SE AKPANAMDE MAN ETRE NDISUA OWO

1 | Kûsari owo

Se Bible Ọdọhọde:

“Abasi inamke asari, edi ke kpukpru idụt enye enyenyịme owo eke abakde enye onyụn̄ anamde edinen ido.”—UTOM 10:34, 35.

Se Itien̄wed Emi Ọwọrọde:

Jehovaha Abasi isisehe ebiet emi owo otode m̀mê nte enye etiede. Edi enye esise se owo ekerede ye se idọn̄de owo. Bible ọdọhọ n̄ko ete: “Owo ese se enye okụtde ke enyịn; edi Jehovah ese esịt.”—1 Samuel 16:7.

Se Akpanamde:

Kpa ye oro nnyịn mîkemeke ndidiọn̄ọ se isịnede owo ke esịt, imekeme ndima kpukpru owo nte Abasi amade. Kûsua owo ke ntak ebiet emi enye otode. Edieke ekerede ke emesisari owo ke ntak ebiet emi enye otode, bọn̄ akam dọhọ Jehovah an̄wam fi etre utọ n̄kpọ oro. (Psalm 139:23, 24) Edieke ọbọn̄de akam eben̄e Jehovah an̄wam fi etre asari, enye oyokop akam fo onyụn̄ an̄wam fi. —1 Peter 3:12.

a Bible ọdọhọ ke Abasi ekere Jehovah.—Psalm 83:18.

“Akanam ntiehe kiet ye mbakara . . . Idahaemi ndisịne ke ubon nditọ Abasi oro ẹdude ke ofụri ererimbot.”—TITUS

Se Iketịbede—TITUS

Ama Etre Ndisisua Owo

Titus ekedi owo n̄ka afai emi ẹkeyatde esịt ke ntak ibet emi ẹkenịmde ẹte mbubịt owo ẹkûdian idem ye mbakara. Enye ọdọhọ ete: “Ima isika ikọtọn̄ọ en̄wan ke mme ebiet emi owo mîkesiyakke mbubịt owo ẹdụk, utọ nte, ufọkisen ye itie un̄wọn̄ n̄kpọ.” Titus ọdọhọ ke ikesinam kpukpru emi ke ntak usua. Enye ọdọhọ n̄ko ete: “Edieke owo ekededi afan̄ade se ntịn̄de, edide eren m̀mê n̄wan, ami nsibem iso nsiak enye ufia.”

Titus ama ọtọn̄ọ ndikpụhọde ini enye ọtọn̄ọde ndikpep Bible ye Mme Ntiense Jehovah. Se enye okokotde ke Bible ama enen̄ede otụk enye. Enye ama enen̄ede ama se Abasi ọn̄wọn̄ọde ndinam ke obufa ererimbot emi ‘n̄kpa mîdidụhe aba, mfụhọ m̀mê ntuan̄a m̀mê ubiak mîdinyụn̄ idụhe aba.’—Ediyarade 21:3, 4.

Ke nsonso oro, ikememke inọ Titus nditre ndisua owo. Enye ọdọhọ ke ama enen̄ede ọsọn̄ imọ ndikpụhọde nte isikerede n̄kpọ ye nte isinamde n̄kpọ. Edi se enye okokotde ke Utom 10:34, 35, emi ọdọhọde ke Abasi isarike owo, ama enen̄ede an̄wam enye.

Nso iketịbe? Titus ọdọhọ ete: “Ke ini n̄kokụtde nte Mme Ntiense Jehovah ẹmade kiet eken, inamke n̄kpọ m̀mê owo edi mbakara m̀mê obubịt owo, mma nnịm ke ido ukpono mmọ edi nnennen ido ukpono. Idem mbemiso n̄kanade baptism nte kiet ke otu Mme Ntiense Jehovah, mbakara kiet ke esop nnyịn ama okot mi udia ke ufọk esie. Ama enen̄ede akpa mi idem! Akanam ntiehe kiet ye mbakara, man ẹketetịn̄ ẹban̄a nditiene mbakara ndia udia ke ufọk esie. Idahaemi ndisịne ke ubon nditọ Abasi oro ẹdude ke ofụri ererimbot.”