Ẹnam Uwem Mbufo Okụt Unen!
“Ọfọfọn ọnọ owo eke mîsan̄ake ke item mme idiọk owo . . . Kpukpru se enye anamde [oyokụt unen, NW].”—PSALM 1:1, 3.
1. (a) Didie ke ediwak uyen ke ererimbot ẹse edikụt unen? (b) Didie ke Bible etịn̄ aban̄a owo emi okụtde unen?
EDIKỤT unen—nso ke ikọ oro ọwọrọ ọnọ fi? “Ata akpan utịtmbuba mi edi ndidi andikụt unen ke mbubehe,” ntre ke akparawa kiet ọkọdọhọ. N̄kaiferi kiet ọkọdọhọ ete: “Akpan uduak mi edi ndinyene ubon oro okopde inemesịt.” Edi n̄kaiferi efen ọkọdọhọ ete: “Akpan uduak mi akam edi ndinyene ediye ufọkidụn̄, ediye ubomisọn̄ . . . Se ibehede mi edi udọn̄ idemmi.” Mfịna edi nte ke okụk, ubon, m̀mê idem uforo uforo ubọkọkọ idịghe se ẹdade ẹbiere ata edikụt unen. Ke Psalm 1:1-3, nnyịn ikot ite: “Ọfọfọn ọnọ owo eke mîsan̄ake ke item mme idiọk owo . . . Mbet Jehovah adat enye esịt . . . Kpukpru se enye anamde [oyokụt unen, NW].”
2. M̀mọ̀n̄ ke ẹkeme ndikụt ata unen, ndien nso idi n̄kukụre usụn̄ ndinyene enye?
2 Bible mi ọn̄wọn̄ọ n̄kpọ oro owo ndomokiet mîkemeke ndinọ—ata edikụt unen! Edi enye itịn̄ke iban̄a udori okụk. Bible ke idemesie odụri owo utọn̄ ete: “Itọn̄ inyene edi orụn̄ kpukpru orụk mme idiọk-n̄kpọ.” (1 Timothy 6:10) Ẹkụt ata unen ke ndinem Abasi esịt—esịnede edinịm ibet Jehovah. Enye emi kpọt ekeme ndida ata uyụhọ ye ata inemesịt ndi! Ekeme ndidi ekikere edidu ke idak ibet Jehovah nnyụn̄ ndi se ẹtemede-teme se edinamde itiehe inem inem. Edi, Jesus ọkọdọhọ ete: “Inemesịt odu ọnọ mbon oro ẹnyenede udọn̄ ke n̄kpọ eke spirit mmọ.” (Matthew 5:3, NW) Edide afo ọmọfiọk m̀mê ufiọkke, ẹkebot fi ye mme udọn̄ n̄kpọ eke spirit—esịnede ọkpọsọn̄ udọn̄ ndifiọk Abasi nnyụn̄ ndiọn̄ọ mme uduak esie. Ke ntre, afo ekeme ndinyene ata inemesịt n̄kukụre edieke afo oyụhọde mme udọn̄ oro onyụn̄ etienede “mbet Jehovah.”
Ntak Nnyịn Iyomde Mbet Abasi
3. Ntak emi nnyịn ikpokopde inemesịt ndiyak Jehovah ‘enen̄ede ikpat nnyịn’?
3 Prọfet Jeremiah ekewet ete: “O Jehovah, mmọfiọk nte ke usụn̄ owo idụhe owo ke ubọk: owo eke asan̄ade inyụn̄ ikemeke ndinen̄ede ikpat esiemmọ.” (Jeremiah 10:23) Emi edi ntre ye kpukpru owo, n̄kpri ye ikpọ. Idịghe ọniọn̄, ifiọk n̄kpọntịbe, ye ifiọk ndinen̄ede ikpat nnyịn kpọt ke nnyịn inana; nnyịn ikam inyeneke-nyene unen ndinam ntre. Ke Ediyarade 4:10b, Bible ọdọhọ ete: “Ọbọn̄ ye Abasi nnyịn, Afo omodot ndibọ ubọn̄ ye ukpono ye odudu, koro Afo okobotde kpukpru n̄kpọ; ndien oto uduak Fo ke mmọ ẹdu, ẹkenyụn̄ ẹboro.” Nte Andibot nnyịn, Jehovah edi “ntọn̄ọ uwem.” (Psalm 36:9, NW) Ke ntre, enye ọfiọk nte nnyịn ikpadade uwem nnyịn inam n̄kpọ akan owo ekededi. Ntre enye ikanamke mbet man ọbiọn̄ọ nnyịn ndidara uwem, edi man an̄wam nnyịn ibọ ufọn. (Isaiah 48:17) Ke ofụmide ibet Abasi, afo oyokụt edikpu.
4. Ntak emi ata ediwak uyen ẹbiatde uwem mmọ?
4 Ke uwụtn̄kpọ, ndi akanam afo emekere aban̄a ntak emi ata ediwak uyen ẹbiatde uwem mmọ ebe ke n̄kpọsọn̄ ibọk, etịme etịme ido, ye mme idiọkido eken? Psalm 36:1, 2 anam an̄wan̄a ete: “Idiọk ọdọhọ idiọk owo ke ọwọn̄ esịt esie: baba uten̄e Abasi idụhe enye ke iso. Koro enye abian̄ade idem esie ke enyịn esiemmọ, aban̄a edikụt ye edisua idiọk ido esie.” Sia mmọ mînyeneke “uten̄e Abasi,” ediwak uyen ẹbian̄a idemmọ ndinịm ke akpanikọ nte ke ndiọi edu uwem inyeneke ndiọi utịp. Nte ededi, ke akpatre mmọ ẹnyene ndinyịme edumbet emi owo mîkemeke ndikpụhọde mi: “Se ededi owo ọtọde, oro ke enye edinyụn̄ ọdọk. Owo eke ọtọde ọnọ obụkidem ọyọdọk mbiara oto obụkidem; edi owo eke ọtọde ọnọ Spirit, oto ke Spirit ke enye ọyọdọk nsinsi uwem.”—Galatia 6:7, 8.
“Ndibat Usen”
5, 6. (a) Ntak emi mme uyen ẹkpenyenede ‘ndibat usen mmọ,’ ndien nso ke ndinam oro ọwọrọ? (b) Nso ke ‘nditi Andibot nnyịn’ ọwọrọ?
5 Didie ke afo ekeme ndinam uwem fo okụt unen ndien ‘ọdọk nsinsi uwem’? Moses ekewet ete: “Isua ata ye duop ẹdu ke eyo uwem nnyịn, ye isua anan̄, edieke nsọn̄idem odude . . . koro enye (isua) awarade ndibe, ndien nnyịn idan̄a.” (Psalm 90:10) Ọsọsọn̄ afo ndikere mban̄a n̄kpa, edieke edide amakam ekekere. Ke akpanikọ, ediwak uyen ẹsinam n̄kpọ nte n̄kpọ eke mmọ mîkemeke ndikpa. Edi Moses owụt nnyịn ata idem n̄kpọ oro edide ubiak ubiak n̄kpọ nte ke uwem edi ibio ibio. Ubiọn̄ ikam idụhe nte ke nnyịn iyodu uwem isịm isua 70 m̀mê 80. “Ini ye unọmọ” ẹkam ẹkeme ndisịbe uwem mbon oro ẹdide uyen ẹnyụn̄ ẹkopde nsọn̄idem. (Ecclesiastes 9:11) Didie, ndien, ke afo edida ọsọn̄urua uwem oro afo enyenede idahaemi anam n̄kpọ? Moses ọkọbọn̄ akam ete: “Nam nnyịn ifiọk ndibat usen nnyịn ntem, man nnyịn ida esịt ifiọk idi.”—Psalm 90:12.
6 Nso ke ndibat usen fo ọwọrọ? Enye iwọrọke ite ke afo ekpenyene ndiwụk ekikere ke udomo ini emi afo ekemede ndidu uwem. Moses ọkọbọn̄ akam ete Jehovah ekpep ikọt Esie nte ẹkemede ndida usen ẹmi ẹsụhọde ẹnọ mmọ nnam n̄kpọ ke usụn̄ oro adade ukpono ọsọk Enye. Nte afo amabat usen uwem fo—adade usen kiet kiet nte ọsọn̄urua inyene ndida nnam n̄kpọ man ada itoro ọsọk Abasi? Bible ọnọ n̄kparawa owo nsịnudọn̄ emi: “Sio iyatesịt ke esịt fo fep, ndien, nyụn̄ bịn se idiọkde ke obụkidem fo fep: koro uyen ye usiere uwem ẹdide ikpîkpu. Nyụn̄ ti Andibot fi ke ini afo edide akparawa.” (Ecclesiastes 11:10–12:1) Nditi Andibot nnyịn esịne n̄kpọ akan ikpîkpu editi nte ke enye odu. Ke ini anamidiọk oro ekeben̄ede Jesus ete: “Ti mi ke adan̄aemi Afo edide ndida ubọn̄,” enye okoyom Jesus anam se ikande nditi enyịn̄ esie. Enye okoyom Jesus anam n̄kpọ, anam enye eset! (Luke 23:42; men Genesis 40:14, 23; Job 14:13 domo.) Ke ukem usụn̄ oro, nditi Jehovah abuana ndinam n̄kpọ, ndinam se inemde enye esịt. Ndi ẹkeme ndidọhọ ke afo ke eti Jehovah?
Fep Ndifụbe Mme Anamidiọk
7. Ntak emi ndusụk uyen ẹmekde ndifre Andibot mmọ? Nọ uwụtn̄kpọ.
7 Ediwak n̄kpri owo ẹmek ndifre Jehovah koro mmọ ẹkerede ẹte ke ndidi Ntiense etie ukpan ukpan akaha. Eyenete kiet ke Spain eti nte eketiede enye ke idem ke ini ekedide uyen: “Mma nnyene udọn̄ ke ererimbot koro akpanikọ eketiede mfịna mfịna ye nsọn̄ido nsọn̄ido. Enye ọkọwọrọ nditetie, ndikpep n̄kpọ, ndika mme mbono esọp, ndisịn urụkitọn̄, ndien n̄kamaha mme n̄kpọ oro.” Ndi esitie fi ke idem ndusụk ini nte ke amataba n̄kpọ ke ntak emi anamde n̄kpọ Abasi? Ekeme ndidi ayakpa fi idem ndifiọk nte ke ama etie kiet ke otu mme andiwet Bible ntre ke idem. Mbọk kụbọde Bible fo nyụn̄ kot Psalm 73.
8. Ntak emi Asaph ‘ekefịbede mbon iseri ufụp’?
8 Ẹyak nnyịn idụn̄ọde ndusụk ntọt ke psalm emi. Ps 73 Ufan̄ikọ 2 ye 3 ẹdọhọ ẹte: “Edi ama edi ami, osụk esisịt ukot ọkpọfiọnọde mi; osụk ata esisịt ikpat ekpefebede mi. Koro n̄kefịbede mbon iseri ufụp, n̄kụt ifụre mme idiọk owo.” Nte ekemde ye ikọ enyọn̄ n̄wed, Asaph ekewet psalm emi. Enye ekedi ebre ikwọ owo Levi ye owo ukem iduọk ini ye Edidem David. (1 Chronicles 25:1, 2; 2 Chronicles 29:30) Okposụkedi enye ekenyenede eti ifet ndinam utom ke temple Abasi, enye ama ‘efịbe’ mme owo oro ẹkenamde inua ẹban̄a ukwan̄ido mmọ. Eketie nte ke n̄kpọ ama ọfọn ye mmọ; eketie nte mmọ ẹma ẹnyene emem ye ifụre. Ke akpanikọ, unen oro eketiede nte ke mmọ ẹma ẹkụt ama anam “ekikere esịt mmọ ebe ọwọrọ.” (Ps 73 Ufan̄ikọ 5, 7) Mmọ ẹma “ẹtie ke enyọn̄,” oro edi, ke edu ntan̄idem, ẹtịn̄ ẹban̄a mme edinam ufịk mmọ. (Ps 73 Ufan̄ikọ 8) “Ẹnịm inua mmọ ẹse enyọn̄, edeme mmọ onyụn̄ asan̄a ke ererimbot,” ikereke iban̄a owo ndomokiet—edide ke heaven m̀mê ke isọn̄.—Ps 73 Ufan̄ikọ 9.
9. Didie ke ekeme nditie ndusụk uyen Christian mfịn ke idem nte eketiede Asaph?
9 Eyedi ẹkeme nditịn̄ ukem oro mban̄a mme uke fo ke ufọkn̄wed. Afo emekeme ndikop mmọ ẹwọkde inua ye unana bụt ẹban̄a obukpo idan̄, idat idat usọrọ mmọ, ye edisịn idem ke uda n̄kpọsọn̄ mmịn ye n̄kpọsọn̄ ibọk. Ke ini afo emende se mmọ ẹkotde udia uwem odomo ye mfafaha usụn̄ emi anade afo asan̄a nte Christian, afo ndusụk ini emekeme ‘ndifụbe mbon iseri ufụp.’ (Matthew 7:13, 14) Asaph ke idemesie ama esịm idaha oro enye ọkọdọhọde ete: “Mmanam esịt mi asana ikpîkpu ikpîkpu, mmonyụn̄ nyet ubọk mi ke edisana ido. Ndien n̄kụt ufen ofụri usen.” (Ps 73 Ufan̄ikọ 13, 14) Ih, enye ama ọtọn̄ọ ndibụp ufọn edinam n̄kpọ Abasi nnyụn̄ ndu eti uwem.
10, 11. (a) Nso ikanam Asaph okpụhọde ekikere? (b) Didie ke mme anamidiọk ẹdu ke “mfọfiọnọ ebiet”? Nọ uwụtn̄kpọ.
10 Ke mfọniso, Asaph ikodụhe ke idaha unana idotenyịn emi ke anyan ini. Enye ama ọsọsọp okụt ete ke emem oro eketiede nte mme idiọkowo ẹnyene ekedi sụk abian̄a—ndien ekedi sụk n̄kpọ ibio ini! Enye ama etịn̄ ete: “Afo odori mmọ kpa ke mfọfiọnọ ebiet: ọduọk mmọ ke nditaha. Didie ke mmọ ẹkabade ẹdi n̄kpọ nsobo ke idaha kiet! Mmọ ẹmekụre ke akpakop n̄kpọ ndịk.” (Ps 73 Ufan̄ikọ 18, 19) Ediwak uke fo ẹdu ke “mfọfiọnọ ebiet” kpasụk ntre. Ebebịghi m̀mê awawara mmọ ẹyedọk utịp edu unana uten̄e Abasi mmọ, osụn̄ọde ke uyomo idịbi oro owo mîyomke, udọn̄ọ oro ẹdade ẹto idan̄, idem n̄kpọkọbi m̀mê n̄kpa! Ke akam ọdiọkde akan oro, mmọ ẹda nsannsan ye Abasi.—James 4:4.
11 Ekpri Ntiense kiet ke Spain ama okụt akpanikọ emi ke idemesie. Nte uyen, enye okodu uwem esịt iba, enen̄erede enyene ebuana ye otu uyen oro mîkabakke Abasi. Ikebịghike, enye ama ọduọ ke ima ye kiet ke otu mmọ—enyene mbumehe uda n̄kpọsọn̄ ibọk. Okposụkedi enye ke idemesie mîkadaha n̄kpọsọn̄ ibọk, enye ama esidep n̄kpọsọn̄ ibọk ọnọ akparawa oro. Enye enyịme ete: “Mma nsikam n̄n̄wam ndiwụk enye abiabon.” Ke mfọniso, enyịn ama an̄wan̄a eyenete an̄wan emi ndien ẹma ẹfiak ẹnam enye enyene nsọn̄idem eke spirit. Edi akakpa enye idem didie ndikop ke ukperedem nte ke ufan eren esie oro ekesidade n̄kpọsọn̄ ibọk ama akpa ke ntak AIDS. Ih, kpa nte andiwet psalm ọkọdọhọde, mme owo ẹmi mîbakke Abasi ẹdu ke “mfọfiọnọ ebiet.” Ndusụk mmọ ẹkeme ndikpan̄a ke unana idotenyịn nte utịp obukpo ido uwem mmọ. Ama edi mbon eken, ibọhọke mmọ ẹkpụhọde usụn̄ mmọ, ke ini iso mmọ ẹyesobo “ini emi Ọbọn̄ Jesus editode ke heaven ọbiọn̄ọde ke ikan̄ emi asakde, ye mme angel odudu Esie, edisio usiene ọnọ mmọ ẹmi mîfiọkke Abasi, mînyụn̄ isụkke ibuot inọ gospel Ọbọn̄ nnyịn Jesus.”—2 Thessalonica 1:7, 8.
12. Didie ke uyen kiet ke Japan ekedikụt nte edide ndisịme ndifịbe mme anamidiọk?
12 Do, edi ndisịme didie ntem ndifịbe “mmọ ẹmi mîfiọkke Abasi”! Ke akpanikọ, edi mbon oro ẹfiọkde Jehovah ẹnyụn̄ ẹnyenede idotenyịn ndidu uwem ke nsinsi ke ẹnyene ndifịbe. Ekpri eyenete kiet ke Japan ama edifiọk oro. Nte uyen, enye n̄ko “ama oyom ifụre efen efen.” Enye anam an̄wan̄a ete: “N̄kekere ke mmataba n̄kpọ. Ekem ndifiọk nte uwem mi editiede edieke n̄kpọn̄de akpanikọ. Mma n̄keme ndikụt nte ndude uwem isua 70 m̀mê 80 ndien ekem n̄kpa. Edi Jehovah ọnọ idotenyịn nsinsi uwem! Ndifiọk emi ama an̄wam mi ndiwụt esịtekọm nnọ se n̄kenyenede.” Kpa ye oro, ndinam akpanikọ ke ini owo odude ke otu mbon oro mîtieneke ibet Abasi idịghe mmemmem n̄kpọ. Nso idi ndusụk n̄kpọ ẹmi afo ekemede ndinam man ọbiọn̄ọ mme utọ mfịghe oro?
Kpeme Mme Nsan̄a Fo!
13, 14. Ntak emi edide akpan n̄kpọ ndisasat mme nsan̄a?
13 Ẹyak nnyịn itọn̄ọ ntak ise se ẹtịn̄de ẹban̄a owo oro okụtde unen, emi ẹwetde ke Psalm 1:1-3: “Ọfọfọn ọnọ owo eke mîsan̄ake ke item mme idiọk owo, mînyụn̄ idaha ke usụn̄ mme anam idiọk, mînyụn̄ itiehe ke itie mbon nsahi; edi mbet Jehovah adat enye esịt; enye onyụn̄ osụk ekere mbet esie ke uwemeyo ye ke okoneyo. Ndien enye ebiet eto eke ẹtọde ke mben akpa mmọn̄, eke osion̄ode mfri esie ke ekem ini; ikọn̄ esie inyụn̄ iken̄eke; ndien kpukpru se enye anamde ọwọrọ usụn̄.”
14 Tịm fiọk ke akpa ifet nte ke mme nsan̄a fo ẹnyene akamba udeme. Mme N̄ke 13:20 ọdọhọ ete: “Owo eke asan̄ade ye mme enyene-ibuot eyenyene ibuot: edi nsan̄a mbon ndisịme ọyọdiọn̄ ọdiọk.” Emi iwọrọke ndinana ima, nditie nsọn̄ido nsọn̄ido, m̀mê ikọ ikọ ye mme uyen ẹmi mîdịghe Mme Ntiense Jehovah. Bible esịn udọn̄ ọnọ nnyịn ete ima mbọhọidụn̄ nnyịn inyụn̄ ‘idu ke emem ye kpukpru owo.’ (Rome 12:18; Matthew 22:39) Nte ededi, afo emekeme ndikụt nte afo ‘asan̄ade ke item’ mbon oro mîtieneke mme idaha Bible edieke afo odụkde n̄kpet n̄kpet nsan̄a ye mmọ akaha.
Mme Ufọn Edikot Bible
15. Didie ke mme uyen ẹkeme ndikọri udọn̄ nnọ edikot Bible?
15 Andiwet psalm ọkọdọhọ n̄ko ete ke owo oro okụtde unen okop inemesịt ndikot mbet Abasi “ke uwemeyo ye ke okoneyo.” (Psalm 1:1, 2) Edi akpanikọ, idịghe mmemmem n̄kpọ ndikot Bible, ndien ‘ndusụk n̄kpọ ẹdu eke ọsọn̄de owo nditịm mfiọk’ ke esịt. (2 Peter 3:16) Edi iyomke edikot Bible etie mba mba. Emekeme ‘ndiyom ata mmọn̄eba’ eke Ikọ Abasi. (1 Peter 2:2) Domo ndikot esisịt kpọt ke usen kiet kiet. Edieke odude mme n̄kpọ oro mîn̄wan̄ake fi, nam ndụn̄ọde. Ke oro ebede, kere ban̄a se okokotde. (Psalm 77:11, 12) Edieke mûkemeke ndiwụk ekikere, domo ndikot “ke esịt,” (NW) uyo ọwọrọ. Nte ini akade, ima emi afo enyenede ọnọ edikot Bible iditreke ndikọri. Ekpri eyenete an̄wan kiet ke Brazil eti ete: “Kpukpru ini ekesitie nte Jehovah odu nsannsan ọkpọn̄ mi. Edi ke ndusụk ọfiọn̄ idahaemi, ami mmanam n̄kọri ke ọkpọkpọ ukpepn̄kpọ ye edikot Bible mi. Idahaemi etie mi ke idem nte ke itie ebuana mi ye Jehovah enen̄ede ọsọn̄ idem. Enye enen̄ede edi ata owo ọnọ mi.”
16. Didie ke nnyịn ikeme ndibọ ekese ufọn nto mme mbono esop?
16 Edidụk mme mbono esop edi akpan n̄kpọ n̄ko kaban̄a n̄kọri eke spirit fo. Edieke afo ‘etịn̄de enyịn ekpeme adan̄a nte okopde,’ afo emekeme ndibọ ekese nsịnudọn̄. (Luke 8:18) Ndi esitie fi ke idem ndusụk ini nte ke mme mbono esop itịmke inem? Ọfọn, bụp idem fo, ‘Nso ke ami nnam man nnam mme mbono esop ẹnyene inem? Ndi mmesinọ n̄kpan̄utọn̄? Ndi mmesitịm idem? Ndi mmesibọrọ mbụme?’ Kamse, Bible ọdọhọ nnyịn ete “ikere nte ikpedemerede kiet eken inọ ima ye nti utom; . . . inọ kiet eken item.” (Mme Hebrew 10:24, 25) Man anam emi ana afo etiene abuana! Edi akpanikọ, man afo etiene abuana ana ebem iso etịm idem. Ekpri eyenete an̄wan kiet enyịme ete: “Enen̄ede edi mmemmem n̄kpọ nditiene mbuana ke mme mbono esop ke ini afo etịmde idem.”
Nditiene Usụn̄ Abasi Ada Esịm Edikụt Unen
17. Didie ke owo emi etịn̄de enyịn okot Bible “ebiet eto eke ẹtọde ke mben akpa mmọn̄”?
17 Andiwet psalm aka iso etịn̄ aban̄a owo emi okụtde unen ete ke “ebiet eto eke ẹtọde ke mben akpa mmọn̄.” Ekeme ndidi akpa mmọn̄ akada aban̄a mme ukpe oro ẹkesidade mmọn̄ do ẹduọk ke mme eto ke mme in̄wan̄ mfri. (Isaiah 44:4) Edikot Bible ke usen ke usen etie nte ndinyene ebuana ye utọ ebiet oro ẹnyenede udia ye nduọkodudu ẹto, emi mîkemeke ndikpu. (Jeremiah 17:8) Afo eyenyene odudu emi afo oyomde man ọyọ mme idomo ye mme mfịna. Ke ama ọkọfiọk ekikere Jehovah, afo eyenyene ọniọn̄ oro afo oyomde man anam nti ubiere.
18. Nso ikeme ndinam akparawa owo okụt unen ke ndinam n̄kpọ Jehovah?
18 Ndusụk ini, ekeme nditie nte edi ọkpọsọn̄ n̄kpọ ndinam n̄kpọ Jehovah. Edi kûdede ukere ke ọsọn̄ akaha ndinam. (Deuteronomy 30:11) Bible ọn̄wọn̄ọ ọnọ fi ete ke ‘kpukpru se afo anamde ọyọwọrọ usụn̄’ ke akpatre, adan̄a nte akpan uduak fo edide ndinem nnyụn̄ ndat Jehovah esịt! (Mme N̄ke 27:11) Ndien ti, afo udaha ikpọn̄ unam emi. Afo emenyene ibetedem otode Jehovah ye Jesus Christ. (Matthew 28:20; Mme Hebrew 13:5) Mmọ ẹdiọn̄ọ mme mfịghe emi afo osobode, ndien tutu amama mmọ idikpọn̄ke fi. (Psalm 55:22) Afo n̄ko emenyene ibetedem otode “nditọ-ete” ye ete ye eka fo edieke mmọ ẹdide mme abak-Abasi. (1 Peter 2:17) Ye utọ ibetedem oro, ọkọrọ ye ubiere ye ukeme fo, afo emekeme ndikụt unen ke uwem, idịghe idahaemi kpọt, edi ke nsinsi!
Mme Mbụme Ndida Nnam Ndụn̄ọde
◻ Nso idi ata edikụt unen?
◻ Ntak emi nnyịn iyomde Jehovah enen̄ede ikpat nnyịn?
◻ Didie ke mme uyen ẹkeme ‘ndibat usen mmọ’?
◻ Ntak emi edide ndisịme ndifịbe mme anamidiọk?
◻ Didie ke edikot Bible eke usen ke usen ye edidụk mme mbono esop kpukpru ini ẹkeme ndin̄wam mme uyen ẹkụt unen ke uwem?
[Ndise ke page 20]
Sia mmọ mînyeneke “uten̄e Abasi,” ediwak uyen ẹsịn idem ke edu uwem oro akamade nsobo
[Ndise ke page 22]
Mme uyen ẹsiwak ndifre nte ke mme edinam mmọ ẹnyene utịp
[Ndise ke page 23]
Kọri ima nọ edikot Bible
[Ndise ke page 23]
Mme mbono esop ẹyenen̄ede ẹnem fi edieke afo etịmde idem