Kûmen̄e Ndinọ Ikọ Ntiense
1. Oyom uko man ẹnam nso, ndien ntak?
1 Ndi akanam ememen̄e ndinọ ikọ ntiense ke ufọkn̄wed ke ntak emi ekefehede ndịk ke ẹmọn̄ ẹsak fi? Oyom enyene uko man ekeme ndinọ ikọ ntiense, akpan akpan edieke afo edide owo o-bụt. Nso idin̄wam fi?
2. Didie ke ẹkeme ndida eti ibuot nnam n̄kpọ ke ini ẹnọde ikọ ntiense ke ufọkn̄wed?
2 Da Eti Ibuot Nam N̄kpọ: Okposụkedi emi afo ekemede ndida ufọkn̄wed nte ọkpọkpọ efakutom fo, ti ete ke iyomke ọtọn̄ọ nneme Ikọ Abasi ye kpukpru owo nte emi afo akpanamde ke ini ọkwọrọde ikọ ke ufọk ke ufọk. Da eti ibuot biere ini emi ekpetịn̄de ikọ. (Eccl. 3:1, 7) Nneme ubet ukpepn̄kpọ m̀mê utom ufọkn̄wed ekeme ndinam fi enyene ifet nditịn̄ se afo enịmde ke akpanikọ. Mîdịghe eyen ufọkn̄wed mbufo ekeme ndibụp fi ntak emi afo mûtieneke ubuana ke ndusụk edinam. Ndusụk nditọete ẹsisian mme andikpep mmọ ke ntọn̄ọ ntọn̄ọ isua ufọkn̄wed ke mmimọ idi Mme Ntiense Jehovah ẹnyụn̄ ẹnọ mmọ n̄wed oro anamde se nnyịn inịmde ke akpanikọ an̄wan̄a. Mbon en̄wen ẹsidori n̄wed ke enyọn̄ okpokoro mmọ man nditọ ufọkn̄wed mmọ ẹbụp mbụme.
3. Didie ke afo ekpetịm idem man ọnọ ikọ ntiense ke ufọkn̄wed?
3 Tịm Idem: Edieke etịmde idem, eyenen̄ede enyene uko. (1 Pet. 3:15) Domo ndikere mban̄a mme mbụme oro ẹkemede ndibụp fi, nyụn̄ kere nte ọkpọbọrọde. (N̄ke 15:28) Edieke ekemede, nịm Bible fo ye ibat ibat n̄wed ke ufọkn̄wed, utọ nte n̄wed Reasoning, n̄wed N̄kparawa Owo Ẹbụp, ọkọrọ ye n̄wed oro etịn̄de n̄kpọ aban̄a edibotn̄kpọ, man ekeme ndida mmọ nnam n̄kpọ ke ini oyomde. Dọhọ ete ye eka fo ẹsịn ini oro ẹkpenamde nnamn̄wụt ẹban̄a emi ke ini utuakibuot ubon mbufo.
4. Ntak emi afo akpakade iso ndinọ ikọ ntiense ke ufọkn̄wed?
4 Nyene In̄wan̄-In̄wan̄ Ekikere: Kûkere ke nditọ ufọkn̄wed mbufo ẹyesak fi kpukpru ini emi afo etịn̄de n̄kpọ aban̄a akpanikọ. Etie nte ndusụk mmọ ẹyema fi ke ntak uko fo ẹnyụn̄ ẹkam ẹkeme ndikpan̄ utọn̄. Edi kûyak idem emem fi edieke owo ndomokiet mîkpan̄ke utọn̄. Jehovah eyenem esịt ke ukeme oro afo esịnde ndinọ ikọ ntiense. (Heb. 13:15, 16) Ka iso ben̄e enye an̄wam fi ‘aka iso etịn̄ ikọ uko uko.’ (Utom 4:29; 2 Tim. 1:7, 8) Kere nte esịt edinemde fi ke ini owo akpan̄de utọn̄ ọnọ fi. Nte ini akade, owo oro akam ekeme ndidi ekemmọ asan̄autom Jehovah!