UKPEPN̄KPỌ 57
Nso ke Akpanam Edieke Anamde Akwa Idiọkn̄kpọ?
Afo eyedue Jehovah ndusụk ini kpa ye oro afo amade enye onyụn̄ esikpemede idem man udûnam se enye asuade. Edi ndusụk idiọkn̄kpọ esikpon akan ndusụk. (1 Corinth 6:9, 10) Edieke anamde akwa idiọkn̄kpọ, kûfre ke Jehovah osụk amama fi; enye eben̄e idem ndifen nnọ fi nnyụn̄ n̄n̄wam fi.
1. Nso ke ikpanam man Jehovah efen ọnọ nnyịn?
Mbon emi ẹnen̄erede ẹma Jehovah ẹsifụhọ etieti ke ini mmọ ẹkụtde ke imanam akwa idiọkn̄kpọ. Edi se Jehovah ọkọn̄wọn̄ọde ọnọ ikọt esie esidọn̄ mmọ esịt. Enye ọkọdọhọ ete: “Mme idiọkn̄kpọ mbufo ẹkpetie nte iduot, ẹyenam mmọ ẹfia nte snow.” (Isaiah 1:18) Edieke ikabarede esịt, Jehovah eyefen ọnọ nnyịn ofụri ofụri. Didie ke owo esikabade esịt? Owo emi akabarede esịt esinen̄ede atua n̄kpọfiọk idiọkn̄kpọ emi enye anamde, etre ndinam idiọkn̄kpọ oro, onyụn̄ ekpe Jehovah ubọk ete efen ọnọ imọ. Enye esinam se enye ekekeme man etre ndisikere m̀mê ndinam n̄kpọ ekededi emi akanamde enye anam idiọkn̄kpọ, onyụn̄ odomo ndidu uwem nte Jehovah ọdọhọde.—Kot Isaiah 55:6, 7.
2. Didie ke Jehovah esida mbiowo an̄wam nnyịn ima inam idiọkn̄kpọ?
Edieke inamde akwa idiọkn̄kpọ, Jehovah ọdọhọ ‘ikot, m̀mê itịn̄ inọ, mbiowo esop.’ (Kot James 5:14, 15.) Mbiowo ẹma Jehovah ye ikọt esie. Ẹsinyụn̄ ẹkpep mbiowo nte mmọ ẹkemede ndin̄wam nnyịn ifiak idi ufan Jehovah.—Galatia 6:1.
Didie ke mbiowo ẹsin̄wam nnyịn ke ini inamde akwa idiọkn̄kpọ? Mbiowo iba m̀mê ita ẹsida Bible ẹwụt nnyịn ke se ikanamde ọdiọk. Mmọ ẹyenọ nnyịn item ẹnyụn̄ ẹtịn̄ se idin̄wamde nnyịn ikûnam idiọkn̄kpọ. Edieke owo emi akanamde akwa idiọkn̄kpọ mîkabakede esịt, mbiowo ẹsisio enye ke esop man enye idibiat mbon en̄wen.
SỊN IDEM KPEP
Se se idin̄wamde fi ọdiọn̄ọ nte Jehovah esin̄wamde nnyịn ke ini inamde akwa idiọkn̄kpọ, ye se idinamde fi ama se enye esinamde oro.
3. Ndiyarade idiọkn̄kpọ nnyịn esinam ifiak idi ufan Jehovah
Idiọkn̄kpọ ekededi oro inamde ebehe Jehovah. Ntre ọfọn iyarade idiọkn̄kpọ nnyịn inọ enye. Kot Psalm 32:1-5, ekem ẹbọrọ mbụme emi ẹnyụn̄ ẹneme ẹban̄a enye:
Ntak ọfọnde isiyarade idiọkn̄kpọ nnyịn inọ Jehovah utu ke ndidedịp?
Esifere nnyịn ke idem ima iyarade idiọkn̄kpọ nnyịn inọ Jehovah, inyụn̄ itịn̄ inọ mbiowo man ẹn̄wam nnyịn. Se VIDIO emi, ekem ẹbọrọ mbụme oro etienede ẹnyụn̄ ẹneme ẹban̄a enye.
Ke vidio oro, didie ke mbiowo ẹken̄wam Canon afiak etiene Jehovah?
Ana isitịn̄ akpanikọ inọ mbiowo, ikûdịp mmọ n̄kpọ sia mmọ ẹyom ndin̄wam nnyịn. Kot James 5:16, ekem ẹbọrọ mbụme emi ẹnyụn̄ ẹneme ẹban̄a enye:
Nnyịn nditịn̄ akpanikọ edisan̄a didie inam emem utom ọnọ mbiowo ndin̄wam nnyịn?
Yarade idiọkn̄kpọ fo, tịn̄ akpanikọ nọ mbiowo, nyụn̄ nyịme Jehovah an̄wam fi
4. Jehovah esitua mme anamidiọk mbọm
Edieke owo emi anamde akwa idiọkn̄kpọ mîmaha ndinam se Jehovah ọdọhọde, ọfọn ẹsio enye ke esop. Inaha idian idem ye enye. Kot 1 Corinth 5:6, 11, ekem ẹbọrọ mbụme emi ẹnyụn̄ ẹneme ẹban̄a enye:
Ukem nte leaven esinamde uyo ofụt, nso ke ndidian idem ye owo emi mîmaha ndikabade esịt ekeme ndinam ke esop?
Ukem nte Jehovah esituade mme anamidiọk mbọm, mbiowo ẹsika ẹbịne mbon oro ẹkesiode ẹfep ke esop man ẹn̄wam mmọ ẹfiak ẹdinam n̄kpọ Abasi. Kpa ye emi ntụnọ oro akabiakde mmọ, ntụnọ oro ama anam mmọ ẹkụt ke se mmimọ ikanamde ikọfọnke.—Psalm 141:5.
• Didie ke nte Jehovah esinamde n̄kpọ ye mme anamidiọk owụt ke Enye enyene ifiọk, mbọm ye ima?
5. Jehovah esifen ọnọ owo emi akabarede esịt
Jesus ama ọnọ uwụtn̄kpọ emi an̄wamde nnyịn ikụt nte esitiede Jehovah owo ama akabade esịt. Kot Luke 15:1-7, ekem ẹbọrọ mbụme emi ẹnyụn̄ ẹneme ẹban̄a enye:
Nso ke itie Bible emi ekpep fi aban̄a Jehovah?
Kot Ezekiel 33:11, ekem ẹbọrọ mbụme emi ẹnyụn̄ ẹneme ẹban̄a enye:
Nso ke ana owo anam man owụt ke imenen̄ede ikabade esịt?
Jehovah esinen̄ede ese aban̄a ikọt esie ukem nte eti ekpemerọn̄ esisede aban̄a erọn̄
NDUSỤK OWO ẸSIDỌHỌ ẸTE: “N̄kpetịn̄ idiọkn̄kpọ mi nnọ mbiowo, ẹyesio mi ke esop.”
Nso ke ọkpọdọhọ owo emi etịn̄de utọ ikọ ntre?
SE IKPEPDE
Jehovah eyefen ọnọ nnyịn ikpenen̄ede ikabade esịt inyụn̄ itre idiọkn̄kpọ oro ikanamde, inamke n̄kpọ m̀mê idiọkn̄kpọ oro okokpon didie.
Se M̀mê Emeti
Ntak ọfọnde iyarade idiọkn̄kpọ nnyịn inọ Jehovah?
Nso ke ikpanam man Jehovah efen mme idiọkn̄kpọ nnyịn?
Edieke inamde akwa idiọkn̄kpọ, ntak ọfọnde idọhọ mbiowo man ẹn̄wam nnyịn?
KPEP N̄KPỌ EN̄WEN
Se nte Jehovah akanamde se idude ke Isaiah 1:18 ye ete kiet.
Ẹma ẹsio owo ẹfep ke esop, didie ke oro esin̄wam owo oro ye mbon en̄wen?
“Nte Mbiowo Ẹkemede Ndiwụt ke Imama Mme Anamidiọk Inyụn̄ Ikop Mmọ Mbọm” (Enyọn̄-Ukpeme, August 2024)
Se Se nte ẹmade ẹnyụn̄ ẹtuade mbon oro mîkabakede esịt mbọm
“Nte Mbiowo Ẹkemede Ndin̄wam Mbon Emi Ẹsiode Ẹfep ke Esop” (Enyọn̄-Ukpeme, August 2024)
Ke ibuotikọ emi “Akana Mfiak Nnyọn̄ Mbịne Jehovah,” se se ikanamde ete kiet emi ọkọkpọn̄de esop Abasi enịm ke Jehovah akafiak ada enye edisịn ke esop esie.