‘Ọfọn Nnyịn Ndisan̄a N̄kpere Abasi’!

1-2. (a) Nso ke ana inam man idi ufan ye owo inyụn̄ inen̄ede ikpere enye? (b) Idineme nso ke ibuotikọ emi?

NDI emenyene ufan emi mbufo mbiba ẹtiede nte ekop ye idịbi? Akadaha didie yak ẹdikpere ntre? Ana-edi ama esiwak ndisio ini ndu ye enye, ọdiọn̄ọ mme n̄kpọ emi afịnade enye, se isọn̄de enye, se enye amade, ye se enye mîmaha. Ama okụt nti edu esie emi akpamade ndikpebe. Ama edima ufan fo oro.

² Okpoyom ndidi ufan ye owo nnyụn̄ nnen̄ede n̄kpere enye, ana esisio ini odu ye enye. Edidi ntre n̄ko okpoyom ndidi ufan ye Jehovah Abasi nnyụn̄ nnen̄ede n̄kpere enye. Ibuotikọ emi eyeneme nte ikemede ndinen̄ede n̄kpere Abasi nnyịn, ye nsio nsio ufọn emi idinyenede ima inam ntre. Ẹyak ibem iso ineme ntak emi ọfọnde inen̄ede ikpere Jehovah emi edide akakan Ufan nnyịn.

3. Ntak emi ọfọnde isitie ikere mme ufọn emi ididiade ima ikpere Jehovah? Nọ uwụtn̄kpọ.

³ Imenịm ke emenyịme ke ọfọn idomo ndikpere Jehovah. Edi ikpetie ikere se inamde enen̄ede ọfọn ndinam ntre, oro ayanam ọdọn̄ nnyịn ndika iso ndomo ndinen̄ede n̄kpere enye. (Ps. 63:6-8) Kop uwụtn̄kpọ mi ise. Imọdiọn̄ọ ke ikpesidia nti n̄kpọ, isịn̄ede idem, inen̄ede iduọk odudu, inyụn̄ in̄wọn̄ mmọn̄ awak ekem, ke kpukpru oro ẹdi ke ufọn nnyịn. Kpa ye oro, ediwak owo inen̄ekede idọn̄ enyịn ke se itịn̄de oro, nsọn̄idem mmọ inyụn̄ ibeheke mmọ. Edi ima isiwak ndikere ufọn emi nnyịn nditiene mbet nsọn̄idem edinamde inọ nnyịn, oro ayanam inen̄ede ibiere nditiene mbet oro. Kpa ntre ke edi ye nnyịn ndikpere Jehovah. Imekeme ndidiọn̄ọ ke ndikpere enye ọfọn ye nnyịn, edi nnyịn nditie n̄kere mme ufọn emi ididiade ima inam ntre ekeme ndinam enen̄ede ọdọn̄ nnyịn ndika iso n̄kpere Ufan nnyịn.​—Ps. 119:27-30.

4. Andikewet Psalm 73:28 eketịn̄ nso?

⁴ Kot Psalm 73:28. Andikewet Psalm 73 ekedi eyen Levi emi ẹkemekde ẹte ẹsitiene ọkwọ ikwọ ke temple Jehovah. Ana-edi enye ama ọsọn̄ọ ada atuak ibuot ọnọ Jehovah ke ediwak isua. Kpa ye oro, enye ama osụk okụt ke ọfọn iti idem imọ ye mbon en̄wen ke “ndisan̄a n̄kpere Abasi” ọfọn ye imọ ye mmọ n̄ko. Nso idi ndusụk ufọn emi owo ekemede ndidia enye ama anam ntre?

“NDISAN̄A N̄KPERE ABASI” ESINAM IKOP INEMESỊT

5. (a) Ntak emi isikopde inemesịt ima inen̄ede ikpere Jehovah? (b) Da se idude ke Mme N̄ke 2:6-16 nọ ndusụk uwụtn̄kpọ emi owụtde nte ọniọn̄ Jehovah ekemede ndinyene ufọn nnọ fi nnyụn̄ n̄kpeme fi.

⁵ Nte itịmde ikpere Jehovah, ntre ke idinen̄ede ikop inemesịt. (Ps. 65:4) Awak ntak emi ikọ oro edide akpanikọ. Ntak kiet edi ke ima inam mme item ọniọn̄ emi ẹdude ke Bible emi edide Ikọ esie, imesidia ufọn. Utọ ọniọn̄ oro isiyakke idụk ndụk m̀mê inam n̄kpọ emi ekemede ndinam ikọnọ idem unan, inyụn̄ iyakke ikanam ikpọ ndudue. (Kot Mme N̄ke 2:6-16.) Bible ọdọhọ: “Owo emi okụtde ọniọn̄ ye owo emi enyenede mbufiọk, okop inemesịt.” Ikọ oro edi ofụri akpanikọ.​—N̄ke 3:13.

6. Nso ikanam andikewet Psalm oro okûkop idatesịt aba?

⁶ Idem mme ufan Jehovah ẹsifụhọ ndusụk ini; enye oro edi ntre. Ini andikewet Psalm 73 ọkọtọn̄ọde ndikere mban̄a mme n̄kpọ emi ẹketiede enye nte ẹdi utụk, esịt ikadatke enye aba. Enye ama ọtọn̄ọ ndiyat esịt onyụn̄ esịn mbon en̄wen enyịn, sia ke ekikere esie eketie enye nte ke uwem akakam efere ye ndiọi owo emi mîbeheke mmọ m̀mê Abasi do m̀mê idụhe, emi mîkonyụn̄ imaha ndidu uwem nte Abasi ọdọhọde. Enye ekekere ke mbon afai ye mbon ntan̄idem ẹforo ẹkan, mmọ ke idem ọsọn̄ akan, mmọ ke ufen mîkam isịmke. Edi se enye ekekerede oro ikenenke. (Ps. 73:3-7, 12) Ama enen̄ede afịna andikewet Psalm oro tutu enye ekere m̀mê ofụri emi imọ iduọde idaha ida inam n̄kpọ Abasi akam edi ndiduọn̄ọ inụn̄ ke nsia ebiọn̄. Kop se ikọwọrọde enye ke inua ke ntak emi enye okofụhọde. Enye ọkọdọhọ ete: “Ke akpanikọ edi ke ikpîkpu ke nnam esịt mi asana nnyụn̄ nyet ubọk mi ndiwụt ke nduehe.”​—Ps. 73:13.

7. Mfụhọ okpoyom ndibọ nnyịn inemesịt, nso ke ikeme ndinam? (Se n̄ko ndise.)

⁷ Andikewet Psalm oro ikayakke mfụhọ ọbọp enye ukot ye ubọk enịm. Enyene se enye akanamde. Enye ama “[odụk] akwa edisana ebiet Abasi.” Do ke Jehovah akan̄wam enye ekere n̄kpọ ọfọn. (Ps. 73:17-19) Ima ifụhọ, Jehovah emi edide akakan Ufan nnyịn ọdiọn̄ọ. Ikpọbọn̄ akam idọhọ enye ada nnyịn usụn̄, inyụn̄ inyịme un̄wam emi enye adade Ikọ esie ye esop an̄wam nnyịn, oro ọyọsọn̄ọ nnyịn idem, iyonyụn̄ ikeme ndiyọ se inamde ifụhọ. Ekpededi uwak ekikere ẹtịmede nnyịn esịt, Jehovah ọyọdọn̄ nnyịn esịt onyụn̄ anam esịt ana nnyịn sụn̄.​—Ps. 94:19.a

“NDISAN̄A N̄KPERE ABASI” ESINAM UWEM NNYỊN ENYENE IBUOT ONYỤN̄ ANAM INYENE IDOTENYỊN

8. Tịn̄ mme akpan usụn̄ en̄wen emi nnyịn ndisan̄a n̄kpere Abasi esinyenede ufọn ọnọ nnyịn.

⁸ Enyene akpan usụn̄ iba en̄wen emi ndisan̄a n̄kpere Abasi esinyenede ufọn ọnọ nnyịn. Akpa, enye anam uwem nnyịn enyene ibuot. Ọyọhọ iba, enye anam inen̄ede inyene idotenyịn ke se Abasi ọkọn̄wọn̄ọde aban̄a ini iso eyetịbe. (Jer. 29:11) Ẹyak itịm ise ufọn iba emi.

9. Didie ke nnyịn ndisan̄a n̄kpere Jehovah anam uwem nnyịn enyene ibuot?

⁹ Nnyịn ndisan̄a n̄kpere Jehovah anam uwem nnyịn enyene ibuot. Ediwak owo emi ẹdọhọde mfịn ke Abasi idụhe ẹkere ke ufọn uwem emi idụhe, ke utịt utịt kpukpru owo ẹyekpan̄a ẹkụre ke ererimbot emi. Edi se ikpepde ke Ikọ Abasi anam inen̄ede inịm ke Abasi “odu ye nte ke enye edi andinọ mbon oro ẹnen̄erede ẹyom enye utịp.” (Heb. 11:6) Idem mfịn emi, uwem enen̄ede enem nnyịn sia ituak ibuot inọ Jehovah Ete nnyịn emi odude ke heaven. Ntak emi enye okobotde nnyịn edi oro.​—Deut. 10:12, 13.

10. Psalm 37:29 owụt ke mbon emi ẹdoride enyịn ke Jehovah ẹdori enyịn ndinyene nso ke ini iso?

¹⁰ Se ediwak owo mfịn ẹdoride enyịn edi utom, ndidọ n̄wan m̀mê ebe nnyene nditọ, ye ndin̄wana n̄kpọ nnịm man n̄kpọn̄ ima ikpọn̄ utom, mmimọ inyene se idade idu uwem, okụre ke oro; Abasi isịneke ke se ibatde oro. Edi mme asan̄autom Jehovah ẹdori enyịn ke enye. (Ps. 25:3-5; 1 Tim. 6:17) Imọbuọt idem ye Abasi emi nnyịn ima ikasan̄a ikpere inyụn̄ inịm se enye ọn̄wọn̄ọde ndinam nnọ nnyịn ke ini iso. Se idoride enyịn iban̄a ke ini iso esịne nte idituakde ibuot inọ enye ke nsinsi nsinsi ke Paradise.​—Kot Psalm 37:29.

11. Ima isan̄a ikpere Abasi, esitie nnyịn didie ke idem, esinyụn̄ etie enye didie ke idem?

¹¹ Ediwak usụn̄ en̄wen do emi nnyịn ndisan̄a n̄kpere Abasi esinyenede ufọn ọnọ nnyịn. Ke uwụtn̄kpọ, Jehovah ọn̄wọn̄ọ ndifen mme idiọkn̄kpọ mbon emi ẹkabarede esịt, emi ẹnyụn̄ ẹkperede enye. (Isa. 1:18) Ke ntak oro, ufọn idụhe nnyịn ndikpa ekikere mban̄a ndiọi n̄kpọ emi ikanamde ke ini edem, inyụn̄ ibiom utọ ukụt oro isan̄a. (Ps. 32:1-5) Imekeme ndinam esịt enem Jehovah; oro oyonyụn̄ anam esịt enem nnyịn. (N̄ke 23:15) Imenịm ke afo emekeme ndikere mban̄a mme edidiọn̄ en̄wen emi ikemede ndinyene ke ntak emi idide ufan ye Abasi inyụn̄ isan̄ade ikpere enye. Edi akpanam nso man aka iso enen̄ede ekpere Abasi?

SE IKPANAMDE MAN IKA ISO ‘ISAN̄A IKPERE ABASI’

12. Nso ke anam man enen̄ede ekpere Abasi?

¹² Ekpedi ama ana baptism onyụn̄ edi Christian, ọwọrọ amananam n̄kpọ aka anyan man ekpere Jehovah. Ama ekpekpep ediwak n̄kpọ emi ẹdide akpanikọ aban̄a Jehovah Abasi ye Christ Jesus, akabade esịt ọkpọn̄ ndiọi n̄kpọ emi ekesinamde, enen̄ede ọbuọt idem ye Abasi, onyụn̄ odomo ndidu uwem nte enye ọdọhọde ẹdu. Edi ikpoyom ndinen̄ede n̄kpere Abasi, ana ika iso inam mme n̄kpọ oro.​—Col. 2:6.

13. Ewe n̄kpọ ita ẹkeme ndin̄wam nnyịn ika iso inen̄ede ikpere Jehovah?

¹³ Nso idin̄wam nnyịn ika iso inen̄ede ikpere Jehovah? (1) Ana ika iso ikot Bible inyụn̄ ikpekpep. Nte isụk inamde ntre, iyekpep mme akpan n̄kpọ iban̄a Abasi. Edi inaha itre do. Utu ke oro, ana idomo ndidiọn̄ọ se Abasi oyomde inam, inyụn̄ ida mme item emi odude ke Ikọ esie idu uwem nte enye ọdọhọde idu. (Eph. 5:15-17) (2) Ana itie ikere ediwak n̄kpọ emi ẹwụtde ke enye ama nnyịn, man ikeme ndinen̄ede mbuọt idem ye enye. (3) Ana ika iso isua mme n̄kpọ emi ẹsiyatde Jehovah esịt, inyụn̄ ikpeme man nnyịn ididi ufan ye mbon emi ẹsinamde utọ mme n̄kpọ oro.​—Ps. 1:1; 101:3.

14. Didie ke 1 Corinth 10:31 owụt ndusụk n̄kpọ emi ikemede ndinam kpukpru usen man inem Jehovah esịt? (Se mme ndise n̄ko.)

¹⁴ Kot 1 Corinth 10:31. Ọfọn yak ikûkpa mba ndinam mme n̄kpọ emi ẹsinemde Jehovah esịt. Se itịn̄de oro ikụreke ke ndika ukwọrọ-ikọ nnyụn̄ ndụk mbono esop. Se inamde kpukpru usen ana edi se inemde Jehovah esịt. Ke uwụtn̄kpọ, edieke ibuanade se inyenede ye mbon en̄wen inyụn̄ isịnke n̄kari ke se ededi emi inamde, imesinam esịt enem Jehovah. (2 Cor. 9:7; Heb. 13:18) N̄kpọ en̄wen edi ke enye iyomke ida uwem emi enye ọnọde nnyịn ibre mbre. Edieke nnyịn mîdiaha inyụn̄ in̄wọn̄ke n̄kpọ ibe ubọk, edieke inyụn̄ isede iban̄a idem nnyịn ke usụn̄ ekededi emi ikemede, iyenen̄ede ikpere Enye emi ọkọnọde nnyịn uwem. Kpukpru se inamde man inem Jehovah esịt, idem ye mme n̄kpọ emi ẹtiede nte ẹdi n̄kpri n̄kpri n̄kpọ, ayanam enye ama nnyịn eti-eti.​—Luke 16:10.

15. Jehovah oyom inam n̄kpọ didie ye mbon en̄wen?

¹⁵ Jehovah ọfọn ye ndinen owo ye mme anam ukwan̄n̄kpọ. (Matt. 5:45) Nte enye oyomde nnyịn ifọn ye mbon en̄wen edi oro n̄ko. Ke uwụtn̄kpọ, ikpanaha ‘itịn̄ n̄kpọ ibiat owo ndomokiet, ikûnyụn̄ udi mbon en̄wan’; akpana “[itie] ifụre ifụre ye kpukpru owo.” (Titus 3:2) Ke ntak oro, ikpanaha ikere ke imọfọn ikan mbon en̄wen sia mmọ mîdịghe Mme Ntiense Jehovah. (2 Tim. 2:23-25) Ima isifọn ido ye kpukpru owo inyụn̄ idiọn̄ọ nte inamde n̄kpọ ye mmọ, iyenen̄ede ikpere Jehovah.

IMEKEME NDISAN̄A “N̄KPERE ABASI” IDEM KE INI INAMDE NDUDUE

16. Eketie didie andikewet Psalm 73 ke idem nte ini akakade?

¹⁶ Ekpedi ekedi aka ko, enye ọtọn̄ọ nditie fi nte udotke se Jehovah amade, edinam didie? Se ima ikeneneme owụt ke mbiet n̄kpọ oro ama etịbe ọnọ andikewet Psalm 73. Kop nte enye ekesemede idem mi: “Akayak esisịt ukot ekpefebede mi, ikpat mi ama ekpere ndifiọnọde.” (Ps. 73:2) Enye akada inua esie ọdọhọ ke “esịt ama ọdiọk” imọ, imọ inyụn̄ ‘inana ibuot’ nte “unam” ke iso Jehovah. (Ps. 73:21, 22) Ndi ndudue esie ama anam enye ọdọhọ ke eke imọ okụre, ke imọ idotke se Jehovah amade aba?

17. (a) Idem ke ini idem ekenen̄erede emem andikewet Psalm oro, nso ke enye akanam? (b) Nso ke ikeme ndikpep nto mbụk esie? (Se mme ndise n̄ko.)

¹⁷ Ekpededi andikewet Psalm oro ekekere ke Jehovah eyet ubọk ọkpọn̄ imọ, ekeme ndidi enye ikekereke ntre yak ebịghi. Etie nte ini idem ekenen̄erede emem enye, enye ama okụt ke edi se imọ inen̄ede ikpere Abasi. Se enye eketịn̄de anam idọhọ ntre. Enye ọkọdọhọ ete: “Edi ami ndodu ye afo [Jehovah] kpukpru ini; afo omomụm mi ubọk nnasia. Afo ayada mi usụn̄ ke item fo, ekem ada mi esịm ubọn̄.” (Ps. 73:23, 24) Ama etie nnyịn nte ke nnyịn inen̄ekede ibuọt idem ye Jehovah aba mîdịghe etie nte idem emem nnyịn ke ntak ndudue nnyịn, yak nnyịn n̄ko idọhọ Jehovah ọsọn̄ọ nnyịn idem. (Ps. 73:26; 94:18) Ekpededi ukot efebede nnyịn ekpri, imekeme ndinyọn̄ mbịne Jehovah inyụn̄ inịm ke enye “[esinyịme] ndifen nnọ.” (Ps. 86:5) Ini ikpetịmde ikpere Abasi nnyịn edi ini emi idem enen̄erede emem nnyịn.​—Ps. 103:13, 14.

ẸYAK ‘ISAN̄A IKPERE ABASI’ KE NSINSI NSINSI

18. Ntak emi ikemede ndidọhọ ke inyeneke nte ikemede ndikpere Jehovah yak edi ke imekpere enye ikaha?

¹⁸ Inyeneke nte ikemede ndikpere Jehovah yak edi ke imekpere enye ikaha, inyụn̄ inyeneke nte ikemede ndidiọn̄ọ enye yak edi ke imọdiọn̄ọ enye ima. Bible ọdọhọ ke mme usụn̄ Jehovah, ọniọn̄ esie, ye ifiọk esie “ayan̄a owo ndifiọk.”​—Rome 11:33.

19. Didie ke se mme Psalm ke ikpehe emi ọsọn̄ọ nnyịn idem?

¹⁹ Psalm 79:13 ọdọhọ ete: “Amaedi nnyịn ikọt fo ye ufene emi afo ọbọkde, nnyịn iyọkọm fi ke nsinsi; nnyịn iyatan̄a itoro fo ke ofụri emana.” Nte osụk akade iso enen̄ede ekpere Abasi, afo n̄ko emekeme ndinen̄ede nnịm ke enye ọyọdiọn̄ fi ke nsinsi nsinsi, omonyụn̄ ekeme nditịn̄ uko uko ete: “Abasi edi akwa itiat esịt mi ye udeme mi ke nsinsi.”​—Ps. 73:26.