Nam Ini Editi Emi Edi Ini Inemesịt!
1. Nso n̄kpọ kiet idinam esịt enen̄ede enem nnyịn ke ini Editi emi?
1 Ndi ayama ndinen̄ede n̄kop inemesịt ke March, April, ye May? Usụn̄ kiet ndinam emi edi ndisịn ifịk ke utom ukwọrọikọ, ndien edieke ekemede, anam utom usiakusụn̄ unọ un̄wam. Didie ke emi edinam esịt enen̄ede enem fi?
2. Didie ke nnyịn nditat utom ukwọrọikọ nnyịn edinam itetịm ikop inemesịt?
2 Nam Esịt Enen̄ede Enem Fi: Jehovah okobot nnyịn man inyene inemesịt inyụn̄ ikop uyụhọ ke ndituak ibuot nnọ enye nnyụn̄ nyụhọ ndammana udọn̄ oro inyenede ndituak ibuot nnọ enye. (Matt.5:3) Enye okobot nnyịn ke usụn̄ oro anamde nnyịn ikeme ndikop inemesịt ke ini inọde mbon en̄wen n̄kpọ. (Utom 20:35) Utom ukwọrọikọ an̄wam nnyịn inam mbiba emi—ituak ibuot inọ Abasi inyụn̄ in̄wam mbon en̄wen. Emi ọwọrọ ke nte nnyịn isịnde ifịk inam n̄kpọ Abasi kpa ntre ke iditetịm ikop inemesịt. N̄ko, adan̄a nte ikwọrọde ikọ, kpa ntre ke iditetịm inyene usọ. Adan̄a nte inyenede usọ, ntre ke idinyene uko, idem idinyụn̄ inyekke nnyịn. Nnyịn iyenyene ekese ifet ndikwọrọ ikọ nnyụn̄ ntọn̄ọ ukpepn̄kpọ Bible. Kpukpru emi ẹsinam utom ukwọrọikọ enem nnyịn.
3. Ntak emi ọfiọn̄ March ye April ẹdifọnde ndinam utom usiakusụn̄ unọ un̄wam?
3 March ye April ẹdidi san̄asan̄a ọfiọn̄ ndinam utom usiakusụn̄ unọ un̄wam. Ke ọfiọn̄ mbiba emi nnyịn imekeme ndimek m̀mê idinọ hour 30 m̀mê 50. Akan oro, ọtọn̄ọde ke Saturday, March 22 esịm usen Editi ke Monday, April 14, nnyịn iyetiene ibuana ke ndikot mme owo ẹdidụk Editi. Idem edidaduai kpukpru owo ke esop koro ediwak owo ẹdinamde utom “ke esịt kiet” man ẹkụre efakutom mmọ ke ini oro ẹnọde.—Zeph. 3:9.
4. Nso ke ikpanam edieke iyomde ndinam utom usiakusụn̄ unọ un̄wam?
4 Tịm Idem Idahaemi: Da ini dụn̄ọde ndutịm fo man ese mme ukpụhọde oro akpanamde man atat utom ukwọrọikọ fo ọfiọn̄ kiet m̀mê akande oro. Sịn n̄kpo emi ke akam. (Jas. 1:5) Neme n̄ko ye ubon fo ye mbon en̄wen ke esop. (N̄ke 15:22) Ndien afo oyokụt ke kpa ye oro idem mîsọn̄ke fi m̀mê oro esinamde utom ofụri ini, oyosụk ekeme ndikop inemesịt ndinam utom usiakusụn̄ unọ un̄wam.
5. Nso iditịbe edieke itatde utom ukwọrọikọ nnyịn ini Editi emi?
5 Jehovah oyom mme asan̄autom esie ẹkop inemesịt. (Ps. 32:11) Edieke isịnde ifịk itat utom ukwọrọikọ nnyịn ke ini Editi emi, nnyịn iyokop inemesịt inyụn̄ inam esịt enem Ete nnyịn eke heaven.—N̄ke 23:24; 27:11.