Da Mme Prọfet nte Uwụtn̄kpọ—Joel
1. Didie ke ikeme ndiwụt ke imosụhọde idem nte Joel ke ini ikwọrọde ikọ?
1 Prọfet Joel ekedi anie? N̄kukụre n̄kpọ oro enye etịn̄de aban̄a idemesie edi nte ke imọ idi “eyen Pethuel.” (Joel 1:1) Prọfet emi okosụhọrede idem mi akada ke etop Jehovah akakam edi akpan n̄kpọ, idịghe imọ emi idide isụn̄utom. Kpasụk ntre, ke ini ikwọrọde ikọ, akpana inam mme owo ẹkere ẹban̄a Jehovah ye se Bible ẹtịn̄de, utu ke ndiyom ẹtoro nnyịn m̀mê ẹda nnyịn nte mme ọfiọk n̄kpọ owo. (1 Cor. 9:16; 2 Cor. 3:5) Ke adianade do, etop emi itan̄ade esisọn̄ọ nnyịn idem. Mme ntịn̄nnịm ikọ Joel ewe ikeme ndinam nnyịn isịn ifịk itan̄a eti mbụk inyụn̄ inyene idotenyịn mfịn?
2. Nte usen Jehovah ekperede akpanam nnyịn inam nso?
2 “Usen Jehovah Emekpere” (Joel 1:15): Okposụkedi emi ẹkewetde mme ikọ emi ke ediwak tọsịn isua emi ẹkebede, nnyịn idu uwem ke akpatre ini emi mmọ ẹsude. Nte n̄kpọ akade-ka iso ọdiọk ke ererimbot, nte mme owo mînyeneke udọn̄ ke eti mbụk, ye nte ẹsisakde nnyịn ke ini ikwọrọde ikọ ke efakutom nnyịn ẹnen̄ede ẹwụt ke idu uwem ke mme akpatre usen idiọk editịm n̄kpọ emi. (2 Tim. 3:1-5; 2 Pet. 3:3, 4) Ke ini ikerede nte utịt enen̄erede ekpere, imenyene ntak ndinam utom ukwọrọikọ edi akpa n̄kpọ ke uwem nnyịn.—2 Pet. 3:11, 12.
3. Ntak emi utom ukwọrọikọ edide ata akpan n̄kpọ nte akwa ukụt etịmde ekpere?
3 “Jehovah Eyedi Ebiet Ubọhọ Ọnọ Ikọt Esie” (Joel 3:16): Nnyen̄e emi ẹtịn̄de ẹban̄a ke ufan̄ikọ emi ada aban̄a ubiereikpe oro Jehovah ọnọde ke akwa ukụt kpọt. Ẹnem nnyịn ndifiọk ke Jehovah ayanyan̄a mme asan̄autom esie emi ẹnamde akpanikọ, ini oro. (Edi. 7:9, 14) Nte nnyịn ikwọrọde ikọ inyụn̄ ikụtde nte Jehovah ẹsede aban̄a nnyịn onyụn̄ ọsọn̄ọde nnyịn idem, nnyịn itetịm iyọ inyụn̄ ibuọt idem ndien mme n̄kpọ emi ẹyen̄wam nnyịn ke ini akwa ukụt emi edide.
4. Ntak emi ikpokopde idatesịt inyụn̄ ikopke ndịk iban̄a ini iso?
4 Okposụkedi emi ndusụk owo ẹdọhọde ke etop Joel edi etop mfụhọ, etop emi anam ikọt Abasi ẹnyene idotenyịn edinyan̄a. (Joel 2:32) Mmọdo, ẹyak nnyịn ikûkop ndịk iban̄a ini iso edi ẹyak isịn ifịk itan̄a eti mbụk Obio Ubọn̄ ke adan̄aemi inamde se idude ke Joel 2:23: “Ẹdara ẹnyụn̄ ẹdat esịt ke Jehovah Abasi mbufo.”