Ufọn Emi Adiade ke Ntak Emi Jehovah Efende Ọnọ Fi

1. Owo ọkpọdọhọ ke imefen fi, ntak emi ekemede ndisọn̄ ndidiọn̄ọ se ikọ esie ọwọrọde?

OWO ọkpọdọhọ fi “Mmefen nnọ fi,” ekeme nditie fi nte ẹduọk fi mbịtmbịt mmọn̄ ke idem ke usen anainai eyo, akpan akpan ekpedi ọmọdiọn̄ọ ke ama etịn̄ mîdịghe anam n̄kpọ emi akayatde enye! Edi nso ke ikọ oro “Mmefen nnọ fi” enen̄ede ọwọrọ? Ndi se owo emi afo akayatde esịt an̄wanade nditịn̄ edi ke imọ ye afo imekeme ndifiak ndi itai ye aban̄? Mîdịghe, ndi ọwọrọ ke imọ imemen iso ifep ke se iketịbede, edi ke mbufo mbiba ikemeke nditie aba nte ẹkesitiede? Sia edide ikọ oro “Mmefen nnọ fi” ekeme ndiwọrọ nsio nsio n̄kpọ, ekeme ndisọn̄ ndidiọn̄ọ se ikọ owo oro ọwọrọde.

2. Didie ke Bible etịn̄ aban̄a nte Jehovah esifende owo? (Se ikọ idakisọn̄ n̄ko.)

² Nte Jehovah esifende nnyịn emi mîfọnke ima enen̄ede okpụhọde ye nte isifende mme owo. Idụhe eke ekemede ndifen owo nte Jehovah. Kop se andiwet Psalm kiet eketịn̄de aban̄a Jehovah mi: “Ata edifen nnọ [oto] fi, man ẹkpebak fi.”a (Ps. 130:4) Akpanikọ edi oro. Eke Jehovah edi “ata edifen nnọ.” Enye edi owo emi owụtde nnyịn se ata edifen nnọ ọwọrọde. Ke ndusụk ufan̄ikọ ke N̄wed Abasi Usem Hebrew, ikọ emi mme andiwet ufan̄ikọ oro ẹdade ẹtịn̄ ẹban̄a nte Jehovah esifende owo edi ikọ emi owo mîkemeke ndida ntịn̄ mban̄a nte mme owo ẹsifende owo.

3. Didie ke nte Jehovah esifende owo okpụhọde ye nte isifende? (Isaiah 55:6, 7)

³ Jehovah ama efen owo, enye esisọhi idiọkn̄kpọ owo oro efep ofụri ofụri. Oro esinam ikeme ndifiak nnen̄ede n̄kpere enye. Enem nnyịn nte Jehovah esifende owo ofụri ofụri ye nte enye esinamde ntre ata ediwak ini.​—Kot Isaiah 55:6, 7.

4. Didie ke Jehovah an̄wam nnyịn inen̄ede idiọn̄ọ se ata edifen nnọ ọwọrọde?

⁴ Edieke nte Jehovah esifende owo okpụhọrede ye nte isifende, edinam didie in̄wan̄a nnyịn emi mîfọnke ima se ata edifen nnọ ọwọrọde? Jehovah ọnọ nnyịn mme uwụtn̄kpọ man an̄wan̄a nnyịn nte enye esifende owo. Imọn̄ ineme ndusụk mmọ ke ibuotikọ emi. Mmọ ẹyenam ikụt nte Jehovah esimende idiọkn̄kpọ nnyịn efep ndien kpa ke ukem ini oro, anam ikeme ndifiak n̄kpere enye. Nte isụk inemede mme uwụtn̄kpọ emi, se inemede ayanam inen̄ede ima edima Ete nnyịn emi esiwụtde nnyịn ke nsio nsio ediwak usụn̄ nte imọ ifende nnyịn.

JEHOVAH ESIMEN IDIỌKN̄KPỌ NNYỊN EFEP

5. Nso isitịbe Jehovah ama adahado ọnọ nnyịn mîdịghe efen mme idiọkn̄kpọ nnyịn?

⁵ Ke Bible, ediwak ini ẹsimen idiọkn̄kpọ ẹdomo ye ndodobi mbiomo. Kop se Edidem David eketịn̄de aban̄a mme idiọkn̄kpọ esie mi: “Mme ndudue mi ẹmedọk ẹbe ibuot mi; nte ndodobi mbiomo mmọ ẹmedobi ẹkan mi.” (Ps. 38:4) Mme anamidiọk ẹma ẹkabade esịt, Jehovah esidahado mîdịghe efen ọnọ mmọ. (Ps. 25:18; 32:5) Ikọ Hebrew emi ẹkabarede nte “dahado” m̀mê “fen nọ” ọwọrọ “ndidorode n̄kpọ mfep” m̀mê “ndimen n̄kpọ.” Ima inam idiọkn̄kpọ, esitie nte ata ndodobi mbiomo odoro nnyịn ke afara. Jehovah ama efen ọnọ nnyịn, esitie nte enye odorode nnyịn ndodobi mbiomo oro ke afara onyụn̄ emen efep.

6. Jehovah ama emen idiọkn̄kpọ nnyịn efep, idiọkn̄kpọ oro esiyom usụn̄ didie ọkpọn̄ nnyịn?

⁶ Bible etịn̄ uwụtn̄kpọ en̄wen emi owụtde adan̄a nte Jehovah esimende idiọkn̄kpọ nnyịn efep yak enen̄ede oyom usụn̄ ọkpọn̄ nnyịn. Psalm 103:12 ọdọhọ nnyịn ete: “Kpa nte edem usiahautịn oyomde usụn̄ ọkpọn̄ edem usoputịn, ntre ke enye enịm mme ndudue nnyịn oyom usụn̄ ọkpọn̄ nnyịn.” Edem usiaha-utịn ikpereke-kpere edem usoputịn; tutu amama mbiba oro ikemeke-keme ndidu itie kiet. Oro ọwọrọ ke usụn̄ emi Jehovah emende idiọkn̄kpọ nnyịn ọkpọn̄ nnyịn oyom usụn̄ ata eti-eti akan nte ikemede-keme ndikere. Oro owụt ke Jehovah esifen idiọkn̄kpọ nnyịn n̄kpọ isụhọke. Ikọ oro ọdọn̄ nnyịn esịt eti-eti!

7. Didie ke Bible owụt se Jehovah esinamde ye mme idiọkn̄kpọ nnyịn? (Micah 7:18, 19)

⁷ Kpa ye emi edide Jehovah esimen idiọkn̄kpọ nnyịn enịm ata anyan usụn̄ ntem ọkpọn̄ nnyịn, ndi enye esimụm esịn ke edọn̄? Ihih-o. Edidem Hezekiah ekewet ntem aban̄a Jehovah: “Afo omotop kpukpru mme idiọkn̄kpọ mi ọduọn̄ọ ke edem fo.” (Isa. 38:9, 17) Uwụtn̄kpọ oro ọwọrọ ke Jehovah esimen idiọkn̄kpọ mbon emi ẹkabarede esịt otop ọduọk, ifiakke ikese aba. Usụn̄ en̄wen emi ẹkemede ndikabade ikọ oro edi emi: “Amanam [mme idiọkn̄kpọ mi] ẹtie nte n̄kpọ emi mîtịbeke akanam.” Bible ada uwụtn̄kpọ en̄wen enen̄ede ọsọn̄ọ se itịn̄de oro. Edi ke Micah 7:18, 19. (Kot.) Ke itie oro, ẹdọhọ ke Jehovah emen mme idiọkn̄kpọ nnyịn otop esịn ke udem inyan̄. Ke eset, n̄kpọ ọkpọduọ odụk udem inyan̄, owo ikesifiakke ikụt n̄kpọ oro aba.

8. Nso ke ikpep ke ekpri ibuotikọ emi?

⁸ Mme uwụtn̄kpọ emi inemede ẹkpep nnyịn ke Jehovah ama efen nnyịn, enye efen ofụri ofụri, ntre ufọn idụhe nnyịn ndika iso nyak esịt amia nnyịn ufen. David ọkọdọhọ ke “mmọ oro ẹfende mme ukwan̄ido mmọ ẹnyụn̄ ẹfụkde mme idiọkn̄kpọ mmọ ẹkop inemesịt; owo oro Jehovah mîdibatke idiọkn̄kpọ esie inọ enye okop inemesịt.” Akpanikọ edi oro. (Rome 4:6-8) Ata edifen nnọ edi oro!

JEHOVAH ESIKWỌHỌDE IDIỌKN̄KPỌ NNYỊN EFEP

9. Mme uwụtn̄kpọ ewe ke Jehovah ada owụt nnyịn adan̄a nte enye ekemede ndifen mme idiọkn̄kpọ nnyịn?

⁹ Jehovah ada mme uwụtn̄kpọ en̄wen an̄wam nnyịn ikụt nte enye adade n̄kpa emi Eyen esie akakpade afak nnyịn ọkwọhọde idiọkn̄kpọ mbon emi ẹkabarede esịt efep. Bible etịn̄ nte Jehovah eyetde mme idiọkn̄kpọ oro onyụn̄ adararede mmọ. Oro anam anamidiọk asana. (Ps. 51:7; Isa. 4:4; Jer. 33:8) Jehovah ke idemesie etịn̄ se isitịbede enye ama anam oro ete: “Mme idiọkn̄kpọ mbufo ẹkpetie nte iduot, ẹyenam mmọ ẹfia nte snow; ẹkpeyịbe nte ididuot ọfọn̄, mmọ ẹyekabade ẹtie nte idet erọn̄.” (Isa. 1:18) Iduot m̀mê ndatndat n̄kpọ efen okpodụk ọfọn̄, ọsọsọn̄ ndiyet nsio. Edi Jehovah ada uwụtn̄kpọ oro ọsọn̄ọ ọnọ nnyịn ete ke ẹkeme ndiyet mme idiọkn̄kpọ nnyịn mfep tutu owo ikwe mmọ aba; ukpọk mbukpọn̄ mbukpọn̄ ntem, owo ikwe.

10. Ewe uwụtn̄kpọ efen ke Jehovah ada owụt adan̄a nte enye esitatde esịt efen nnyịn?

¹⁰ Ke ibuotikọ emi ekebede, ima itetịn̄ ke ẹmen idiọkn̄kpọ nnyịn ẹdomo ye “isọn.” (Matt. 6:12; Luke 11:4) Ntre kpukpru ini emi inamde idiọkn̄kpọ idian Jehovah, ntre ke isọn nnyịn oro okpon aka. Se ikamade enye okpon enyene ndịk! Edi Jehovah ama efen nnyịn, esitie nte enye abiat isọn emi ẹkpekebatde ẹte ke imakama enye efep ofụri ofụri. Enye isidịghe ama efen idiọkn̄kpọ nnyịn ama, enye edidọhọ: “Ẹdi ẹdikpe isọn emi ẹkamade.” Uwụtn̄kpọ oro enem eti-eti; anam ikụt ke Jehovah ama efen nnyịn, ke imesin̄wek iduọk!

11. Bible ndidọhọ ke ‘ẹsọhi mme idiọkn̄kpọ nnyịn ẹfep’ ọwọrọ nso? (Utom 3:19)

¹¹ Jehovah esibiat isọn emi ikamade efep, oro edi, efen idiọkn̄kpọ nnyịn. Edi enye esinam se ikande oro, enye esisọhi efep n̄ko. (Kot Utom 3:19.) Se nte etiede mi-o. Ẹkpebiat isọn ẹfep ke n̄wed, ẹyedrọ akamba kpan̄-kpan̄ (X) ntem ke itie emi ẹkewetde isọn oro. Kpa ye oro, ẹkeme ndisụk n̄kụt ibat okụk emi ẹkewetde ke idak kpan̄-kpan̄ oro. Edi ndisọhi n̄kpọ mfep itiehe ntre. Yak itịn̄ nte mmọn̄n̄wed eset ekesitiede man an̄wan̄a. Ẹkesibuak ukan̄, gọm, ye mmọn̄ ẹda ẹnam mmọn̄n̄wed. Owo ekeme ndimen kusa emi ẹma ẹkenyịni ke mmọn̄ otụk ke se ẹkewetde oro enye ọkwọhọde ofụri ofụri. Ntre, ẹma ‘ẹsọhi isọn ẹfep,’ se ẹkewetde oro owo isikwe aba ukpọk mbukpọn̄ mbukpọn̄; editie nte utọ isọn oro ikodụhe akananam. Enen̄ede enem nnyịn ndidiọn̄ọ ke Jehovah ama efen idiọkn̄kpọ nnyịn, enye esisọhi idiọkn̄kpọ oro efep ofụri ofụri, owo ikwe ukpọk mbukpọn̄ ntem!​—Ps. 51:9.

12. Uwụtn̄kpọ emi aban̄ade obubịt enyọn̄ ekpep nnyịn nso?

¹² Enyene uwụtn̄kpọ en̄wen emi Jehovah adade owụt nte imọ isikwọhọrede idiọkn̄kpọ nnyịn ifep. Enye ọdọhọ ete: “Ami nyọsọhi mme ndudue fo mfep nte n̄kpọ eke ndade obubịt enyọn̄ mfụk nnyụn̄ nsọhi mme idiọkn̄kpọ fo mfep nte n̄kpọ eke ndade obubịt enyọn̄ mfụk.” (Isa. 44:22) Jehovah ama efen nnyịn, esitie nte enye ada obubịt enyọn̄ ofụk mme idiọkn̄kpọ nnyịn oro; nnyịn ikwe mmọ aba, enye ke idemesie ikwe aba.

13. Jehovah ama efen mme idiọkn̄kpọ nnyịn, esitie nnyịn didie ke idem?

¹³ Nso ke mme uwụtn̄kpọ emi ẹkpep nnyịn? Jehovah ama efen mme idiọkn̄kpọ nnyịn, ikpanaha ika iso iyak esịt amia nnyịn ufen nte ẹdọhọ ke ẹsụk ẹkokụt idiọn̄ọ idiọkn̄kpọ oro ekpri ke idem nnyịn. Ẹma ẹda iyịp Jesus Christ ẹbiat ofụri isọn nnyịn ẹfep, owo ikwe ukpọk mbukpọn̄ ntem; editie nte utọ isọn oro idụhe akanam. Nte Jehovah esifende nnyịn edi oro ima ikabade esịt. Ata edifen nnọ edi oro.

JEHOVAH ESIFIAK ADA NNYỊN NTE UFAN

14. Jehovah ama ọdọhọ ke imefen nnyịn ofụri ofụri, nso ikeme ndinam inịm? (Se mme ndise n̄ko.)

¹⁴ Ata edifen emi Jehovah esifende mme idiọkn̄kpọ nnyịn anam ikeme ndifiak ndi ufan esie. Sia Jehovah esifende nnyịn ofụri ofụri, ikpanaha iyak esịt aka iso amia nnyịn ufen. Ikpanaha ndịk anam nnyịn ke Jehovah ke osụk esesịn n̄kpọ oro ke esịt, ke onyụn̄ oyom usụn̄ ndinọ nnyịn ufen. Nsa Abasi mbon-o! Jehovah ama ọdọhọ ke imefen nnyịn ofụri ofụri, nso ikeme ndinam inịm? Prọfet Jeremiah ọkọdọhọ ke Jehovah ọdọhọ ete: “Nyefen ndudue mmọ, ndinyụn̄ ntịghi aba mme idiọkn̄kpọ mmọ.” (Jer. 31:34) Ikọ emi Jeremiah eketịn̄de aban̄a Jehovah do ke apostle Paul akafiak etịn̄ ke Mme Hebrew 8:12. Edi nso ke ikọ oro enen̄ede ọwọrọ?

15. Ẹma ẹdọhọ ke Jehovah itịghi mme idiọkn̄kpọ nnyịn aba, ọwọrọ nso?

¹⁵ Ama okụt ikọ oro “ti” ke Bible, idịghe kpukpru ini ke esiwọrọ ke n̄kpọ afiak odụk owo ekikere m̀mê ke owo ke ekere n̄kpọ oro. Utu ke oro ekeme ndiwọrọ n̄ko ke owo anam n̄kpọ aban̄a n̄kpọ oro. Anamidiọk emi ọkọkọn̄ọde ke eto ekpere Jesus ekeben̄e Jesus ete: “Jesus, ti mi ke ini afo odụkde obio ubọn̄ fo.” (Luke 23:42, 43) Ikọ esie ikọwọrọke yak Jesus ekere aban̄a imọ ini imọ isụk itịn̄de ikọ oro ye enye do. Se Jesus ọkọbọrọde enye ama owụt ke imọ iyanam n̄kpọ yak anamidiọk oro eset. Ntre Jehovah ama ọdọhọ ke imọ itịghi mme idiọkn̄kpọ nnyịn aba, ọwọrọ ke enye idinọhọ nnyịn ufen. Ididịghe ini ko ke iso, enye okobụhọde idiọkn̄kpọ emi enye ama ekefen nnyịn edikama amia nnyịn ufen.

16. Ewe uwụtn̄kpọ ke Bible ada anam ikụt ke Jehovah ama efen nnyịn, ke esitie nte ẹsio nnyịn ke ufụn?

¹⁶ Enyene uwụtn̄kpọ en̄wen emi Bible adade anam ikụt ke Jehovah ama efen nnyịn, ke esitie nte ẹsio nnyịn ke ufụn. Sia idide mme anamidiọk, ndiọi n̄kpọ ẹsinyụn̄ ẹdọn̄de nnyịn, idi “ifịn idiọkn̄kpọ.” Edi Jehovah ama efen ọnọ nnyịn, itie nte ifịn emi “[ẹbọhọde] idiọkn̄kpọ” m̀mê emi ẹma ẹkesio ke ufụn idiọkn̄kpọ. (Rome 6:17, 18; Edi. 1:5) Jehovah ama efen mme idiọkn̄kpọ nnyịn, esinenem nnyịn ke idem, isidara nte ofụn emi ọwọrọde ke ufụn.

17. Didie ke ndifen mme idiọkn̄kpọ nnyịn anam ẹkọk nnyịn udọn̄ọ? (Isaiah 53:5)

¹⁷ Kot Isaiah 53:5. Akpatre uwụtn̄kpọ emi idinemede emen nnyịn odomo ye mbon emi ẹdọn̄ọde udọn̄ọ-ada-owo-ibuot. Jehovah ndikayak Eyen esie edikpa afak nnyịn anam Bible ọdọhọ ke ẹkọk nnyịn udọn̄ọ. (1 Pet. 2:24) Ima inam idiọkn̄kpọ, itie nte mbon emi ẹdọn̄ọde. Ufak anam ẹkọk nnyịn udọn̄ọ oro yak ifiak ikeme ndikpere Jehovah. Owo emi ẹkọkde enye ata idiọk udọn̄ọ esikop inemesịt utọ oro idụhe. Ukem oro n̄ko, Jehovah ama efen mme idiọkn̄kpọ nnyịn yak ikeme ndifiak ndian idem ye enye, esịt esinem nnyịn eti-eti.

UFỌN EMI IDIADE KE NTAK EMI JEHOVAH EFENDE ỌNỌ NNYỊN

18. Se inemede iban̄a nsio nsio uwụtn̄kpọ ke Bible emi ẹwụtde nte Jehovah esifende nnyịn ekpep nnyịn nso? (Se n̄ko ekebe emi, “Nte Jehovah Esifende Nnyịn.”)

¹⁸ Imeneme nsio nsio uwụtn̄kpọ ke Bible emi ẹban̄ade nte Jehovah esifende nnyịn, edi nso ke ikpep? Se ikpepde edi ke Jehovah ama efen nnyịn, enye efen ofụri ofụri. Ke ini iso, enye idifiakke imia nnyịn ufen ke idiọkn̄kpọ oro. Oro anam ikeme ndifiak n̄kpere Ete nnyịn emi odude ke heaven. N̄kpọ en̄wen edi ke nnyịn ifreke ke ata edifen emi Jehovah efende nnyịn edi enọ. Ima emi enye amade mme anamidiọk ye mfọnido emi owo mîdotke emi enye ọfọnde ye mmọ anam enye ọnọ enọ oro. Itoho ke ntịm-nnam, sia inyeneke se owo ndomokiet etịmde anam emi anamde enye odot ndibọ enọ oro.​—Rome 3:24.

19. (a) Ikpenen̄ede ikọm Jehovah ke nso? (Rome 4:8) (b) Idineme nso ke ibuotikọ emi etienede?

¹⁹ Kot Rome 4:8. Bible okot Jehovah, Abasi “ata edifen nnọ”! Edi se nnyịn owo kiet kiet inen̄erede ikọm Jehovah nte enye edide utọ Abasi oro. (Ps. 130:4) Edi enyene akpan n̄kpọ emi edide nnyịn mînamke, Abasi idifenke inọ nnyịn. Jesus ama anam akpan n̄kpọ oro an̄wan̄a. Enye ọkọdọhọ: “Mbufo mîfenke inọ mme owo ke mme idiọkn̄kpọ mmọ, Ete mbufo idinyụn̄ ifenke inọ mbufo ke mme idiọkn̄kpọ mbufo.” (Matt. 6:14, 15) Ke ntak oro, ana ikpep ndifen mbon en̄wen nte Jehovah esifende nnyịn. Edi didie ke ikeme ndinam oro? Ibuotikọ emi etienede oyowụt nnyịn.