Ọniọn̄ Ọniọn̄ Item Solomon Kaban̄a N̄wed Oro Ẹkpekotde
“EDINAM ediwak n̄wed inyeneke edikụre; edikpep n̄kaha onyụn̄ esịn idem akpa mba.” (Ecclesiastes 12:12) Ke ini enye ekewetde mme ikọ oro ke n̄kpọ nte isua 3,000 emi ẹkebede, enyene-ọniọn̄ Edidem Solomon eke Israel eset ikakpanke ukot n̄wed. Utu ke oro, enye okowụt ke ọfọn ndisasat mme n̄wed oro ikotde. Item oro enen̄ede odot ye eyo nnyịn didie ntem, sia ẹmịn̄de ediwak biliọn n̄wed ke ofụri ererimbot kpukpru isua!
Ana in̄wan̄-in̄wan̄ nte ke “ediwak n̄wed” oro Solomon eketịn̄de aban̄a ikedịghe mme n̄wed oro ẹbọpde-bọp m̀mê oro ẹnamde owo okop idem inem. Ke ntre, enye ama anam an̄wan̄a ete ke ndikot mme utọ n̄wed oro n̄kaha idinọhọ ufọn oro ebịghide, utu ke oro, ayanam owo “akpa mba.”
Nte ededi, ndi ikọ Solomon ọkọwọrọ ke idụhe n̄wed ndomokiet oro ekemede ndinọ eti ndausụn̄ oro ẹkemede ndiberi edem, emi andikot ekemede ndibọ ufọn nto? Baba-o, koro enye ama ewet n̄ko ete: “Uyo mbon eti ibuot ẹbiet n̄kpọ ukịm-enan̄: mme etubom mbon esop [m̀mê, mmọ eke ẹwetde ikọ] ẹnyụn̄ ẹbiet okpukwak eke ẹkọn̄de ẹsịn: ekpemerọn̄ kiet ọkọnọ mmọ.” (Ecclesiastes 12:11) Ke akpanikọ, odu mme ikọ oro ẹwetde-wet emi ẹtiede nte “ukịm-enan̄” oro ẹkemede ndinụk owo anam eti n̄kpọ. Mmọ ẹkeme ndisịn udọn̄ nnọ owo asan̄a ke eti usụn̄. N̄ko-n̄ko, mmọ ẹkeme ndin̄wam owo ọsọn̄ọ ada ke ubiere esie onyụn̄ enyene iwụk, ukem nte “okpukwak eke ẹkọn̄de ẹsịn” ke eto.
M̀mọ̀n̄ ke nnyịn ikeme ndikụt mme utọ ikọ ọniọn̄ oro? Akakan ke otu ikọ emi, nte Solomon ọkọdọhọde, ẹdi mme ikọ oro ẹtode ekpemerọn̄, m̀mê andibọk kiet, kpa Jehovah. (Psalm 23:1) Mmọdo, mfọnn̄kan n̄wed oro inyenede ndimek man ikụt mme utọ ikọ ọniọn̄ oro edi n̄wed oro ẹkedade odudu spirit Abasi ẹwet—kpa Bible. Ndikot mme utọ ikọ oro ẹkedade odudu spirit Abasi ẹwet do kpukpru ini ekeme ndin̄wam nnyịn iben̄e “idem ke kpukpru nde ndinam eti utom ekededi.”—2 Timothy 3:16, 17.