Sụhọde Idem Nyịme ke Enyene Se Mûdiọn̄ọke

1. Jehovah okobot nnyịn didie? Ntak emi enye okobotde nnyịn ntre?

IMEKEME ndikere n̄kpọ, ikpep mbufa n̄kpọ, ikụt n̄kpọ ke enyịn idiọn̄ọ se ọwọrọde ye se edimande, inyụn̄ idiọn̄ọ nte ikpanamde-nam se ikpepde. Nte Jehovah okobotde nnyịn edi oro. Nso ikanam enye obot nnyịn ntre? Enye oyom “[ikụt] ifiọk Abasi” onyụn̄ oyom ida se idiọn̄ọde iban̄a enye ibiere se ifọnde nte isụk ikade iso inam n̄kpọ inọ enye.​—N̄ke 2:1-5; Rome 12:1.

2. (a) Kpa ye emi ikemede ndikpep ediwak n̄kpọ, nso ke ana idiọn̄ọ? (Job 37:23, 24) (Se ndise n̄ko.) (b) Nso ufọn ke ididia ima inyịme ke enyene mme n̄kpọ emi nnyịn mîdiọn̄ọke?

² Kpa ye edide imekeme ndikpep ediwak n̄kpọ, idịghe kpukpru n̄kpọ ke idiọn̄ọ. (Kot Job 37:23, 24.) Kop uwụtn̄kpọ Job. Jehovah ama obụp enye ediwak mbụme emi ẹkenamde enye okụt ke ediwak n̄kpọ do emi enye mîdiọn̄ọke. Oro ama anam Job okụt ke oyom imọ isụhọde idem, onyụn̄ an̄wam enye okpụhọde nte enye esikerede n̄kpọ. (Job 42:3-6) Nnyịn n̄ko iyadia ufọn ima isụhọde idem inyịme ke enyene mme n̄kpọ emi nnyịn mîdiọn̄ọke. Nsụhọde-idem oro ayanam inịm ke Jehovah ayayarade n̄kpọ emi enen̄erede edi se nnyịn idiọn̄ọde ọnọ nnyịn, man ikeme ndibiere nnennen se ikpanamde.​—N̄ke 2:6.

3. Idineme nso ke ibuotikọ emi?

³ Ke ibuotikọ emi, iyeneme ndusụk n̄kpọ emi nnyịn mîdiọn̄ọke ye nte uwem ekemede ndisọn̄ nnyịn ke ntak mme n̄kpọ oro. Iyokụt n̄ko ke ọfọn nte nnyịn mîdiọn̄ọke ndusụk n̄kpọ. Nnyịn ndineme mme n̄kpọ emi ayanam inen̄ede inịm ke Jehovah emi edide “Enye emi ọfọnde ama ke ifiọk” esidọhọ nnyịn mme n̄kpọ emi ẹnen̄erede ẹdi se idiọn̄ọde.​—Job 37:16.

NNYỊN IDIỌN̄ỌKE INI EMI UTỊT EDIDIDE

4. Matthew 24:36 owụt ke nso idi n̄kpọ kiet emi nnyịn mîdiọn̄ọke?

⁴ Kot Matthew 24:36. Nnyịn idiọn̄ọke ini emi utịt ererimbot emi edidide. Jesus ikakam idiọn̄ọke “usen ye hour” oro ini enye osụk odude mi ke isọn̄.a Nte ini akakade, Jesus ama ọdọhọ mme apostle esie ke Jehovah emi edide enye ama enịm ini ndinam n̄kpọ, ini oro isibehe, enịm ini emi ndusụk n̄kpọ ẹditịbede “ke idak odudu esiemmọ,” oro ọwọrọ ke enye enyene unen ndibiere ini emi ndusụk n̄kpọ ẹditịbede. (Utom 1:6, 7) Jehovah ebebiere ini emi utịt ererimbot emi edidide, edi idịghe utom nnyịn ndidụn̄ọde ndiọn̄ọ ata nnennen ini emi utịt edidide.

5. Sia nnyịn mîdiọn̄ọke ini emi utịt edidide, ekeme nditie nnyịn didie ke idem?

⁵ Se Jesus eketịn̄de anam ikụt ke nnyịn idiọn̄ọke m̀mê idibet ebịghi didie mbemiso utịt ererimbot emi edide. Oro ekeme ndinam inana ime mîdịghe idem emem nnyịn, akpan akpan ekpedi ebịghi ikọtọn̄ọ ndibet usen Jehovah yak edi. Mîdịghe ekeme ndisọn̄ nnyịn ndiyọ nsahi emi mbonubon nnyịn m̀mê mbon en̄wen ẹsakde nnyịn. (2 Pet. 3:3, 4) Imekeme ndikere ke ekpedi imọdiọn̄ọ ata nnennen usen emi utịt edidide, ke imekeme ndinen̄ede nnyene ime, ke oyonyụn̄ afiak emem nnyịn utom ndiyọ nsahi emi ẹsakde nnyịn.

6. Ntak emi ọfọnde nte nnyịn mîdiọn̄ọke ini emi utịt edidide?

⁶ Se idude edi ke Jehovah nditre ndidọhọ nnyịn usen emi utịt edidide anam inyene ifet ndiwụt ke inam n̄kpọ inọ enye ke ntak emi imade enye, ke imonyụn̄ ibuọt idem ye enye. Nnyịn inamke n̄kpọ inọ Jehovah sia utịt ke edi, koro oro editie nte ke utịt oro ama edi onyụn̄ ebe, ke nnyịn idibuọtke idem ye Jehovah aba. Utu ke ndinen̄ede nsịn ekikere nnyịn ke ini emi “usen Jehovah” edidide, ọfọn inen̄ede isịn ekikere ke nti n̄kpọ emi ẹditịbede ẹma ẹsobo idiọk ererimbot emi ẹma. Ima inam ntre, oro ayan̄wam nnyịn ika iso inen̄ede ikpere Jehovah inyụn̄ inam ofụri se ikekeme ndinem enye esịt.​—2 Pet. 3:11, 12.

7. Nso ke idiọn̄ọ?

⁷ Mme akpatre usen ẹketọn̄ọ ke 1914, imọdiọn̄ọ enye oro, onyụn̄ ọfọn inen̄ede isịn ekikere ke oro. Jehovah ọnọ nnyịn mme prọfesi ke Bible emi ẹwụtde ke isua oro ke mme akpatre usen ẹketọn̄ọ ye nte n̄kpọ editiede ke ererimbot toto ke ini oro. Mme prọfesi oro ndisu anam inen̄ede inịm ke “akwa usen Jehovah emekpere.” (Zeph. 1:14) Imọdiọn̄ọ n̄ko utom emi Jehovah oyomde inam. Utom oro edi nnyịn ndidọhọ adan̄a ediwak owo nte ikekeme “eti mbụk obio ubọn̄.” (Matt. 24:14) Ẹkwọrọ etop emi ke n̄kpọ nte idụt 240 ye ke se ibede usem 1,000. Imesịn idem inam akpan utom emi, ibetke tutu nnyịn idiọn̄ọ “usen ye hour” mbemiso inamde ntre.

NNYỊN IDIỌN̄ỌKE NTE JEHOVAH EDIMADE NDINAM N̄KPỌ

8. “Utom ata Abasi” ada aban̄a nso? (Ecclesiastes 11:5)

⁸ Idịghe kpukpru ini ke isidiọn̄ọ “utom ata Abasi.” (Kot Ecclesiastes 11:5.) Ikọ Bible oro aban̄a se Jehovah esinamde yak etịbe m̀mê se enye esiyakde etịbe man se enye akaduakde osu. Nnyịn ikemeke ndidiọn̄ọ kpukpru ntak emi anamde Jehovah ayak n̄kpọ etịbe m̀mê ndidiọn̄ọ nnennen nnennen nte Jehovah edisan̄ade inyan̄a nnyịn. (Ps. 37:5) Ọsọsọn̄ nnyịn ndidiọn̄ọ utọ n̄kpọ oro ukem nte ọsọn̄de ndidiọn̄ọ nte eyen asan̄ade ọkọri ke esịt idịbi. Tutu emi n̄kpọ enye oro in̄wan̄ake nta-ifiọk ofụri ofụri.

9. Sia nnyịn mîdiọn̄ọke nte Jehovah edin̄wamde nnyịn, nso ke ikeme ndinam? Nso ke ikeme ndikere?

⁹ Nnyịn mîdiọn̄ọke nte Jehovah edin̄wamde nnyịn, oro ekeme ndinam imen̄e ndinam se akpanade inam. Ekeme ndinyene mme n̄kpọ emi anade inam man ikeme ndinam n̄kpọ Abasi n̄kan nte inamde idaha-emi, utọ nte ndision̄o ubọk ke ndusụk n̄kpọ ke uwem nnyịn m̀mê ndika n̄kodu ke ebiet emi ẹyomde-yom mme ọkwọrọ-ikọ, edi nnyịn isịk kan̄a inịm. Mîdịghe, edieke nnyịn mîkemeke ndinam se ikebierede ndinam nnọ Abasi, isịn idem ikwọrọ ikọ edi ikwe se iwụtde adan̄a ofụri ukeme emi isịnde, mîdịghe mfịna oto iso ye edem esịm nnyịn ke utom emi inamde inọ Abasi, imekeme ndikere ke etie nte Abasi inemke esịt ye nnyịn.

10. Tịn̄ mme akpan edu emi ikemede ndinyene ke ntak emi nnyịn mîdiọn̄ọke nte Jehovah edin̄wamde nnyịn.

¹⁰ Nte nnyịn mîdiọn̄ọke nte Jehovah edisan̄ade in̄wam nnyịn ekeme ndin̄wam nnyịn inyene mme akpan edu nte nsụhọde-idem ye ndidiọn̄ọ ebiet emi odudu nnyịn etrede. Imesidikụt ke ekikere Jehovah ye usụn̄ esie ẹkon̄ ẹkan eke nnyịn. (Isa. 55:8, 9) Imesidikpep n̄ko ndinen̄ede mbuọt idem ye Jehovah nnyụn̄ nyak kpukpru n̄kpọ nsịn enye ke ubọk. Ima ikụt ibuot ke utom ukwọrọ-ikọ m̀mê ke utom emi inamde inọ esop Abasi, imesitoro Jehovah sia enye akam odot itoro oro. (Ps. 127:1; 1 Cor. 3:7) N̄kpọ mîtiehe nte ikekerede, ọfọn iti ke Jehovah mmọdo, ke enye okụt kpukpru n̄kpọ. (Isa. 26:12) Iyanam udeme nnyịn inyụn̄ ika iso inịm ke Jehovah ayanam udeme esie. Imenen̄ede inịm ke Jehovah eyeteme nnyịn se akpanade inam, ọkpọkọm ididịghe ke utịbe utịbe usụn̄ emi enye ekesinamde ndusụk ini ke eset.​—Utom 16:6-10.

11. Nso ke idiọn̄ọ emi ekemede ndin̄wam nnyịn?

¹¹ Imọdiọn̄ọ ke nnyịn iditreke ndikụt ima, unenikpe, ye ọniọn̄ ke kpukpru se Jehovah anamde. Imọdiọn̄ọ ke Jehovah idaha se inamde inọ enye ye nditọ-ete nnyịn ke ekpri n̄kpọ. Imọdiọn̄ọ n̄ko ke Jehovah isitreke ndidiọn̄ mbon emi ẹsọn̄ọde ẹda ye enye.​—Heb. 11:6.

NNYỊN IDIỌN̄ỌKE SE IDITỊBEDE N̄KPỌN̄

12. James 4:13, 14 owụt ke nso ke nnyịn mîdiọn̄ọke?

¹² Kot James 4:13, 14. Nnyịn idiọn̄ọke nte uwem nnyịn editiede n̄kpọn̄. Ata akpanikọ edi oro. “Ini ye n̄kpọntịbe unana idotenyịn” ẹyesịm nnyịn ke ererimbot emi. (Eccl. 9:11) Ntre, nnyịn ikemeke ndidiọn̄ọ m̀mê iyakam ikeme ndinam se ikaduakde ndinam, m̀mê iyakam idu uwem ikụt utịt n̄kpọ emi inamde.

13. Mme n̄kpọ emi nnyịn mîdiọn̄ọke m̀mê ẹditie didie ẹkeme ndinam etie nnyịn didie ke idem?

¹³ Mme n̄kpọ ke uwem emi, emi nnyịn mîdiọn̄ọke m̀mê ẹditie didie ẹsọsọn̄ ndiyọ. Ntak edide ntre? Imekeme nditie mfịna idem mban̄a se ikemede nditịbe, ekikere oro inyụn̄ iyakke ikop idatesịt. N̄kpọ mmọn̄eyet ye se nnyịn mîkodorike enyịn ndikụt ẹkpebuat nnyịn, imekeme ndifụhọ, enyịn onyụn̄ anan nnyịn. N̄kpọ en̄wen edi ke n̄kpọ mîtiehe nte ikekerede, ekeme nditie nnyịn nte ke eke nnyịn okụre, idem onyụn̄ emem nnyịn.​—N̄ke 13:12.

14. Nso idinam ikop ata inemesịt? (Se ndise n̄ko.)

¹⁴ Ima iyọ mme mfịna emi ẹsịmde nnyịn, isiwụt ke ọkpọkọm edi didie ke inam n̄kpọ inọ Ete nnyịn emi odude ke heaven ke ntak emi imade enye idịghe ke ntak udori emi ididiade. Mme mbụk ke Bible ẹnam ikụt ke ikpanaha idori enyịn ke Jehovah oyofụk nnyịn ofụri ofụri mfịna ndomokiet isịmke nnyịn, onyụn̄ anam ikụt ke idụhe n̄kpọ ndomokiet ke uwem nnyịn emi Jehovah ama ekebebiere enịm ete ke nte editịbede edi oro. Jehovah ọdiọn̄ọ ke idịghe tutu nnyịn idiọn̄ọ se iditịbede n̄kpọn̄ ndien nnyịn ikop inemesịt. Utu ke oro, se inamde ikop inemesịt edi nnyịn ndiyak enye eteme nnyịn se ikpanamde, inyụn̄ ikop uyo esie. (Jer. 10:23) Ima iyom ndibiere n̄kpọ inyụn̄ idọhọ Jehovah an̄wam nnyịn, editie nte idọhọ: “Edieke edide uduak Jehovah, nnyịn iyodu uwem inyụn̄ inam emi m̀mê oko.”​—Jas. 4:15.

15. Nso ke idiọn̄ọ iban̄a ini iso?

¹⁵ Nnyịn idiọn̄ọke se usen kiet kiet emi esierede edimande, edi imọdiọn̄ọ ke Jehovah ọn̄wọn̄ọ ke iyodu uwem ke nsinsi, edide ke heaven m̀mê ke isọn̄ emi. Imọdiọn̄ọ ke Jehovah ikemeke ndisu nsu, ke n̄kpọ ndomokiet ikemeke ndikpan enye ndinam kpukpru se enye ọkọn̄wọn̄ọde. (Titus 1:2) Enye ikpọn̄ ekeme “[nditịn̄] akpatre ke ntọn̄ọ, ndien ke eset enye etịn̄ mme n̄kpọ oro owo mînamke.” Enye ama ekeme ndinam ntre ke mme n̄kpọ emi ẹketịbede ke ini edem oyonyụn̄ anam ntre ke mme n̄kpọ emi ẹditịbede ke ini iso. (Isa. 46:10) Imenen̄ede idiọn̄ọ ke inyeneke se ikemede ndikpan Jehovah ndima nnyịn. (Rome 8:35-39) Se ededi emi editịbede, Jehovah ọyọnọ nnyịn ọniọn̄ ye odudu iyọ, enye oyonyụn̄ ọdọn̄ nnyịn esịt yak iyọ. Ẹyak inịm ke Jehovah ayan̄wam nnyịn onyụn̄ ọdiọn̄ nnyịn.​—Jer. 17:7, 8.

IDINEN̄EKEDE IN̄WAN̄A NNYỊN ADAN̄A NTE JEHOVAH ỌDIỌN̄ỌDE NNYỊN EKETRE

16. Psalm 139:1-6 owụt ke nso ke Jehovah ọdiọn̄ọ emi mîdinen̄ekede in̄wan̄a nnyịn adan̄a nte enye ọdiọn̄ọde eketre?

¹⁶ Kot Psalm 139:1-6. Andikobot nnyịn ọdiọn̄ọ nte itiede, ọdiọn̄ọ mme n̄kpọ emi ẹketịbede ẹnọ nnyịn, emi ẹnamde itie nte itiede, ikere n̄kpọ nte ikerede, inyụn̄ ida n̄kpọ nte isidade. Jehovah esikere aban̄a nnyịn kpukpru ini. Enye ọdiọn̄ọ se itịn̄de ye se ikoyomde nditịn̄, ọdiọn̄ọ se inamde ye ntak emi inamde n̄kpọ nte inamde. Kpa nte Edidem David eketịn̄de, Jehovah ada ke ikpat ndin̄wam nnyịn. N̄kpọ ndomokiet ikemeke ndikpan enye ndin̄wam nnyịn. Enem nnyịn esịt eti-eti ndidiọn̄ọ ke Akakan Ọbọn̄ Andikara ofụri ekondo, Andikobot enyọn̄ ye isọn̄ emi edide ata ọkpọsọn̄, enen̄ede ekere aban̄a nnyịn! David ọkọdọhọ ete: “Utọ ifiọk emi edi ata utịbe ọnọ mi. Enye enen̄ede okon̄ tutu n̄kemeke ndisịm.”​—Ps. 139:6.

17. Ntak emi ekemede ndisọn̄ nnyịn ndinyịme ke Jehovah enen̄ede ọdiọn̄ọ nnyịn?

¹⁷ Ubon emi ikokponde, nte ẹnamde n̄kpọ ke edem nnyịn, m̀mê se ikesinịmde akpa akpa ekeme ndinam ọsọn̄ nnyịn ndida Jehovah nte Ete emi amade nnyịn onyụn̄ ekerede aban̄a nnyịn. Mîdịghe imekeme ndikere ke mme ndudue emi ikanamde ke ini edem ẹdiọk ẹkaha, ke Jehovah ikpoyomke ndidiọn̄ọ utọ owo nte nnyịn tutu amama, ke enye ikpereke nnyịn ke usụn̄ ndomokiet. Ama esitie David ke idem ntre ndusụk ini. (Ps. 38:18, 21) Mîdịghe ekeme ndidi owo emi osụk enen̄erede odomo ndikpụhọde ndu uwem nte Abasi oyomde ekeme ndikere ete, ‘Ekpedi Abasi enen̄ede ọdiọn̄ọ mi ntre, nso ikpanam enye eyịre ete ntre uwem emi ọsọn̄de mi eti-eti nditre?’

18. Ima inyịme ke Jehovah ọdiọn̄ọ nnyịn akan nte idiọn̄ọde idem nnyịn, nso ufọn ke ididia? (Se mme ndise n̄ko.)

¹⁸ Imekeme ndikpep ndinyịme ke Jehovah ọdiọn̄ọ nnyịn akan nte idiọn̄ọde idem nnyịn, ke enye okụt eti n̄kpọ ke idem nnyịn emi nnyịn mme enyene-idem mîkwe. Kpa ye edide enye okụt mme ndudue nnyịn, ọdiọn̄ọ ntak emi etiede nnyịn ke idem nte etiede nnyịn oro, onyụn̄ ọdiọn̄ọ ntak emi inamde se inamde, enye osụk amama nnyịn. (Rome 7:15) Ama enen̄ede an̄wan̄a nnyịn ke Jehovah okụt adan̄a nte nnyịn ikemede ndifọn n̄ketre, oro eyenen̄ede ọsọn̄ọ nnyịn idem ndika iso nsọn̄ọ nda nnam n̄kpọ nnọ enye ye idatesịt.

19. Nso ke idiọn̄ọ iban̄a Jehovah, emi mîkemeke ndikpụhọde?

¹⁹ Bible ọdọhọ ke Jehovah edi ima, imonyụn̄ idiọn̄ọ ntre. Idụhe se ẹfan̄ade do. (1 John 4:8) Imọdiọn̄ọ ke se Jehovah ọdọhọde inam m̀mê se enye ọdọhọde ikûnam owụt ke enye ama nnyịn, ke kpukpru ini enye oyom uwem enem nnyịn. Imọdiọn̄ọ ke Jehovah oyom inyene nsinsi uwem. Enye ọkọnọ Eyen esie edikpa man inyene uwem oro. Eyen esie ndikakpa mfak nnyịn anam inịm ke kpa ye emi isinamde ndudue, ke imekeme ndika iso nnam n̄kpọ nnọ Jehovah inyụn̄ ikụt ibuot. (Rome 7:24, 25) Imọdiọn̄ọ n̄ko ke ‘Abasi okpon akan esịt nnyịn onyụn̄ ọfiọk kpukpru n̄kpọ.’ (1 John 3:19, 20) Inyeneke n̄kpọ ndomokiet ke uwem nnyịn emi edịbede Jehovah ke enyịn, enye onyụn̄ ọdiọn̄ọ ke imekeme ndinam n̄kpọ nnọ enye inyụn̄ ikụt ibuot.

20. Nso idin̄wam nnyịn ikûtịmede esịt ukaha uban̄a se nnyịn mîdiọn̄ọke?

²⁰ Kpukpru se anade idiọn̄ọ, Jehovah anam idiọn̄ọ, idịpke nnyịn. Ima isụhọde idem inyịme ke ikọ oro edi akpanikọ, nnyịn iditiehe itịmede esịt ikaha iban̄a se nnyịn mîkemeke ndinam n̄kpọ ndomokiet mban̄a, iyonyụn̄ inen̄ede isịn ekikere ke se idide akpan n̄kpọ ikan. Ima inam ntre, iwụt ke ibuọt idem ke ofụri esịt ye Jehovah emi edide “Enye emi ọfọnde ama ke ifiọk.” (Job 36:4) Enyene ndusụk n̄kpọ emi nnyịn mîdiọn̄ọke idaha-emi, edi imọdiọn̄ọ ke ini ke edi ke iso emi idikpepde mbufa n̄kpọ ito Akwa Abasi nnyịn inyụn̄ ikpep mbufa n̄kpọ iban̄a enye ke nsinsi nsinsi.​—Eccl. 3:11.