Utịp Ẹkenọde Job—Ntak Ndinyene Idotenyịn
“Jehovah ọdiọn̄ Job ke ukperedem akan eke mbemiso.” —JOB 42:12.
1. Nso ke Jehovah anam ọnọ ikọt esie, idem ke ini mme idomo ẹnamde idem enen̄ede emem mmọ?
JEHOVAH “edi Andinọ mmọemi ẹyomde Enye utịp.” (Mme Hebrew 11:6) Enye n̄ko edemede ikọt esie oro ẹyakde idem ẹnọ nditie ntiense uko uko, idem ọkpọkọm mme idomo ẹnam mmọ ẹkop mmemidem nte mme akpan̄kpa. (Job 26:5; Ediyarade 11:3, 7, 11) Oro ekedi ntre ke n̄kan̄ Job oro okokụtde ndutụhọ. Okposụkedi abian̄a abian̄a mbon ndọn̄esịt ita ẹkesụn̄ide enye, enye ikodopke uyo ke ntak ndịk owo. Utu ke oro, enye ama ọnọ uko uko ikọ ntiense.
2. Okposụkedi mmọ ẹsobode ukọbọ ye nsọn̄ọn̄kpọ, didie ke Mme Ntiense Jehovah ẹkan ke mme idomo mmọ?
2 Ediwak Mme Ntiense Jehovah eyomfịn ẹmesobo utọ ikpọ ukọbọ ye nsọn̄ọn̄kpọ oro tutu mmọ ẹkpere n̄kpa. (2 Corinth 11:23) Nte ededi, ukem nte Job, mmọ ẹmewụt ima ẹnyenede ẹnọ Abasi ẹnyụn̄ ẹnam edinen ido. (Ezekiel 14:14, 20) Mmọ n̄ko ẹmebọhọ mme idomo mmọ ye ubiere ndinem Jehovah esịt, ẹkop nsọn̄idem ndinọ uko uko ikọ ntiense, ẹnyụn̄ ẹyọhọ ye ata idotenyịn.
Job Ọnọ Uko Uko Ikọ Ntiense
3. Nso utọ ikọ ntiense ke Job ọkọnọ ke akpatre utịn̄ikọ esie?
3 Ke akpatre utịn̄ikọ esie, Job ama akam ọnọ n̄kponn̄kan ikọ ntiense akan nte enye ekebemde iso ọnọ. Enye ama okụbi abian̄a abian̄a mbon ndọn̄esịt esie inua ofụri ofụri. Ye ubiak ubiak ikọ emiom, enye ama ọdọhọ ete: “Afo an̄wam enyeemi mînyeneke odudu adan̄a didie!” (Job 26:2) Job ama otoro Jehovah, emi akadade odudu esie ọkọn̄ ekondo isọn̄ nnyịn ke ikpîkpu ke ufụmenyọn̄ onyụn̄ ọkọn̄ enyọn̄ oro akamade mmọn̄ okon̄ ọkpọn̄ isọn̄. (Job 26:7-9) Edi, Job ọkọdọhọ ete ke mme utọ utịben̄kpọ oro ‘ẹdi utịt usụn̄ Jehovah.’—Job 26:14.
4. Nso ke Job eketịn̄ aban̄a nsọn̄ọnda, ndien ntak emi enye ekekemede nditịn̄ ikọ ke usụn̄ oro?
4 Ke ọfiọkde ke imọ iduehe, Job ama ọdọhọ ete: “Ndisioho mfọnmma ke idemmi mfep tutu ndikpa.” (Job 27:5) Ke edide isio ye nsunsu edori ikọ oro ẹkedoride enye, enye ikanamke n̄kpọ ndomokiet oro odotde ndibọ se ikosịmde enye. Job ama ọfiọk ete ke Jehovah isikopke akam mbon nsọn̄ibuot edi eyenọ mbon nsọn̄ọnda utịp. Emi ekeme nditịm nti nnyịn nte ke ibịghike oyobio Armageddon eyesio mme idiọkowo ke itie odudu mmọ efep, ndien mmọ idibọhọke ubọk Abasi oro mîdinyeneke mbọm. Tutu osịm ini oro, ikọt Jehovah ẹyesan̄a ke mfọnmma mmọ.—Job 27:11-23.
5. Didie ke Job akakabade ata eti ibuot?
5 Kere nte owo ita oro ẹkenyenede ọniọn̄ ererimbot mi ẹkpan̄de utọn̄ ke adan̄aemi Job okowụtde nte ke owo amada usọ esie oyom gold, silver, ye mme n̄kpọuto eken ke isọn̄ ye ke inyan̄. Enye ama ọdọhọ ete: “Ndien ndinyene eti ibuot ọfọn akan pearl.” (Job 28:18) Abian̄a abian̄a mbon ndọn̄esịt Job ikekemeke ndidep ata eti ibuot. Enye oto Andibot ofụm, edịm, emịnen̄mịnen̄, ye obuma. Ke akpanikọ, “ndibak Ọbọn̄ [ukpono ukpono] edi eti ibuot, ndinyụn̄ n̄kabade n̄kpọn̄ idiọk edi asian.”—Job 28:28.
6. Ntak emi Job eketịn̄de aban̄a uwem esie eke akpa?
6 Kpa ye ndutụhọ esie, Job iketreke ndinam n̄kpọ Jehovah. Utu ke ndiwọn̄ọde n̄kpọn̄ Ata Edikon̄, enyene nsọn̄ọnda eren emi ama oyom ndifiak nnyene akani “itie ebuana esie ye Abasi.” (Job 29:4, NW) Job ikanamke inua ke ini enye eketịn̄de nte imọ ‘ikanyan̄ade eyen ubuene, isịnede edinen ido ke idem, ikonyụn̄ idide ata ete inọ mme ubuene.’ (Job 29:12-16) Utu ke oro, enye akabat mme akpanikọ ẹban̄ade uwem esie nte anam-akpanikọ asan̄autom Jehovah. Nte afo ọmọkọri utọ eti n̄kpọ editi oro? Ke akpanikọ, Job n̄ko ama owụt nte mme edori ikọ abian̄a abian̄a owo ita oro ẹkedide nsu.
7. Nso orụk owo ke Job ekedi?
7 Nditọwọn̄ ‘ẹmi enye ekpesịnde ndida mme ete mmọ nnịm ye mme ebua n̄kpri ufene esie’ ẹma ẹsak Job nsahi. Ẹma ẹsua ẹnyụn̄ ẹfiari enye etap. Kpa ye oro ekenen̄erede okop ubiak, owo ikowụtke Job edikere mban̄a ndomokiet. (Job 30:1, 10, 30) Koro enye akayakde ofụri uwem esie ọnọ Jehovah, nte ededi, enye ama enyene edisana ubieresịt onyụn̄ ekeme ndidọhọ ete: “Yak ẹdomo mi ke balance eke enende: yak Abasi onyụn̄ ọfiọk ete ke mfọn mma.” (Job 31:6) Job ikedịghe esịn efịbe m̀mê owo n̄kari, ndien enye iketreke ndin̄wam mmọ oro ẹdude ke unana. Okposụkedi enye ekenyenede inyene, akananam enye ibuọtke idem ke inyene obụkidem. Akan oro, Job ikesịnke idem ke ukpono ndem ebe ke ndituak ibuot nnọ mme anana uwem n̄kpọ, utọ nte ọfiọn̄. (Job 31:26-28) Ke ndibuọt idem ke Abasi, enye ama onịm eti uwụtn̄kpọ nte enyene nsọn̄ọnda. Kpa ye kpukpru ndutụhọ esie ye edidu eke mme abian̄a abian̄a mbon ndọn̄esịt, Job ama anam usọ usọ edikan̄ idem onyụn̄ ọnọ eti ikọ ntiense. Ke ama eketịn̄ mme ikọ esie osịm utịt, enye ama ese Abasi nte Ebiereikpe ye Ọnọ-Utịp esie.—Job 31:35-40.
Elihu Etịn̄ Ikọ
8. Elihu ekedi anie, ndien didie ke enye okowụt ukpono ye uko?
8 Akparawa owo oro Elihu, andito ubon Buz eyen Nahor ndien ke ntem edide nsannsan iman Abraham ufan Jehovah, ama odu ekpere. (Isaiah 41:8) Elihu ama owụt ukpono ọnọ ikpọ owo ebe ke ndikpan̄ utọn̄ nnọ edem mbiba ke eneni emi. Edi, enye ama etịn̄ ikọ uko uko aban̄a mme n̄kpọ ẹmi mmọ ẹkenamde ẹdue. Ke uwụtn̄kpọ, enye ama ayat esịt ye Job ke ‘ndinịm idemesie ke edinen n̄kan Abasi.’ Iyatesịt Elihu akpan akpan akaka nnennen ebịne abian̄a abian̄a mbon ndọn̄esịt oro. Ikọ mmọ ẹketie nte ẹmenede Abasi ke enyọn̄ edi ama enen̄ede esuene enye ebe ke ndida ke n̄kan̄ Satan ke eneni emi. ‘Ọyọhọde ye ikọ’ onyụn̄ edide se edisana spirit onụkde, Elihu ekedi ntiense Jehovah oro mîten̄eke owo enyịn.—Job 32:2, 18, 21.
9. Didie ke Elihu eketịn̄ aban̄a edifiak nnam Job okop nsọn̄idem?
9 Job ama ekere aban̄a ediwụt unen idemesie akan eke Abasi. Ke akpanikọ, enye ama odomo idem ye Abasi. Nte ededi, nte ukpọn̄ Job ekekperede n̄kpa, idiọn̄ọ edifiak n̄kop nsọn̄idem ama odu. Didie ke edi ntre? Ọfọn, ama onụk Elihu nditịn̄ nte ke Jehovah ama ọfọn enye mfọn ke ndinọ etop emi: “Fak enye mbak edisụhọde ke udi: mmokụt n̄kpọ usio-isop. Obụkidem esie akabade nsek akan eke eyenọwọn̄: enye eyefiak ke mme usen uyen esie.”—Job 33:24, 25.
10. Ẹkenyene ndidomo Job n̄kosịm nso udomo, edi nso ke nnyịn ikeme ndinyene nsọn̄ọ ke ikerede iban̄a 1 Corinth 10:13?
10 Elihu ama enen̄ede Job ke ndikọdọhọ ke idoroke owo udori ndinam ufan ye Abasi ebe ke ndimụm nsọn̄ọnda n̄kama. Elihu ọkọdọhọ ete: “Nsa Abasi, enye idiọkke. Nsa Abasi Ibom, enye inamke ukwan̄n̄kpọ. Koro enye eyeda se owo anamde osio usiene ye owo.” Job ama anam n̄kpọ ibụmede ibụmede ke ndikọsọn̄ọ ntịn̄ mban̄a edinen ido esie, edi enye akanam ntre ke unana ifiọk ye ikike oro ekemde. Elihu ama adian ete: “Mmoyom nte ẹkpedomode Job ẹkụre, ẹban̄a ibọrọ esie ke otu mme idiọkowo.” (Job 34:10, 11, 35, 36) Ukem ntre, ẹkeme ndidomo mbuọtidem ye nsọn̄ọnda nnyịn ọyọhọ ọyọhọ n̄kukụre edieke ‘ẹdomode nnyịn ẹkụre’ ke ndusụk usụn̄. Edi, ima ima Ete nnyịn eke heaven idiyakke ẹdomo nnyịn ẹbe se ukeme nnyịn edide.—1 Corinth 10:13.
11. Ke inen̄erede idu ke udomo, nso ke nnyịn ikpenyene nditi?
11 Nte Elihu akakade iso, enye ama afiak owụt nte ke Job ama odori nsọn̄uyo ke edinen ido esie akaha. Ikpenyene ndiwụk ntịn̄enyịn ke Akwa Andibot nnyịn. (Job 35:2, 6, 10) Abasi “inịmke mme idiọkowo uwem: edi ọnọ sụn̄sụn̄ owo se inende,” Elihu ọkọdọhọ ntre. (Job 36:6) Owo ndomokiet ikemeke nditeme Abasi usụn̄ nnyụn̄ ndọhọ ke enye amanam idiọk. Enye omokpon akan se nnyịn ikemede ndifiọk, ndien ibat isua esie akak ndidụn̄ọde. (Job 36:22-26) Ke ini enen̄erede odu ke udomo, ti ete ke nsinsi Abasi nnyịn edi edinen ndien eyenọ nnyịn utịp ke mme utom edinam akpanikọ nnyịn oro adade itoro ọsọk enye.
12. Nso ke mme akpatre ikọ Elihu ẹwụt ẹban̄a ubiereikpe oro Abasi edibierede ọnọ mme idiọkowo?
12 Ke adan̄aemi Elihu eketịn̄de ikọ, oyobio ama ofụme. Nte enye akasan̄ade ekpere, esịt esie ama enyek onyụn̄ esehede. Enye ama etịn̄ aban̄a ikpọ n̄kpọ oro Jehovah akanamde onyụn̄ ọdọhọ ete: “O Job, kop ikọ emi, tuak da, nyụn̄ tịmfiọk mme utịben̄kpọ Abasi.” Ukem nte Job, oyom nnyịn ikere iban̄a mme utịben̄kpọ ye itie ubọn̄ Abasi oro enyenede ndịk. Elihu ọkọdọhọ ete: “Abasi Ibom! nnyịn ikemeke ndisịm Enye: okpon odudu, ye ikpe, onyụn̄ awak eti ido; iditụkke tụk. Oro esịn owo ẹbak enye.” (Job 37:1, 14, 23, 24) Mme akpatre ikọ Elihu ẹti nnyịn ẹte ke ini Abasi ke mîdibịghike edibierede ikpe ọnọ mme idiọkowo, enye iditụkke tụk ke ikpe ye edinen ido eyenyụn̄ onịm mmọ oro ẹbakde enye uwem nte mme andituak ibuot oro ẹten̄ede enye. Nso ifet ke edi ntem ndidu ke otu mbon nsọn̄ọnda oro ẹdiọn̄ọde Jehovah nte Andikara Ekondo! Ẹyọ nte Job ọkọyọde, ndien ẹkûdede ẹyak Devil odụri mbufo osio ke itie mbufo oro ẹdiọn̄de ke otu mme okop inemesịt otu ẹmi.
Jehovah Ọbọrọ Job
13, 14. (a) Nso ke Jehovah ọkọtọn̄ọ ndibụp Job mbụme mban̄a? (b) Nso mme n̄kpọ ke nnyịn ikeme ndikpep nto mme mbụme eken oro Abasi okobụpde Job?
13 Didie ke anaedi idem ama akpa Job ntem ke ini Jehovah eketiede ke oyobio ọbọrọ enye! Oyobio oro ekedi edinam Abasi, ke mîbietke akwa oyobio oro Satan akadade ndiwụri ufọk nnyụn̄ n̄wot nditọ Job. Job ikosioroke uyo nte Abasi okobụpde ete: “Afo okodu m̀mọ̀n̄ ke ini ntọn̄ọde ndinam ererimbot? . . . Anie okonyụn̄ onịm itiat inụk esie? Ke ini mme ntantaọfiọn̄ usenubọk ẹkwọde uyo kiet, kpukpru nditọ Abasi ẹnyụn̄ ẹsiode n̄kpo.” (Job 38:4, 6, 7) Jehovah ama obụp Job mbụme ke adiana ke adiana aban̄a inyan̄, obubịt enyọn̄ nte edisịnen̄kpọ esie, usiere, enyịnusụn̄ n̄kpa, un̄wana ye ekịm, ye mme ntantaọfiọn̄. Job ikekemeke nditịn̄ n̄kpọ ndomokiet ke ini ẹkebụpde enye ete: “Nte afo ọmọfiọk mme ewụhọ ikpaenyọn̄?”—Job 38:33.
14 Mme mbụme eken ẹwụt ẹte ke mbemiso ẹkebotde owo ẹnyụn̄ ẹnọde odudu ete akara iyak, inuen, mme unam, ye mme n̄kpọ eke ẹnyọnide, Abasi ama esinọ mmọ n̄kpọ—ye unana un̄wam m̀mê item otode owo ekededi. Ẹsiak mme utọ edibotn̄kpọ nte editịm, ostrich, ye horse ke n̄kaiso mbụme oro Jehovah okobụpde. Ẹma ẹbụp Job ẹte: “Nte edi uyo fo esịn ntrukpom ọdọk aka akanam efọk esie ke enyọn̄?” (Job 39:27) Baba! Kere nte Job akanamde n̄kpọ ke ini Abasi okobụpde enye ete: “Nte andisua nnọ Abasi edibọrọ?” Eyịghe idụhe Job ọkọdọhọde ete: “Sese, mmedehe; ndibọrọ fi didie? nda ubọk mi n̄kụbi inua mi.” (Job 40:2, 4) Sia Jehovah esinende kpukpru ini, edieke akanam nnyịn idomode ndisụk enye uyo, nnyịn ikpenyene ‘ndida ubọk nnyịn n̄kụbi inua nnyịn.’ Mme mbụme Abasi n̄ko ẹma ẹmenede akakan itie, uku, ye odudu esie, nte ẹwụtde ke edibotn̄kpọ.
Behemoth ye Leviathan
15. Ke ofụri ofụri ẹnịm ke Behemoth edi nso utọ unam, ndien nso idi ndusụk n̄kpọ oro ẹdade ẹdiọn̄ọ enye?
15 Ekem Jehovah ama asiak Behemoth, emi ke ofụri ofụri ẹnịmde nte edide isantịm. (Job 40:15-24) Edide n̄wọrọnda ke akwa ubom esie, akwa udobi esie, ye ntụtntụt ikpa esie, unam emi ọbọkde idem ke ikọn̄ mi “ata ikọn̄.” Ebiet emi odudu ye nsọn̄idem esie ẹtode ẹdu ke isịn ye osịp idịbi esie. Mme ọkpọ ukot esie ẹsọn̄ nte “akwa okpoho.” Behemoth ifeheke usọp mmọn̄ edi ọwọk ebe ọtọ.
16. (a) Nte ẹtịn̄de ẹban̄a Leviathan odot ye ewe edibotn̄kpọ, ndien nso idi ndusụk akpanikọ ẹban̄ade enye? (b) Odudu oro Behemoth ye Leviathan ẹnyenede ekeme ndinọ nso ekikere mban̄a edinam mme utom ke utom Jehovah?
16 Abasi n̄ko ama obụp Job ete: “Nte afo emekeme ndida uwam ndụri fiom [“Leviathan,” NW] nsio? m̀mê emekeme ndifịk edeme esie ke urụk?” Nte ẹtịn̄de ẹban̄a Leviathan odot ye fiom. (Job 41:1-34) Enye idinamke ediomi emem ye owo ekededi, ndien idụhe owo eti ibuot ndomokiet emi enyenede uko ekem ndidemede unam eke ọnyọnide-nyọni mi. Idan̄ inamke enye efehe, ndien “enye asak imam ke ẹnyen̄ede eduat.” Leviathan eke ayatde esịt anam udem ofụt nte eso aran. Akpanikọ oro nte ke Leviathan ye Behemoth ẹma ẹnen̄ede ẹkop odudu ẹkan Job ama an̄wam ndinam enye osụhọde idem. Ana nnyịn n̄ko ke nsụhọdeidem ifiọk ite ke nnyịn inyeneke odudu ke idem nnyịn. Ndien imoyom eti ibuot ye ukeme oro Abasi ọnọde man ibọhọ edet Satan, kpa Urụkikọt, inyụn̄ iyọhọ utom nnyịn ke utom Jehovah.—Philippi 4:13; Ediyarade 12:9.
17. (a) Didie ke Job ‘okokụt Abasi’? (b) Mme mbụme oro Job mîkekemeke ndibọrọ ẹkewụt nso, ndien didie ke emi ekeme ndin̄wam nnyịn?
17 Ke ẹnamde enye osụhọde idem ofụri ofụri, Job ama edifiọk ukwan̄ ekikere esie onyụn̄ onyịme ete ke imọ iketịn̄ ikọ ke unana ifiọk. Edi, enye ama owụt mbuọtidem nte ke imọ ‘iyokụt Abasi.’ (Job 19:25-27) Didie ke oro ekpekeme nditịbe, sia owo ndomokiet mîkemeke ndikụt Jehovah ndien odu uwem? (Exodus 33:20) Ke akpanikọ, Job ama okụt uyarade odudu Abasi, okop ikọ Abasi, ẹnyụn̄ ẹtat enye enyịn ikike man okụt akpanikọ aban̄ade Jehovah. Job ke ntre ‘ama asua idemesie onyụn̄ etie ke obu ye ntọn̄ atua n̄kpọfiọk.’ (Job 42:1-6) Ediwak mbụme oro enye mîkekemeke ndibọrọ ama owụt n̄kponn̄kan idaha Abasi onyụn̄ owụt nte owo ekpride, idem enyeoro ama akayak idem ọnọ Jehovah nte Job ekedide. Emi an̄wam nnyịn ndikụt nte ke nnyịn ikpenyeneke ndibat udọn̄ idem nnyịn ke akpan n̄kpọ n̄kan edinam enyịn̄ Jehovah asana ye ediwụt unen itie edikara esie. (Matthew 6:9, 10) Akpan udọn̄ nnyịn ekpenyene ndidi ndimụm nsọn̄ọnda n̄kama ke n̄kan̄ Jehovah ye edikpono enyịn̄ esie.
18. Nso ke okoyom abian̄a abian̄a mbon ndọn̄esịt Job ẹnam?
18 Nso, ndien, kaban̄a abian̄a abian̄a mbon ndọn̄esịt oro ẹkebatde idem ke edinen? Jehovah nte enende ekpekekeme ndiwot Eliphaz, Bildad, ye Zophar ke ndiketre nditịn̄ akpanikọ mban̄a enye, nte Job eketịn̄de. Abasi ọkọdọhọ ete: “Mbufo ẹda ndien enan̄ itiaba, ye okukịm itiaba, ke idem mbufo, ndien ẹka ke ebiet owo mi Job, ẹkewa edifọp uwa ẹban̄a idem mbufo; ndien owo mi Job edinam n̄kpeubọk ọnọ mbufo.” Owo ita emi ẹkenyene ndisụhọde idemmọ man ẹnam emi. Job oro okomụmde nsọn̄ọnda akama ekenyene ndibọn̄ akam mban̄a mmọ, ndien Jehovah ama onyịme akam esie. (Job 42:7-9) Edi nso kaban̄a n̄wan Job, emi akakpakde enye osụn̄i Abasi ndien akpa n̄kpa? Etie nte n̄wan emi ama anam emem ye enye ebe ke mbọm Abasi.
Mme Utịp Oro Ẹn̄wọn̄ọde Ẹnọ Nnyịn Idotenyịn
19. Ke ebuana ye Job, didie ke Jehovah okowụt ke Imọ imokpon ikan Devil?
19 Ndondo oro Job eketrede ndikere mban̄a mme ndutụhọ esie okonyụn̄ afiakde ọtọn̄ọ utom Abasi, Jehovah ama anam mme n̄kpọ ẹkpụhọde ye enye. Ke Job ama ọkọbọn̄ akam aban̄a owo ita oro, Abasi ‘ama osio enye ke itie mbuotekọn̄ afiak edi’ onyụn̄ ọnọ enye “kpukpru se enye ekenyenede utịm ikaba.” Jehovah ama owụt ke Imọ imokpon ikan Devil ebe ke ndiwọn̄ọde ubọk Satan oro ọkọnọde udọn̄ọ mfep nnyụn̄ n̄kọk Job ke utịbe utịbe usụn̄. Abasi n̄ko ama odori mme otu demon oro ukpan onyụn̄ ọbiọn̄ọ mmọ ebe ke nditọn̄ọ ntak nda nna mme angel Esie nsịn ọkọ n̄kan Job n̄kụk.—Job 42:10; Psalm 34:7.
20. Ke mme usụn̄ ewe ke Jehovah ọkọnọ Job utịp onyụn̄ ọdiọn̄ enye?
20 Nditọete Job iren, iban, ye n̄kani ọdiọn̄ọ ẹma ẹkaiso ndidi ndidia n̄kpọ ye enye, ẹseme ye enye, ẹnyụn̄ ẹdọn̄ enye esịt kaban̄a afanikọn̄ oro Jehovah akayakde osịm enye. Mmọ kiet kiet ẹma ẹnọ Job okụk ye n̄kpanuen o-gold kiet. Jehovah ama ọdiọn̄ Job ke ukperedem akan ntọn̄ọ esie, ntre enye ama edinyene n̄kpri ufene 14,000, camel 6,000, enan̄ iba iba ke itie 1,000, ye uman ass 1,000. Job n̄ko ama edinyene nditọiren itiaba ye nditọiban ita, ukem ibat oro enye ekenyenede ke mbemiso. Nditọiban esie—Jemimah, Keziah, ye Keren-happuch—ẹkedi nye-n̄kan iban ke idụt oro, ndien Job ama ọnọ mmọ udeme ke otu nditọete mmọ iren. (Job 42:11-15) Akan oro, Job ama odu uwem isua 140 efen onyụn̄ okụt emana nditọ esie inan̄. Mbụk emi eberi ete: “Edikem Job akpa usọn̄, onyụn̄ oyụhọ isua.” (Job 42:16, 17) Ndinam uwem esie ọniọn̄ ekedi utịbe utịbe utom Jehovah Abasi.
21. Didie ke mbụk N̄wed Abasi aban̄ade Job an̄wam nnyịn, ndien nso ke nnyịn ikpebiere ndinam?
21 Mbụk N̄wed Abasi aban̄ade Job anam nnyịn itịm idu ke edidemede iban̄a mme edinam Satan onyụn̄ an̄wam nnyịn ndikụt nte itie edikara ekondo enyenede ebuana ye nsọn̄ọnda owo. Ukem nte Job, ẹyedomo kpukpru mmọ oro ẹmade Abasi. Edi nnyịn imekeme ndiyọ nte Job ọkọyọde. Enye ama ọbọhọ idomo esie ye mbuọtidem ye idotenyịn, ndien mme utịp esie ẹma ẹwak. Nte mme asan̄autom Jehovah mfịn, nnyịn imenyene ata mbuọtidem ye idotenyịn. Ndien nso akwa idotenyịn ke Akwa Ọnọ-Utịp onịm nnyịn owo kiet kiet ke iso ntem! Ndinyene utịp eke heaven ke ekikere eyen̄wam mmọ oro ẹyetde aran ndinam n̄kpọ Abasi ke edinam akpanikọ ke ofụri ini uwem mmọ ke isọn̄. Ediwak owo oro ẹnyenede idotenyịn eke isọn̄ idikpaha tutu amama, edi ẹyenọ mmọ oro ẹkpade utịp ediset ke n̄kpa ke Paradise ke isọn̄, ọkọrọ ye Job ke idemesie. Ye utọ ata idotenyịn oro ke esịt ye ekikere, yak kpukpru mmọ oro ẹmade Abasi ẹwụt nte ke Satan edi osu nsu ebe ke ndisọn̄ọ nda ke n̄kan̄ Jehovah nte mbon nsọn̄ọnda ye mme anam-akpanikọ andinọ itie edikara ekondo esie ibetedem.
Didie ke Afo Ọkpọbọrọ?
◻ Nso ikedi ndusụk akpan n̄kpọ oro Job eketịn̄de ke akpatre ibọrọ oro enye ọkọbọrọde abian̄a abian̄a mbon ndọn̄esịt esie?
◻ Didie ke Elihu okowụt nte idide ntiense Jehovah oro mîten̄eke owo enyịn?
◻ Nso ikedi ndusụk mbụme oro Abasi okobụpde Job, ndien nso utịp ke mmọ ẹkenyene?
◻ Didie ke afo ọbọ ufọn oto mbụk N̄wed Abasi aban̄ade Job?
[Mme ndise ke page 18]
Mme ikọ Jehovah ẹban̄ade Behemoth ye Leviathan ẹma ẹn̄wam ndinam Job osụhọde idem