UKPEPN̄KPỌ 56
Se Akpanamde Man Esop Ẹdiana Kiet
Ke ini idude ke otu ikọt Jehovah, esinem nnyịn nte ekesinemde Edidem David tutu enye ọdọhọ ete: “Ọfọn didie onyụn̄ enem didie ntem nditọete ndidụn̄ ọtọkiet ke edidianakiet!” (Psalm 133:1) Mme owo isitiehe-tie ntre itọn̄ọ idiana kiet, se nnyịn kiet kiet inamde esinam nnyịn idiana kiet.
1. Nso ke mme owo ẹsisọp ẹkụt ke otu ikọt Jehovah?
Okpodụk ikọ Abasi Mme Ntiense Jehovah ke ebiet ekededi, ekeme ndidi udûkopke usem oro, edi kpukpru owo ẹyedara fi ẹnyụn̄ ẹwụt ke imama fi; editie fi nte ebịghi ẹkediọn̄ọ idem mbufo. Nso isinam edi ntre? Nnyịn isikpep ukem ikọ Abasi ke kpukpru ebiet. Imesinyụn̄ idomo ndima kpukpru owo. Ndien inamke n̄kpọ m̀mê m̀mòn̄ ke ito, kpukpru nnyịn ‘isiseme ikot enyịn̄ Jehovah man inam n̄kpọ esie ke esịt kiet.’—Zephaniah 3:9.
2. Nso ke akpanam man esop ẹnen̄ede ẹdiana kiet?
“Ẹnyene ufiop ufiop ima ke ofụri esịt ẹnọ kiet eken.” (1 Peter 1:22) Didie ke akpanam se Bible ọdọhọde emi? Kûtak ke ndise se nditọete mînamke ọfọn, edi domo ndikụt nti edu mmọ ye nti n̄kpọ emi mmọ ẹnamde. Utu ke ndima ndidian idem kpọt ye mbon emi ẹtiede nte afo, domo ndidian idem ye mbon en̄wen n̄ko, inamke n̄kpọ m̀mê mmọ ẹto m̀mòn̄. Imekeme n̄ko ndinam se ikekeme man isio asari ifep ke esịt nnyịn.—Kot 1 Peter 2:17.a
3. Nso ke edinam edieke enyenede mfịna ye eyenete fo?
Kpukpru nnyịn idi kiet, edi nnyịn ifọnke ima. Ndusụk ini imesinam se nnyịn mîkpanamke m̀mê se ibiakde owo en̄wen. N̄wed Abasi ọdọhọ nnyịn ete: “Ẹka iso . . . ẹfen kiet eken,” ekem adian do ete: “Kpa nte Jehovah ekefende mbufo ke ofụri esịt, ẹfen mbon en̄wen kpasụk ntre.” (Kot Colossae 3:13.) Imesidue Jehovah ediwak ini, edi enye isitreke ndifen nnọ nnyịn. Enye oyom nnyịn isifen inọ nditọete nnyịn n̄ko. Edieke enyenede mfịna ye owo ndomokiet, yom usụn̄ nam emem.—Kot Matthew 5:23, 24.b
SỊN IDEM KPEP
Se nsio nsio n̄kpọ emi afo ekemede nditiene nnam man esop ẹdiana kiet, emem onyụn̄ odu.
Nso ke akpanam man emem odu?
4. Kûsari owo
Imama kpukpru nditọete nnyịn. Edi ekeme ndisọn̄ nnyịn ndidian idem ye mbon emi mîtiehe nte nnyịn. Ndi odu se ikemede ndin̄wam nnyịn? Kot Utom 10:34, 35, ekem ẹbọrọ mbụme emi ẹnyụn̄ ẹneme ẹban̄a mmọ:
Jehovah ayak kpukpru orụk owo ẹdi Ntiense esie. Didie ke oro akpanam fi ada mbon emi mîtiehe nte afo?
Nso ke mme owo ẹsida ẹsari owo ke obio emi afo odude, emi anade ekpeme man udûtiene unam?
Kot 2 Corinth 6:11-13, ekem ẹbọrọ mbụme emi ẹnyụn̄ ẹneme ẹban̄a enye:
Ekere ke nso ke akpanam man enen̄ede ama kpukpru nditọete fo onyụn̄ ekpere mmọ idem?
5. Sifen nọ owo ke ofụri esịt nyụn̄ nam emem
Jehovah esifen ọnọ nnyịn ke ofụri esịt idịghe man nnyịn ikponyụn̄ ifen inọ enye n̄ko. Kot Psalm 86:5, ekem ẹbọrọ mbụme emi ẹnyụn̄ ẹneme ẹban̄a mmọ:
Didie ke Jehovah esifen ọnọ owo?
Nso inam ama nte Jehovah esifende owo?
Nso ikeme ndinam ọsọn̄ nnyịn ndidiana kiet?
Didie ke ikeme ndikpebe Jehovah nnyụn̄ n̄ka iso ndiana kiet ye nditọete nnyịn ke esop? Kot Mme N̄ke 19:11, ekem ẹbọrọ mbụme emi ẹnyụn̄ ẹneme ẹban̄a enye:
Edieke owo anamde se iyatde fi m̀mê eduede fi, nso ke akpanam man mfịna ididu?
Imesidue mbon en̄wen ndusụk ini. Nso ke ikpanam edieke oro etịbede? Se VIDIO emi, ekem ẹbọrọ mbụme oro etienede ẹnyụn̄ ẹneme ẹban̄a enye.
Ke vidio oro, nso ke sista oro akanam man emem odu?
6. Sikụt nti n̄kpọ emi nditọete fo ẹnamde
Nte ikperede nditọete nnyịn idem, ntre ke idisikụt se mmọ ẹnamde ọfọn ye se mmọ mînamke ọfọn. Nso idin̄wam nnyịn ikûwụk enyịn ke se mmọ mînamke ọfọn? Se VIDIO emi, ekem ẹbọrọ mbụme oro etienede ẹnyụn̄ ẹneme ẹban̄a enye.
Nso idin̄wam fi esikụt nti edu emi nditọete fo ẹnyenede?
Nti edu nnyịn ke Jehovah esinen̄ede ese. Kot 2 Chronicle 16:9a, ekem ẹbọrọ mbụme emi ẹnyụn̄ ẹneme ẹban̄a enye:
Etie fi didie ndidiọn̄ọ ke nti edu nnyịn ke Jehovah esinen̄ede ese?
Ata eti diamond esinyene ndo, edi mme owo ẹsisụk ẹmama enye. Nditọete nnyịn ifọnke ima, kpa ye oro Jehovah osụk amama mmọ
NDUSỤK OWO ẸSIDỌHỌ ẸTE: “Owo mîkpehe mi ubọk mfenke nnọ enye.”
Ntak ọfọnde isisọp ifen inọ owo?
SE IKPEPDE
Edieke esifende ọnọ nditọete ke esop onyụn̄ owụtde ke imama mmọ, oro eyetiene anam emem ye edidianakiet odu ke esop.
Se M̀mê Emeti
Nso ke akpanam man etre asari?
Nso ke akpanam edieke enyenede mfịna ye asan̄autom Jehovah nte fo?
Nso inam fi oyom ndikpebe nte Jehovah esifende ọnọ owo?
KPEP N̄KPỌ EN̄WEN
Se nte uwụtn̄kpọ kiet emi Jesus ọkọnọde ekemede ndin̄wam nnyịn ikûsusọp ukụt ndudue unọ owo.
Ndi akpana ikpe owo ubọk ekpededi ikere ke nnyịn iduehe owo oro?
“N̄kpeubọk—Ukpọhọde Edinam Emem” (Enyọn̄-Ukpeme, November 1, 2002)
Se se in̄wamde ndusụk owo ẹtre ndisari owo.
Se se afo ekemede ndinam ke ini enyenede mfịna ye owo, man mfịna oro idibe isịm kpukpru owo ke esop.
a Se Se Ẹwetde Ẹdian 6 man okụt nte ima esinamde mme Christian ẹkpeme idem man idisuan udọn̄ọ.
b Se Se Ẹwetde Ẹdian 7 ke oyokụt nte ẹkpebierede n̄kpọ emi aban̄ade mbubehe ye n̄kpọ emi edide se ẹkotde owo ikpe.