Moses ye Nnụk​—Esen Esen Mbiet

EDIEKE edide akanam afo amanam isan̄ osịm Italy, ekeme ndidi afo ama okụt ọwọrọetop mbiet Moses oro etiede-tie, emi Michelangelo okobotde, odude idahaemi ke Ufọkederi St. Peter ke Chains, ke Rome. Utom-usọ eke ọyọhọ isua ikie-16 emi etie esen esen didie ntem, nte enye owụtde Moses ye nnụk ẹtịbede enye ke ibuot! Ke akpanikọ, ibat ibat mme anam-ndise ẹma ẹwụt Moses nte otịbede nnụk. Ntak edide ntre? Nte Bible ọnọ ntak ekededi ke ekikere emi?

Edikabade Bible eke Latin Vulgate asian nnyịn ete ke enye ama okokụre nneme ye Abasi ke Obot Sinai, iso Moses ama “otịbe nnụk.” (Exodus 34:29, 30, 35; men Douay Version domo.) Ekese owo ke Christendom ẹma ẹma Vulgate emi etieti ndien enye ama akara usụn̄ nte N̄wed Abasi akan̄wan̄ade mme owo.

Nte ededi, ikọ Hebrew oro ẹkabarede “otịbe nnụk” ọwọrọ n̄ko ‘sion̄o un̄wana’ m̀mê ‘nyama.’ (Se ikọ idakisọn̄ eke Douay Version ke Exodus 34:29.) Nte ekemde ye Theological Wordbook of the Old Testament, ikọ oro “owụt se itiede nte nnụk utu ke ndidi nnụk ke idemesie.” Ke ẹdade-da ẹkụt, uyama un̄wana esibiet nnụk ke akpanikọ.

Ẹkeme ndinam emi an̄wan̄a sia iso Moses akayamade, nte ubọn̄ Jehovah akasan̄ade ebe. (Exodus 33:22; 34:6, 7) Paul ọsọn̄ọ emi ndidi nnennen ifiọk ẹnyenede ẹban̄a, ewetde aban̄a “ubọn̄” iso Moses, utu ke “nnụk” esie.​—2 Corinth 3:7.

Nnennen ifiọk ẹnyenede ẹban̄a usem a-Bible ke ntem ada osịm ntụn̄ọ n̄kan ifiọk ke ntọt Bible emi. Ke ntre, nnụk oro ke ọwọrọetop mbiet Moses emi Michelangelo okobotde edi sụk esen esen mbiet oro otode ndudue mme akabade Bible, emi ẹma ẹkenen̄ede ke anyanini.

[Ebiet Ẹdade Ndise Ẹto ke page 7]

Oto Short History of Art