Akpanam Nso Man Akan Ndịk N̄kpa?

Se Bible ọdọhọde

Idiọkke ndifehe n̄kpa sia n̄kpa edide asua nnyịn. Imesinyụn̄ inam se ikekeme mbak n̄kpa edida nnyịn. (1 Corinth 15:26) Edi ndifehe n̄kpa m̀mê ndikop ndịk mban̄a n̄kpa ke ntak nsunsu n̄kpọ emi ẹtịn̄de ẹban̄a n̄kpa ye mme akpan̄kpa esinam mme owo “ẹdu ke itie ufụn ke ofụri eyouwem mmọ.” (Mme Hebrew 2:15) Ama ọfiọk akpanikọ, udûkopke utọ ndịk oro. Utọ ndịk emi isiyakke owo okop inem uwem.—John 8:32.

Se Bible etịn̄de aban̄a n̄kpa

Mme akpan̄kpa ifiọkke n̄kpọ ndomokiet. (Psalm 146:4) Ntre, kûyak ndịk anam fi ete ke ama akpa, ke ọyọbọ ufen mîdịghe okop ubiak sia Bible ọdọhọ ke n̄kpa etie nte idap.—Psalm 13:3; John 11:11-14.
Mme akpan̄kpa ikemeke ndinam nnyịn n̄kpọ. Idem mbon emi ẹkenen̄erede ẹsua nnyịn ke ini mmọ ẹkedude uwem ‘inyeneke odudu ke ẹma ẹkekpa.’ (Mme N̄ke 21:16) Bible ọdọhọ ke “usua mmọ ye ufụp mmọ ẹmetak.”—Ecclesiastes 9:6.
Owo ama akpa, oro iwọrọke ke esie okụre. Abasi ayanam mbon emi ẹkpade ẹset.—John 5:28, 29; Utom 24:15.
Abasi ọdọhọ ke ini ke edi emi ‘n̄kpa mîdidụhe aba.’ (Ediyarade 21:4) Bible ọdọhọ ke ini oro “ndinen owo ẹyeda isọn̄ ẹnyene, ẹnyụn̄ ẹdụn̄ ke esịt ke nsinsi.” Ini oro, owo idifeheke ndịk n̄kpa aba.—Psalm 37:29.