‘Nọ Ọyọhọ Ikọ Ntiense’
1. Eti uwụtn̄kpọ ewe ke apostle Paul ekenịm ke utom ukwọrọikọ?
1 “Nam utom fo ọyọhọ ọyọhọ.” (2 Tim. 4:5) Apostle Paul ọkọnọ Timothy item emi koro enye ke idemesie ama ananam se enye eketemede emi. Ke akpanikọ, ọtọn̄ọde ke isua 47 esịm 56 E.N., Paul ama okokụre isan̄ isụn̄utom esie ọyọhọ ita. N̄wed Utom etịn̄ ediwak ini nte Paul ọkọnọde “ọyọhọ ikọ ntiense.” (Utom 23:11; 28:23) Didie ke ikeme ndinam ntre mfịn?
2. Didie ke ikeme ndinọ ọyọhọ ikọ ntiense ke ini ikwọrọde ikọ ke ufọk ke ufọk?
2 Ke Ufọk ke Ufọk: Man ikeme ndisobo mme enyeneufọk oro akananam mîkopke eti mbụk, ekeme ndiyom nnyịn ika ibịne mmọ ke ata isio isio ini. Ekeme ndidi ibuot ufọk edidu ke ufọk ke mbubreyo m̀mê ke utịturua. Nnyịn ikpenyene ndidomo ndikwọrọ ikọ nnọ owo ke kpukpru ufọk, ikade ndien ndien ibịne mbon oro mîkodụhe ke ufọk. Nso ke akpanam edieke esịnde ukeme ndisobo ye mme owo edi mmọ idụhe ke ufọk? Ekeme ndidi ndiwet mmọ leta m̀mê ndikot mmọ ke telefon ayanam ikeme ndinyene nneme ye mmọ.
3. Mme ifet ewe ke afo enyene ndinọ ikọ ntiense an̄wan̄wa ye ke ido nneme?
3 An̄wan̄wa ye ke Ido Nneme: Mme asan̄autom Jehovah mfịn ẹkwọrọ “ata ọniọn̄” ẹnọ kpukpru mbon oro ẹyomde ndikop. Ndusụk ini, mmọ ẹsinam emi “ke efak” m̀mê “ke an̄wa obio.” (N̄ke 1:20, 21) Ke ini isede iban̄a mme edinam nnyịn eke usen ke usen, nte imesinyene ke ekikere ke iyọnọ mme owo ikọ ntiense? Ndi ẹkeme ndidọhọ ke nnyịn ‘imesisịn idem ọkpọsọn̄ ọkpọsọn̄ ke ukwọrọikọ’? (Utom 18:5) Edieke ibọrọ nnyịn idide ‘Ih,’ ọwọrọ ke nnyịn ke inam utom nnyịn, oro edi, ‘ndinọ ọyọhọ ikọ ntiense.’—Utom 10:42; 17:17; 20:20, 21, 24.
4. Didie ke akam ye editie n̄kere ẹkeme ndinam nnyịn inọ ọyọhọ ikọ ntiense?
4 Ndusụk ini, nnyịn imesitre ndikwọrọ ikọ ke ntak mmeme oro inyenede m̀mê ke ntak o-bụt. Ke akpanikọ, Jehovah ọfiọk mmeme nnyịn. (Ps. 103:14) Edi edieke utọ ifet oro ebererede, imekeme ndibọn̄ akam nnọ enye ite ọnọ nnyịn uko man ikeme ndikwọrọ ikọ. (Utom 4:29, 31) N̄ko, ke ini inamde ukpepn̄kpọ idem nnyịn, inyụn̄ itiede ikere Ikọ Abasi, imekeme ndinọ ntịn̄enyịn ke nte ikpowụtde esịtekọm iban̄a akakan ufọn oro eti mbụk enyenede. (Phil. 3:8) Ndien emi ayanam itan̄a enye inọ mme owo uko uko!
5. Didie ke nnyịn ikeme nditiene nnam ntịn̄nnịm ikọ Joel osu?
5 Ntịn̄nnịm ikọ Joel ọkọdọhọ ke mbemiso akwa ye enyene-ndịk usen Jehovah edide, ikọt Abasi ‘ẹyesan̄a’ ẹka iso, idinyụn̄ iyakke n̄kpọ ndomokiet anam mmọ ẹtre ndikwọrọ ikọ. (Joel 2:2, 7-9) Nnyịn ikpakam isịn idem inam utom ukwọrọikọ oro owo mîdifiakke inam aba mi!