Mme Mbụme Ẹtode Mme Andikot
Ntak emi Noah okosiode raven ke ubom osụk ndien ekem osio ibiom?
Bible inamke an̄wan̄a ke nde ke nde. Nte ededi, etie nte edinam Noah esịne ifiọk.
Ke uwemeyo 40 ye okoneyo 40, ọkpọsọn̄ edịm ama edep ke isọn̄, anamde mmọn̄ ukwọ oro akakam ofụkde etịn̄e obot ke ọfiọn̄ ition. Ekem “ubom oro abak ke obot Ararat.” (Genesis 7:6–8:4) Ediwak ọfiọn̄ ke ukperedem, ke ‘mbuot obot ẹma ẹkewọrọ ẹda,’ Noah “ayak raven aka, ndien raven aka afiak, aka afiak.”—Genesis 8:5, 7.
Ntak ekedide raven? Inuen emi edi ọkpọsọn̄ efe ufe, onyụn̄ ekeme ndidu uwem ke nsio nsio orụk udia, esịnede obụk mme akpan̄kpa. Eyedi Noah okosio raven osụk man ese m̀mê enye eyefiak edi m̀mê eyekpọn̄ ubom, iso-ọfọn atade nsụhọ okpo oro ẹwọn̄ọde ẹbono nte mmọn̄ etekde ndien nsatisọn̄ ọwọrọde ada. Nte ededi, raven ikọkpọn̄ke do. Bible ọdọhọ ete ke enye ama aka afiak, edi enye idọhọke ite ke raven akafiak etiene Noah. Iso-ọfọn enye akafiak edisọrọ ke ubom nte enye efede man oyom udia emi ọfiọrọde ke enyọn̄ mmọn̄ oro okosụk odude.
Ke ukperedem, Noah ama emek ndiyak ibiom aka. Nnyịn ikot ite: “Edi ibiom oro ikwe ọtọ eke enye ọsọride ikpat ukot esiemmọ, ndien afiak etiene enye ke ubom.” (Genesis 8:9) Emi ọnọ ekikere nte ke ebede ke usụn̄ edinam esie, ibiom ekeme ndinam n̄kpọ ke ndibiere m̀mê mmọn̄ ukwọ ama asat. Ibiom ẹsinyene ndusụk udomo mbuọtidem ke idem mme owo. Noah ama ekeme ndidori enyịn nte ke ibiom eyefiak edi, idịghe ndisọrọ ke ubom kpọt, edi edi ebịne Noah ke idemesie.
Ẹdọhọ ẹte ke ibiom n̄kukụre esisọrọ ke nsatisọn̄, esife isọn̄ isọn̄ ke itịghede, onyụn̄ ata mbiet. (Ezekiel 7:16) Grzimek’s Animal Life Encyclopedia ọdọhọ ete: “Nte edide akpanikọ ye kpukpru mbomon̄kuku ye ibiom ẹmi ẹtade mfri ye n̄kpasịp, edi ọkpọsọn̄ n̄kpọ ndidia n̄kpọ ke ini snow [m̀mê mmọn̄] ofụkde ofụri ofụri ke se ibede usen kiet, sia akpakịp akpan udia mmọ ẹsibonode ke isọn̄.” Ntre ekeme ndidi ibiom oro ama ada ndusụk uyarade ọsọk Noah nte ke imọ ima ikụt nsatisọn̄ m̀mê nseheikọn̄. Akpa ini oro Noah akayakde enye aka, ibiom oro mmemmem mmemmem ama afiak ebịne enye ke ubom. Ọyọhọ ikaba, ibiom ama afiak edi ye ikọn̄ olive. Ọyọhọ ikata, enye ikafiakke idi aba, ọnọde uyarade nte ke Noah ama ekeme onyụn̄ enyene ifụre ndiwọrọ ke ubom.—Genesis 8:8-12.
Ke adan̄aemi ndusụk owo ẹkemede ndikere ke ẹmi ẹdi mbabuat ntọt, akpanikọ oro nte ke mbụk oro otịm an̄wan̄a, ye unana owo ndifịna idem man ọnọ ọyọhọ ọyọhọ edinam an̄wan̄a, owụt ke Bible edi akpanikọ. Enye ọnọ nnyịn udiana ntak ndinyịme mbụk oro, idịghe nte n̄kpọ oro ẹtịbide-tịbi m̀mê abian̄a, edi nte nnennen akpanikọ. Unana ọyọhọ ntọt ye edinam an̄wan̄a ọnọ ekikere n̄ko aban̄a inem inem n̄kpọ oro mme anam-akpanikọ Christian ẹkemede ndisak iso nse ndibụp Noah ke ini ẹdinamde enye eset onyụn̄ ekeme ndinam mme ntak edinam esie an̄wan̄a nnennen nnennen.—Mme Hebrew 11:7, 39.