Ndifori Usọ Nnyịn ke An̄wautom—Bem Iso Tọn̄ọ Nneme Man Ọnọ Ikọ Ntiense Ido Nneme

Ntak Emi Edide Akpan N̄kpọ: Nnyịn imesikụt ke ediwak owo isidụhe ke ufọk ke ini ikwọrọde ikọ ke ufọk ke ufọk. Edi imesisobo mmọ ke ini idụkde moto ika isan̄, itiede ibet ndikụt abiausọbọ, ke ini iduọkde odudu ke itieutom m̀mê ke ufọkn̄wed, ye ke mme itie eken. Jehovah oyom kpukpru owo ẹkop etop Obio Ubọn̄. (1 Tim. 2:3, 4) Esiyom nnyịn ibem iso itọn̄ọ nneme man ikeme ndinọ ikọ ntiense.

Nte Ikpanamde:

Sasat mbon oro akade ebịne. Ndi owo oro etie ufan ufan onyụn̄ enyịme ndineme nneme? Ndi nte n̄kpọ etiede ye enye anam enye ekeme ndinyene nneme ifụre ifụre? Ndusụk mme asuanetop ẹsibem iso ẹse owo oro mmọ ẹyomde ndinyene nneme ẹnyụn̄ ẹtuak inua imam. Edieke owo oro atuakde inua imam n̄ko, mmọ ẹsidomo nditọn̄ọ nneme.
Bọn̄ ibio ibio akam ke esịt fo edieke mûnyeneke uko nditọn̄ọ nneme.—Neh. 2:4; Utom 4:29.
Tọn̄ọ ke nditịn̄ ibio ibio ikọ, emi ekeme ndidi ekọm. Jesus ikọtọn̄ọke nneme ye n̄wan Samaria ke nditịn̄ nnennen nnennen mban̄a Obio Ubọn̄. (John 4:7) Ndusụk ini imekeme nditọn̄ọ nneme ke nditoro owo. Imekeme ndidọhọ: “Nditọ fo ẹnyene ido.” Ndibụp mbụme edi usụn̄ en̄wen oro ikemede nditọn̄ọ nneme: “Ndi ama okụt se ẹkewụtde ke TV mbubreyo n̄kpọn̄?”
Yom ifet nditịn̄ n̄kpọ mban̄a eti mbụk ke ama ọkọtọn̄ọ nneme, edi kûnam itọk itọk. Yak nneme oro aka iso sụn̄sụn̄. Emekeme nditịn̄ n̄kpọ oro edinamde enye oyom ndikpan̄ utọn̄ mîdịghe etịn̄ n̄kpọ oro edinamde enye obụp mbụme. Ke uwụtn̄kpọ, edieke enemede n̄kpọ aban̄a ubon, afo emekeme ndidọhọ ete: “Mmokụt nti usụn̄ oro ẹkpebọkde nditọ.” Edieke enemede n̄kpọ aban̄a se okokopde ke mbụk n̄kpọntịbe, emekeme ndidọhọ ete: “Mmokot n̄kpọ mban̄a eti mbụk oro edinamde ererimbot emi ọfọn.” Kûyak idem emem fi edieke mûkemeke ndinọ ikọ ntiense ke ini ẹsụk ẹnemede nneme.
Kama tract m̀mê n̄wed oro ekemede ndinọ owo oro enyenede udọn̄.

Nam Emi Ọfiọn̄ Emi:

Kpukpru urua, domo ndisitọn̄ọ nneme mbemiso ọnọde ikọ ntiense ido nneme.