Mme Uyen—Ẹda Ubọ Ukpep Mbufo Ẹnam N̄kpọ Nte Ọfọnde
1 Etie mbufo didie ke idem ndifiak nnyọn̄ ufọkn̄wed ke anyan ini nduọkodudu ebede? Nte ọdọn̄ mbufo ndibọ ufọn nto isua ubọ ukpep efen? Nte mbufo ẹyeda mme ifet oro ufọkn̄wed ọnọde mbufo ẹnam n̄kpọ nte ọfọnde ndibuana akpanikọ ye mme nsan̄a ubet ukpepn̄kpọ ye mme andikpep mbufo? Nnyịn imenịm ke akpanikọ ite ke mbufo ẹyom ndisịn ofụri ukeme mbufo ke ufọkn̄wed.
2 Di Eti Eyen Ufọkn̄wed: Edieke afo etịmde idem mfọn mfọn ke ini afo ọbọde mme ukpep fo onyụn̄ etịmde ọnọ n̄kpan̄utọn̄, afo ọyọbọ mme ufọn ẹmi ẹbịghide. Sịn ifịk se ban̄a mme utom oro ẹnọde fi anam ke ufọk, edi kûyak utom ufọkn̄wed fo ọbiọn̄ọ mme utom ukara Abasi.—Phil. 1:10.
3 Tọn̄ọ obufa isua ufọkn̄wed ye edikot ediye uduot ekpri n̄wed oro Mme Ntiense Jehovah ye Ubọ Ukpep. Ekem, afo m̀mê ete ye eka fo ẹkpenyene ndiyak idem kiet nnọ mme andikpep mbufo kiet kiet. Yak mmọ ẹdiọn̄ọ nte ke ẹyebọrọ mbụme ekededi oro mmọ ẹkemede ndinyene. Emi ayan̄wam mmọ ndidiọn̄ọ mme edumbet ye mme edinịm ke akpanikọ fo ọfọn akan nnyụn̄ ndiana ye afo nte afo adade se ẹkekpepde fi esịn ke edinam. Emi n̄ko ayanam mme andikpep fo ẹnịm ke akpanikọ nte ke afo ye ete ye eka fo ẹmeyom ndidiana kiet ye mmimọ nte mmọ ẹn̄wamde fi ndibọ eti ukpep.
4 Di Eti Ntiense: Ntak mûdaha ufọkn̄wed nte ọkpọkpọ efakutom fo ndinọ ikọ ntiense ido nneme? Ke isua ufọkn̄wed oro edide, afo eyenyene mme n̄wọrọnda ifet ndinọ ikọ ntiense. Afo emenyene utịbe utịbe ifiọk eke spirit oro edide, ke abuanade, ekeme ‘ndinyan̄a fi ye mmọ ẹmi ẹkopde uyo fo.’ (1 Tim. 4:16) Ebede ke ndimụm edu uwem Christian oro odotde ẹkpebe n̄kama nnyụn̄ nnọ ikọ ntiense ke ini ekededi oro odotde ndinam ntre, afo ọyọnọ idemfo ye mbon efen ufọn.
5 Ekpri eyenete eren kiet ama ọnọ ekemmọ nditọ ufọkn̄wed ikọ ntiense ke ido nneme ke ufọkn̄wed. Ke otu mbon oro ẹkenyenede udọn̄ ẹkedi owo Catholic, owo oro mînịmke edidu Abasi ke akpanikọ emi ekesisakde mbon oro ẹnịmde Abasi ke akpanikọ nsahi, ye uyen kiet emi ekedide ata ọn̄wọn̄ sika ye ọkpọsọn̄ ọn̄wọn̄ mmịn. Ke ofụri ofụri, ekpri eyenete eren emi ama an̄wam owo 15 ke otu ubọkn̄ka esie ndisịm uyakidem ye baptism!
6 Ntre mme uyen, ẹsịn idem ke ubọ ukpep ye ke ndinam utom ke n̄wọrọnda efakutom unọ ikọ ntiense mbufo. Do mbufo ẹyedara n̄kponn̄kan ufọn otode edika ufọkn̄wed.