Buọt Idem ye Jehovah!
“Buọt idemfo ye Jehovah ke ofụri esịt fo.”—MME N̄KE 3:5.
1. Didie ke Mme N̄ke 3:5 okotụk akparawa eren kiet, ndien ye nso utịp oro ekedide ke anyanini?
I SỤN̄UTOM kiet oro anamde utom ke anyanini ewet ete: “‘BUỌT IDEM YE ỌBỌN̄ KE OFỤRI ESỊT FO; NDIEN KÛBERI EDEM KE ASIAN FO.’ Mme ikọ Bible oro, emi ẹkediọn̄de eto ẹsịn ẹnyụn̄ ẹkọn̄de ke ibibene ufọk oro ami n̄kakade, ama odụri ntịn̄enyịn mi. Mma n̄kere mban̄a mmọ ke ofụri usen oro. Mma mbụp idemmi nte, nte mmekeme ndibuọt idem ye Abasi ke ofụri esịt mi?” Owo emi ekedi isua 21 ke emana ini oro. Ke isua 90 ke emana onyụn̄ osụk anamde utom ke edinam akpanikọ nte ebiowo ke Perth, Australia, enye ekeme ndiwọn̄ọde enyịn nse uwem oro ọyọhọde ye mbun̄wụm oto ntak edibuọt idem ye Jehovah ke ofụri esịt, esịnede isua ọkpọsọn̄ utom 26 ke ndisiak mbufa an̄wautom isụn̄utom ke Ceylon (idahaemi Sri Lanka), Burma (idahaemi Myanmar), Malaya, Thailand, India, ye Pakistan.a
2. Nso mbuọtidem ke Mme N̄ke 3:5 ekpenyene ndinam nnyịn inyene?
2 “Buọt idemfo ye Jehovah ke ofụri esịt fo”—ikọ Mme N̄ke 3:5 ẹmi, nte ẹsịnde ke Edisana N̄wed Abasi Ibom, ekpenyene ndinụk kpukpru nnyịn ndikaiso nyak uwem nnyịn nnọ Jehovah ke ofụri esịt, inịmde ite ke enye ekeme ndisọn̄ọ mbuọtidem nnyịn, idem tutu osịm udomo edikan mme ikpọ n̄kpọ ubiọn̄ọ. (Matthew 17:20) Ẹyak nnyịn idahaemi idụn̄ọde Mme N̄ke 3:5 ke udọn̄ikọ esie.
Item Oro Ebietde eke Ete
3. (a) Nso nsịnudọn̄ ke ẹkụt ke mme akpa ibuot usụkkiet eke Mme N̄ke? (b) Ntak emi nnyịn ikpọnọde ọyọhọ ntịn̄enyịn ke Mme N̄ke 3:1, 2?
3 Ntọn̄ọ ntọn̄ọ ibuot usụkkiet ke n̄wed Mme N̄ke eke Bible ọyọhọ ye item oro ebietde eke ete, ọniọn̄ ọniọn̄ item otode Jehovah ọnọ kpukpru mbon oro ẹdoride enyịn ndidara itie eyen ke heaven m̀mê “itie eyenisọn̄ emi enyenede ubọn̄ eke nditọ Abasi” ke paradise isọn̄. (Rome 8:18-21, 23) Ọniọn̄ ọniọn̄ item odu mi oro mme ete ye eka ẹkemede ndida ke ndibọk nditọiren ye nditọiban. N̄wọrọnda edi item eke Mme N̄ke ibuot 3, emi ọtọn̄ọde ye item emi: “Eyen mi, kûfre mbet mi; edi yak esịt fo ekpeme mme ewụhọ mi.” Nte mme akpatre usen idiọk ererimbot Satan ẹsan̄ade ẹka ata utịt mmọ, nnyịn ikpakam itịm inọ ntịn̄enyịn ke mme n̄kpọ editi oro Jehovah ọnọde. Ekeme nditie nte usụn̄ ọnọniọn̄, edi un̄wọn̄ọ oro ẹnọde kpukpru owo ẹmi ẹmede ime edi nte ke “ẹyekọrọ anyan usen, ye isua uwem, ye ifụre ẹnọ fi”—nsinsi uwem ke obufa editịm n̄kpọ Jehovah.—Mme N̄ke 3:1, 2.
4, 5. (a) Nso inem inem itie ebuana ke ẹtịn̄ ẹban̄a ke John 5:19, 20? (b) Didie ke item oro ke Deuteronomy 11:18-21 enyene n̄kpọ ndinam tutu osịm usen nnyịn?
4 Inem inem itie ebuana ke ufọt ete ye eyen ekeme ndisọn̄ urua etieti. Andibot nnyịn, Jehovah Abasi, okodiomi enye ke usụn̄ oro. Christ Jesus ama etịn̄ aban̄a n̄kpet n̄kpet itie ebuana esie ye Jehovah ete: “Eyen ikemeke ndinam baba n̄kpọ kiet ke Idemesie, ke mîbọhọke se okụtde nte Ete anamde; koro n̄kpọ ekededi eke Ete anamde, kpa oro n̄ko ke Eyen onyụn̄ etiene anam. Koro Ete amama Eyen, omonyụn̄ owụt Enye kpukpru n̄kpọ eke Enye ke Idemesie anamde.” (John 5:19, 20) Jehovah akaduak ete utọ itie ebuana oro odu ke ufọt imọ ye kpukpru mbonubon imọ ke isọn̄, ọkọrọ ye ke ufọt mme ete ẹdide owo ye nditọ mmọ.
5 Ẹma ẹsịn udọn̄ ẹnọ itie ebuana ubon oro ẹkemede ndibuọt idem ke Israel eset. Jehovah ama ọnọ mme ete item do ete: “Mbufo ẹda ndien ikọ emi ẹsịn ke esịt mbufo, ye ke ukpọn̄ mbufo, ẹnyụn̄ ẹtebe mmọ ẹdian ke ubọk mbufo nte idiọn̄ọ, yak mmọ ẹnyụn̄ ẹna mbufo ke ufọt enyịn ke n̄kpọ ọkpọiso. Mbufo ẹnyụn̄ ẹda mmọ ẹteme nditọ mbufo, ẹnyụn̄ ẹdọhọ ẹban̄a mmọ ke ini afo etiede ke ufọk fo, ye ke asan̄ade ke usụn̄, ye ke anade ke isọn̄, ye ke edemerede ke idap. Nyụn̄ wet mmọ ke obukpọk enyịnusụn̄ ufọk fo, ye ke itịm fo: man usen mbufo, ye usen nditọ mbufo ẹkpebịghi ke isọn̄ emi Jehovah ọkọn̄wọn̄ọde ọnọ mme ete mbufo, ete iyenọ mmọ, adan̄a ini nte enyọn̄ ofụkde isọn̄.” (Deuteronomy 11:18-21) Ikọ odudu spirit eke Akwa Anditeme nnyịn, Jehovah Abasi, ke akpanikọ ekeme ndinam enye enyene n̄kpet n̄kpet itie ebuana ye mme ete ye eka ye nditọ mmọ, ọkọrọ ye kpukpru mmọ oro ẹnamde n̄kpọ esie ke esop Christian.—Isaiah 30:20, 21.
6. Didie ke nnyịn ikeme ndinyene mfọn ke iso Abasi ye ke iso owo?
6 Ọniọn̄ ọniọn̄ item oro ebietde eke ete emi enyenede ikọt Abasi, n̄kpri ye ikpọ, akaiso ke ufan̄ikọ 3 ye 4 ke Mme N̄ke ibuot 3 ete: “Kûyak mfọnido ye akpanikọ ẹkpọn̄ fi: kọn̄ọ mmọ ke itọn̄ fo; wet mmọ ke ọwọn̄esịt fo: ndien afo eyekụt ima ye mfọniso ke iso Abasi ye ke iso owo.” Jehovah Abasi ke idemesie anam ọfọn akan ke ndiwụt ima mfọnido ye akpanikọ. Nte Psalm 25:10 ọdọhọde ete, “kpukpru usụn̄ Jehovah ẹdi ima ye akpanikọ.” Ke ndikpebe Jehovah, nnyịn ikpenyene ndida mme edu ẹmi ye ukpeme oro mmọ ẹkemede ndinọ nte n̄kpọuto, idade mmọ ke ọsọn̄urua nte oro ikpadade ọsọn̄urua n̄kpọitọn̄ inyụn̄ iwetde mmọ nte owo mîkemeke ndisọhi mfep ke esịt nnyịn. Do, nnyịn imekeme ndibọn̄ akam ke esịt akpanikọ ite: “O Jehovah, . . . ima fo ye akpanikọ fo ẹyekpeme mi kpukpru ini.”—Psalm 40:11.
Edibuọt Idem Taktak
7. Ke mme usụn̄ ewe ke Jehovah owụt nte idide se ẹkemede ndibuọt idem?
7 Webster’s Ninth New Collegiate Dictionary akabade edibuọt idem nte “ibetedem akpanikọ ke edu, ukeme, odudu, m̀mê akpanikọ aban̄ade owo m̀mê n̄kpọ.” Edu Jehovah enen̄ede ọkọn̄ọ ke ima-mfọnido esie. Ndien nnyịn imekeme ndinyene ọyọhọ mbuọtidem ke ukeme esie ndinam se enye ọkọn̄wọn̄ọde, koro enyịn̄ esie, Jehovah, akam anam ẹdiọn̄ọ enye nte akwa Aduak Uduak. (Exodus 3:14; 6:2-8) Nte Andibot, enye edi Ebiet emi odudu ye akwa ukeme ẹtode. (Isaiah 40:26, 29) Enye edi uwụtn̄kpọ akpanikọ, koro “Abasi mîkemeke ndisu nsu.” (Mme Hebrew 6:18) Ntem, ẹsịn udọn̄ ẹnọ nnyịn ndinyene ọyọhọ mbuọtidem ke Jehovah, Abasi nnyịn, akwa Ebiet emi kpukpru akpanikọ ẹtode, emi enyenede akakan odudu ndikpeme mbon oro ẹbuọtde idem ke enye nnyụn̄ nnam kpukpru ikpọ uduak esie ẹkụt unen ke ubọn̄ ubọn̄ usụn̄.—Psalm 91:1, 2; Isaiah 55:8-11.
8, 9. Ntak emi mbuọtidem ananade idiọk idiọk ke ererimbot, ndien didie ke ikọt Jehovah ẹnam se idide isio?
8 Ke idiọk ererimbot emi akande nnyịn okụk, mbuọtidem anana idiọk idiọk. Utu ke oro, nnyịn ikụt idiọkitọn̄ ye n̄wo ke kpukpru ebiet. Ke ikpaedem nsiondi magazine World Press Review eke May 1993 ẹma ẹwet etop emi ke ikpọ ubọkn̄wed: “N̄KỌRI N̄WO—Idiọk Okụk ke Ndutịm Obufa Ererimbot. Usiakifia n̄wo ọmọtọn̄ọ ke Brazil osịm Germany, ọtọn̄ọ ke United States osịm Argentina, ọtọn̄ọ ke Spain osịm Peru, ọtọn̄ọ ke Italy osịm Mexico, ọtọn̄ọ ke Vatican osịm Russia.” Sia ọkọn̄ọde ke usua, idiọkitọn̄, ye unana mbuọtidem, inua-okot ndutịm obufa ererimbot eke owo idọkke n̄kpọ ndomokiet inọ ubonowo ikan ntatara unana inemesịt.
9 Ke edide isio ye mme idụt ukaraidem, Mme Ntiense Jehovah ẹkop inemesịt ndidi “idụt eke Jehovah edide Abasi esie.” Mmọ kpọt ke editịn̄ akpanikọ ẹkeme ndidọhọ ẹte, “Nnyịn ibuọt idem ke Abasi.” Owo mmọ kiet kiet ekeme ndifiori ke idatesịt ete: “Nyebụre ke Abasi, kpa ke uyo esie; mmọbuọt idemmi ye Abasi: ndịk idinamke mi.”—Psalm 33:12; 56:4, 11.
10. Nso ikọsọn̄ọ ediwak n̄kparawa Christian idem ndimụm nsọn̄ọnda n̄kama?
10 Ke idụt Asia kiet emi ẹkemiade ediwak tọsịn n̄kparawa Mme Ntiense idiọk idiọk ẹnyụn̄ ẹsịnde ke ufọk-n̄kpọkọbi, mbuọtidem ke Jehovah ama an̄wam ata ediwak mmọ ndiyọ. Okoneyo kiet ke ufọk-n̄kpọkọbi, akparawa Ntiense kiet oro okosobode enyene-ndịk ndutụhọ ama ekere ke imọ idikemeke aba ndiyọ. Edi uyen en̄wen ama edi ebịne enye ndịbe ndịbe ke okoneyo. Enye ama etịn̄ ke odu ete: “Kûyak idem emem fi; ami mma n̄kan̄ mbuọtidem ndien ọtọn̄ọde ke ini oro nnyeneke emem.” Akpa uyen oro ama afiak ọsọn̄ọ ubiere esie ndisọn̄ọ nda. Nnyịn imekeme ndinyene ọyọhọ mbuọtidem ke Jehovah nte ke enye eyen̄wam nnyịn ndikan n̄kpọ ekededi m̀mê ofụri ukeme oro Satan esịnde ndibiat nsọn̄ọnda nnyịn.—Jeremiah 7:3-7; 17:1-8; 38:6-13, 15-17.
11. Didie ke edemede nnyịn ndibuọt idem ke Jehovah?
11 Akpa ibet okot ubak ubak ete: “Afo nyụn̄ ma Jehovah Abasi fo ke ofụri esịt fo.” (Mark 12:30) Nte nnyịn itiede ikere Ikọ Abasi, ikpọ akpanikọ oro nnyịn ikpepde ẹsisụhọde ẹdụk nnyịn esịt tutu onụk nnyịn ndibiat ofụri se inyenede ke ndinam utom utịbe Abasi nnyịn, kpa Ọbọn̄ Jehovah Andikara. Edi esịt oro ọyọhọde ye ekọm ọnọ enye—kaban̄a kpukpru se enye ekpepde nnyịn, anamde ọnọ nnyịn, edinyụn̄ anamde ọnọ nnyịn—onụk nnyịn ndinyene ọyọhọ mbuọtidem ke edinyan̄a esie.—Isaiah 12:2.
12. Ke mme isua ẹmi ẹkebede, didie ke ediwak Christian ẹkewụt mbuọtidem mmọ ke Jehovah?
12 Ẹkeme ndikọri mbuọtidem emi ke ediwak isua. Osụhọdeidem Ntiense Jehovah kiet emi ke edinam akpanikọ akanamde utom ke se iwakde ikan isua 50 ke ibuot itieutom Watch Tower Society ke Brooklyn, ọtọn̄ọde ke April 1927, ekewet ete: “Ke utịt ọfiọn̄ oro mma mbọ okụk ekpatọfọn̄ ekedide $5.00 emi ẹkesịnde ke efọkn̄wed ye ediye kad oro owụtde itien̄wed Bible eke Mme N̄ke 3:5, 6 . . . Ofụri ntak ama odu ndibuọt idem ye Jehovah, koro ke ibuot itieutom ikebịghike mma ndifiọk nte ke Jehovah enyene ‘asan̄autom emi anamde akpanikọ, onyụn̄ enyenede ọniọn̄’ emi ke edinam akpanikọ esede aban̄a kpukpru ufọn n̄kpọ Obio Ubọn̄ ke isọn̄.—Matthew 24:45-47.”b Esịt Christian emi ikowụhọke ke ima okụk, edi ke ndinyene “inyene ke heaven eke mîdikpuhu.” Ke ukem usụn̄ oro mfịn, ediwak tọsịn owo oro ẹnamde utom ke mme ufọkidụn̄ Bethel Watch Tower Society ke ofụri isọn̄ ẹnam ntre ke idak orụk akan̄a itie ubuene oro ibet onyịmede. Mmọ ẹbuọt idem ke Jehovah ndinọ mmọ se mmọ ẹyomde ke usen ke usen.—Luke 12:29-31, 33, 34.
Bet Edem ke Jehovah
13, 14. (a) Ẹkeme ndikụt nti item n̄kukụre ke m̀mọ̀n̄? (b) Nso ke ana ẹfep man ẹyọ ukọbọ?
13 Ete nnyịn eke heaven ọnọ nnyịn item ete: “Kûberi edem ke asian fo.” (Mme N̄ke 3:5) Mme ọnọitem eke ererimbot ye mme ekpepn̄kpọ mban̄a ekikere owo tutu amama ikemeke ndidori enyịn ndinyene ọniọn̄ ye ifiọk oro Jehovah enyenede. “Ifiọk esie akan nte owo obụkde.” (Psalm 147:5) Utu ke ndiberi edem ke ọniọn̄ mme ọwọrọiso owo eke ererimbot m̀mê ke ekikere unana ifiọk nnyịn, ẹyak nnyịn ise Jehovah, Ikọ esie, ye mbiowo ke esop Christian kaban̄a nti item.—Psalm 55:22; 1 Corinth 2:5.
14 Ifiọk owo m̀mê ntan̄idem kaban̄a akamba itie ididaha nnyịn ika ebiet ndomokiet ke usen ọkpọsọn̄ idomo oro ekperede usọp usọp. (Isaiah 29:14; 1 Corinth 2:14) Ke Japan ke ini Ekọn̄ Ererimbot II, ọsọn̄idem ekpemerọn̄ ikọt Abasi oro akatan̄de idem ama emek ndiberi edem ke asian esie. Ke odude ke idak mfịghe enye ama akabade edi owo nsọn̄ibuot, ndien ediwak ke otuerọn̄ n̄ko ẹma ẹtre utom ke idak ukọbọ. Anam-akpanikọ eyenete an̄wan Japan, emi ye uko ọkọbọhọde enyene-ndịk ufen ke ndek ndek ufọk-n̄kpọkọbi, ọkọdọhọ ete: “Mbon oro ẹkenamde akpanikọ ikenyeneke san̄asan̄a ukeme ndien owo ikọfiọkke. Ke akpanikọ ana kpukpru nnyịn ibuọt idem ye Jehovah kpukpru ini ke ofụri esịt nnyịn.”c
15. Ewe edu Abasi edi akpan n̄kpọ edieke anade inem Jehovah esịt?
15 Ndibuọt idem ye Jehovah, utu ke asian nnyịn, abuana nsụhọdeidem. Edu emi edi akpan n̄kpọ didie ntem ọnọ kpukpru mbon oro ẹyomde ndinem Jehovah esịt! Kamse, Abasi nnyịn, okposụkedi edide Ọbọn̄ Andikara ofụri ekondo, akam owụt nsụhọdeidem ke mme edinam esie ye enyene-ọniọn̄ edibotn̄kpọ esie. Nnyịn imekeme ndiwụt esịtekọm ke oro. ‘Enye osụhọrede ese n̄kpọ ke enyọn̄ ye ke isọn̄. Enye osio mme ubuene ke ntan emen.’ (Psalm 113:6, 7) Ke ntak akwa mbọm esie, enye esifen ndudue nnyịn ke isọn̄ n̄kponn̄kan enọ oro enye ọnọde ubonowo, kpa ọsọn̄urua uwa ufak edima Eyen esie, Christ Jesus. Nnyịn ikpowụt esịtekọm didie ntem ke mfọnido emi owo mîdotke mi!
16. Didie ke nditọete iren ẹkeme ndinyanade mbịne mme ifetutom ke esop?
16 Jesus ke idemesie eti nnyịn ete: “Owo ekededi eke edimenerede idem, ẹyesụhọde enye ẹnịm; edi owo ekededi eke edisụhọrede idem, ẹyemenede enye.” (Matthew 23:12) Ke nsụhọdeidem, nditọete oro ẹnade baptism ẹkpenyene ndinyanade mbịne mme mbiomo ke esop Christian. Edi, mme esenyịn ikpenyeneke ndibat itieutom mmọ nte idiọn̄ọ akwa itie, edi nte ifet ndinam utom, ke nsụhọdeidem, ke esịtekọm, ye ke unyịmesịt, nte Jesus akanamde, emi ọkọdọhọde ete: “Ete Mi ke ananam utom tutu osịm emi, Ami ke nnyụn̄ nnam.”—John 5:17; 1 Peter 5:2, 3.
17. Nso ke kpukpru nnyịn ikpowụt esịtekọm iban̄a, adade okosụn̄ọ ke nso edinam?
17 Nnyịn kpukpru ini ke nsụhọdeidem ye ke edibọn̄ akam ikpakam ifiọk ite ke nnyịn idi sụk ntan ke enyịn Jehovah. Nnyịn ikeme ndinem esịt didie ntem, ndien, nte ke “ima Jehovah ebịghi ke nsinsi nsinsi ye mmọ eke ẹbakde enye, edinen ido esie onyụn̄ ebịghi ye nditọ nditọ”! (Psalm 103:14, 17) Kpukpru nnyịn ke ntre ikpenyene ndidi ifịk ifịk nditọ ukpepn̄kpọ Ikọ Abasi. Ini oro ẹbiatde ke ukpepn̄kpọ idemowo ye ukpepn̄kpọ ubon, ye ke mme mbonoesop, ẹkpenyene ndidu ke otu mme hour oro nnyịn ibatde ke nsọn̄urua ikan ke urua kiet kiet. Ke usụn̄ emi ke nnyịn ikọri ke “ndifiọk Ata Edisana.” Oro edi “asian.”—Mme N̄ke 9:10.
“. . . Ke Kpukpru Usụn̄ Fo”
18, 19. Didie ke nnyịn ikeme ndida Mme N̄ke 3:6 nsịn ke edinam ke uwem nnyịn, ndien ye nso utịp?
18 Ke adade nnyịn owụt Jehovah, Ebiet emi asian Abasi otode, Mme N̄ke 3:6 ọdọhọ ete: “Diọn̄ọ enye ke kpukpru usụn̄ fo, ndien enye eyenen̄ede usụn̄ fo onịm.” Ndidiọn̄ọ Jehovah abuana ndisịk n̄kpere enye ke akam. Ebiet ekededi oro nnyịn ikemede ndidu inamke n̄kpọ m̀mê nso idaha ikeme ndidemede, nnyịn imenyene usụn̄ edibịne enye usọp usọp ke akam. Nte nnyịn ikade iso ke mme utom nnyịn eke usen ke usen, nte nnyịn itịmde idem inọ utom an̄wautom, nte nnyịn isan̄ade ke ufọk ke ufọk itan̄ade Obio Ubọn̄ esie, akam ofụri ini nnyịn ekeme ndidi yak enye ọdiọn̄ utom nnyịn. Ntem, nnyịn imekeme ndinyene anana-mbiet ifetutom ye idatesịt ‘edisan̄a ye Abasi,’ inịmde ke akpanikọ ite ke enye ‘eyenen̄ede usụn̄ nnyịn onịm,’ nte enye akanamde ye Enoch, Noah, ye mme anam-akpanikọ nditọ Israel oro ẹkebakde Abasi, utọ nte Joshua ye Daniel.—Genesis 5:22; 6:9; Deuteronomy 8:6; Joshua 22:5; Daniel 6:23; se n̄ko James 4:8, 10.
19 Ke ini nnyịn inamde Jehovah ọfiọk eben̄e nnyịn, nnyịn imekeme ndinyene mbuọtidem nte ke ‘emem Abasi, emi anyan̄ade ifiọk owo, eyekpeme nnyịn esịt ye ekikere ke Christ Jesus.’ (Philippi 4:7) Emem Abasi emi, oro owụtde idem ke iso idara, ekeme ndinam mme enyeneufọk oro nnyịn isobode ke ini utom ukwọrọikọ nnyịn ẹkop etop nnyịn. (Colossae 4:5, 6) Enye n̄ko ekeme ndisịn udọn̄ nnọ mbon oro ẹkemede ndidi ẹsobo mfịghe ye ukwan̄ikpe oro ẹdide ọsọ n̄kpọ ke ererimbot mfịn, nte mbụk emi etienede mi owụtde.d
20, 21. (a) Ke ini edinam oyomonsia Nazi, didie ke nsọn̄ọnda Mme Ntiense Jehovah ekesịn udọn̄ ọnọ mbon en̄wen? (b) Nso ubiere ke uyo Jehovah ekpedemede nnyịn ndinam?
20 Max Liebster, amanaisọn̄ eyen Jew emi ke se itiede nte utịben̄kpọ ọkọbọhọde Nsobo Mme Jew, ama etịn̄ aban̄a isan̄ oro enye akanamde aka itienna uwotowo Nazi ke mme ikọ ẹmi ete: “Ẹma ẹkọbi nnyịn ẹdọn̄ ke mme ubet tren oro ẹkewọn̄ọrede ẹsịn ke ediwak n̄kpri ubet n̄kpọkọbi ẹnọ owo iba. Ke ẹtịghade mi ẹsịn ke kiet ke otu mmọ, mma nna nsak iso nse owo n̄kpọkọbi kiet emi enyịn esie ẹketiede ifụre ifụre. Enye okodu do ke ntak ukpono oro enye ekenyenede ọnọ ibet Abasi, emekde ufọk-n̄kpọkọbi ye ndusụk ndikpa utu ke ndiduọk iyịp mmọ en̄wen. Enye ekedi kiet ke otu Mme Ntiense Jehovah. Ẹma ẹbọ enye nditọ esie, ẹnyụn̄ ẹwot n̄wan esie. Enye okodori enyịn ndikpa nte n̄wan esie. Isan̄ usen 14 oro ama ọbọrọ akam mi, koro ekedi ke ini isan̄ n̄kpa emi ke ami n̄kenyene idotenyịn nsinsi uwem.”
21 Ke ẹma ẹkesio enye ke “obube lion” itienna ekikere Nazi, nte enye okokotde, ndien ke anade baptism, eyenete emi ama ọdọ kiet ke otu Mme Ntiense Jehovah emi n̄ko okodude ke ufọk-n̄kpọkọbi, emi ete esie okonyụn̄ ọbọde ufen ke itienna ekikere ke Dachau. Ke adan̄aemi ete esie okodude do, enye ama okop ke ẹma ẹmụm n̄wan esie ye ekpri eyenan̄wan esie n̄ko. Enye ama etịn̄ nte eketiede enye ke idem ete: “Ama afịna mi etieti. Ndien usen kiet ke adan̄aemi n̄kosụk ndade ke udịm ndiyere mmọn̄, mma n̄kop uyo oro okotde oto Mme N̄ke 3:5, 6 . . . Enye eketie nte uyo oro otode heaven. Enye ekedi sụk se n̄koyomde man mfiak nda ukem ukem.” Ke akpanikọ, uyo oro ekedi eke owo n̄kpọkọbi en̄wen oro okokotde oto itien̄wed Abasi emi, edi n̄kpọntịbe emi ọsọn̄ọ owụt odudu emi Ikọ Abasi ekemede ndinyene ke idem nnyịn. (Mme Hebrew 4:12) Uyo Jehovah akpakam etịn̄ ikọ ye odudu ọnọ nnyịn mfịn ebe ke mme ikọ eke ibuotikọ isua 1994 nnyịn: “Buọt idemfo ye Jehovah ke ofụri esịt fo”!
[Mme Ikọ idakisọn̄]
a Se ibuotikọ oro “Ndibuọt Idem ye Jehovah ke Ofụri Esịt Mi,” nte Claude S. Goodman obụkde, Enyọn̄-Ukpeme (Ikọmbakara), December 15, 1973, page 760-765.
b Se ibuotikọ oro “Ubiere Nditoro Jehovah,” nte Harry Peterson obụkde, Enyọn̄-Ukpeme (Ikọmbakara), July 15, 1968, page 437-440.
c Se ibuotikọ oro “Jehovah Ifreke Mme Asan̄autom Esie,” nte Matsue Ishii obụkde, Enyọn̄-Ukpeme, May 1, 1988, page 21-25.
d Se n̄ko ibuotikọ oro “Edinyan̄a! Nnyịn Ndiwụt Esịtekọm,” nte Max Liebster obụkde, Enyọn̄-Ukpeme (Ikọmbakara), October 1, 1978, page 20-24.
Ke Ibio Ibio
◻ Nso orụk item ke ẹnọ ke Mme N̄ke?
◻ Didie ke mbuọtidem ke Jehovah ọnọ nnyịn ufọn?
◻ Nso ibuana ke ndiberi edem ke Jehovah?
◻ Ntak emi nnyịn ikpọdiọn̄ọde Jehovah ke kpukpru usụn̄ nnyịn-e?
◻ Didie ke Jehovah enen̄ede usụn̄ nnyịn onịm?
[Ndise ke page 15]
Idara idara etop Obio Ubọn̄ esidemede udọn̄ mbon esịt akpanikọ