Kpebe Jehovah ye Jesus —Sịn Ifịk Kwọrọ Ikọ ke Ini Editi Emi
1. Nso ke Mme Ntiense Jehovah ẹsisịn ifịk ẹnam ke ini Editi?
1 Jehovah esisịn ifịk anam n̄kpọ man osu se enye aduakde. Ke ini Isaiah eketịn̄de aban̄a se Obio Ubọn̄ Abasi edinamde, enye ama ewet ke Isaiah 9:7 ete: “Ifịk Jehovah mme udịm edinam emi.” Ukem ntre, ke ini Eyen Abasi ọkọkwọrọde ikọ ke isọn̄, enye ama enen̄ede esịn ifịk anam mme owo ẹdiọn̄ọ se Jehovah amade. (John 2:13-17; 4:34) Kpukpru isua ke ini Editi, ediwak miliọn mme asuanetop ẹsisịn ifịk ẹnam n̄kpọ ukem nte Jehovah ye Jesus, ẹkwọrọ ikọ ẹkan nte ẹsikwọrọde. Ndi eyetiene anam ntre?
2. Nso ke nnyịn idisịn ifịk inam ọtọn̄ọde ke March 7?
2 Kot Mme Owo Ẹdidụk Editi: Ke Saturday, March 7 isua emi, ke iditọn̄ọ ndikot mme owo Editi. Tọn̄ọ idahaemi kere se edinamde man ekeme nditiene nsịn ifịk n̄kwọrọ ikọ. Esịt ẹyenen̄ede ẹnem nditọete edieke mmọ ẹnọde kpukpru owo ikot ke efakutom mmọ. Domo ndinọ kpukpru owo n̄wedikot—nọ mbon itieutom mbufo, mbonubon mbufo, nditọ ufọkn̄wed mbufo, mbon emi esikpepde Bible, ye mbon emi edifiakde ika ikese. Emekeme n̄ko ndida n̄wedikot eke jw.org n̄kot mmọ.
3. Didie ke ikeme ndisịn ifịk n̄kwọrọ ikọ ke March ye April?
3 Nam Utom Usiakusụn̄ Unọ Un̄wam: Edieke isịnde ifịk, iyọkwọrọ ikọ ikan nte isikwọrọde. Imenịm ke ediwak owo ẹyenam utom usiakusụn̄ unọ un̄wam ke March ye April, sia imekeme ndimek ndikwọrọ hour 30. Ke ini utuakibuot ubon mbufo, ẹneme nte kpukpru mbufo ẹdinamde emi. Emekeme ndinam emi n̄ko ke ini ekpepde n̄kpọ ke idemfo. (N̄ke 15:22) Edieke afo ebierede ndisiak usụn̄ ke ini Editi emi onyụn̄ etịn̄de ọnọ mme owo ke esop mbufo, emi ekeme ndinam mmọ ẹtiene ẹnam ntre. Edieke anamde n̄kpọ man esịn ifịk ọkwọrọ ikọ, emi ediwụt ke ekpebe Jesus.—Mark 6:31-34.
4. Nso iditịbe edieke ikpebede ifịk emi Jehovah ye Jesus ẹsisịnde ẹnam n̄kpọ?
4 Iyenen̄ede ibọ ufọn ke ini Editi emi edieke ikpebede ifịk emi Jehovah ye Jesus ẹsisịnde ẹnam n̄kpọ. Ata ediwak owo ke efakutom nnyịn ẹyekop ukwọrọikọ. Nnyịn iyokop ata inemesịt emi esisan̄ade ye ndinam n̄kpọ Jehovah nnyụn̄ nnọ mme owo se inyenede. (Utom 20:35) Ndien ata akpan n̄kpọ edi ke iyanam Jehovah ye Eyen esie ẹnem esịt.