Ukpepn̄kpọ Abasi Atuaha Ye Ukpepn̄kpọ Mme Demon
“Owo ẹyefiak edem ẹkpọn̄ mbuọtidem, ẹnyụn̄ ẹkpan̄ utọn̄ ẹnọ mme spirit abian̄a ye ukpepn̄kpọ mme demon.”—1 TIMOTHY 4:1.
1. Mme Christian ẹdu ke ufọt nso en̄wan?
KERE nte okpodude ofụri uwem fo ke ebiet oro ekọn̄ an̄wanade. Ekpetie didie ndidụk idap ye uyom itiat ikan̄ nnyụn̄ ndemede ndikop uyom ọtọmbe? Ke mfụhọ, ke ndusụk ikpehe ke ererimbot, oro ke akpanikọ edi nte mme owo ẹdude uwem. Ke usụn̄ifiọk eke spirit, nte ededi, kpukpru Christian ẹdu uwem ntem. Mmọ ẹdu uwem ke ufọt akwa en̄wan oro ẹn̄wanade ke n̄kpọ nte isua 6,000 onyụn̄ ọsọn̄de ubọk ke eyo nnyịn. Nso idi ekọn̄ anyanini emi? En̄wan akpanikọ ye nsu, eke ukpepn̄kpọ Abasi ye ukpepn̄kpọ mme demon. Idịghe n̄kponinua ndikot enye—ke nsụhọde n̄kaha ke ebuana ye mme edinam n̄kan̄ edem kiet—en̄wan oro ananade mbọm onyụn̄ akamade n̄kpan̄a akan ke mbụk ubonowo.
2. (a) Nte Paul ọdọhọde, ewe n̄kan̄ iba ẹdu ke ntuaha ye kiet eken? (b) Nso ke ikọ Paul oro “mbuọtidem” ọkọwọrọ?
2 Apostle Paul ama asiak edem mbiba ke en̄wan emi ke ini enye ekewetde ọnọ ẹsọk Timothy ete: “Spirit enen̄ede ọdọhọ ete, ke ukperedem ini owo ẹyefiak edem ẹkpọn̄ mbuọtidem, ẹnyụn̄ ẹkpan̄ utọn̄ ẹnọ mme spirit abian̄a ye ukpepn̄kpọ mme demon.” (1 Timothy 4:1) Tịmfiọk ete ke ukpepn̄kpọ mme demon ẹdinyene odudu akpan akpan ke “ukperedem ini.” Nte isede ke ekikere eyo Paul, nnyịn idu uwem ke utọ ini oro. N̄ko, tịmfiọk, se ibiọn̄ọde-biọn̄ọ ukpepn̄kpọ mme demon, oro edi “mbuọtidem.” Mi, “mbuọtidem” ada aban̄a ukpepn̄kpọ Abasi, emi ọkọn̄ọde ke mme ikọ eke odudu spirit Abasi ẹmi ẹsịnede ke Bible. Utọ mbuọtidem oro ọnọ uwem. Enye ekpep Christian ndinam uduak Abasi. Enye edi akpanikọ oro adade osịm nsinsi uwem.—John 3:16; 6:40.
3. (a) Nso itịbe inọ mbon unọmọ ke en̄wan akpanikọ ye nsu? (b) Anie odu ke edem ukpepn̄kpọ mme demon?
3 Owo ekededi eke afiakde edem ọkpọn̄ mbuọtidem inyeneke nsinsi uwem. Mmọ ẹdi mbon unọmọ ke ekọn̄ oro. Nso enyene-ndịk utịp ke emi edi ntem owo ndiyak ukpepn̄kpọ mme demon ẹbian̄a enye! (Matthew 24:24) Didie ke nnyịn nte owo kiet kiet ikeme ndifep ndidi mbon unọmọ? Ebe ke ndisịn mme nsunsu ukpepn̄kpọ ẹmi, ẹmi ẹnamde uduak “ọbọn̄ mme demon,” Satan kpa Devil, ofụri ofụri. (Matthew 12:24) Nte ẹkemede ndibem iso ntịn̄, mme ukpepn̄kpọ Satan ẹdi nsu, sia Satan edide “ete nsu.” (John 8:44) Kere ban̄a nte enye akadade nsu ke usọ usọ usụn̄ abian̄a akpa ete ye eka nnyịn.
Ukpepn̄kpọ Mme Demon Oro Ẹyararede
4, 5. Ewe nsu ke Satan okosu ọnọ Eve, ndien ntak oro ọkọdiọkde ntre?
4 Ẹwet mme n̄kpọntịbe ẹmi ke Bible ke Genesis 3:1-5. Ke adade urụkikọt, Satan ama aka ebịne n̄wan oro Eve onyụn̄ okobụp enye ete: “Nte enen̄ede edi ntre nte ke Abasi ọkọdọhọ ke inaha mbufo ẹdia kpukpru eto in̄wan̄ emi?” (NW) Mbụme emi etie nte idiọkke, edi fiak kere ban̄a enye. “Nte enen̄ede edi ntre?” Satan akanam nte ke imọ imokop n̄kpaidem, nte n̄kpọ eke ọkpọdọhọde ete, ‘Ntak emi Abasi ekpetịn̄de n̄kpọ eke etiede ntre-e?’
5 Ke unana enye ndifiọk, Eve ama owụt ete ke oro ekedi ntre. Enye ama ọfiọk ukpepn̄kpọ Abasi aban̄ade n̄kpọ emi, nte ke Abasi ama asian Adam ete ke mmọ ẹyekpa edieke mmọ ẹdiade eto ifiọk eti ye idiọk. (Genesis 2:16, 17) Mbụme Satan nte an̄wan̄ade ama edemede enye udọn̄, ntre enye ama akpan̄ utọn̄ tutu enye edi edisịm akpan eneni esie: “Ndien urụkikọt ọdọhọ n̄wan ete, Mbufo idikpaha.” Nso idiọk ikọ ke emi edi ntem owo nditịn̄! Satan ama odori Jehovah, Abasi akpanikọ, Abasi ima, kpa Andibot, ikọ ete ke osu nsu ọnọ nditọ Esie ẹdide owo!—Psalm 31:5; 1 John 4:16; Ediyarade 4:11.
6. Didie ke Satan ekeneni aban̄a mfọnido ye unen itie edikara Jehovah?
6 Edi Satan ama etịn̄ se ikande oro. Enye ama akaiso ete: “Koro Abasi ọmọfiọk ete, ke usen eke mbufo ẹdiade ke esịt, ndien enyịn mbufo ẹyetara; mbufo ẹyenyụn̄ ẹtie nte Abasi, ẹfiọk eti ye idiọk.” Nte Satan ọkọdọhọde, Jehovah Abasi—emi ọkọnọde akpa ete ye eka nnyịn n̄kpọ uwak uwak—ama oyom ndibọ mmọ n̄kpọ oro edide utịbe utịbe. Enye okoyom ndikpan mmọ ẹkûtie nte mme abasi. Ntem, Satan ekeneni aban̄a mfọnido Abasi. Enye n̄ko ama esịn udọn̄ ọnọ ediyụhọ udọn̄ idemowo ye edikokoi nsịn mme ibet Abasi, ọdọhọde ete ke ndinam n̄kpọ ke usụn̄ emi eyenọ ufọn. Ke akpanikọ, Satan ama eneni aban̄a unen itie edikara oro Abasi enyenede ke idem edibotn̄kpọ Esie, ọdọhọde ete ke Abasi inyeneke unen ndomokiet ndinịm adan̄a ke se owo akanamde.
7. Ini ewe ke ẹkebem iso ẹkop ukpepn̄kpọ mme demon, ndien didie ke mmọ ẹdi ukem mfịn?
7 Ye mme ikọ Satan oro, ẹma ẹtọn̄ọ ndikop ukpepn̄kpọ mme demon. Ndiọi ukpepn̄kpọ ẹmi ẹsụk ẹsesịn udọn̄ ẹnọ mbiet edumbet unana uten̄e Abasi oro. Ukem nte enye akanamde ke in̄wan̄ Eden, Satan, idahaemi emi mme ọsọn̄ibuot spirit eken ẹdianade ye enye, osụk eneneni aban̄a unen Abasi ndinịm mme idaha edinam. Enye osụk afafan̄a aban̄a itie edikara Jehovah onyụn̄ odomo ndikara mme owo man ẹsọn̄ ibuot ye Ete mmọ eke heaven.—1 John 3:8, 10.
8. Nso ke Adam ye Eve ẹketaba ke Eden, edi didie ke ẹkewụt ke Jehovah ama enen?
8 Ke akpa ntuaha ke en̄wan ukpepn̄kpọ Abasi ye ukpepn̄kpọ mme demon oro, Adam ye Eve ẹma ẹnam idiọk ubiere ẹnyụn̄ ẹtaba idotenyịn nsinsi uwem mmọ. (Genesis 3:19) Nte mme isua ẹkebede idem mmọ ẹnyụn̄ ẹtọn̄ọde ndikabade ndiọk, ẹma ẹsọn̄ọ nte ekemde ẹnọ mmọ m̀mê anie okosu nsu ndien m̀mê anie eketịn̄ akpanikọ ko ke Eden. Nte ededi, ediwak isua ikie mbemiso mmọ ẹkekpade ata n̄kpa, mmọ ẹma ẹkabade ẹdi akpa mbon unọmọ ke en̄wan oro ke ufọt akpanikọ ye nsu ke ini Andibot mmọ, kpa Andinọ uwem, ekebierede ikpe unana edidot ndidu uwem ọnọ mmọ. Oro ekedi ini mmọ ẹkekpade ke usụn̄ifiọk eke spirit.—Psalm 36:9; men N̄wed Mbon Ephesus 2:1 domo.
Ukpepn̄kpọ Mme Demon Mfịn
9. Didie ke ukpepn̄kpọ mme demon ẹkụt unen ke ediwak isua ikie ẹmi ẹbede?
9 Nte ẹkewetde ke n̄wed Ediyarade, spirit ama emen apostle John aka ke “usen Ọbọn̄,” emi ọkọtọn̄ọde ke 1914. (Ediyarade 1:10) Ke ini oro ẹma ẹsion̄o Satan ye mme demon esie ke heaven ẹduọn̄ọ ke ikpehe isọn̄—kpa akwa n̄kpọ ukpan ọnọ andibiọn̄ọ Akwa Andibot nnyịn. Owo ikokopke aba uyo esie ke heaven nte odoride mme asan̄autom Jehovah ikọ kpukpru ini. (Ediyarade 12:10) Nte ededi, nso n̄kọri ke ukpepn̄kpọ mme demon ẹnam ke isọn̄ ọtọn̄ọde ke Eden? N̄wetnnịm n̄kpọ oro ọdọhọ ete: “Ẹsio akwa dragon ẹduọk ke isọn̄, kpa akani urụkikọt oro ẹkotde enye ẹte, andidori ikọt Abasi ikọ ye Satan, andibian̄a ofụri ererimbot.” (Ediyarade 12:9) Ofụri ererimbot ama ayak idem ọnọ mme nsu Satan! Eyịghe idụhe ẹkotde Satan “ọbọn̄ ererimbot emi”!—John 12:31; 16:11.
10, 11. Ke mme usụn̄ ewe ke Satan ye mme demon esie ẹkop odudu mfịn?
10 Ndi Satan ama onyịme ke ẹma ẹkan imọ ke ẹma ẹkesio enye ke heaven ẹduọk? Ke akpanikọ ikonyịmeke! Enye ama ebiere ndikaiso n̄n̄wana ye ukpepn̄kpọ Abasi ye mmọ oro ẹsọn̄ọde ẹyịre ke enye. Ke etienede edisio oro ẹkesiode enye ke heaven ẹduọk, Satan ama akaiso ke en̄wan esie: “Dragon [Satan] ayat esịt ye n̄wan, onyụn̄ adaba ndin̄wana ekọn̄ ye nditọ esie ẹmi ẹsụhọde ẹmi ẹnịmde mme item Abasi, ẹnyụn̄ ẹyịrede ẹmụm ikọ ntiense Jesus ẹkama.”—Ediyarade 12:17.
11 Ke adianade ye edin̄wana ye mme asan̄autom Abasi, Satan ọyọhọ ererimbot ye ekikere esie, odomode ndimụm ubonowo nsịn ke idak esie. Ke kiet ke otu n̄kukụt Ediyarade esie aban̄ade usen Ọbọn̄, apostle John ama okụt ndiọi unam ita ẹmi ke ndamban̄a usụn̄ ẹdade ẹban̄a Satan, esop ukaraidem esie eke isọn̄, ye n̄wọrọnda odudu ukara ererimbot eke eyo nnyịn. Ikwọt ẹma ẹto ke inua unam ita ẹmi, ẹwọn̄ọ. Nso ke mmọemi ẹkeda ẹban̄a? John ewet ete: “Mmọ ẹdi spirit mme demon ẹmi ẹnamde mme idiọn̄ọ, ẹmi ẹnyụn̄ ẹwọn̄ọde ẹka ke ọtọ ndidem kpukpru ekondo, nditan̄ mmọ mbok ọtọkiet ẹdi ekọn̄ akwa usen Abasi, Andikara kpukpru n̄kpọ.” (Ediyarade 16:14) Nte an̄wan̄ade, ukpepn̄kpọ mme demon ẹnen̄ede ẹkop odudu ke isọn̄. Satan ye mme demon esie ke ẹsụk ẹn̄wan̄wana ye ukpepn̄kpọ Abasi, ndien mmọ ẹyekaiso ndinam ntre tutu Jesus Christ, kpa Edidem Messiah, etre mmọ ke odudu.—Ediyarade 20:2.
Ndidiọn̄ọ Ukpepn̄kpọ Mme Demon
12. (a) Ntak emi ememde utom ndibiọn̄ọ ukpepn̄kpọ mme demon? (b) Didie ke Satan odomo ndida mme asan̄autom Abasi nyọhọ uduak esie?
12 Nte mme owo oro ẹbakde Abasi ẹkeme ndibiọn̄ọ ukpepn̄kpọ mme demon? Mmọ ke akpanikọ ẹkeme ndibiọn̄ọ, ke ntak iba. Akpa, koro ukpepn̄kpọ Abasi okop odudu akan; ndien udiana, koro Jehovah amayarade mme n̄kari Satan man nnyịn ikeme ndibiọn̄ọ mmọ. Nte apostle Paul eketịn̄de, ‘nnyịn inanake ifiọk iban̄a n̄kari ye n̄kukan esie.’ (2 Corinth 2:11) Nnyịn imọfiọk ite ke Satan ada ukọbọ nte usụn̄ kiet ndinam uduak esie. (2 Timothy 3:12) Nte ededi, ke edide n̄kari n̄kari akan, enye odomo ndikara ekikere ye esịt mmọ oro ẹnamde n̄kpọ Abasi. Enye ama abian̄a Eve onyụn̄ ọdọn̄ ndiọi udọn̄ ke esịt esie. Enye esidomo ukem n̄kpọ oro mfịn. Paul ekewet ọnọ ẹsọk mbon Corinth ete: “Mmefehe ndịk, mbak ke usụn̄ ekededi, nte urụkikọt akabian̄ade Eve ke n̄kari esie, ẹdibiat ekikere mbufo, ẹnam mbufo ẹtre ndinyene esịt akpanikọ ye eti ido ye Christ.” (2 Corinth 11:3) Kere ban̄a nte enye abiatde ekikere ubonowo ke ofụri ofụri.
13. Mme nsu ewe ke Satan okosu ọnọ ubonowo toto ke Eden?
13 Ke etịn̄de ọnọ Eve, Satan ama odori Jehovah ikọ edisu nsu onyụn̄ ọdọhọ ete ke mme owo ẹkeme nditie nte mme abasi edieke mmọ ẹsọn̄de ibuot ye Andibot mmọ. Idiọk idaha ubonowo mfịn owụt ete ke edi Satan, idịghe Jehovah, ekedi osu nsu. Mme owo mfịn idịghe mme abasi! Nte ededi, Satan ama osu mme nsu efen adian ye akpa nsu oro. Enye ama etịbi ekikere oro nte ke ukpọn̄ owo ikpaha ke nsinsi, edi se mîkemeke ndikpa. Enye ke ntem ama odomo ubonowo ye ekikere edikeme nditie nte mme abasi ke usụn̄ efen. Ekem, ọkọn̄ọde ke nsunsu ukpepn̄kpọ oro, enye ama edemede ukpepn̄kpọ hell ikan̄, purgatory, ubụpekpo, ye utuakibuot nnọ mme eteete. Ediwak miliọn owo ke mme itie ikie ẹsụk ẹdodụk ufụn ẹnọ mme nsu ẹmi.—Deuteronomy 18:9-13.
14, 15. Nso idi akpanikọ aban̄ade n̄kpa ye idotenyịn owo kaban̄a ini iso?
14 Nte ededi, se Jehovah eketịn̄de ọnọ Adam ekedi akpanikọ. Adam ama akpa ke ini ekeduede Abasi. (Genesis 5:5) Ke ini Adam ye nditọ esie ẹkekpade, mmọ ẹma ẹkabade ẹdi mme ukpọn̄ ẹmi ẹkpade, ẹmi mîfiọkke n̄kpọ mînyụn̄ inyeneke odudu. (Genesis 2:7; Ecclesiastes 9:5, 10; Ezekiel 18:4) Ke ntak idiọkn̄kpọ ẹdade ẹto Adam, kpukpru ukpọn̄ owo ẹkpakpa. (Rome 5:12) Nte ededi, ko ke Eden, Jehovah ama ọn̄wọn̄ọ edidi mfri oro edibiatde mme utom Devil. (Genesis 3:15) Mfri oro ekedi Jesus Christ, ikpọn̄îkpọn̄ edibon Eyen Abasi. Jesus akakpa ye unana idiọkn̄kpọ, ndien uwem esie oro akawade ama akabade edi ufak ndidep ubonowo nsio ke idaha n̄kpa mmọ. Mmọ oro ke nsụkibuot ẹnyenede mbuọtidem ke Jesus ẹnyene ifet ndibọ nsinsi uwem oro Adam ọkọduọkde.—John 3:36; Rome 6:23; 1 Timothy 2:5, 6.
15 Ufak oro, idịghe ndusụk ikpîkpu ekikere nte ke ukpọn̄ esibọhọ n̄kpa, edi ata idotenyịn ubonowo. Emi edi ukpepn̄kpọ Abasi. Enye edi akpanikọ. Enye n̄ko edi utịbe utịbe ediwụt ima ye ọniọn̄ Jehovah. (John 3:16) Nnyịn ikpowụt esịtekọm didie ntem ke ndikpep akpanikọ emi ye ke ndidi se ẹsiode ke ufụn ukpepn̄kpọ mme demon ke mme n̄kpọ ẹmi!—John 8:32.
16. Nso idi mme utịp anyanini ke ini mme owo ẹtienede ifiọk idemmọ?
16 Ebede ke mme nsu esie ke in̄wan̄ Eden, Satan ama esịn udọn̄ ọnọ Adam ye Eve ndinyene udọn̄ edida ke idem n̄kpọn̄ Abasi nnyụn̄ mberi edem ke ifiọk idemmọ. Mfịn, nnyịn imokụt mme utịp anyanini ẹtode oro ke ubiatibet, nsọn̄ọn̄kpọ ndutịm uforo, mme ekọn̄, ye akwa unana edida ukem ukem oro odude ke ererimbot mfịn. Eyịghe idụhe Bible ọdọhọde ete: “Ifiọk ererimbot emi edi ndisịme ke iso Abasi”! (1 Corinth 3:19) Edi, ata ediwak owo ke ndisịme ẹmek ndibọ ufen utu ke ndikpan̄ utọn̄ nnọ mme ukpepn̄kpọ Jehovah. (Psalm 14:1-3; 107:17) Mme Christian, ẹmi ẹma ẹkenyịme ukpepn̄kpọ Abasi, ẹfep ndidi se afia oro omụmde.
17. Nso idi se “ẹkotde ke nsu, ẹte, ifiọk” emi Satan esịnde udọn̄ ọnọ, ndien nso idi mme utịp esie?
17 Paul ekewet ọnọ ẹsọk Timothy ete: “O Timothy, kpeme se ẹkeyakde ẹsịn fi ke ubọk. Fep idem ke mbukpo ndisịme ndutịn̄ ye ọkpọsọn̄ eneni, eke owo ẹkotde ke nsu, ẹte, ifiọk; ndusụk owo ẹma ẹnyịme ukpepn̄kpọ oro, ẹdiyo ẹkpọn̄ mbuọtidem.” (1 Timothy 6:20, 21) “Ifiọk” oro n̄ko ada aban̄a ukpepn̄kpọ mme demon. Ke eyo Paul, anaedi emi akada aban̄a ekikere mbon nsọn̄ibuot oro ndusụk owo ke esop ẹkekpepde. (2 Timothy 2:16-18) Ke ukperedem, se ẹkekotde ifiọk ke nsu, utọ nte ukpepn̄kpọ n̄ka Gnostic ye akwaifiọk mbon Greek, ẹma ẹsabade esop. Ke ererimbot mfịn, unana edinịm edidu Abasi ke akpanikọ, ekikere nte ke owo ifiọkke m̀mê Abasi odu m̀mê idụhe, mme ukpepn̄kpọ edito ke unam mforo owo, ye akwa nsụkuyo oro ẹsụkde Bible ẹdi mme uwụtn̄kpọ ifiọk oro ke nsu ẹkotde ntre, ukem nte mme ekikere oro mîkemke ye N̄wed Abasi oro mbon nsọn̄ibuot eyomfịn ẹkpepde. Ẹkụt mme utịp kpukpru ẹmi ke nsu ẹkotde ifiọk ke edinam esuene esuene ido uwem, ntatara unana ediwụt ukpono nnọ odudu edikara, unana edinam akpanikọ, ye ibụk oro onịmde editịm n̄kpọ Satan idiọn̄ọ.
Ndisọn̄ọ Nyịre ke Ukpepn̄kpọ Abasi
18. Mmanie mfịn ẹyom ukpepn̄kpọ Abasi?
18 Idem okposụkedi Satan esiyọhọde isọn̄ ye ukpepn̄kpọ mme demon toto ke eyo Eden, ndusụk mmọ oro ẹyomde ukpepn̄kpọ Abasi ẹsidu kpukpru ini. Utọ mbon oro ẹmesịm ediwak miliọn mfịn. Mmọ ẹsịne nsụhọ Christian oro ẹyetde aran ẹmi ẹnyenede idotenyịn oro enyenede nsọn̄ọ ndikara ye Jesus ke Obio Ubọn̄ esie eke heaven ye akwa otuowo eke “mme erọn̄ en̄wen” oro akade-kaiso ndikọri ẹmi idotenyịn mmọ edide ndidụn̄ ke ikpehe isọn̄ eke Obio Ubọn̄ oro. (Matthew 25:34; John 10:16; Ediyarade 7:3, 9) Mfịn, ẹmetan̄ mmọemi ẹbok ọtọkiet ke esop ofụri ererimbot kiet oro ikọ Isaiah ẹmi aban̄ade: “Jehovah eyenyụn̄ eteme nditọ fo; ndien emem kpukpru nditọ fo okpon.”—Isaiah 54:13.
19. Nso isịne ke ndidi se Jehovah ọnọde ukpep?
19 Ndidi se Jehovah ọnọde ukpep akan edifiọk ukpepn̄kpọ akpanikọ—okposụkedi oro edide akpan n̄kpọ. Jehovah eteme nnyịn nte ikpodude uwem, nte ikpadade ukpepn̄kpọ Abasi isịn ke edinam ke ọkpọkpọ uwem nnyịn. Ke uwụtn̄kpọ, nnyịn ibọbiọn̄ọ ibụk, oburobụt ido, ye edu nda-ke-idem oro ẹyọhọde ke ererimbot oro akande nnyịn okụk. Nnyịn imọfiọk se uyịre uyịre uyom inyene oro odude ke ererimbot emi edide—n̄kpọ oro akamade n̄kpa. (James 5:1-3) Nnyịn idehede ifre ukpepn̄kpọ Abasi oro ẹwụtde ke mme ikọ apostle John ẹmi: “Ẹkûma ererimbot, ye se idude ke ererimbot. Edieke owo ekededi amade ererimbot, ima Ete idụhe enye ke esịt.”—1 John 2:15.
20, 21. (a) Nso ke Satan ada ke ukeme esie ndikịm mme owo enyịn? (b) Mme edidiọn̄ ewe ẹnyene mmọ oro ẹsọn̄ọde ẹyịre ke ukpepn̄kpọ Abasi?
20 Ẹkụt utịp oro ukpepn̄kpọ mme demon ẹnyenede ke idem mmọ oro enye omụmde ke mme ikọ oro Paul ekewetde ọnọ ẹsọk mbon Corinth: “[Satan amanam] ikike mmọ eke mînịmke ke akpanikọ okịm, mbak un̄wana gospel ubọn̄ Christ, emi edide mbiet Abasi, edisem ọnọ mmọ.” (2 Corinth 4:4) Satan akpama ndikịm mme ata Christian enyịn ke usụn̄ emi n̄ko. Ko ke Eden, enye akada urụkikọt ndibian̄a kiet ke otu mme asan̄autom Abasi. Mfịn, enye ada afai afai m̀mê oburobụt senima ye mme edinam television. Enye ada radio, n̄wed, ye ikwọ anam ibụk ibụk udọn̄ esie. Okopodudu n̄kpọekọn̄ kiet oro enye enyenede edi idiọk nsan̄a. (Mme N̄ke 4:14; 28:7; 29:3) Diọn̄ọ se mme utọ n̄kpọ oro ẹdide kpukpru ini—mme n̄kpọutom ye ukpepn̄kpọ mme demon.
21 Ti ete, mme ikọ Satan ke Eden ẹkedi nsu; mme ikọ Jehovah ẹkedi akpanikọ. Toto ke ntọn̄ọ ntọn̄ọ eyo oro, ntre ke akaiso ndidi. Satan kpukpru ini esidi osu nsu, ndien ukpepn̄kpọ Abasi ye unana edikpu esidi akpanikọ. (Rome 3:4) Edieke nnyịn isọn̄ọde iyịre ke Ikọ Abasi, nnyịn kpukpru ini iyedu ke n̄kan̄ oro akande ke ekọn̄ oro odude ke ufọt akpanikọ ye nsu. (2 Corinth 10:4, 5) Ẹyak nnyịn, ndien, ibiere ndisịn kpukpru ukpepn̄kpọ mme demon. Ke usụn̄ oro nnyịn iyedu isịm ini emi ekọn̄ akpanikọ ye nsu edikụrede. Akpanikọ eyekan. Satan ididụhe aba, ndien ukpepn̄kpọ Abasi kpọt ke ẹdikop ke isọn̄.—Isaiah 11:9.
Nte Afo Emekeme Ndinam An̄wan̄a?
◻ Ini ewe ke ẹkebem iso ẹkop ukpepn̄kpọ mme demon?
◻ Nso idi ndusụk nsu oro Satan ye mme demon esie ẹsịnde udọn̄ ẹnọ?
◻ Ke mme usụn̄ ewe ke Satan enen̄erede okop odudu mfịn?
◻ Nso ke Satan ada ke ndisịn udọn̄ nnọ ukpepn̄kpọ mme demon?
◻ Mme edidiọn̄ ewe ẹnyene mmọ oro ẹsọn̄ọde ẹyịre ke ukpepn̄kpọ Abasi?
[Ndise ke page 9]
Ẹkebem iso ẹkop ukpepn̄kpọ demon ke in̄wan̄ Eden
[Ndise ke page 10]
Ukpepn̄kpọ Abasi aban̄ade ufak ye Obio Ubọn̄ ọnọ ubonowo n̄kukụre idotenyịn