Ini Editi—Ini Ndinam Ekese ke An̄wautom!
1. Mme ntak ewe ẹkpenam nnyịn ikere ndinam ekese ke ọfiọn̄ March, April, ye May?
1 Ndi emekeme ndinam ekese ke an̄wautom ke ini Editi oro osụk edide mi? Ke ediwak ebiet, eyo eyeye idinyụn̄ isọpke ndikụt. Ndusụk mme asuanetop ẹyebọ nduọkodudu ke itieutom m̀mê ke ufọkn̄wed, oro mmọ ẹdikemede ndida nnam utom ke an̄wautom. Ọtọn̄ọde ke April 2, iyenyene san̄asan̄a ubịnikọt ndida n̄kot mbon oro ẹnyenede udọn̄ ẹditiene nnyịn ẹdụk Editi ke April 17. Ke oro ebede, iyodomo ndinam n̄kpọ mban̄a udọn̄ mbon oro ẹkedụkde Editi inyụn̄ ikot mmọ ẹdidụk akpan utịn̄ikọ an̄wa oro ẹdinọde ke urua April 25. Ke akpanikọ, ediwak ntak ẹdu emi ẹkpenamde nnyịn ikere ndinam ekese ke ọfiọn̄ March, April, ye May.
2. Nso idi ata eti usụn̄ kiet oro ikpanamde ekese ke utom ukwọrọikọ nnyịn?
2 Usiakusụn̄ Unọ Un̄wam: Ata eti usụn̄ kiet ndinam ekese edi ndinam utom usiakusụn̄ unọ un̄wam. Sia kpukpru nnyịn inyenede ekese ndinam, oyom ibabak inam ndutịm inyụn̄ inam mme ukpụhọde ke ndutịm nnyịn. (N̄ke 21:5) Emekeme ndisịk ndusụk n̄kpọ oro afo esinamde, emi mîdịghe akpan n̄kpọ, enịm kan̄a. (Phil. 1:9-11) Ntak mûnamke mbon en̄wen ke esop ẹfiọk ke afo akpama ndinam utom usiakusụn̄ unọ un̄wam man ese m̀mê mmọ ẹkeme nditiene fi nnam?
3. Didie ke mme ubon ẹkpenam ndutịm man ẹnam ekese?
3 Ke ini mbubreyo Utuakibuot Ubon mbufo efen, ọkpọfọn ẹneme mme utịtmbuba mbufo nte ubon. (N̄ke 15:22) Edieke ubon adianade kiet ke afan̄ emi, ndusụk owo ke ubon ẹkeme ndinam utom usiakusụn̄ unọ un̄wam ke ọfiọn̄ kiet m̀mê awakde akan oro. Nso edieke mbufo mîkemeke ndinam emi? Ubon ẹkeme ndisụk nnam ndutịm man ẹnam ekese ebe ke ndiwọrọ an̄wautom ke ndusụk mbubreyo m̀mê ke ndibịghi ke an̄wautom ke mme utịturua.
4. Mme edidiọn̄ ewe ke idinyene ke ini inamde ekese ke an̄wautom ke ini Editi emi?
4 Jehovah esikụt kpukpru se inamde ke utom esie onyụn̄ ama mme n̄waidem oro inamde. (Heb. 6:10) Imesikop idatesịt ke ini inọde Jehovah ye mbon en̄wen enọ. (1 Chron. 29:9; Utom 20:35) Ndi emekeme ndinam ekese ke ini Editi emi onyụn̄ enyene ekese idatesịt ye edidiọn̄ oro ẹditode afo ndinam emi?