Se Ẹtide Owo Ẹban̄a Akamba Mbono
Ini Ẹditọn̄ọde ye Ini Ẹdisuanade: Ke usen mbita emi, mbono editọn̄ọ ke n̄kanika ebede 8 usenubọk ke minit 20. Kpukpru nnyịn ikpenyene nditie ke itie nnyịn mbemiso ini emi man mbono ọtọn̄ọ ediye ediye. Ke Friday ye Saturday, mbono edisuana ke ayakde minit ition ndimia inan̄ mbubreyo; ndien ke Sunday, ke ayakde minit efịt ndimia ita.
‘Kwọ Ikwọ Toro Jehovah’: Ikọt Abasi ke eset ẹma ẹsikwọ ikwọ ẹtoro Abasi, ndien tutu mfịn nnyịn isitreke ndikwọ ikwọ ntoro Jehovah ke mme mbono nnyịn. (Ps. 28:7) Kpukpru usen, mbemiso ẹtọn̄ọde mbono usenubọk ye eke uwemeyo, ẹsibre ikwọ ẹnọ nnyịn. Ikwọ emi itiehe nte ikwọ emi ẹsibrede ke ndusụk itie edinam mbemiso ẹtọn̄ọde edinam; ẹsibre ikwọ emi man anam nnyịn inen̄ede iben̄e idem ndikpep n̄kpọ mban̄a Jehovah ye nte ikpanamde n̄kpọ esie. Ntem ke ini etieibuot okpokoro ọdọhọde ke ẹmọn̄ ẹtọn̄ọ ndibre ikwọ emi, mbọk sụhọde tie nen̄ede kpan̄ utọn̄ kop ndinem ikwọ oro, utu ke ndineme nneme. Emi oyowụt ke imenen̄ede ima ukeme oro nditọete nnyịn iren ye iban ẹsisịnde man ẹbre ikwọ emi ẹnọ nnyịn. Nditọete emi ẹsida okụk idemmọ ẹkpe usụn̄ ẹto nsio nsio itie ke ofụri ererimbot ẹka Patterson ke New York, ikaba ke isua, man ẹkebre ẹnyụn̄ ẹkwọ ndinem ikwọ ẹnọ nnyịn. Ke ima ikakpan̄ utọn̄ ikop ikwọ emi ima, ọfọn kpukpru nnyịn idian uyo ikwọ ikwọ n̄wed ikwọ nnyịn itoro Jehovah.
Itie Ubon N̄kpọisan̄: Mme adaidaha ẹyewụt mme owo itie ndibon n̄kpọisan̄. Ubon emi ẹnyenede moto iba m̀mê ita ikpenyeneke ndida kpukpru ndi sia itie unịm moto inen̄ekede ikpon. Ndusụk owo ẹnyụn̄ ẹkeme ndinịm moto mmọ ntiene mbon en̄wen nsan̄a. Mbọk ẹtiene ndausụn̄ mbon oro ẹsede ẹban̄a nte ẹbonde n̄kpọisan̄.—1 Cor. 13:4, 5.
Edimụm Itie Nnịm: Mbọk ẹkûnyanyan̄a itie, ẹkere ẹban̄a mbon en̄wen, ẹnyụn̄ ẹnyịme ndikpọn̄ itie nnọ mmọ edieke oyomde inam ntre. Edieke inamde emi, isenowo emi ẹdide mbono ẹyekụt ke idi ata mme Christian, emi oyonyụn̄ anam mmọ ẹtoro Jehovah. (John 13:34, 35; 1 Cor. 13:5; 1 Pet. 2:12) Imekeme ndimụm itie nnịm nnọ mbon oro ẹdụn̄de ye nnyịn, mbon oro ẹsan̄ade ye nnyịn ke n̄kpọisan̄ nnyịn, m̀mê mbon oro nnyịn isụk ikpepde mmọ Bible. Mbọk ẹkûdori n̄kpọ ke itie emi mbufo mîditiehe, sia emi ẹkeme ndinam mme owo ẹkere ke owo enyene itie oro. Ẹnịm san̄asan̄a itie ẹnọ n̄kani owo ye mbon n̄kpọnnam. Sia itie emi ẹnịmde mi mîkponke, owo kiet m̀mê iba oro ẹsede ẹban̄a n̄kani owo emi kpọt ẹkpetiene mmọ ẹtie.
Sịne Ọfọn̄ Ọfọn Nyụn̄ Kama Idem Ọfọn: Ana nnyịn isịne ọfọn̄ ọfọn, utu ke ndisịne nte mbon ererimbot ẹsisịnede. (1 Tim. 2:9) Nnyịn n̄ko ikpenyeneke ndisịne n̄kpọ nsuahade nsuahade ke ini idụkde m̀mê iwọrọde ke ufọkisen, mbemiso mbono ọtọn̄ọde ye ke mbono ama akasuana. Emi ayanam enem nnyịn ndidian kad idiọn̄ọ mbono nnyịn, bụt idinyụn̄ inamke nnyịn ndikwọrọ ikọ ke ini anade inam ntre. Edieke isịnede n̄kpọ ọfọn inyụn̄ idude uwem ọfọn ke ini idụkde mbono, emi ayanam mbon oro ẹnyenede eti esịt ẹkop etop Bible emi edinyan̄ade mmọ, oyonyụn̄ anam esịt enem Jehovah.—Zeph. 3:17.
Kûyak Fon M̀mê N̄kpọ Usio Ndise Fo Afịna Mme Owo: Nnyịn idiwụt ke imokpono mme owo edieke nnyịn mîyakkke fon m̀mê tablet nnyịn afịna mmọ. Edieke ikamade fon, tablet, n̄kpọ usio ndise, m̀mê mme n̄kpọ ntre, ifọnke iyak mmọ ẹnam nnyịn ifụk mme owo m̀mê ẹnam uyom. Inyụn̄ ifọnke ida tablet m̀mê fon nnyịn inọ m̀mê ibọrọ etop emi mîban̄ake akpan n̄kpọ ke ini mbono osụk akade iso.
Udia Uwemeyo: Mbọk ẹda udia uwemeyo ẹdi utu ke ndikpọn̄ itie mbono man ẹkedep udia ke ini nduọkodudu. Ẹmekeme ndikama ekpri n̄kpọ udọn̄ udia emi ẹkemede ndinịm ke idak n̄kpọitie. Owo inyịmeke ẹmen ikpọ n̄kpọ udọn̄ udia ye mme ọtọ-akpa ẹdi efe mbono.
Enọ Imaesịt: Nnyịn imekeme ndiwụt esịtekọm mban̄a ndutịm oro ẹnamde ke mbono emi ke nditịp okụk ke imaesịt ke itie mbono man ẹda ẹnam utom Abasi ke ofụri ererimbot. Edieke oyomde ndinọ cheque, ekpenyene ndiwet “Watch Tower Society of Jehovah’s Witnesses” ke cheque oro. Emekeme n̄ko ndida kad ATM nnọ enọ imaesịt.
Ibọk: Edieke afo enyenede san̄asan̄a ibọk oro esidade, mbọk kụt ete ke amakama enye awak ekem koro owo idinyeneke utọ ibọk oro ke itie mbono. Ẹkpenyene ndiduọn̄ọ abiabon ye n̄kpọ ukịmibọk mbon oro ẹdọn̄ọde ikịm an̄wan n̄kụhọ ke ebiet oro ẹsiduọn̄ọde mme n̄kpọ oro ẹkemede ndinọ owo unan utu ke ndidọn̄ mmọ ke n̄kpọ udọn̄ mbio itie mbono ye eke itieidụn̄.
Ikpaukot: Mbọk kpeme mbak se anamde edinam fi m̀mê owo en̄wen ada unan emi enye mîkpadaha. Kpukpru isua, ikpaukot esinọ mme owo unan, akpan akpan n̄kokon̄ ikpaukot. Ntre ọkpọfọn esịne ikpaukot oro ọfọnde ye fo, emi ediyakde fi asan̄a ifụre ifụre mbak udûda unan.
Ukpatn̄kpọ Nseknditọ ye Mme Akpakaha: Owo ikpenyeneke ndida ukpatn̄kpọ nseknditọ ye akpakaha ndi itie mbono. Edi ẹkeme ndida n̄kpọitie nseknditọ oro ẹkemede ndinịm n̄kpere ete ye eka mmọ ndi.
Perfume: Iyowụt ke imama mme owo edieke iduọkde esisịt perfume m̀mê itrede ndiduọk enye emi ọsọn̄de utebe mbak edifịna mbon oro ẹnyenede utọ udọn̄ọ nte ikọn̄ obun̄wek.—1 Cor. 10:24.
Please Follow Up (S-43): Ẹkpenyene ndida babru Please Follow Up n̄wet n̄kpọ mban̄a owo ekededi emi amade ukwọrọikọ oro ikwọrọde inọ enye ke ini mbono. Ẹmekeme ndiyak babru oro ẹma ẹkewet n̄kpọ ẹyọhọ nnọ Itieutom Unọ N̄wed, mîdịghe ẹyak ẹnọ ewetn̄wed esop mbufo ke ẹma ẹkenyọn̄ọ mbono.
Itie Unyamudia ye Mme Anyam N̄kpọ: Nam n̄kpọ emi ẹdinọde Jehovah ubọn̄ ke itie unyamudia. Sịne n̄kpọ nte asan̄autom Abasi. Ẹmekeme ndinọ mbon emi ẹnamde utom ke itie unyamudia ekpri okụk edieke ẹsinamde ntre ke edem mbufo.
Ufọkidụn̄ M̀mê Ufọkisen:
Mbọk ẹkûbọ ubet awak akan se mbufo ẹyomde, ẹkûnyụn̄ ẹdụn̄ ke ubet ẹwak ẹkan ibat oro ẹdọhọde ẹdụn̄.
Kûdọhọ ke uyomke aba ubet ufọkisen oro ẹkenịmde ẹnọ fi, ibọhọke n̄kpọ etịbe; nyụn̄ sọsọp nam mbon ufọkisen ẹdiọn̄ọ man mmọ ẹnọ mbon oro ẹyomde ufọkidụn̄ ubet oro. (Matt. 5:37) Ekeme ndidi owo idikpọn̄ke okụk oro ekekpede inọ fi edieke ini oro ọdọhọde ke uyomke ubet oro aba mîyọhọke usen iba.
Men ukpatn̄kpọ umen mbiomo ke ufọkisen ke ini eben̄ede idem nditan̄ mbiomo fo, nyụn̄ men kenịm ndondo oro okụrede man mbon en̄wen ẹkpekụt ẹmen.
Tem udia ke ebiet oro ẹdọhọde ẹtem.
Kûmen mme n̄kpọ oro ẹnịmde ẹnọ mme andidụn̄ ufọkisen utọ nte, uyo, swid, tea m̀mê mmịn, ukan nte akpanade emen.
Ẹnam n̄kpọ ọfọn̄ kpukpru ini ye mbon oro ẹnamde utom ke ufọkisen ye mbon Itieutom Unọ Ufọkidụn̄. Mmọ ẹse ẹban̄a ata ediwak isenowo, ntre mmọ ẹyema edieke ifọnde ido, inyene ime, inyụn̄ inamde n̄kpọ ye eti ibuot.
Mme ete ye eka ẹkpenyene ndikpeme nditọ mmọ kpukpru ini ke ufọkisen, ke dọmitri, m̀mê ke itie ekededi.
Ẹkûdụn̄ ke mme dọmitri edieke Itieutom Unọ Ufọkidụn̄ mîdọhọke mbufo ẹdụn̄, sia oro ekeme ndinam mme owo ẹwak ẹkaha ke ubet kiet. Ẹdụn̄ ke ebiet oro ẹnọde mbufo. Irenowo ikpenyeneke ndidu tutu eyo ọsọn̄ m̀mê ndina ke ufọkidụn̄ oro ẹnọde iban; iban ikponyụn̄ inamke ntre ke ufọkidụn̄ oro ẹnọde irenowo.
Edieke mfịna odude ke ebiet oro odụn̄de, sọsọp dọhọ Itieutom Unọ Ufọkidụn̄ ke ini osụk odude ke itie mbono man mmọ ẹn̄wam fi.
Utom Imaesịt: Owo ekededi oro akpamade ndin̄wam ke utom ke itie mbono ekpenyene ndika itie Utom Imaesịt. Nditọwọn̄ oro mîyọhọke kan̄a isua 16 ẹkeme ndinam utom ye ete m̀mê eka m̀mê owo oro esede aban̄a mmọ. Mmọ ẹkeme n̄ko ndinam utom ye akwa owo emi ete m̀mê eka m̀mê owo oro esede aban̄a mmọ enyịmede.