Ntak Emi Abasi Mîsibọrọke Kpukpru Akam?
Esinenem Ete nnyịn eke heaven, Jehovah Abasi, ndikop akam emi ibọn̄de ke ofụri esịt inọ enye. Edi enyene ndusụk n̄kpọ emi ẹkemede ndinam enye okûbọrọ akam nnyịn. Nte nso? N̄ko, nso ke ikpeti ke ini ibọn̄de akam? Kop ndusụk se Bible etịn̄de mi.
“Ke ini ọbọn̄de akam, kûyịre nditịn̄ mfiak ntịn̄ n̄kpọ kiet.”—Matthew 6:7.
Jehovah iyomke imomụm akam idọn̄ ke ibuot m̀mê ikokot akam ke n̄wed inọ enye. Utu ke oro, enye oyom isitịn̄ se isịnede nnyịn ke esịt ke ini ibọn̄de akam. Kere ise, ndi akpama ufan fo esitịn̄ ukem n̄kpọ ọnọ fi kpukpru usen? Nti ufan ẹsitịn̄ se isịnede mmọ ke esịt ẹnọ kiet eken. Ke ini ibọn̄de akam ke ikọ idem nnyịn inọ Ete nnyịn eke heaven, emi owụt ke ida enye nte Ufan nnyịn.
“Mbufo ẹmeben̄e, edi ibọhọ, koro mbufo ẹben̄ede kaban̄a idiọk uduak.”—James 4:3.
Imọdiọn̄ọ ke Abasi idibọrọke akam nnyịn edieke iben̄ede enye n̄kpọ emi enye asuade m̀mê n̄kpọ emi enye mîyomke nnyịn inyene. Ke uwụtn̄kpọ, edieke owo ọdọhọde Abasi an̄wam imọ ikan ke mbre-mfọniso, Abasi idibọrọke utọ akam oro sia enye ọdọhọ nnyịn ikûdiọk itọn̄ ikûnyụn̄ unịm ke “abasi Mfọniso” odu. (Isaiah 65:11; Luke 12:15) Owo emi ekerede ke “abasi Mfọniso” ekeme ndin̄wam owo abian̄a idem! Edieke iyomde Abasi ọbọrọ akam nnyịn, ana ikụt ite ke se iben̄ede enye ekem ye se Bible ekpepde.
“Owo eke ọwọn̄ọrede utọn̄ man okûkop ibet—idem akam esie edi n̄kpọ mbubiam.”—Mme N̄ke 28:9.
Ke eyo nditọ Israel, Abasi ikọbọrọke akam mbon oro mîkenịmke ibet esie. (Isaiah 1:15, 16) Ntre ke onyụn̄ edi mfịn sia Abasi ikpụhọkede. (Malachi 3:6) Edieke iyomde Abasi ọbọrọ akam nnyịn, ana idu uwem nte enye ọdọhọde. Edi ndi enye oyosụk okop akam nnyịn edieke ikanamde n̄kpọ emi mîfọnke ke ini edem? Ekeme ndisụk n̄kop! Abasi eyefen ọnọ nnyịn edieke ikabarede esịt inyụn̄ inamde se ikekeme man inem enye esịt.—Utom 3:19.