Mbọm Jehovah Anyan̄a Nnyịn Osio ke Unana Idotenyịn
“O Abasi, tua mi mbọm, nte ima fo edide: sọhi ndudue mi fep ke ediwak mbọm fo.”—PSALM 51:1.
1, 2. Didie ke akwa idiọkn̄kpọ ekeme nditụk kiet ke otu mme asan̄autom Jehovah?
OWO ikemeke ndibiat ibet Jehovah mbọhọ ufen. Oro owụt idem didie ntem edieke nnyịn inamde ndusụk akwa idiọkn̄kpọ idian Abasi! Okposụkedi ekemede ndidi nte ke nnyịn ima inam n̄kpọ Jehovah ke edinam akpanikọ ke ediwak isua, ndibiat ibet esie ekeme ndidi ntak ọkpọsọn̄ editịmede esịt m̀mê ọkpọsọn̄ mfụhọ. Nnyịn imekeme ndikere ke Jehovah ọmọkpọn̄ nnyịn ye nte ke nnyịn idotke aba ndinam n̄kpọ esie. Idiọkn̄kpọ nnyịn ekeme nditie nte ọkpọsọn̄ idiọk enyọn̄ oro ọbiọn̄ọde un̄wana mfọn Abasi.
2 Edidem David eke Israel eset inikiet ama okụt idemesie ke utọ idaha oro. Didie ke idaha emi ọkọtọn̄ọ?
Idiọk Usio-Ukot Ekeme Ndida Nsịm Akwa Idiọkn̄kpọ
3, 4. Nso ikotịbe inọ Edidem David ke ini uforo?
3 David ama ama Abasi edi ama anam idiọk usio-ukot oro akadade okosịm ikpọ idiọkn̄kpọ. (Men Galatia 6:1 domo.) Emi ekeme nditịbe nnọ anana mfọnmma owo ekededi, akpan akpan edieke enye enyenede odudu ke idem mbon efen. Nte edidem oro oforode, David ama ọwọrọ etop onyụn̄ enyene odudu. Anie ekpedede eneni ikọ esie? Mbon oro ẹnyenede ukeme ẹkesidu ke mben̄eidem ẹnyụn̄ ẹnyịme ndinam n̄kpọ nnọ enye, ndien mme owo ẹma ẹsinyene udọn̄ ndinam se enye oyomde mmọ ẹnam. Edi, David ama edue ke ndidọ ediwak iban ye ke ndibat mme owo.—Deuteronomy 17:14-20; 1 Chronicles 21:1.
4 Ke ini uforo n̄kpọ obụkidem emi, David ama anam ikpọ idiọkn̄kpọ adian Abasi ye owo. Kamse, idiọkn̄kpọ kiet ama ada osịm eken nte urụk ọfọn̄ oro Satan okịmde adian kiet! Ke adan̄aemi ekemmọ nditọ Israel ẹken̄wanade ẹkọn̄ ye mbon Ammon, David ama ada ke enyọn̄ ufọk esie ese ediye n̄wan Uriah, kpa Bath-sheba, nte eyerede mmọn̄. Uriah ke akan̄wana ekọn̄, edidem ama ọdọhọ ẹda n̄wan oro ẹdi ufọkubọn̄ esie onyun̄ esịn efịbe ye enye. Kere nte esịt okotịmerede enye ke ini ọkọfiọkde ke ukperedem ete ke enye ama oyomo! David ama ọdọhọ ẹda Uriah ẹdi, odoride enyịn ete ke enye eyedu ye Bath-sheba ke okoneyo oro ndien ke eyedọhọ ke eyen oro edi eke imọ. Okposụkedi oro David akanamde enye akpa mmịn, Uriah ama esịn ndina ye enye. Idahaemi ke mbrenyịn, David ama ọnọ Joab etubom ekọn̄ ndedịbe ewụhọ ete esịn Uriah ke iso ekọn̄ ke ebiet emi enye edikpade. Ẹma ẹwot Uriah ke ekọn̄, ebeakpa esie ama onịm ini ntuan̄a nte ido esidide, ndien David ama ọdọ enye mbemiso mme owo ẹkefiọkde ẹban̄a uyomo idịbi esie.—2 Samuel 11:1-27.
5. Nso ikotịbe ke David ama akanam idiọkn̄kpọ ye Bath-sheba, ndien nso utịp ke mme idiọkn̄kpọ esie ẹkenyene ke idemesie?
5 Ebede ke prọfet Nathan, Abasi ama ayarade idiọkn̄kpọ David onyụn̄ ọdọhọ ete: “Ami nyenam idiọkn̄kpọ etịbe ke ufọk fo anam fi.” Mmọdo, eyen oro akamanade ọnọ Bath-sheba ama akpa. (2 Samuel 12:1-23) Akpan David, Amnon, ama adan̄ eyenete esie an̄wan Tamar ke n̄kanubọk ndien eyeneka an̄wan emi ama owot enye. (2 Samuel 13:1-33) Absalom eyen edidem ama odomo ndibọ ebekpo ke odudu onyụn̄ esuene ete esie ke ndinyene ebuana idan̄ ye ibanesa David. (2 Samuel 15:1–16:22) Ekọn̄ mbio obio eketre ke n̄kpa Absalom onyụn̄ ada mfụhọ efen efen ọsọk David. (2 Samuel 18:1-33) Nte ededi, mme idiọkn̄kpọ David ama anam enye osụhọde idem onyụn̄ anam enye ọfiọk ufọn edisịk n̄kpere Abasi esie oro enyenede esịtmbọm. Edieke nnyịn inamde idiọkn̄kpọ, ẹyak nnyịn ke nsụhọdeidem ikabade esịt inyụn̄ isịk ikpere Jehovah.—Men James 4:8 domo.
6. Ntak emi ikpe okobiomde Edidem David akpan akpan?
6 David ama edue akpan akpan koro enye ekedi andikara Israel oro okotịmde ọdiọn̄ọ Ibet Jehovah. (Deuteronomy 17:18-20) Enye ikedịghe pharaoh Egypt m̀mê edidem Babylon oro ẹkenanade utọ ifiọk oro ndien nte ido edide ẹkpekekemede ndinam mme n̄kpọ oro Abasi asuade. (Men Ephesus 2:12; 4:18 domo.) Nte andibuana ke idụt oro ayakde idem ọnọ Jehovah, David ama ọfiọk ete ke efịbe ye uwotowo ẹdi ikpọ idiọkn̄kpọ. (Exodus 20:13, 14) Mme Christian n̄ko ẹfiọk ibet Abasi. Nte ededi, ukem nte David, ndusụk mmọ ẹbiat ibet ke ntak ndammana idiọkn̄kpọ, mmeme eke owo, ye idomo oro mîkemeke ndibiọn̄ọ. Edieke oro okpotịbede ọnọ owo nnyịn kiet ekededi, iyomke nnyịn idu ke ekịm ekịm idaha oro ọbiọn̄ọde enyịn usen̄kpọ eke spirit nnyịn onyụn̄ esịnde nnyịn ke ọkpọsọn̄ unana idotenyịn.
Ediyarade Idiọkn̄kpọ Ada Nsụkesịt Edi
7, 8. (a) Nso ikotịbe inọ David ke ini enye okodomode ndidịp mme idiọkn̄kpọ esie? (b) Ntak anade owo ayarade onyụn̄ ọkpọn̄ idiọkn̄kpọ esie?
7 Edieke inamde ikpọ ndudue idian ibet Abasi, nnyịn imekeme ndikụt nte ọsọn̄de ndiyarade mme idiọkn̄kpọ nnyịn, idem ndiyarade nnọ Jehovah. Nso ikeme nditịbe ke mme utọ idaha oro? Ke Psalm 32, David ama onyịme ete: “Koro n̄kodopde uyo [utu ke ndiyarade idiọkn̄kpọ], mme ọkpọ mi ẹyemede ke ntuan̄a mi ofụri usen. Koro ubọk fo [Jehovah] odobide mi ke idem ke uwemeyo ye okoneyo: nsek mi asat ke ndaeyo.” (Ps 32 Ufan̄ikọ 3, 4) Ndidomo ndidịp idiọkn̄kpọ esie nnyụn̄ mfịk ubieresịt oro ikpe obiomde nnịm ama anam idem emem ọsọn̄ibuot David. Editịmede esịt ama osụhọde odudu esie ata etieti tutu enye eyetie nte eto oro ọkpọsọn̄ eyo ọnọmọde oro mînyeneke mmọn̄. Ke akpanikọ, ekeme ndidi enye n̄ko ama okop ubiak ke ekikere ye ke ikpọkidem. Nte ededi, enye ama ataba idatesịt esie. Edieke owo nnyịn ekededi ikụtde idem nnyịn ke mbiet idaha oro, nso ke nnyịn ikpanam?
8 Ediyarade ndudue nnọ Abasi ekeme ndida edifen nnọ ye nsụkesịt edi. David ama ọkwọ ete, “Nyesian fi ndudue mi, ndien n̄kofụkke mme ukwan̄n̄kpọ mi. N̄kọdọhọ nte, Nyetịn̄ mme idiọkido mi nnọ Jehovah; ndien afo efen ukwan̄n̄kpọ ye ndudue mi.” (Psalm 32:5) Nte afo omokop mfụhọ ke ntak ndusụk idiọkn̄kpọ oro odịpde? Nte ikpọfọnke ikan ndiyarade nnyụn̄ n̄kpọn̄ enye man ọbọ mbọm Abasi? Ntak mûkotke mbiowo esop unyụn̄ uyom ukọkudọn̄ọ eke spirit? (Mme N̄ke 28:13; James 5:13-20) Ẹyenyịme edu edikabade esịt fo, ndien nte ini akade emekeme ndifiak nnyene idatesịt Christian fo. David ọkọdọhọ ete, “Ọfọfọn ọnọ owo eke ẹfende mme idiọkido esie, ẹnyụn̄ ẹfụkde ndudue esie. Ọfọfọn ọnọ owo eke Jehovah mîbatke mme ukwan̄n̄kpọ inọ enye, baba abian̄a mînyụn̄ idụhe ke spirit esie.”—Psalm 32:1, 2.
9. Ini ewe ke ẹkewet Psalm 51, ndien ntak-a?
9 David ye Bath-sheba ẹma ẹnam ibat ẹnọ Jehovah Abasi ke ntak idiọk edinam mmọ. Okposụkedi ẹkpekekemede ndiwot mmọ ke ntak idiọkn̄kpọ mmọ, Abasi ama atua mmọ mbọm. Enye akatua David mbọm akpan akpan ke ntak ediomi Obio Ubọn̄. (2 Samuel 7:11-16) Ẹkụt edu edikabade esịt David kaban̄a mme idiọkn̄kpọ oro enye akanamde ye Bath-sheba ke Psalm 51. Atua n̄kpọfiọk edidem oro ekewet psalm emi otụkde owo esịt mi ke prọfet Nathan ama ekedemede ubieresịt esie owụt nte edidue oro enye ekeduede ibet Abasi okokponde. Ama oyom uko man Nathan odụri ntịn̄enyịn David owụt idiọkn̄kpọ esie, kpa nte anade mbiowo Christian oro ẹmekde ẹnyene uko man ẹnam mme utọ n̄kpọ oro mfịn. Utu ke ndikan̄ edori ikọ oro nnyụn̄ ndọhọ ẹwot Nathan, edidem oro ke nsụhọdeidem ama ayarade idiọkn̄kpọ. (2 Samuel 12:1-14) Psalm 51 owụt se enye eketịn̄de ọnọ Abasi ke akam kaban̄a oburobụt edinam esie oro onyụn̄ odot n̄ko nditie n̄kere ke akam, akpan akpan edieke nnyịn ikanamde idiọkn̄kpọ inyụn̄ iyomde mbọm Jehovah.
Nnyịn Inyene Ndinam Ibat Nnọ Abasi
10. Didie ke David ekekeme ndifiak nnyene nsọn̄idem eke spirit?
10 David ikoyomke ntak inọ kaban̄a idiọkn̄kpọ esie edi ama ekpe ubọk ete: “O Abasi, tua mi mbọm, nte ima fo edide: sọhi ndudue mi fep ke ediwak mbọm fo.” (Psalm 51:1) Ke ndinam ndudue, David ama ebe mme adan̄a Ibet Abasi. Nte ededi, idotenyịn enye ndifiak n̄kop nsọn̄idem ke n̄kan̄ eke spirit ama odu, edieke Abasi atuade enye mbọm nte ekemde ye ima-mfọnido, m̀mê ima akpanikọ Esie. Uwak mbọm Abasi eke ini edem ama ọnọ edidem oro akakabarede esịt do isọn̄ ndinyene mbuọtidem nte ke Andinam enye eyesọhi mme ndudue esie ẹfep.
11. Mme uwa Usen Usio-isop ẹkenọ ekikere ẹban̄a nso, ndien nso ke ẹyom kaban̄a edinyan̄a mfịn?
11 Ebede ke ntịn̄nnịm uwụtn̄kpọ eke mme uwa Usen Usio-isop, Jehovah ama anam ẹfiọk nte ke imọ imenyene usụn̄ ndinam mbon oro ẹkabarede esịt ẹsana ẹbọhọ idiọkn̄kpọ mmọ. Nnyịn idahaemi imọdiọn̄ọ ite ke mbọm ye edifen nnọ esie ẹtara ẹsịm nnyịn ke isọn̄ mbuọtidem nnyịn ke uwa ufak Jesus Christ. Edieke David, ye mme mbiet ye uwụtn̄kpọ uwa emi ke ekikere, ekekemede ndibuọt idem ke ima-mfọnido ye uwak mbọk Jehovah, adan̄a didie akan oro ke mme asan̄autom Abasi eyomfịn ẹkpekọn̄ mbuọtidem ke ufak oro ẹnọde kaban̄a edinyan̄a mmọ!—Rome 5:8; Mme Hebrew 10:1.
12. Nso ke ndinam idiọkn̄kpọ ọwọrọ, ndien didie ke David ekekere aban̄a idiọk edinam esie?
12 Ke ekpede Abasi ubọk, David ama adian do ete: “Diọn̄ yet mme ukwan̄n̄kpọ mi fep, nyụn̄ sio mi mme idiọkido ke idem fep, nam ndi edisana. Koro mmọfiọk ndudue mi: idiọkido mi onyụn̄ odu mi ke iso kpukpru ini.” (Psalm 51:2, 3) Ndinam idiọkn̄kpọ edi ndiwọrọ n̄kpọn̄ usụn̄ ke se iban̄ade mme idaha Jehovah. David ke akpanikọ ama anam oro. Edi, enye ikebietke owotowo m̀mê esịn efịbe oro mîdọn̄ke enyịn iban̄a ndudue esie, okopde mfụhọ kpọt aban̄a ufen oro enye ọbọde m̀mê ndikeme ndimen udọn̄ọ. Nte andima Jehovah, David ama asua se idiọkde. (Psalm 97:10) Enye ama okop itekesịt aban̄a idiọkn̄kpọ esie onyụn̄ oyom Abasi anam imọ isana ibọhọ enye ofụri ofụri. David ama otịm ọdiọn̄ọ mme ndudue esie onyụn̄ enen̄ede atua n̄kpọfiọk ke enye ndikayak idiọk udọn̄ esie akan enye ubọk. Idiọkn̄kpọ esie okodu enye ke iso kpukpru ini, koro ubieresịt owo emi abakde Abasi oro esịt obiomde ikpe isinaha sụn̄ tutu edikabade esịt, ediyarade idiọkn̄kpọ, ye edifen nnọ Jehovah ada itie.
13. Ntak emi David ọkọdọhọde ke ikanam idiọkn̄kpọ idian Abasi ikpọn̄?
13 Ke ọfiọkde ke imọ inyene ndinam ibat nnọ Jehovah, David ama ọdọhọ ete: “Mmedue fi, kpa fi ikpọn̄, mmonyụn̄ nnam idiọk ke iso fo: man afo enen ke ikọ fo, onyụn̄ edi edisana ke ini afo ekpede ikpe.” (Psalm 51:4) David ama abiat ibet Abasi, esuene itieutom edidem, ndien “nte eyịghe mîdụhe omiom Jehovah,” esuenede Enye. (2 Samuel 12:14, NW; Exodus 20:13, 14, 17) Mme edinam idiọkn̄kpọ David n̄ko ẹkedi mme ndudue oro enye anamde adian n̄ka nditọ Israel ye mbonubon esie, kpa nte anamidiọk oro anade baptism mfịn adade mfụhọ m̀mê ubiak ọsọk esop Christian ye mbonima. Okposụkedi edidem oro akakabarede esịt mi ọkọfiọkde ete ke imọ ima inam idiọkn̄kpọ idian mme utọ ekemmọ owo nte Uriah, enye ama ọfiọk n̄kokon̄ ibat oro inyenede ndinam nnọ Jehovah. (Men Genesis 39:7-9 domo.) David ama ọfiọk ete ke ubiereikpe Jehovah edidi edinen. (Rome 3:4) Oyom mme Christian oro ẹnamde idiọkn̄kpọ ẹnyene ukem ekikere oro.
Mme Ntak Ẹmi Ẹsụhọrede Idaha N̄kpọ
14. Mme ntak ewe ẹmi ẹsụhọrede idaha n̄kpọ ke David akasiak?
14 Okposụkedi David mîkodomoke ndikụt unen nnọ idemesie, enye ama ọdọhọ ete: “Sese, n̄kamana ke ukwan̄; eka mi okonyụn̄ oyomo mi ke idiọk.” (Psalm 51:5) David akamana ke ukwan̄, eka esie ama onyụn̄ okop ubiak uman ke ntak ndammana idiọkn̄kpọ. (Genesis 3:16; Rome 5:12) Mme ikọ esie iwọrọke ite ke nnennen ebuana ndọ, uyomo idịbi, ye uman eyen ẹdi idiọkn̄kpọ, sia edide Abasi ọkọtọn̄ọ ndọ ye uman eyen; David ikonyụn̄ itịn̄ke iban̄a akpan idiọkn̄kpọ eka esie. Ẹkeyomo enye ke idiọk sia ete ye eka esie ẹkedide mme anamidiọk ukem nte kpukpru anana mfọnmma owo.—Job 14:4.
15. Okposụkedi Abasi ekemede ndikere mban̄a mme ntak ẹmi ẹsụhọrede idaha n̄kpọ, nso ke nnyịn mîkpenamke?
15 Edieke edide nnyịn ima inam idiọkn̄kpọ, nnyịn imekeme nditịn̄ ke akam oro ibọn̄de inọ Abasi mme ntak ekededi ẹmi ẹsụhọrede idaha n̄kpọ oro ekemede ndidi ẹma ẹtịp ẹsịn ke nnyịn ndinam idiọk. Edi ẹyak nnyịn ikûwọn̄ọde mfọnido Abasi oro owo mîdotke isịn ke obukpo uwem m̀mê ndida ndammana idiọkn̄kpọ nte ebiet udịbe ndifehe mbọhọ mbiomo idiọkn̄kpọ nnyịn. (Jude 3, 4) David ama onyịme mbiomo oro akasan̄ade ye edikere ndiọi ekikere ye ediyak idem nnọ idomo. Ẹyak nnyịn ibọn̄ akam iben̄e editre ndiyak nnyịn nsịn ke idomo ndien ekem inam n̄kpọ ke n̄kemuyo ye utọ akam oro.—Matthew 6:13.
Eben̄e Ndidi Se Ẹnamde Asana
16. Abasi ama ewe edu, ndien didie ke oro okpotụk eduuwem nnyịn?
16 Mme owo ẹkeme nditie nte nti owo oro ẹyakde idem ẹnọ Abasi, edi enye ese n̄kpọ ebe enyọn̄ idem onyụn̄ okụt se mmọ ẹdide ke esịtidem. David ọkọdọhọ ete: “Sese, afo [Jehovah] amama akpanikọ ke esịt: afo eyenyụn̄ anam mi mfiọk ifiọk ke ọwọn̄esịt.” (Psalm 51:6) David ama enyene ubiomikpe nsu ye ukwan̄ edinam ke ndidiomi n̄kpa Uriah ye ke ndidomo ndidịp mme akpanikọ akaban̄ade uyomo idịbi Bath-sheba. Edi, enye ama ọfiọk ete ke Abasi ama akpanikọ ye se isanade. Emi ekpenyene nditụk eduuwem nnyịn ke eti usụn̄, koro Jehovah eyebiom nnyịn ikpe edieke nnyịn inamde ukwan̄ edinam. (Mme N̄ke 3:32) David n̄ko ama ọfiọk ete ke edieke Abasi ‘anamde imọ ifiọk ifiọk,’ nte edidem oro akabarede esịt, imọ iyekeme ndidu uwem ekekem ye mme idaha Abasi ke nyọhọ nsụhọ uwem imọ.
17. Nso ke ọkọwọrọ ndibọn̄ akam man ẹda hyssop ẹyet asana?
17 Sia andiwet psalm okokụtde ete ke imọ imoyom un̄wam Abasi ke ndikan mme ntụhọ unam idiọk, enye ama akaiso ekpe ubọk ete: “Afo eyeda hyssop osio idiọkido mi efep, ndien nyesana: eyeyet mi idem, ndien nyefia n̄kan snow.” (Psalm 51:7) Ke adianade ye mme n̄kpọ eken, ẹkesikama eto hyssop (iso-ọfọn eto marjoram, m̀mê Origanum maru) ke edinam unam mbon oro akpamfia okomụmde ẹsana. (Leviticus 14:2-7) Ntre ama enen ete David ọbọn̄ akam oyom ẹda hyssop ẹyet imọ isana ibọhọ idiọkn̄kpọ. Ekikere edinam asana enyene ebuana n̄ko ye eben̄e esie nte yak Jehovah eyet imọ man imọ ikeme ndikabade nsana ofụri ofụri, ikam ifia ikan snow oro mîmenke mbụrụbiom m̀mê mbio eken. (Isaiah 1:18) Edieke ubieresịt obiomde owo nnyịn ekededi kemi ke ntak ndusụk idiọk edinam, ẹyak nnyịn inyene mbuọtidem nte ke edieke nnyịn ke edikabade esịt iyomde edifen Abasi, enye ekeme ndiyet onyụn̄ anam nnyịn isana ke isọn̄ uwa ufak Jesus.
Eben̄e Edifiak Nda Nsịn ke Itie
18. Nso ikedi idaha David mbemiso enye akakabarede esịt onyụn̄ ayararede ndudue, ndien didie ke ifiọk aban̄ade emi ekeme ndinyene ufọn mfịn?
18 Mme ikọ David ẹmi ẹkeme ndin̄wan̄a Christian ekededi oro akanam ubieresịt obiomde ikpe: “[Jehovah] eyenam n̄kop inemesịt ye idatesịt; mme ọkpọ emi afo okobụn̄de ẹyedara.” (Psalm 51:8) Mbemiso David akakabarede esịt onyụn̄ ayarade mme idiọkn̄kpọ esie, ubieresịt esie oro okotịmerede ama anam enye anana inemesịt. Enye ikakam ikwe inem ke mme ikwọ itoro ye idatesịt oro nti mme ọkwọ ikwọ ye mme ebre ikwọ oro ẹnyenede usọ ẹkekwọde. Ubiak oro David emi akanamde idiọk okokopde ke Abasi nditre ndinọ unyịme ama okpon etieti tutu enye eyebiet owo oro ẹkebụn̄de mme ọkpọ esie ubiak ubiak. Enye ama oyom edifen nnọ, edifiak n̄kop nsọn̄idem eke spirit, ye edifiak nnyene idatesịt oro enye ke mbemiso ekenyenede. Anamidiọk oro akabarede esịt mfịn n̄ko oyom edifen Jehovah man afiak enyene idatesịt oro enye ekenyenede mbemiso enye akanamde n̄kpọ oro akabiatde itie ebuana esie ye Abasi. Owo oro akabarede esịt ndifiak nnyene “idatesịt edisana spirit” owụt ete ke Jehovah emefen enye onyụn̄ ama enye. (1 Thessalonica 1:6) Nso ndọn̄esịt ke oro ada edi ntem!
19. Ekpetie David didie ke idem edieke Abasi ọkpọsọhide kpukpru ndudue esie efep?
19 David ama akaiso ndibọn̄ akam ete: “Fụk iso fo, kûse mme idiọkido mi; nyụn̄ sọhi kpukpru mme ukwan̄n̄kpọ mi fep.” (Psalm 51:9) Owo ikemeke ndidori enyịn Jehovah ndinyịme idiọkn̄kpọ. Ntem, ẹkeben̄e ẹte yak enye ofụk iso esie ke mme idiọkn̄kpọ David. Edidem oro ama eben̄e n̄ko ete Abasi ọsọhi kpukpru ukwan̄n̄kpọ imọ efep, ọsọhi kpukpru ukwan̄ido imọ efep. Ke Jehovah akpakam anamde oro! Enye ekpemenede mme edu David, emen mfịghe ubieresịt oro otịmerede efep, onyụn̄ ayak edidem oro kemi akabarede esịt mi ọfiọk nte ke ima ima Abasi imọ efen imọ.
Nso Edieke Edide Afo Ama Anam Idiọkn̄kpọ?
20. Nso ke ẹtoro ẹnọ Christian ekededi oro akanamde akwa idiọkn̄kpọ?
20 Psalm 51 owụt nte ke ekededi ke otu mme asan̄autom Jehovah oro ẹma ẹkeyak idem ẹnọ ẹmi ẹnamde akwa idiọkn̄kpọ ẹdi ẹmi ẹkabarede esịt ẹkeme ndiben̄e enye ye mbuọtidem ndiwụt mmọ mfọn nnyụn̄ nnam mmọ ẹsana ẹbọhọ idiọkn̄kpọ mmọ. Edieke afo edide Christian oro akanamde idiọkn̄kpọ ke utọ usụn̄ oro, ntak mûyomke edifen nnọ eke Ete nnyịn eke heaven ke akam nsụhọdeidem-e? Wụt ke imọ imoyom un̄wam Abasi man ẹdi se ẹnyịmede ke iso esie, nyụn̄ ben̄e ete enye anam imọ ifiak inyene akpa idatesịt imọ. Mme Christian oro ẹkabarede esịt ye mbuọtidem ẹkeme ndika mbịne Jehovah ke akam ye mme utọ eben̄e oro, koro “Enye eyewak ndidahado.” (Isaiah 55:7; Psalm 103:10-14) Ke akpanikọ, ẹkpenyene ndika mbịne mbiowo esop man mmọ ẹkeme ndinọ un̄wam eke spirit oro ẹyomde.—James 5:13-15.
21. Nso efen ke nnyịn ididụn̄ọrede?
21 Mbọm Jehovah anyan̄a ikọt esie osio ke unana idotenyịn. Edi ẹyak nnyịn idụn̄ọde mme eben̄e ofụri esịt eken eke David oro akakabarede esịt ke Psalm 51. Ukpepn̄kpọ nnyịn eyewụt nte ke Jehovah isịnke edibụn̄ọ esịt ke ndek.
Didie ke Afo Ọkpọbọrọ?
◻ Nso utịp ke akwa idiọkn̄kpọ ekeme ndinyene ke idem kiet ke otu mme asan̄autom Jehovah?
◻ Didie ke okotụk David ke ini enye okodomode ndidịp idiọkn̄kpọ esie?
◻ Ntak emi David ọkọdọhọde ete ke imọ ikanam idiọkn̄kpọ idian Abasi ikpọn̄?
◻ Okposụkedi Abasi ekemede ndikere mban̄a mme ntak ẹmi ẹsụhọrede idaha n̄kpọ, nso ke nnyịn mîkpanamke?
◻ Nso ke Christian akpanam edieke enye anamde akwa idiọkn̄kpọ?