Imokop Inemesịt Nte Jehovah Esifende Nnyịn

1-2. Didie ke se iwọrọde ubonowo ebiet se iwọrọde akparawa emi ẹtịn̄de ẹban̄a ke akpa ikpehe?

YAK idọhọ ke ọmọdiọn̄ọ eyen imọ owo kiet. Edi usen kiet n̄kpọ emi osiode owo ndotndot mmọn̄eyet etịbe; aksiden owot ete ye eka akparawa oro ukem usen. N̄kpọ oro obụn̄ enye esịm akpatre. Edi mben akam edi oro. Enye edikop ke ete ye eka esie ẹma ẹtahade kpukpru okụk emi ubon mmọ ẹkenyenede ẹma. Isọn emi ẹnịmde ẹnọ enye, okpokop emekeme ndisụhọ. Idaha-oro n̄kpọ-akpa esie edidi isọn, idịghe inyene. Ndien mme enyene isọn ẹdi emi, ke ẹkpak isọn mmọ ke ifịk ke ifịk. Isọn emi anade ke isọn̄, ọkpọkọm akparawa oro anam nso, idikemeke ndikpe nsio.

² Se iwọrọde nnyịn ebiet se iwọrọde akparawa oro. Adam ye Eve emi ẹkedide akpa ete ye eka nnyịn ẹma ẹfọn ẹma ẹnyụn̄ ẹdụn̄ ke ata ediye Paradise ntem. (Gen. 1:27; 2:7-9) Uwem mmọ ekpekedi inemesịt inemesịt, udia-uwem udia-uwem, ke nsinsi nsinsi. Edi ẹtise kpukpru n̄kpọ ọtọ etịmede. Jehovah ama ebịn mmọ osio ke ediye Paradise oro, mmọ inyụn̄ ikemeke ndidu uwem aba ke nsinsi. Nso n̄kpọ-akpa ke mmọ ẹkenịm ẹnọ nditọ mmọ? Bible ọdọhọ nnyịn ete: “Mmọdo, nte idiọkn̄kpọ okotode owo kiet [Adam] odụk ererimbot, n̄kpa onyụn̄ otode ke idiọkn̄kpọ oro odụk, ndien n̄kpa atara esịm kpukpru owo koro kpukpru mmọ ẹma ẹnam idiọkn̄kpọ.” (Rome 5:12) Idiọkn̄kpọ emi utịt esie edide n̄kpa ke Adam akakpa ọkpọn̄ ọnọ nnyịn. Idiọkn̄kpọ oro etie nte akamba isọn emi owo nnyịn ndomokiet mîkemeke ndisio.​—Ps. 49:8.

3. Ntak emi ẹkemede ndimen mme idiọkn̄kpọ nnyịn ndomo ye “isọn”?

³ Jesus ekemen mme idiọkn̄kpọ odomo ye “isọn.” (Matt. 6:12; Luke 11:4) Ima inam idiọkn̄kpọ, etie nte ikama Jehovah isọn. Ana ikpe utịp idiọkn̄kpọ oro. Isọn oro akpana ntre, nnyịn ikpehe, n̄kukụre ini emi ẹkpekemede ndibiat isọn oro mfep ekpedi ima ikpa. Ndien ima ikpa, nnyịn ikpenyeneke idotenyịn ndifiak ndu uwem aba.​—Rome 6:7, 23.

4. (a) Nso ikpetịbe inọ kpukpru mme anamidiọk ekpedi nnyịn ikenyeneke eke an̄wamde nnyịn? (Psalm 49:7-9) (b) Ke Bible, ikọ oro “idiọkn̄kpọ” ada aban̄a nso? (Se ekebe emi, “Idiọkn̄kpọ.”)

⁴ Ndi enyene usụn̄ emi ikemede ndifiak nnyene kpukpru se Adam ye Eve ẹkeyakde atak nnyịn? Enyene-o, edi utọ odudu oro isịneke nnyịn ke ubọk. (Kot Psalm 49:7-9.) Ekpedi nnyịn ikenyeneke eke an̄wamde nnyịn, nnyịn ikpenyeneke idotenyịn ndidu uwem ke nsinsi ke ini iso m̀mê ndiset. Se itetịn̄ emi, n̄kpa nnyịn ekpebiet n̄kpa unam; ima ikpa imakpa, ifiakke iset aba.​—Eccl. 3:19; 2 Pet. 2:12.

5. Didie ke edima Ete nnyịn an̄wam nnyịn osio isọn idiọkn̄kpọ emi ikadade ito Adam? (Se ndise.)

⁵ Fiak kere ban̄a akparawa emi iketịn̄de iban̄a ke ntọn̄ọ ntọn̄ọ. Ekpetie enye didie ke idem edieke imọ owo ọdọhọde enye ke imọn̄ isio kpukpru isọn esie? Idịghe se ẹbobụp, esịt ekpenem akparawa oro tutu, enye okponyụn̄ enyịme. Ukem oro n̄ko, Jehovah Ete nnyịn emi amade nnyịn ọnọ nnyịn enọ emi osiode isọn idiọkn̄kpọ emi ikadade ito Adam. Kop nte Jesus akanamde oro an̄wan̄a mi: “Abasi ama enen̄ede ama ererimbot tutu enye ọnọ ikpọn̄-ikpọn̄ edibon Eyen esie, man owo ekededi eke ọbuọtde idem ye enye okûtak edi enyene nsinsi uwem.” (John 3:16) N̄kpọ en̄wen edi ke enọ oro anam ikeme ndidi ufan ye Jehovah.

6. Mme ikọ ewe ke Bible ke iyom ndineme ke ibuotikọ emi? Ntak-a?

⁶ Ikpanam nso man idia ufọn utịbe utịbe enọ emi, ẹnyụn̄ ẹkeme ndifen “isọn” emi ikamade? Idikụt ibọrọ ke se mme ikọ nte ndifiak ntie ke emem ye Abasi, usio-isop, ndinam emem ye Abasi, ufak, ndinyan̄a, ye ndidi se ẹbatde ke edinen ẹwọrọde ke Bible. Ke ibuotikọ emi, imọn̄ ineme se mme ikọ oro kiet kiet ẹwọrọde. Nte isụk ikerede se mmọ ẹwọrọde, iyenen̄ede ikop inemesịt ke se Jehovah akanamde yak ẹkeme ndifen mme idiọkn̄kpọ nnyịn.

JEHOVAH OYOM IFIAK ITIE KE EMEM YE ENYE

7. (a) Nso efen ikatak Adam ye Eve? (b) Nso ke iyom ke mbrenyịn ke ntak emi idide nditọ mmọ? (Rome 5:10, 11)

⁷ Idịghe ifet ndidu uwem ke nsinsi edi n̄kukụre n̄kpọ emi akatakde Adam ye Eve-o. Nte mmọ ẹkedide ufan ye Jehovah Ete mmọ ama atak mmọ n̄ko. Akpa akpa, mmọ ẹkesịne ke ubon Abasi. (Luke 3:38) Edi ke mmọ ẹma ẹkesọn̄ ibuot ye Jehovah, enye ama ebịn mmọ osio ke ubon esie. Enye oro eketịbe mbemiso mmọ ẹketọn̄ọde ndinyene nditọ. (Gen. 3:23, 24; 4:1) Sia idide nditọ mmọ, akana edi se ifiakde iketie ke emem ye Jehovah. (Kot Rome 5:10, 11.) Usụn̄ en̄wen emi ikemede ndisịn ikọ oro edi ke akana idomo ndifiak ndi ufan Jehovah. N̄wed kiet emi etịn̄de n̄kpọ aban̄a Bible ọdọhọ ke ikọ Greek emi ẹkabarede nte ‘ndifiak ntie ke emem’ ke itie Bible oro ekeme ndiwọrọ “ndinam asua akabade ufan.” Se inen̄erede ikpa owo idem edi ke Jehovah edi Enye emi ekebemde iso anam n̄kpọ man mme asua esie ẹkabade ufan esie. Didie ke enye anam oro?

USIO-ISOP ANAM IKEME NDIDI UFAN JEHOVAH

8. (a) Usio-isop edi nso? (b) Ndinam emem ye Abasi edi nso?

⁸ Usio-isop ke Jehovah ada anam enye ye mme anamidiọk ẹfiak ẹdi ufan. Ndisio isop esịne ndimen n̄kpọ kiet n̄kpụhọ ye n̄kpọ en̄wen, ndien ana n̄kpọ mbiba oro ẹdi ukem ekọmurua. Ẹma ẹnam ntre, ẹyefiak ẹnyene n̄kpọ emi akatakde m̀mê emi ẹkebiatde, mîdịghe ẹnam n̄kpọ oro afiak odu. Ke N̄wed Abasi Christian Usem Greek, oyokụt ikọ en̄wen emi akade ndiwọrọ ukem n̄kpọ nte “usio-isop.” Ikọ oro edi ndinam emem ye Abasi. (Rome 3:25) Oro anam ikeme ndidu ke emem ye Abasi inyụn̄ ikeme ndidi ufan esie.

9. Enyene se Jehovah akanamde man ẹkeme ndifen idiọkn̄kpọ nditọ Israel, emi owo mînamke aba. N̄kpọ oro ekedi nso?

⁹ Enyene se Jehovah akanamde man ẹkeme ndifen idiọkn̄kpọ nditọ Israel, man mmọ ẹnyụn̄ ẹkeme ndidi ufan esie. Owo inamke n̄kpọ oro aba, edi se se ekedide mi. Ke Israel, ẹma ẹsinịm usọrọ Usen Usio-Isop kpukpru isua. Usen oro, akwa oku ama esiwa mme unam ke ibuot mme owo. Imọdiọn̄ọ ke mme unam emi ẹkewade ikekemke se ẹsiode isop idiọkn̄kpọ owo ekededi ofụri ofụri sia unam ye owo idịghe n̄ka. Edi adan̄a nte nditọ Israel emi ẹkekabarede esịt ẹkewade mme n̄kpọ emi Jehovah okoyomde mmọ ẹwa, Jehovah ama eben̄e idem ndifen mme idiọkn̄kpọ mmọ. (Heb. 10:1-4) N̄kpọ en̄wen edi ke uwa Usen Usio-Isop oro ye mme uwa eken emi nditọ Israel ẹkesiwade ke ntak idiọkn̄kpọ mmọ ama anam mmọ ẹnen̄ede ẹkụt ke idi mme anamidiọk, ke edi se ẹnamde se ikande oro man ẹfen mme idiọkn̄kpọ mmọ ofụri ofụri.

10. Nso ke Jehovah akanam man ẹkeme ndidi ẹma ẹfen idiọkn̄kpọ, ẹfen ofụri ofụri?

¹⁰ Enyene se Jehovah akaduakde ndinam man ẹkeme ndidi ẹma ẹfen idiọkn̄kpọ, ẹfen ofụri ofụri. Enye ama anam “ẹwa” edima Eyen esie “ini kiet kpọt ndibiom mme idiọkn̄kpọ ediwak owo.” (Heb. 9:28) Jesus ama ọnọ “ukpọn̄ esie nte ufak ke ibuot ediwak owo.” (Matt. 20:28) Ufak edi nso?

UFAK EDI EKỌMURUA EMI JESUS EKEKPEDE MAN IKEME NDIDI UFAN ABASI

11. (a) Bible owụt ke ufak edi nso? (b) Nso utọ owo kpọt ikekeme ndikpe ufak?

¹¹ Se Bible etịn̄de owụt ke ufak edi ekọmurua emi ẹnọde man ẹsio isop n̄kpọ, emem onyụn̄ afiak odu.a Ke enyịn Jehovah, ufak anam ikeme ndinyene se ikatakde. Ke didie? Ti ke se ikatakde Adam ye Eve ekedi mfọnmma uwem mmọ ye ifet emi mmọ ẹkenyenede ndidu uwem ke nsinsi. Ntre akana ufak emi ẹdinọde ekem ye se ikatakde. (1 Tim. 2:6) N̄kukụre owo emi ekekemede ndikpe ufak oro ekedi erenowo emi ama okokpon ọwọrọ owo, onyụn̄ (1) ọfọnde ama; (2) ekemede ndidu uwem ke nsinsi ke isọn̄; ye (3) enyịmede ndiyak uwem esie aka ke ntak nnyịn. Idaha-oro ndien ke uwem owo oro ekpekekeme ndidi se ẹdade ẹkpụhọ m̀mê ẹdade ẹsio isop uwem emi akatakde.

12. Nso ikanam Jesus ekeme ndikpe ufak emi okoyomde ẹkpe?

¹² Kere n̄kpọ ita emi akanamde Jesus ekeme ndikpe ufak emi okoyomde ẹkpe. (1) Enye ama ọfọn ama​—“enye ikanamke idiọkn̄kpọ.” (1 Pet. 2:22) (2) Enye ndikọfọn mma akanam enye edi utọ owo emi ekemede ndidu uwem ke nsinsi ke isọn̄. (3) Enye ama eben̄e idem ndikpa nyak uwem esie aka ke ntak nnyịn. (Heb. 10:9, 10) Sia Jesus ọkọfọnde ama, enye ekedi ukem ye Adam mbemiso Adam akanamde idiọkn̄kpọ. Ti ke Adam ekedi akpa owo ke isọn̄ emi. (1 Cor. 15:45) Jesus ndikakpa akanam enye ekeme ndisio isop idiọkn̄kpọ Adam, oro edi, anam ẹfiak ẹnyene se Adam akayakde atak. (Rome 5:19) Nte Jesus akasan̄ade edi “akpatre Adam” edi oro. Ufọn idụhe mfọnmma owo efen ndidi ndisio isop ke se Adam akayakde atak. Jesus akakpa “ini kiet kpọt,” ini kiet oro onyụn̄ ekem.​—Heb. 7:27; 10:12.

13. Nso ke usio-isop ada okpụhọde ye ufak?

¹³ Nso ndien ke usio-isop ada okpụhọde ye ufak? Usio-isop edi n̄kpọ emi Abasi akanamde man enye ye mme owo ẹkeme ndifiak ndi ufan. Ufak edi ekọmurua emi ẹkekpede man ẹkeme ndisio isop idiọkn̄kpọ mme anamidiọk. Ọsọn̄urua iyịp emi Jesus ọkọduọkde ke ntak nnyịn ada aban̄a ekọmurua oro.​—Eph. 1:7; Heb. 9:14.

JEHOVAH ANYAN̄A NNYỊN ONYỤN̄ ABAT NNYỊN KE EDINEN

14. Nso ke idineme idaha-emi? Ntak-a?

¹⁴ Mme ufọn ewe ke usio-isop anam ọnọ nnyịn? Enyene mme ikọ ke Bible emi ẹwụtde mme ufọn oro. Kpa ye emi edide se mme ikọ oro ẹwọrọde ebiet kiet eken, ikọ kiet kiet ẹnam akpan n̄kpọ kiet ke usio-isop emi anamde Jehovah efen mme idiọkn̄kpọ nnyịn ọwọrọ ada. Nte inamde mmọ kiet kiet an̄wan̄a, iyokụt n̄ko nte mmọ ẹbehede nnyịn owo kiet kiet.

15-16. (a) Ke Bible, ikọ oro “ndinyan̄a” ada aban̄a nso? (b) Didie ke oro ebehe nnyịn?

¹⁵ Ke Bible, ikọ oro ndinyan̄a ada aban̄a ndikpọk owo nyak m̀mê nditebe owo ikpe ke ntak emi ẹma ẹkekpe ufak. Apostle Peter ekesịn n̄kpọ oro ntem: “Mbufo ẹmefiọk ẹte ke idịghe mme n̄kpọ emi ẹkemede ndibiara, nte silver m̀mê gold, ke ẹkeda ẹnyan̄a mbufo [at. ed., “ẹkeda ẹfak mbufo”] ẹsio ke ikpîkpu usụn̄ uwem emi mbufo ẹkekpepde ẹto ido edinam mme ete ete mbufo. Edi ẹkeda ọsọn̄urua iyịp, nte eke eyenerọn̄ emi ananade ndo onyụn̄ ananade ntọi, kpa eke Christ.”​—1 Pet. 1:18, 19.

¹⁶ Ufak emi ẹkekpede anam ikeme ndiwọrọ ke ufụn idiọkn̄kpọ ye n̄kpa emi otụhọrede nnyịn. (Rome 5:21) Imetịm ikụt ke imenyene eti ntak ndinen̄ede n̄kọm Jehovah ye Jesus nte ẹdade ọsọn̄urua iyịp m̀mê uwem Jesus ẹnyan̄a nnyịn.​—1 Cor. 15:22.

17-18. (a) Ndidi se ẹbatde ke edinen ọwọrọ nso? (b) Didie ke oro ebehe nnyịn?

¹⁷ Ndidi se ẹbatde ke edinen ọwọrọ ke se ededi emi ẹkedade ẹbiom nnyịn ikpe, ẹbiat ẹfep; ẹsọhi kpukpru ndudue nnyịn ẹfep, iditie nte mbon emi mînamke idiọkn̄kpọ akanam. Jehovah ndinam oro iwọrọke ke enye ke idemesie itieneke ibet unenikpe emi enye enịmde. Enye ibatke nnyịn ke edinen sia imanam se idotde se ẹbatde ntre. Isinyụn̄ idịghe ima inam idiọkn̄kpọ, enye anam nte n̄kpọ itịbeke. Nte iwụtde ke imọbuọt idem ke se enye akanamde man osio isop idiọkn̄kpọ nnyịn, ye ke ekọmurua emi ẹkekpede man ẹfak nnyịn anam enye enyene ntak ndibiat isọn nnyịn mfep.​—Rome 3:24; Gal. 2:16.

¹⁸ Nso ufọn ke nnyịn owo kiet kiet idia ke ntak oro? Ke eke mbon emi ẹmekde yak ẹkedu ye Jesus ke heaven ẹkara, ẹbabat mmọ ke edinen nte nditọ Abasi. (Titus 3:7; 1 John 3:1) Ẹfen mme idiọkn̄kpọ mmọ. Mmọ ẹditie nte mbon emi mînamke idiọkn̄kpọ akanam, ndien oro anam mmọ ẹdot ndikodu ke Obio Ubọn̄. (Rome 8:1, 2, 30) Ke eke mbon emi ẹdoride enyịn ndidu uwem ke nsinsi ke isọn̄ emi, ẹbat mmọ ke edinen nte mme ufan Abasi, ẹnyụn̄ ẹfen mme idiọkn̄kpọ mmọ. (Jas. 2:21-23) Akwa otu-owo emi ẹdibọhọde Armageddon ẹnyene idotenyịn ndidu uwem ke nsinsi ke isọn̄ emi, ikpaha aba. (John 11:26) “Ndinen owo” ye “mme anam ukwan̄n̄kpọ” emi ẹma ẹkekpa ẹyeset. (Utom 24:15; John 5:28, 29) Utịt utịt, kpukpru ikọt Jehovah emi ẹkopde uyo ẹnọ enye ke isọn̄ emi “[ẹyenyene] ubọn̄ ubọn̄ ifụre nditọ Abasi.” (Rome 8:21) Iyekeme ndifiak ntie ke emem ye Jehovah Ete nnyịn. Se utọ utịbe edidiọn̄ emi usio-isop anamde inyene do!

19. Didie ke se Jehovah ye Jesus ẹkenamde ẹnọ nnyịn anam nnyịn ikûtie aba nte mbon emi mînyeneke idotenyịn? (Se n̄ko ekebe emi, “Se Ọwọrọde Ọnọ Nnyịn.”)

¹⁹ Ata ofụri akpanikọ edi ke enyene ini emi ikenyenede mbọm nte akparawa emi iketịn̄de iban̄a ke ntọn̄ọ ntọn̄ọ, emi kpukpru n̄kpọ akatakde enye, ẹnyụn̄ ẹnịm akamba isọn emi enye mîkpekemeke ndikpe tutu amama ẹnọ enye. Imọkọm Jehovah nte inyenede eke an̄wamde nnyịn. Se Jehovah akanamde man ẹsio isop idiọkn̄kpọ nnyịn ye ufak emi ẹkekpede ẹnam ikûtie aba nte mbon emi mînyeneke idotenyịn. Nnyịn ndibuọt idem ke Jesus Christ anam ẹkeme ndinyan̄a nnyịn m̀mê ẹsio nnyịn ke ufụn idiọkn̄kpọ ye n̄kpa. Ẹkeme n̄ko ndifen mme idiọkn̄kpọ nnyịn ofụri ofụri enye etie nte akananam nnyịn inamke idiọkn̄kpọ. Se idide akpan n̄kpọ ikan edi ke idaha-emi imekeme ndidi ufan ye Jehovah Ete nnyịn emi odude ke heaven, emi amade nnyịn.

20. Idineme nso ke ibuotikọ emi etienede?

²⁰ Nte itiede ikere se Jehovah ye Jesus ẹkenamde ẹnọ nnyịn, imesikop inemesịt eti-eti. (2 Cor. 5:15) Ekpedi mmọ ikan̄wamke nnyịn, nnyịn ikpenyeneke idotenyịn ndomokiet! Jehovah efen mme idiọkn̄kpọ nnyịn. Edi didie ke oro ebehe nnyịn owo kiet kiet? Se idinemede ke ibuotikọ emi etienede edi oro.