Ndi Mmafịna Idem N̄kaha Mban̄a Nte Ntiede?

Mbụme: Ndi mmafịna idem n̄kaha?

1. Ewe ke otu emi owụt nte etiede fi ke idem?

   • Akananam mmaha nte ntiede.

   • Ndusụk ini mmesima nte ntiede.

   • Mmama nte ntiede kpukpru ini.

2. Nso ke akpama ndikpụhọ ke idem fo?

   • Uniọn̄

   • Ubom

   • Ekpatidem

   • Idet

   • Kọlọ ikpọkidem

   • Etak afara

   • N̄kpọ efen

3. Wet n̄kpọ yọhọ mme udịmikọ emi.

   Mmesisua idem mi . . .

   • mma ndọk nda ke udomon̄kpọ.

   • mma nse idem ke ukụtiso.

   • mma mmen idem ndomo ye mbon en̄wen (mme ufan mi, mbon fim).

4. Wet n̄kpọ yọhọ mme udịmikọ emi.

   Nsise nte ndobide . . .

   • kpukpru usen.

   • kpukpru urua.

   • ke ini ke ini.

5. Ewe ke otu emi owụt nte etiede fi ke idem?

   • Owo emi mîmaha nte enye etiede. (Uwụtn̄kpọ: “Ini eke nsese idem mi ke ukụtiso, nsikere ke mmokpon mbiara. Mmetie biọn̄ tutu man ntek.”—Serena.)

   • Owo emi mîfịnake idem iban̄a nte enye etiede. (Uwụtn̄kpọ: “Idịghe kpukpru n̄kpọ ke idem nnyịn ke idima, ana ida ndusụk n̄kpọ nte ikụtde. Ufọn idụhe owo nditie mfịna idem ke n̄kpọ emi enye mîkemeke ndikpụhọde.”—Natanya.)

Bible ọdọhọ ‘ikûkere iban̄a idem nnyịn ikan nte nnyịn ikpekerede.’ (Rome 12:3) Ọwọrọ ke oyom osụk ekere aban̄a idemfo edi okûyak ebe ubọk. N̄kọ emi esinam otụk edet onyụn̄ asana idem. Utọ enye emi idiọkke.

Akpanam nso edieke mûmaha nte etiede onyụn̄ afịnade idem akaha? Emekeme ndibụp idemfo ete . . .

‘Ntak emi mmemmaha nte ntiede?’

Ediwak ntak ẹdu utọ nte:

• Se owo okụtde ke magazine ye TV. “Nnyịn mme uyen imesikụt ediwak ndise emi ẹnamde ikere ke ana inyene esan̄ esan̄ idem inyụn̄ ibọbọbọ isat kpukpru ini. Enye anam edieke nnyịn mîsịneke n̄kpọ mîdịghe ikere ke etie nte imokpon ikaha, nnyịn isua idem nnyịn!”—Kellie.

• Nte ete ye eka owo ẹnamde n̄kpọ. “Se n̄kụtde edi ke edieke eka afịnade idem akaha, eyen esie an̄wan esinyụn̄ anam kpa ntre. Ete okponyụn̄ anam ntre, eyen esie eren etiene anam.”—Rita.

• Owo ndikere ke imọ iwọrọke n̄kpọ. “Mbon emi ẹsifịnade idem ẹkaha ẹsiyom ẹtoro mmimọ kpukpru ini. Akakak mi ndinam n̄kpọ ye utọ mbon oro!”—Jeanne.

Kpa ye oro inọde nsio nsio ntak mi, emekeme ndisụk mbụp ete . . .

‘Ndi akpana n̄kpụhọ nte ntiede?’

Se mi se ndusụk ubọkn̄ka fo ẹtịn̄de.

“Udukemeke ndikpụhọde kpukpru se mûmaha ke idem fo, ntre da idem fo nte onyụn̄ okụtde. Edieke anamde ntre, mme owo ẹdikere ke okwo ọfọn ama.”—Rori.

“Nam se ekekeme man idem ọsọn̄ fi. Idem ama ọsọn̄ fi, idem eyeye fi. Edieke owo ọkpọn̄de ndima utọ owo emi afo edide ọkọdọhọ ke imọ imaha nte etiede, owo oro imaha fi ke ofụri esịt.”—Olivia.

Se anade eti: Nam se ekemede. Kûfịna idem uban̄a se mûkemeke ndikpụhọde. Ama afịna idem akaha, emekeme ndinam idem fo ibak. (Kot “Mbụk Julia.”)

Ama ama nte etiede, udûnyeneke mfịna. N̄kaiferi emi ekerede Erin ọdọhọ: “Enyene mme n̄kpọ emi mmemmaha ke idem mi. Se n̄kụtde edi ke mma ntie n̄kere mme n̄kpọ emi, ke esịt esidiọk mi. Ntre, se nnamde idahaemi edi ndisịn̄ede idem nnyụn̄ n̄kpeme se ndiade. Se isụhọde oko ifịnake mi aba.”

Mfọnn̄kan n̄kpọ emi akpanamde ọnọ idem!

Edieke amade nte etiede, oyokụt ke esịt ayana fi sụn̄, idem onyụn̄ eye fi. Bible ekeme ndin̄wam fi. Bible ọdọhọ anam mme n̄kpọ emi:

• Ma nte etiede. “Se enyịn okụtde ọfọn akan se ukpọn̄ asan̄ade oyom. Emi n̄ko edi ikpîkpu ye edifehe mbịne ofụm.”—Ecclesiastes 6:9.

• Kûwot idem ke ntak usịn̄ede idem. “Edisịn̄ede idem enyene esisịt ufọn.”—1 Timothy 4:8.

• Kûyom uyai enyọn̄ idem kpọt. “Owo ese se enye okụtde ke enyịn; edi Jehovah ese esịt.”—1 Samuel 16:7.

“Nte ikamade iso owụt nte idade idem nnyịn. Edieke owo amade idemesie, mbon en̄wen ẹyekụt oro ẹnyụn̄ ẹkpere enye.”—Sarah.

“Owo ama eye uyai, enye ọyọsọp odụk owo enyịn. Edi se mme owo ẹsitide ẹban̄a owo ẹsidi ido esie ye utọ owo emi enye edide.”—Phylicia.

Se n̄ko Mme N̄ke 11:22; Colossae 3:10, 12; 1 Peter 3:3, 4.