Se Akpanamde Man Ukwọrọikọ Enen̄ede Enem Fi

1. Esitie ndusụk owo didie ke idem ndikwọrọ ikọ nnọ owo? (Se ndise n̄ko.)

NNYỊN emi idide ikọt Jehovah isikwọrọ ikọ sia imade Ete nnyịn emi odude ke heaven, inyụn̄ iyomde ndin̄wam mme owo ẹdidiọn̄ọ enye. Ukwọrọikọ esinem ediwak mme asuanetop etieti, edi isinemke mbon eken ndusụk ini. Nso idi ntak? Ndusụk mmọ ẹdi ata mbon o-bụt, ẹnyụn̄ ẹkere ke mmimọ inen̄ekede idiọn̄ọ ndikpep mbon en̄wen n̄kpọ. Ndusụk mmọ, ndidaha n̄ka ufọk owo ke ini owo mîkotke mmọ esifafịna mmọ. Ndusụk ẹfehe mme enyeneufọk ndiyat esịt ye mmọ. Ndusụk toto ke ekpri ke ẹkekpep mmọ ndidi “mbabak ikọ.” Nditọete emi ẹnen̄ede ẹma Jehovah, edi esisọn̄ mmọ ndidaha mbịne owo emi mmọ mîdiọn̄ọke n̄kọkwọrọ eti mbụk nnọ. Kpa ye oro, mmọ ẹdiọn̄ọ ke utom ukwọrọikọ edi ata akpan utom, mmọ ẹsinyụn̄ ẹwak ndika ukwọrọikọ. Jehovah esinem esịt ye mmọ etieti!

2. Ekpedi ukwọrọikọ isinemke fi ndusụk ini, ntak emi mûkpayakke idem emem fi?

² Ndi mme n̄kpọ ntre ẹsinam ukwọrọikọ inemke fi ndusụk ini? Ekpedi ntre, kûyak idem emem fi. Mme n̄kpọ emi ẹnamde idem enyek fi do ẹkeme ndiwụt ke omosụhọde idem, uyomke ndisio idem etop, unyụn̄ uyomke ndinyene mfịna ye owo ndomokiet. Idụhe eke esiyomde mbon en̄wen ẹyat esịt ye enye, akpan akpan ekpedi enye ke odomo ndinam eti n̄kpọ nnọ mmọ. Ete fo emi odude ke heaven enen̄ede ọdiọn̄ọ nte etiede fi ke idem, onyụn̄ oyom ndin̄wam fi. (Isa. 41:13) Ke ibuotikọ emi, imọn̄ ineme n̄kpọ ition emi ẹkemede ndin̄wam fi ekpetie fi ntre ke idem, ye se akpanamde man ukwọrọikọ enem fi.

YAK IKỌ ABASI ỌSỌN̄Ọ FI IDEM

3. Nso ikan̄wam prọfet Jeremiah ọkwọrọ ikọ ọnọ mme owo?

³ Toto ke eset tutu emi, ikọt Abasi ẹkpenyene utom emi ọsọn̄de mmọ ndinam, se Abasi etịn̄de ẹsisọn̄ọ mmọ idem. Kop uwụtn̄kpọ prọfet Jeremiah. Ini Jehovah ọkọdọn̄de enye ọkọkwọrọ ikọ, Jeremiah ama emen̄e. Jeremiah ọkọdọhọ ete: “Ami mfiọkke nditịn̄ ikọ, koro ami ndi eyenọwọn̄.” (Jer. 1:6) Nso ikan̄wam enye enyene uko ọkọkwọrọ se ẹkedọn̄de enye? Se Abasi eketịn̄de akan̄wam. Jeremiah ọkọdọhọ ete: “Enye akabade etie nte ikan̄ eke esịnede mi ke ọkpọ asak; ndien ami n̄kpa mba ndimụm enye n̄kama.” (Jer. 20:8, 9) Kpa ye emi edide mbon emi ẹkedọn̄de Jeremiah ọkọkwọrọ ikọ ọnọ ẹkedi ikaki, etop emi Abasi ọkọdọn̄de enye ọkọkwọrọ ama anam enye enyene odudu aka se ẹkedọn̄de enye.

4. Ima ikot Ikọ Abasi inyụn̄ isụhọde itie ikere se ikotde, nso isitịbe? (Colossae 1:9, 10)

⁴ Se Jehovah etịn̄de ke Bible esisọn̄ọ mme Christian idem. Ke leta emi apostle Paul ekewetde ọnọ esop ke Colossae, enye ama ọdọhọ nditọete oro ke ndinyene nnennen ifiọk ayan̄wam mmọ ẹka iso “ẹn̄wụm mfri ke kpukpru nti utom,” ndien oro ayanam mmọ “ẹsan̄a nte odotde ye Jehovah.” (Kot Colossae 1:9, 10.) Utom edikwọrọ eti mbụk esịne ke otu nti utom oro. Ntre ima ikot Ikọ Abasi inyụn̄ isụhọde itie ikere se ikotde, iyenen̄ede ibuọt idem ye Jehovah inyụn̄ inen̄ede ikụt ntak emi anade ikwọrọ etop Obio Ubọn̄ inọ mme owo.

5. Nso idin̄wam nnyịn inen̄ede idia ufọn ima ikot Bible inyụn̄ ikpekpep?

⁵ Edieke iyomde ndinen̄ede ndia ufọn nto Ikọ Abasi, ana itehede idem ikot inyụn̄ ikpep enye, ekem itie ikere se ikpepde. Kûnam itọk itọk. Ama okot Bible ekesịm ufan̄ikọ emi mînen̄ekede in̄wan̄a fi, kûdọhọ yak enye oro ebet kan̄a ibe ika en̄wen. Utu ke oro, da Watch Tower Publications Index m̀mê N̄wed Ndụn̄ọde Mme Ntiense Jehovah yom nte ẹnamde ufan̄ikọ oro an̄wan̄a. Ama etehede idem ekpep Ikọ Abasi, eyenen̄ede enịm ke kpukpru se idude ke Ikọ Abasi ẹdi akpanikọ. (1 Thess. 5:21) Adan̄a nte enen̄erede enịm ke Ikọ Abasi edi akpanikọ, ntre ke edinen̄ede inem fi ndimen se ekpepde n̄ketịn̄ nnọ mbon en̄wen.

TỊM IDEM ỌFỌN MBEMISO AKADE UKWỌRỌIKỌ

6. Ntak emi ikpetịmde idem ọfọn mbemiso ikade ukwọrọikọ?

⁶ Ekpetịm idem ọfọn mbemiso akade ukwọrọikọ, idem idinen̄ekede inyek fi ndineme Ikọ Abasi ye mbon en̄wen. Jesus ama an̄wam mme mbet esie ẹtịm idem mbemiso enye osiode mmọ ọdọn̄ ẹkekwọrọ ikọ. (Luke 10:1-11) Mme mbet oro ndikanam se Jesus ekekpepde mmọ ama anam mmọ ẹkeme ndinam ediwak nti n̄kpọ, oro ama onyụn̄ anam mmọ ẹnen̄ede ẹkop inemesịt.​—Luke 10:17.

7. Didie ke ikeme nditịm idem mbemiso ikade ukwọrọikọ? (Se ndise n̄ko.)

⁷ Didie ke ikeme nditịm idem mbemiso ikade ukwọrọikọ? Ọfọn ikere nte iditịn̄de se iyomde ndikwọrọ ke ikọ idem nnyịn, inyụn̄ itịn̄ enye nte owo eneme nneme ye owo. N̄kpọ en̄wen emi edin̄wamde nnyịn edi ndikere n̄kpọ iba m̀mê ita emi mme owo ẹsitịn̄de mmọ mîyomke ndikop ukwọrọikọ ye se ikpọbọrọde. Ekem ima isobo mme owo, yak ikûnam nte ẹkama ikpa ẹda nnyịn ke edem, yak inam n̄kpọ ufan ufan, mbre mbre, iso imam imam.

8. Didie ke mme Christian ẹbiet esombat emi apostle Paul eketịn̄de aban̄a ke uwụtn̄kpọ esie?

⁸ Ke uwụtn̄kpọ emi apostle Paul ọkọnọde, enye ama etịn̄ udeme nnyịn ke n̄kpọ utom ukwọrọikọ emi. Enye ọkọdọhọ ete: “Nnyịn ikama n̄kpọuto emi ke esombat.” (2 Cor. 4:7) Nso idi n̄kpọuto oro? Edi utom edikwọrọ eti mbụk Obio Ubọn̄ emi anyan̄ade mme owo. (2 Cor. 4:1) Esombat ada aban̄a mmanie? Ada aban̄a ikọt Abasi emi ẹsimende eti mbụk ẹketịn̄ ẹnọ mbon en̄wen. Ke eyo Paul, mme anyamurua ẹkesidọn̄ mme ọsọn̄urua n̄kpọ nte udia, wine, ye okụk ke esombat ẹmen ẹka ebiet emi mmọ ẹyomde ndika. Ukem oro n̄ko, Jehovah emen eti mbụk emi edide ata ọsọn̄urua n̄kpọ esịn nnyịn ke ubọk. Edieke iyakde Jehovah an̄wam nnyịn, iyekeme ndika iso n̄kwọrọ etop oro nnọ mbon en̄wen.

BỌN̄ AKAM DỌHỌ JEHOVAH ỌNỌ FI UKO

9. Nso idin̄wam nnyịn ikûfehe mme owo enyịn m̀mê ndiyak ndịk anam nnyịn m̀mê mmọ ẹyeyat esịt ye nnyịn? (Se ndise n̄ko.)

⁹ Ndusụk ini, imekeme ndifehe owo enyịn mîdịghe ndịk anam nnyịn ke mme owo ẹmọn̄ ẹyat esịt ye nnyịn. Nso ikeme ndin̄wam nnyịn ikan utọ mfịna oro? Kere akam emi mme apostle ẹkebọn̄de ini ẹkedọhọde mmọ ẹkûkwọrọ ikọ aba. Utu ke mmọ ndikayak ndịk anam mmọ ẹtre ndikwọrọ ikọ, mmọ ẹma ẹdọhọ Jehovah an̄wam mmimọ ‘ika iso itịn̄ ikọ esie uko uko.’ Jehovah ọkọbọrọ akam oro ke ebe oro. (Utom 4:18, 29, 31) Ndịk owo akpanam nnyịn ndusụk ini, nnyịn n̄ko imekeme ndibọn̄ akam ndọhọ Jehovah an̄wam nnyịn. Dọhọ Jehovah an̄wam fi ama mme owo man ekeme nditre ndifehe mmọ enyịn.

10. Didie ke Jehovah esin̄wam nnyịn idi Mme Ntiense esie? (Isaiah 43:10-12)

¹⁰ Jehovah emek nnyịn Mme Ntiense esie, enye onyụn̄ ọn̄wọn̄ọ ndin̄wam nnyịn inyene uko. (Kot Isaiah 43:10-12.) Yak ineme usụn̄ inan̄ ke otu mme usụn̄ emi enye esinamde oro ọnọ nnyịn. Akpa, ini ekededi emi ikwọrọde eti mbụk inọ mme owo, Jesus do ye nnyịn. (Matt. 28:18-20) Ọyọhọ iba, Jehovah esisio mme angel ọdọn̄ ẹn̄wam nnyịn. (Edi. 14:6) Ọyọhọ ita, Jehovah ọnọ nnyịn edisana spirit esie. Spirit oro esin̄wam nnyịn iti mme n̄kpọ emi ima ikekpekpep. (John 14:25, 26) Ọyọhọ inan̄, Jehovah ọnọ nnyịn nditọete isisan̄a ntre ikwọrọ ikọ. Ima imen un̄wam emi Jehovah ọnọde nnyịn idian ye un̄wam emi ndima nditọete nnyịn ẹn̄wamde nnyịn, iyenyene uko inyụn̄ ika iso ikwọrọ ikọ.

NAM N̄KPỌ TIENE NTE MME OWO ẸTIEDE KÛNYỤN̄ UKPA MBA

11. Nso idin̄wam fi okụt ediwak owo ọkwọrọ ikọ ọnọ ama aka ukwọrọikọ? (Se ndise n̄ko.)

¹¹ Mûkwe ediwak owo ke ufọk ukwọrọ ikọ unọ, ndi ukwọrọikọ esidorode fi? Bụp idemfo: ‘Mbon efakutom nnyịn ẹdu ke m̀mọ̀n̄ utọ ini n̄kanika emi?’ (Utom 16:13) ‘Ndi ẹdu ke itieutom mîdịghe ẹka urua?’ Ekpedi ntre, akpada ke efak ọkwọrọ ikọ, ndi emekeme ndikụt ediwak owo n̄kwọrọ ikọ nnọ? Brọda Joshua ọdọhọ ete: “Mmesikụt ediwak owo n̄kwọrọ ikọ nnọ ke itie emi ikpọ ufọkurua ẹdude ye ke itie emi mme owo ẹsibonde moto.” Enye ye Bridget n̄wan esie ẹkpeka ukwọrọikọ mbubreyo ini eyo mîfụkke owo idem kan̄a m̀mê ke uwemeyo Sunday, mmọ ẹsikụt ediwak owo ke ufọk.​—Eph. 5:15, 16.

12. Ikpanam didie idiọn̄ọ se mme owo ẹnịmde m̀mê se ibehede mmọ?

¹² Ekpedi okoyom ndikwọrọ ikọ nnọ owo ndien enye etie nte ke enye iyomke ndikop, domo ndidiọn̄ọ se enye enịmde m̀mê se ibehede enye. Joshua ye Bridget ẹsida mbụme emi odude ke akpa page tract nnyịn ẹtọn̄ọ nneme Ikọ Abasi ye mme owo. Ke uwụtn̄kpọ, mmọ ẹkpeyom ndida tract Didie ke Afo Ada Bible? n̄kwọrọ ikọ, mmọ ẹyedọhọ ẹte: “Ndusụk owo ẹda Bible nte N̄wed Abasi, ndusụk inen̄ekede ida ntre. Afo ada didie?” Utọ mbụme oro esiwak ndinam mmọ ẹkeme ndineme Ikọ Abasi ye mme owo.

13. Ọkpọkọm mme owo ikpan̄ke utọn̄ ini ikwọrọde ikọ, ntak ikemede ndidọhọ ke imokụt ibuot? (Mme N̄ke 27:11)

¹³ Idịghe ibat mbon emi ẹkpan̄de utọn̄ ke isida ibiere m̀mê imokụt ibuot. Ntak-a? Sia edide mme owo ẹkpan̄ utọn̄ m̀mê ikpan̄ke, imanam se Jehovah ye Jesus ẹyomde inam, imọnọ ikọ ntiense. (Utom 10:42) Idem ke ini nnyịn mîkwe owo ikwọrọ ikọ inọ mîdịghe ikaka ndikwọrọ, owo imaha ndikop, imekeme ndikop idatesịt sia imọdiọn̄ọ ke imanam esịt enem Ete nnyịn emi odude ke heaven.​—Kot Mme N̄ke 27:11.

14. Ntak emi ikemede ndidat esịt edieke asuanetop efen okụtde owo emi amade ukwọrọikọ nnyịn ke efakutom nnyịn?

¹⁴ Asuanetop efen okpokụt owo emi amade ukwọrọikọ nnyịn, nnyịn n̄ko imekeme nditiene ndat esịt. Enyọn̄-Ukpeme kiet emi ima ikekpekpep emen utom emi inamde odomo ye mme owo ndiyom eyenọwọn̄ emi osopde. Ediwak owo ẹsitiene ẹyom eyen oro; ẹdụk nsio nsio itie ẹyom, ẹkanade. Ẹma ẹkụt eyen oro kpukpru owo ẹdidat esịt, idịghe sụk owo kiet emi okokụtde enye. Ukem oro n̄ko ke edi ye utom emi inamde ndin̄wam mme owo ẹdi mbet Jesus. Kpukpru owo ke esop ẹsidian ubọk ẹnam. Kpukpru owo ẹsidian ubọk ẹkwọrọ efakutom nnyịn ẹma, ndien owo kiet ama ọtọn̄ọ ndidụk mbono esop, kpukpru owo ẹsidia idara.

NEN̄EDE SỊN EKIKERE KE IMA EMI AMADE JEHOVAH YE MBỌHỌIDỤN̄ FO

15. Didie ke nnyịn ndinam se idude ke Matthew 22:37-39 ekeme ndinam ukwọrọikọ enen̄ede enem nnyịn? (Se n̄ko ndise .)

¹⁵ Ima isịn ekikere ke ima emi imade Jehovah ye mbọhọidụn̄ nnyịn, ukwọrọikọ eyenen̄ede enem nnyịn. (Kot Matthew 22:37-39.) Kere nte edinemde Jehovah esịt ndikụt nte ikwọrọde ikọ ye nte esịt edinemde mme owo mmọ ẹma ẹtọn̄ọ ndikpep Bible! Kere n̄ko nte ẹdinyan̄ade mbon oro ẹkekpan̄de utọn̄ ẹkop ukwọrọikọ nnyịn.​—John 6:40; 1 Tim. 4:16.

16. Edieke n̄kpọ mîyakke iwọrọ ke ufọk, ikpanam nso man ukwọrọikọ enem nnyịn? Nọ uwụtn̄kpọ.

¹⁶ Ndi enyene se ikụkde fi isịn ke ufọk? Ekpedi ntre, sịn ekikere ke se ekemede ndinam n̄wụt ke amama Jehovah ye mbọhọidụn̄ fo. Ini udọn̄ọ COVID-19 ekesịmde ofụri ererimbot, Samuel ye Dania n̄wan esie ikekemeke ndikpọn̄ ufọk. Ikememke ye mmọ ini oro. Mmọ ẹkesiwak ndikot mme owo ke fon n̄kwọrọ ikọ nnọ, ẹwet leta Ikọ Abasi ẹnọ mme owo, ẹnyụn̄ ẹda Zoom ẹkpep mme owo Bible. Samuel ama esikwọrọ ikọ ọnọ mbon emi enye ekesisobode ini enye akade ndibọ usọbọ kansa ke ufọkibọk. Enye ọdọhọ ete: “Uwem ama ọsọn̄ ye nnyịn, idem eyemem nnyịn, ekikere oyo nnyịn, onyụn̄ ọsọn̄ nnyịn ndibuọt idem ye Abasi. Ana inam se idin̄wamde nnyịn ikop inem n̄kpọ Abasi.” Ini kpukpru oro okosụk etịbede, Dania ama ọduọ ada unan inyụn̄ ikemeke ndidaha nda ke bed ofụri ọfiọn̄ ita. Aka ko, ekedidi se enye etiede ke n̄kpọitie mbon n̄kpọnnam ke ọfiọn̄ itiokiet. Enye ọdọhọ ete: “Mma nnam kpukpru se n̄kekemede ntiene nte n̄kpọ eketiede ye ami. Mma n̄kwọrọ ikọ nnọ nurse kiet emi ekedide edisọbọ mi idem, nnyụn̄ nsineme Ikọ Abasi ye mbon emi ẹkesimende n̄kpọ ẹsọk mi ke ufọk. Mma nneme Ikọ Abasi ke fon ye mma kiet emi akanamde utom ke kọmpeni emi ẹsinyamde n̄kpọ ufọkibọk.” Se iketịbede inọ Samuel ye Dania ikayakke mmọ ẹkeme ndikwọrọ ikọ nte ẹkesikwọrọde, edi mmọ ẹma ẹnam se ẹkekemede ẹnyụn̄ ẹkop idatesịt.

17. Nso ke ekeme ndinam man enen̄ede adia ufọn oto n̄kpọ ition emi inemede ke ibuotikọ emi?

¹⁷ Ekpekeme ndinam kpukpru n̄kpọ ition emi ẹtịn̄de ke ibuotikọ emi inikiet, enye oro ọfọn akan. Mme n̄kpọ kiet kiet emi ẹtịn̄de etie nte nsio nsio n̄kpọ emi oyomde ndida ntem orụk udia kiet. Ama atan̄ nsio nsio n̄kpọ oro ọdọn̄ kiet etem udia oro, udia oro eyenem tutu ẹdia ẹkọrọde usan. Ima inam n̄kpọ ition emi ẹtemede nnyịn ke ibuotikọ emi, iyenen̄ede ikan mme n̄kpọ emi ẹnamde nnyịn ndịk ubọk, ukwọrọikọ oyonyụn̄ enen̄ede enem nnyịn.