Ndi Emeti?
Ndi ama etịn̄ enyịn okot mme Enyọn̄-Ukpeme isua emi? Ọfọn, se m̀mê emekeme ndibọrọ mme mbụme emi:
Nso isinam ọdọn̄ nnyịn ndinọ Jehovah ubọn̄?
Isinọ Jehovah ubọn̄ sia imenen̄ede ikpono enye inyụn̄ inen̄ede ima enye. Ntak en̄wen edi ke imoyom mbon en̄wen ẹdiọn̄ọ n̄kpọ ẹban̄a enye.—w25.01, p. 3.
Owo akpanam se ibiakde nnyịn, nso idin̄wam nnyịn inen̄ede ifen enye?
Nnyịn idinamke nte inyeneke se itịbede; edi nnyịn ndisio n̄kpọ oro mfep ke esịt nnyụn̄ ntre ndiyat esịt idiyakke ubiak oro anam ikọdiọk uwem ye mbon en̄wen.—w25.02, p. 15-16.
Ntak emi Mark emi ekedide mbet Jesus edide eti uwụtn̄kpọ ọnọ mme brọda emi ẹdide n̄kparawa?
Mark ama enyịme ndinam n̄kpọ nnọ mbon en̄wen. Kpa ye edide n̄kpọ ama etịbe emi etiede nte ke ama abiak enye, ke n̄kpọ onyụn̄ ọbọhọ enye abiara, oro ikakpanke enye ndinam n̄kpọ nnọ nditọ-ete esie. Enye ama ekpere Paul ye nditọ-ete emi ẹkesọn̄de idem ke esop, emi ẹkenyụn̄ ẹnamde n̄kpọ ẹnọ Jehovah ke ediwak isua.—w25.04, p. 27.
Ini Jesus ọkọdọhọde ke akam esie: “Ami [mmanam] mmọ ẹfiọk enyịn̄ fo,” nso ke ikọ esie ọkọwọrọ? (John 17:26)
Mme mbet Jesus ẹma ẹdọdiọn̄ọ enyịn̄ Abasi. Edi enye akanam mmọ ẹdiọn̄ọ utọ Owo emi Abasi emi ekerede Jehovah edide, esịnede se Enye anamde, mme edu Esie, ye mme n̄kpọ emi Enye aduakde ndinam.—w25.05, p. 20-21.
Ikposụhọde idem, nso ke idinyịme?
Iyenyịme ke enyene mme n̄kpọ emi nnyịn mîdiọn̄ọke. Ke uwụtn̄kpọ, nnyịn idiọn̄ọke ini emi utịt edidide m̀mê nte Jehovah edimade ndinam n̄kpọ ini oro. Nnyịn idiọn̄ọke n̄ko se iditịbede n̄kpọn̄ m̀mê adan̄a nte Jehovah ọdiọn̄ọde nnyịn eketre.—w25.06, p. 15-18.
Nso ikeme ndin̄wam nnyịn idia ufọn ito ibuotikọ emi ikotde m̀mê utịn̄ikọ ofụri owo emi ikopde?
Imekeme ndibụp idem nnyịn ite: ‘Nso ke ẹda ẹnam mbon emi ẹnamde n̄kpọ emi ẹnọ ẹkụt ke se Bible etịn̄de edi akpanikọ? Ndi enyene eti uwụtn̄kpọ emi n̄kemede ndida n̄kpep owo n̄kpọ? Anie ekpenen̄ede ama ibuotikọ emi?’—w25.07, p. 19.
Nte Abasi akanamde n̄kpọ ye David ekpep nnyịn nso aban̄a nte Abasi esifende owo?
David ama anam ikpọ idiọkn̄kpọ, edi ke enye ama ekenen̄ede akabade esịt, Jehovah ama efen enye. (1 Ndi. 9:4, 5) Abasi ama efen idiọkn̄kpọ, enye isitịghi se anamidiọk oro akanamde m̀mê ndimụm nsịn ke edọn̄ man akama amia enye ufen ke ini iso.—w25.08, p. 17.
Ekpedi enyene se ekpepde owo ke Bible emi osụk ọsọn̄de ndin̄wan̄a enye, nso ke ekeme ndinam?
Ekpedi enyene n̄kpọ emi ekpepde owo ke Bible emi osụk ọsọn̄de ndin̄wan̄a enye, be kan̄a kpọn̄ enye oro, aka ko fiak dikpep n̄kpọ oro.—w25.09, p. 24.
Bible ọdọhọ ke idiọkn̄kpọ enyene “abian̄a abian̄a odudu.” (Heb. 3:13) Didie ke edi ntre?
Idiọkn̄kpọ ekeme ndinam esidọn̄ nnyịn ndinam n̄kpọ emi mîfọnke. Enye ekeme n̄ko ndinam isiwak ndinyene eyịghe, utọ nte m̀mê Abasi enen̄ede ama nnyịn.—w25.10, p. 16.
Ewe n̄kpọ ita ẹkeme ndin̄wam nnyịn ibọn̄ akam yak enen̄ede oto nnyịn esịt?
(1) Ndikere mban̄a mme edu Jehovah. (2) Ndikere se idide akpan mfịna emi inyenede, utọ nte m̀mê anie ke ana ifen inọ, inyụn̄ isịn ke akam. (3) Ndibọn̄ akam yak ebịghi. Oro ayanam ikeme ndinen̄ede ntịn̄ nte etiede nnyịn ke idem nnọ Jehovah.—w25.10, p. 19-20.
Didie ke ikeme ndin̄wam mbon emi ẹma ẹkesọn̄?
Imekeme ndisika n̄kese mmọ nnyụn̄ n̄kot mmọ ke fon. Imekeme n̄ko ndisan̄a ye mmọ n̄kokụt dọktọ. Mîdịghe imekeme ndidiana ye mmọ ikwọrọ ikọ ke nsio nsio usụn̄.—w25.11, p. 6-7.
Nso ye nso idi akpan n̄kpọ ke ndọ Christian, emi anamde ẹkpono Abasi?
Tiene ibet ukara emi aban̄ade ndọ. Kụt ete ke se ẹnamde ke itie udianndọ ye ke itie usọrọ ndọ owụt ke ẹmenyene mme edu emi spirit Abasi esinamde owo enyene. Kûyak ọfọn̄ fo edi okop-etop-edi-ndise, nyụn̄ kụt ete ke unamke se mbon edem mbufo ẹsinamde, emi N̄wed Abasi akpande. Ini ẹsụk ẹtịmde ndọ mbufo, nam ẹnen̄ede ẹdiọn̄ọ nte ẹyomde ẹnam n̄kpọ ke ndọ mbufo.—w25.12, p. 21-24.