Mbụme Oro Mme Andikot Ẹbụpde

Ndi Ẹyesobo Isọn̄ Emi?

N̄kpọ ndomokiet idinamke isọn̄ emi. Ntak idọhọde ntre? Koro Abasi ọn̄wọn̄ọ ke “isọn̄ idisehekede ke nsinsi-nsinsi.” (Psalm 104:5) Bible ọdọhọ ke “emana kiet aka, emana efen onyụn̄ edi: edi ererimbot ada ke nsinsi.”—Ecclesiastes 1:4.

Ke Psalm 104:5, ẹda ikọ Hebrew iba emi, ʽoh·lamʹ ye ʽadh emi ẹwọrọde “ke nsinsi” ẹwụt ke isọn̄ edidu ke nsinsi. ʽOh·lamʹ ekeme ndiwọrọ “ediwak isua” m̀mê “ke nsinsi.” Students’ Hebrew and Chaldee Dictionary ọdọhọ ke ʽadh ọwọrọ “ubịghi, anana utịt, nsinsi.” Ikọ Hebrew iba emi ẹnen̄ede ẹsọn̄ọ ke isọn̄ edidu ke nsinsi. Kere ban̄a ntak ita efen oro Bible ọnọde ndiwụt ke isọn̄ edidu ke nsinsi.

Akpa, Abasi okoyom ofụri isọn̄ edi ediye Paradise man mme owo ẹdụn̄ọ, enye ikoyomke isọn̄ etie nte ndon. Isaiah 45:18 ọdọhọ ke Jehovah edi “andibot enyọn̄; enye . . . emi obotde isọn̄, onyụn̄ anamde enye; enye owụk enye, ibotke enye ke ikpîkpu, obot enye man ẹdụn̄ ke esịt.”

Ọyọhọ iba, Abasi ọn̄wọn̄ọ ke mbon oro ẹkopde item imọ ẹyedụn̄ ke isọn̄ emi ke nsinsi ke emem. Micah 4:4 ọdọhọ ete: “Kpukpru mmọ ẹyetie ke idak vine mmọ ye ke idak fig mmọ; ndien baba owo kiet eke edinamde mmọ ndịk ididụhe: koro edi inua Jehovah mme udịm ọdọhọ.” Ntre, Abasi oyom isọn̄ emi odu ke nsinsi man mme owo ẹdụn̄ọ, mîdịghe ntre un̄wọn̄ọ esie ikposụhu.—Psalm 119:90; Isaiah 55:11; 1 John 2:17.

Ọyọhọ ita, Abasi ọdọhọ ubonowo ẹse ẹban̄a isọn̄. Ikọ Abasi ọdọhọ ete: “Enyọn̄ edi heaven Jehovah: edi enye ada isọn̄ ọnọ nditọ owo.” (Psalm 115:16) Ndi emekere ke edima ete ọkpọnọ eyen esie ata eti n̄kpọ ekem abiat n̄kpọ oro? Utọ n̄kpọ emi ikemeke nditịbe! Jehovah idinyụn̄ isoboke isọn̄ ye mme andidụn̄ ke esịt, koro “Abasi edi ima.”—1 John 4:8.

Jesus Christ ama ọsọn̄ọ ke ‘ikọ Ete imọ edi akpanikọ.’ (John 17:17) N̄ko n̄ko, Abasi emi mîkemeke ndisu nsu ọn̄wọn̄ọ ke “nti owo ẹyeda isọn̄ ẹnyene, ẹnyụn̄ ẹdụn̄ ke esịt ke nsinsi.”—Psalm 37:29; Titus 1:2.

[Ebiet Ẹdade Ndise Ẹto ke page 31]

Globe: Based on NASA photo