Ndi Ọdọn̄ Fi Ndinen̄ede Nnam Utom Ọyọhọ Ọyọhọ?

“MMA nyat esịt ye Jehovah,” ntre ke Laura ọdọhọ. “Mma nsibọn̄ akam kpukpru ini nte enye an̄wam nnyịn ikọk mme mfịna okụk nnyịn man n̄keme ndika iso nsiak usụn̄—edi ufọn ikodụhe. Ke akpatre mma ntre usiakusụn̄. Ana nnyịme n̄ko nte ke mma nsifụbe ufụp mban̄a mbon oro ẹkekemede ndika iso.”

Kere, n̄ko, ban̄a se iban̄ade Michael, asan̄autom unamutom ke esop Mme Ntiense Jehovah. Enye ama esinyanade ebịne itieutom esenyịn. (1 Timothy 3:1) Ke ini owo mîkọyọhọke udọn̄ esie ke ediwak isua, enye ama akabade enen̄ede okop iyatesịt tutu enye iyomke ifetutom oro aba. Enye ọdọhọ ete: “N̄kakam n̄kemeke aba ndiyọ ubiak edikpu oro.”

Ndi afo emenyene ukem ifiọk n̄kpọntịbe oro? Ndi afo ama enyene ndikpọn̄ ifetutom ukara Abasi oro akamade? Ke uwụtn̄kpọ, ndi afo ama enyene nditre ndinam utom nte asiakusụn̄, anditan̄a Obio Ubọn̄ uyọhọ ini? Mîdịghe ndi ọdọn̄ fi ndibiom ndusụk mbiomo esop oro ẹnọde mbon en̄wen? Akam ekeme ndidi nte ke enen̄ede ọdọn̄ fi ndinam utom ke Bethel m̀mê ndinam utom nte isụn̄utom, edi mme idaha fo iyakke.

“Idotenyịn eke anamde ubịghi esịn esịt ọdọn̄ọ,” ntre ke n̄wed Mme N̄ke ọdọhọ. (Mme N̄ke 13:12) Emi ekeme ndinen̄ede ndi ntre ke ini mbon en̄wen ẹnyenede mme ata ukem ifetutom oro afo odoride enyịn aban̄a. Ndi Ikọ Abasi ọnọ owo ekededi emi okụtde edikpu ikike, ndọn̄esịt, ye idotenyịn? Ih, enye ọnọ. Ke akpanikọ, Psalm ọyọhọ 84 owụt ekikere asan̄autom Jehovah emi ekenyenede ukem udọn̄ oro owo mîyụhọke ke utom Jehovah.

Esịtekọm Oro Levite Owụtde

Nditọ Korah, mme Levite ẹmi ẹkenamde utom ke temple Jehovah ẹkenyụn̄ ẹdade ifetutom mmọ ke ata akpan n̄kpọ, ẹkewet Psalm ọyọhọ 84. “Mme idụn̄ fo, O Jehovah mme udịm, ẹnem didie!” ntre ke owo kiet ke otu mmọ ọkọdọhọ. “Okụre Jehovah ọdọn̄ mi ukpọn̄ tutu akpa mba; esịt mi ye obụkidem mi ẹkwọ ẹnọ Abasi uwem.”—Psalm 84:1, 2.

Levite emi ama enyene udọn̄ ndinam utom ke temple Jehovah tutu idem ikpîkpu unaisọn̄ ke usụn̄ Jerusalem ama eye enye. “Ke ẹsan̄ade ke itịghede Mmọn̄eyet,” ntre ke enye ọdọhọ, “ẹnam enye obube mmọn̄.” (Psalm 84:6) Ih, nte ido edide ikpehe oro asatde eketie nte ikpehe oro enyenede ediwak mmọn̄.

Sia andiwet psalm oro mîkedịghe Levite edide oku, enye ekekeme ndinam utom urua kiet kpọt ke temple ke ọfiọn̄ itiokiet. (1 Chronicles 24:1-19; 2 Chronicles 23:8; Luke 1:5, 8, 9) Enye ekesibiat mme ini esie eken ke ufọk ke kiet ke otu mme obio Levite. Enye ke ntre ama ọkwọ ete: “Idem ntarusụn̄ omokụt ufọk, akadan̄ Abasi omonyụn̄ okụt efọk ke idem esie, eke enye ekpenịmde nditọ esiemmọ, idem mme itieuwa fo, O Jehovah mme udịm, edidem mi, ye Abasi mi.” (Psalm 84:3) Levite oro okpokokop inemesịt didie ntem edieke enye ekpeketiede nte mme inuen ẹmi ẹkesidụn̄de kpukpru ini ke temple!

Ekpekedi mmemmem n̄kpọ ọnọ Levite oro ndikop iyatesịt ke ntak emi enye mîkekemeke ndinam utom ediwak ini ke temple. Nte ededi, enye ama okop inemesịt ndinam utom nte enye ekekemede, ndien enye ke akpanikọ ama ọfiọk ete ke utuakibuot ofụri esịt oro ẹtuakde ẹnọ Jehovah odot ye ukeme oro ẹsịnde. Nso ikan̄wam anam-akpanikọ Levite emi ndikop uyụhọ ke mme ifetutom esie?

Kpep Ndikop Uyụhọ

“Usen kiet ke okụre fo ọmọfọn akan tọsịn,” ntre ke Levite oro ọdọhọ. “Mmemek ndida ke asan̄udọk ke ufọk Abasi mi, akan ndidụn̄ ke mme tent mme oburobụt owo.” (Psalm 84:10) Enye ama ọfiọk ete ke ndibiat usen kiet ke ufọk Jehovah edi ifetutom oro mînyeneke udomo. Ndien Levite oro ama enyene se ikande usen kiet ndinam utom ke temple. Uyụhọ emi enye ekenyenede ke mme ifetutom esie ama anam enye ọkwọ ke ntak idatesịt.

Nso kaban̄a nnyịn? Nte imowụt esịtekọm iban̄a mme edidiọn̄ nnyịn, mîdịghe nte nnyịn imesinyene ntụhọ edifre se ima ikenyenyene ke utom Jehovah? Ke ntak utuakibuot oro mmọ ẹtuakde ẹnọ enye, Jehovah ọmọnọ ikọt esie ediwak ifetutom ye mme utom. Mmọemi ẹsịne ndodobi mbiomo edise enyịn, edibọk erọn̄, edinọ ukpep, ye nsio nsio ikpehe utom uyọhọ ini. Edi mmọ n̄ko ẹbuana mme ọsọn̄urua n̄kpọ eken oro ẹnyenede n̄kpọ ndinam ye utuakibuot Jehovah.

Ke uwụtn̄kpọ, kere ban̄a utom ukwọrọikọ Christian. Apostle Paul ekemen ifetutom nnyịn ndikwọrọ eti mbụk odomo ye edinyene ‘ọsọn̄urua n̄kpọ ke aban̄ mbat.’ (2 Corinth 4:7) Nte afo amada utọ utom oro ke ọsọn̄urua n̄kpọ? Jesus Christ, emi akadade iso ke utom ukwọrọikọ Obio Ubọn̄, akada enye ntre, enịmde uwụtn̄kpọ. (Matthew 4:17) “Sia nnyịn inyenede utom . . . , esịt iduọhọ nnyịn,” ntre ke Paul ọkọdọhọ.—2 Corinth 4:1.

Mme mbonoesop Christian n̄ko ẹdi edisana ndutịm emi owo mîkpadaha mfefere mfefere. Ke mme mbonoesop nnyịn, nnyịn imesibọ akpan item inyụn̄ idara ebuana oro iyomde. Ke mme mbonoesop nnyịn n̄ko imekeme nditịn̄ ikọ an̄wan̄wa mban̄a mbuọtidem ye idotenyịn nnyịn ebe ke ndibọrọ mbụme kpukpru ini ye ke ndibuana ke ndutịm ke mme usụn̄ en̄wen. (Mme Hebrew 10:23-25) Ke akpanikọ mme mbonoesop nnyịn ẹdi ndutịm emi ẹkpedade ke ọsọn̄urua!

Michael, oro ẹkesiakde ke mbemiso, ama enen̄ede ese mme edidiọn̄ ẹmi ke ọsọn̄urua onyụn̄ owụt ntotụn̄ọ esịtekọm aban̄a mmọ. Edi edikpu esie ke ndiketre ndikeme ndinam utom nte ebiowo ama osụhọde esịtekọm oro enye ekenyenede aban̄a mmọ ke ibio ini. Ebede ke ndifiak n̄wụk ntịn̄enyịn ke mmọ, enye ama ekeme ndifiak nda ukem ukem onyụn̄ ebet Jehovah ye ime.

Utu ke nditre ndikop uyụhọ ke ntak emi mînyeneke akpan ifetutom, nnyịn iyanam ọfọn ndidụn̄ọde mme usụn̄ oro Jehovah ọdiọn̄de nnyịn, nte andiwet psalm akanamde.a Edieke nnyịn ikpude ndikụt ekese, oyom nnyịn ifiak ise, iben̄ede Jehovah atat enyịn nnyịn man ikụt mme ifetutom nnyịn ye mme usụn̄ oro enye ọdiọn̄de nnyịn onyụn̄ adade nnyịn anam n̄kpọ kaban̄a itoro esie.—Mme N̄ke 10:22.

Edi akpan n̄kpọ n̄ko ndifiọk nte ke mme akpan ifetutom, utọ nte itieutom esenyịn, oyom san̄asan̄a n̄kpọ oro ẹnamde owo odot. (1 Timothy 3:1-7; Titus 1:5-9) Ntre oyom nnyịn idụn̄ọde idem nnyịn, iyomde mme ebiet ẹmi inyenede ndinam n̄kọri ndien ekem isịn ukeme ofụri esịt ndinam n̄kọri.—1 Timothy 4:12-15.

Kûyak Idem Emem Fi

Edieke nnyịn mîbọhọ akpan ifetutom, nnyịn ikpebiereke ite ke Jehovah enyene ima ọnọ mme andinyene enye akan m̀mê ke enye iyakke nnyịn inyene eti n̄kpọ. Ke akpanikọ, nnyịn ikpenyeneke ndikere ke ntak ufụp nte ke mmọ en̄wen ẹmi ẹkenyene mme ifetutom ẹmi nte mîdotke ke ntak uma utu ke edimek eke ukara Abasi. Ndinyene mme utọ ekikere ẹmi ekeme ndida n̄kesịm ufụp, utọk, ye idem edikpa mba ofụri ofụri.—1 Corinth 3:3; James 3:14-16.

Laura, emi ẹkesiakde ke ntọn̄ọ, ikakpaha mba. Enye ke akpatre ama akan mme ekikere iyatesịt ye ufụp esie. Laura ama ọbọn̄ akam ndien ndien ọnọ Abasi oyom un̄wam man akan etikwo etikwo ekikere esie kaban̄a unana ukeme esie ndinam utom usiakusụn̄. Enye n̄ko ama oyom un̄wam oto iren oro ẹdotde ke esop onyụn̄ afiak okụt ima Abasi ke idemesie. “Jehovah ama ọnọ mi ifụre ekikere,” ntre ke enye ọkọdọhọ. “Ke adan̄aemi ami ye ebe mi mîkemeke ndisiak usụn̄ idahaemi, nnyịn ida ini oro ikesinamde ke ọsọn̄urua inyụn̄ isikop odudu ito mme ifiọkutom oro ikesinyenede. Nnyịn n̄ko iman̄wam akamba eyen nnyịn ke utom usiakusụn̄ esie.” Ke okopde uyụhọ, Laura ekeme idahaemi ‘ndidara ye mmọ ẹmi ẹdarade’ ke utom usiakusụn̄ mmọ.—Rome 12:15.

Nịm Mme Utịtmbuba Oro Ekemede Ndisịm

Nnyịn ndikop uyụhọ ke mme ifetutom eke idahaemi iyomke ite nnyịn itre ndinịm mme n̄kaiso utịtmbuba ukara Abasi. Ke ndineme mban̄a ediset ke n̄kpa eke heaven, Paul ama etịn̄ aban̄a ‘edinyanade mbịne se inade ke iso.’ Enye n̄ko ama ọdọhọ ete: “Ẹyak nnyịn isan̄a ke se nnyịn ima ikọbọ inyene idu uwem.” (Philippi 3:13-16) Mme utịtmbuba ukara Abasi ẹkeme ndin̄wam nnyịn inyanade ika iso. Nte ededi, n̄kpọ-ata edi ndinam mmọ ẹdi ata idem n̄kpọ.

Mme utịtmbuba ẹdide ata idem n̄kpọ ẹwụt ifiọk ẹnyụn̄ ẹdi se ẹkemede ndisịm. (Philippi 4:5) Emi iwọrọke ite ke utịtmbuba emi oyomde ndusụk isua ọkpọsọn̄ utom idịghe ata idem n̄kpọ. Ẹkeme ndisịm utọ utịtmbuba anyanini emi ebe ke ndinịm udịm udịm ukeuke utịtmbuba, m̀mê mme usio-ukot. Mmọemi ẹkeme nditie nte mme akpan n̄kọri eke spirit. Ndikụre usio-ukot kiet kiet uforo uforo ọyọnọ ekikere uyụhọ ke usụn̄ utu ke edikpu.

Eti Edida Ukem Ukem

Nte ededi, edi akpan n̄kpọ ndifiọk nte ke ekeme ndidi nnyịn idinyeneke ndusụk ifetutom ke ntak mme idaha ye mme unana ukeme nnyịn. Ndinịm mmọ nte mme utịtmbuba ada n̄kukụre esịm edikpu. Ẹkpenyene ndikpọnọde mme utọ utịtmbuba oro nnịm n̄kan̄ n̄kan̄, ke nsụhọde n̄kaha idahaemi. Emi ididịghe ọkpọsọn̄ n̄kpọ ndinam edieke ibọn̄de akam iyom uyụhọ otode Abasi inyụn̄ inamde edinam uduak Jehovah edi akpan n̄kpọ oro ebehede nnyịn. Ke ini nnyịn inyanarede ibịne mme ifetutom, ubọn̄ Jehovah—idịghe owo ndikụt mme ọkpọkpọ edinam nnyịn—edi akpan n̄kpọ. (Psalm 16:5, 6; Matthew 6:33) Bible asian nnyịn nte enende ete: “Kan̄a utom fo nọ Jehovah, ndien uduak fo ọyọsọn̄ọ ada.”—Mme N̄ke 16:3.

Ke ndikere mban̄a Psalm ọyọhọ 84, nnyịn imekeme ndikụt nte ke andiwet psalm ama owụt utọ edu emi kaban̄a mme ifetutom, ndien Jehovah ama ọdiọn̄ enye akamba akamba. Akan oro, psalm emi aka iso ndinọ ikọt Jehovah ufọn tutu esịm mfịn.

Ye ediberi edem ke akam ke Jehovah, afo emekeme ndinam udọn̄ fo kaban̄a mme ifetutom efen efen ye uyụhọ oro afo okopde idahaemi ẹda ukem ukem. Kûdede uyak udọn̄ fo ndinam ekese anam fi etre ndiwụt esịtekọm kaban̄a se enyenede idahaemi ye idatesịt edinam n̄kpọ Jehovah ke nsinsi. Beri edem ke Jehovah, sia emi adade ekesịm inemesịt, nte ẹwụtde ke mme ikọ Levite oro: “O Jehovah mme udịm, ọfọfọn ọnọ owo eke ọbuọtde idem esie ye afo.”—Psalm 84:12.

[Mme Ikọ idakisọn̄]

[Ekebe ke page 11]

Mme Utịtmbuba Oro Ikemede Ndinịm

Edikot Bible ke usen ke usen.—Joshua 1:8; Matthew 4:4

Edifori ukeme ikike nnyịn ebe ke ukpep ibọde ito N̄wed Abasi.—Mme Hebrew 5:14

Edikọri n̄kpet n̄kpet itie ebuana ye Abasi.—Psalm 73:28

Edikọri mbun̄wụm spirit kiet kiet.—Galatia 5:22, 23

Edifori uduot akam nnyịn.—Philippi 4:6, 7

Edinyene uforo n̄kan ke ukwọrọikọ ye unọ ukpep.—1 Timothy 4:15, 16

Edikot nnyụn̄ ntie n̄kere nsiondi magazine Enyọn̄-Ukpeme ye Awake! kiet kiet.—Psalm 49:3

[Ndise ke page 9]

Ke ndinịm mme ọkpọkpọ utịtmbuba, nịm edinam uduak Abasi akpa