eken. Bem iso biere se afo editịn̄de man ọtọn̄ọ nneme onyụn̄ ọnọ ibio ibio ikọ ntiense. Eyedi ke ini iso, afo emekeme ndikpep ndinọ mme mbọhọidụn̄, mme iman, mme nsan̄autom fo, ye mme ọdiọn̄ọ eken ikọ ntiense ido nneme.
6 Oyoyom afo akama ediwak n̄wed ke ini ọnọde ikọ ntiense ido nneme. Mme n̄wed ewe? Afo emekeme ndikama tract Nte Afo Akpama Ndifiọk N̄kpọ Efen Efen Mban̄a Bible? Neme akpa ikpehe ekikere ition, emi ẹnọde nsio nsio ntak oro anade ẹkot Bible. Wụt ekebe oro odude ke edem ndida nyom ukpepn̄kpọ Bible mfọn. Ke ini afo okụtde owo oro enyenede udọn̄, nọ ediye uduot ekpri n̄wed Oyom. Ke odoride enyịn ndisobo mme owo oro ẹsemde usem efen, men ekpri n̄wed Good News for All Nations, kama. Page 2 anam an̄wan̄a nte ẹkpedade enye ẹnọ ikọ ntiense. Edieke asan̄ade ke ubomisọn̄, afo emekeme ndikama ibat ibat akpan n̄wed efen ke ntak mbon oro ẹnyenede ata udọn̄ ke etop Obio Ubọn̄.
7, 8. Nso item aban̄ade ukamaidem ye edu uwem nnyịn ke adan̄aemi ikade isan̄ ye ke ini nduọkodudu ke nnyịn ikpada isịn ke edinam?
7 Kere Ban̄a Ukamaidem ye Edu Uwem Fo: Ana nnyịn ikụt ite ke edu uwem nnyịn ọkọrọ ye ọfọn̄ ye ukamaidem nnyịn idinọhọ mbon en̄wen idiọk ekikere m̀mê ndinam mmọ “ẹtịn̄ n̄kpọ ẹbiat” esop Jehovah. (Utom 28:22) Emi ibuanake ini oro ikade isan̄ kpọt, edi abuana ini nduọkodudu n̄ko. Enyọn̄-Ukpeme, August 1, 2002, page 18, ikpehe ekikere 14, eteme ete: “Ukamaidem nnyịn ikpetiehe n̄wụtidem n̄wụtidem, uwouwo uwouwo, ikpedemekede udọn̄ idan̄, ikposion̄oke owo ndido idem, m̀mê nditie n̄kon̄ine n̄kon̄ine. Ke adianade do, nnyịn ikpesịne n̄kpọ ke usụn̄ oro owụtde ‘uten̄e Abasi.’ Nte emi inọhọ nnyịn n̄kpọ ndikere? Emi iwọrọke n̄kukụre ndisịne n̄kpọ nte odotde ke ini idụkde mme mbono esop ndien ekem isịne n̄kpọ nte imama ke mme ini eken. Kpukpru ini ukamaidem nnyịn ekpenyene ndiwụt edu uten̄e ye ukpono koro nnyịn idi mme Christian ye mme asan̄autom kpukpru ini.”—1 Tim. 2:9, 10.
8 Nnyịn ikpenyene ndisịne n̄kpọ oro owụtde iso bụt onyụn̄ enyenede uku. Edieke ukamaidem ye edu uwem nnyịn kpukpru ini ẹwụtde mbuọtidem nnyịn ke Abasi, tutu amama nnyịn idimen̄eke ndinọ ikọ ntiense ido nneme koro nnyịn ikamade idem nte mîdotke.—1 Pet. 3:15.
9. Nso unen ke ndinọ ikọ ntiense ke Paul okokụt ke Rome?
9 Ikọ Ntiense Ido Nneme Esin̄wụm Mfri: Ke isua iba oro Paul okodude ke n̄kọbintem ke Rome, enye ama enyene nti utịp ke ukeme oro enye ekesịnde ndinọ ikọ ntiense. Luke ama ọtọt ete ke ‘ndusụk owo ẹma ẹnịm ikọ emi enye eketịn̄de ke akpanikọ.’ (Utom 28:24) Paul ke idemesie ama owụt nte ‘ọyọhọ ikọ ntiense’ oro enye ọkọnọde okokụtde unen ke ini enye ekewetde ete: “Se iketịbede inọ mi akam akabade anam gospel asuana; oto do kpukpru mbon-ekọn̄ ke nna-ekọn̄ ọbọn̄ ye kpukpru mmọ eken ẹnen̄ede ẹkụt ẹte, ẹma ẹkọbi mi kaban̄a Christ; n̄kpọkọbi mi onyụn̄ anam ediwak nditọ-ete ke Ọbọn̄ ẹsọn̄ọ esịt ẹkaha ẹtịn̄ ikọ Abasi ye uko, ẹnana ndịk.”—Phil. 1:12-14.
10. Nso unen ke ebe ye n̄wan ẹkekụt isua oko ke ndinọ ikọ ntiense?
10 Isua oko, ke ẹma ẹkenyọn̄ mbono district ẹdi usen kiet, ebe ye n̄wan ẹma ẹnyene inem inem ifiọkutom ke ndinọ anyamudia emi edide n̄wan emi okobụpde mmọ aban̄a kad idiọn̄ọ mbono mmọ, ikọ ntiense ido nneme. Mmọ ẹma ẹsian enye ẹban̄a mbono oro ye idotenyịn oro Bible akamade ọnọ ini iso ubonowo. Mmọ ẹma ẹnọ enye tract oro Nte Afo Akpama Ndifiọk N̄kpọ Efen Efen Mban̄a Bible? ẹnyụn̄ ẹnam ndutịm ukpepn̄kpọ Bible mfọn an̄wan̄a. N̄wan oro ama ọdọhọ ke imọ imoyom owo esidi edise imọ, ewet enyịn̄ ye adres esie ke edem tract oro, onyụn̄ ọdọhọ ebe ye n̄wan oro ẹnam ndutịm. Nso unen ke afo ekeme ndikụt ke ndisịn ifịk ke ‘ndinọ ọyọhọ ikọ ntiense’?
11. Mme edu ewe ke nnyịn ikpọkọri man isuan eti mbụk ebe ke ‘ndinọ ọyọhọ ikọ ntiense’?
11 Suan Eti Mbụk Ọyọhọ Ọyọhọ: Kere nte Paul ekenemde esịt ke ini enye okokopde ete ke ekemmọ mme Christian ẹma ẹkpebe uwụtn̄kpọ ifịk imọ! Nnyịn ikpakam inam kpukpru se ikekeme man isuan eti mbụk ebe ke ndida kpukpru ifet nnọ ikọ ntiense ido nneme mban̄a edinịm ke akpanikọ nnyịn oro ọkọn̄ọde ke Bible.
[Ekebe ke page 4]
Mme N̄wed Oro Ẹyomde ke Unọ Ikọ Ntiense Ido Nneme
■ Nte Afo Akpama Ndifiọk N̄kpọ Efen Efen Mban̄a Bible? (tract)
■ Nso ke Abasi Oyom Oto Nnyịn? (ediye uduot ekpri n̄wed)
■ Good News for All Nations (ekpri n̄wed)
■ Mme akpan n̄wed eken