Ndi Mme Ntiense Jehovah Ẹsisasuan Ubon M̀mê Ẹsinanam Ẹdiana Kiet?

Nnyịn Mme Ntiense Jehovah imesinam se idin̄wamde ubon nnyịn ye eke mbọhọidụn̄ nnyịn ẹdiana kiet. Imọnọ Abasi ukpono sia enye ọkọtọn̄ọ ubon. (Genesis 2:​21-​24; Ephesus 3:​14, 15) Enye etịn̄ mme n̄kpọ ke Bible emi ẹn̄wamde ndọ mme owo ke nsio nsio itie ke ererimbot enem, ubon mmọ ẹnyụn̄ ẹdiana kiet.

Nte Mme Ntiense Jehovah Ẹsinamde Mme Ubon Ẹdiana Kiet

Imesidomo nte ikekeme ndinam se Bible etịn̄de sia oro esinam inen̄ede idi nti ebe, nti ibanndọ, ye nti ete ye eka. (Mme N̄ke 31:​10-​31; Ephesus 5:22–​6:4; 1 Timothy 5:8) Nti n̄kpọ emi Bible ekpepde ẹsụk ẹn̄wan̄wam mme ubon emi ẹdide owo enye emi aka ido ukpono enye emi, enye oko aka ido ukpono enye eken. (1 Peter 3:​1, 2) Kop se mbon emi mîdịghe Mme Ntiense Jehovah, edi emi ebe m̀mê n̄wan mmọ ekedidide Ntiense Jehovah ẹtịn̄de mi:

• Clauir emi otode Brazil ọdọhọ ete: “Tọn̄ọ ke akpa isua emi inamde ndọ tutu esịm ọyọhọ isua itiokiet, ekedi utọk utọk, mfịna mfịna. Edi ke Ivete ama akakabade edi Ntiense Jehovah, enye ama enen̄ede enyene ime onyụn̄ enen̄ede ama mi. Se ikanamde ndọ nnyịn okûsuana edi oro.”

• Agness emi otode Zambia ọdọhọ ete: “Ini Chansa ebe mi ọtọn̄ọde ndikpep Bible ye Mme Ntiense Jehovah, n̄kamaha sia n̄kekere ke mmọ ẹsisasuan ubon. Edi mmedikụt ke se enye ekpepde ke Bible akam an̄wan̄wam ndọ nnyịn.”

Ke ini ikwọrọde ikọ inọ mme owo inyụn̄ ikpepde mmọ Ikọ Abasi, imesinam mmọ ẹkụt nte Bible ekemede ndin̄wam mmọ

• Ẹdiọn̄ọ utọ owo emi mmọ ẹkpedọde

• Ẹdụn̄ emem emem ke akpa isua ndọ mmọ

• Ẹdiọn̄ọ nte ẹkpenamde n̄kpọ ye mme ukot mmọ

• Ẹdiọn̄ọ se ẹkpedade okụk mmọ ẹnam

• Ẹtre ndisifan̄a mfan̄a

• Ẹsifen kiet eken

• Ẹdiọn̄ọ nte ẹkpebọkde nditọ mmọ

Ndi owo ndikpụhọ ido ukpono esisịn mfịna ke ndọ?

Esisịn ndusụk ini. Ke uwụtn̄kpọ, ndụn̄ọde emi kọmpeni kiet emi ekerede Sofres ẹkenamde ke 1998 owụt ke mfịna ama odu etieti ke ndọ 1 ke otu ndọ 20 emi ebe m̀mê n̄wan ekedikabarede edi Ntiense Jehovah.

Jesus ama etetịn̄ ke ndusụk ini mfịna oyodu ke ubon mbon emi ẹnamde se imọ ikpepde. (Matthew 10:​32-​36) Will Durant emi ekesiwetde n̄kpọ aban̄a mbụkeset ọkọdọhọ ke ini mbon Rome ẹkekarade, “ke ẹkesidọhọ ke mme Christian ẹsuan ufọk mme owo.”a Se ẹsinyụn̄ ẹtịn̄de ye ndusụk Mme Ntiense Jehovah mfịn edi oro. Edi ndi oro ọwọrọ ke ebe m̀mê n̄wan emi edide Ntiense Jehovah esimen mfịna edi ufọk?

Enyene ikpe kiet ke esop emi ẹkedọhọde ke Mme Ntiense Jehovah ẹsuan ubon. Ini Esop Europe Oro Ẹsede Ẹban̄a Unen Owo ẹkebierede ikpe oro, mmọ ẹma ẹdọhọ ke mbonubon emi mîdịghe Mme Ntiense Jehovah ẹsiwak ndida mfịna ndi sia mmọ “isinyịmeke ke iman mmọ emi edide Ntiense Jehovah enyene unen ndika ido ukpono emi enye amade, nnyụn̄ nnam se ẹsinamde ke ido ukpono oro.” Esop ẹma ẹdọhọ n̄ko ẹte: “Nte n̄kpọ esitiede edi oro ke mme ubon emi mme owo ẹkade nsio nsio ido ukpono, idịghe kpọt ke ubon emi ẹdide ndusụk owo ẹdi Mme Ntiense Jehovah, ndusụk idịghe.”b Idem ke ini ẹsuade Mme Ntiense Jehovah ke ntak emi mmọ ẹnamde n̄kpọ Abasi, mmọ ẹsidomo ndinam item Bible emi: “Ẹkûda idiọk ẹsio owo usiene idiọk. . . . Edieke usụn̄ odude, adan̄a nte mbufo ẹkekeme, ẹtie ke emem ye kpukpru owo.”​​—Rome 12:​17, 18.

Se inamde Mme Ntiense Jehovah ẹnịm ke ikpọdọ mbon ido ukpono mmimọ kpọt

Mme Ntiense Jehovah ẹsinam se Bible ọdọhọde ete ‘ẹdọ ke Ọbọn̄ ikpọn̄-ikpọn̄,’ oro ọwọrọ yak mmọ ẹdọ owo ido ukpono mmọ kpọt. (1 Corinth 7:​39) Ewụhọ oro oto Bible, onyụn̄ ọfọn. Ke uwụtn̄kpọ, se ẹkewetde ke 2010 ke Journal of Marriage and Family ọkọdọhọ ke “ebe ye n̄wan emi ẹkade ukem ido ukpono ẹnyụn̄ ẹdiande ubọk ẹnam n̄kpọ Abasi mmọ” ẹsinen̄ede ẹdiana kiet.c

Edi Mme Ntiense Jehovah isidọhọke mbon ido ukpono mmọ ẹdian̄ade ẹkpọn̄ n̄wan m̀mê ebe mmọ emi mîdịghe Ntiense Jehovah. Bible ọdọhọ: “Edieke eyenete ekededi enyenede n̄wanndọ eke mînịmke ke akpanikọ, ndien n̄wan emi enyịme ndidụn̄ ye enye, yak enye okûdian̄ade ọkpọn̄ n̄wan oro; ndien n̄wan emi enyenede ebe eke mînịmke ke akpanikọ, edi ebe oro enyịme ndidụn̄ ye enye, yak enye okûdian̄ade ọkpọn̄ ebe esie.” (1 Corinth 7:​12, 13) Mme Ntiense Jehovah ẹsinam item Bible emi.