Ndi Afo Ke Anam Ofụri Utom Fo Ọnọ Abasi?
“Abasi oyokot kpukpru n̄kpọ ẹmi ẹnamde ẹdi ikpe, ọkọrọ ke kpukpru ndịbe-ndịbe n̄kpọ, ẹdide eti, ẹnyụn̄ ẹdide mme idiọk.”—ECCLESIASTES 12:14.
1. Nso ndutịm ke Jehovah anam ọnọ ikọt esie?
JEHOVAH ọnọ mbon oro ẹkade iso nditi enye nte Akwa Andibot mmọ ibetedem. Ikọ esie eke odudu spirit ọnọ mmọ ifiọk oro ẹyomde man ẹnem enye esịt ke kpukpru usụn̄. Edisana spirit Abasi ada mmọ usụn̄ ndinam uduak Abasi nnyụn̄ ‘n̄n̄wụm mfri ke kpukpru nti utom.’ (Colossae 1:9, 10) Akan oro, Jehovah ọnọ udia eke spirit ye ndausụn̄ ukara Abasi ebe ke “asan̄autom emi anamde akpanikọ, onyụn̄ enyenede ọniọn̄.” (Matthew 24:45-47) Do, ke ediwak usụn̄, ikọt Abasi ẹnyene edidiọn̄ otode heaven nte mmọ ẹnamde n̄kpọ Jehovah ẹnyụn̄ ẹnamde akpan utom eke edikwọrọ eti mbụk Obio Ubọn̄.—Mark 13:10.
2. Kaban̄a utom Jehovah, mme mbụme ewe ẹkeme ndidemede?
2 Mme ata Christian ẹkop inemesịt ndinam edisana utom nnọ Jehovah. Edi, ndusụk owo ẹkeme ndikop mmemidem nnyụn̄ n̄kere ke ukeme mmimọ iwọrọke n̄kpọ. Ke uwụtn̄kpọ, ndusụk ini mme Christian oro ẹma ẹkeyak idem ẹnọ ẹkeme ndiyịk m̀mê ukeme ofụri esịt oro isịnde enen̄ede odot. Ke ini ẹkerede ẹban̄a ukpepn̄kpọ ubon ye mme edinam eken, mme utọ mbụme nte mmọ ẹmi ẹkeme ndidemede ke ekikere ibuot ubon: ‘Nte Jehovah enen̄ede enem esịt ye se nnyịn inamde? Ndi nnyịn imanam ofụri utom oro inyenede ndinam nnọ Abasi?’ Mme ikọ ọniọn̄ ọkwọrọikọ ẹkeme ndin̄wam ndibọrọ mme utọ mbụme oro.
Nte Kpukpru N̄kpọ Ẹdi Ikpîkpu?
3. Nte ekemde ye Ecclesiastes 12:8, nso idi ata akpatre ikpîkpu n̄kpọ?
3 Ndusụk owo ẹkeme ndikere ke mme ikọ owo ọniọn̄ ẹmi inen̄ekede isịn udọn̄ inọ owo ndomokiet—n̄kparawa m̀mê ikpọ owo. “Ọkwọrọ-ikọ ọdọhọ, ete, Ata akpatre ikpîkpu n̄kpọ; kpukpru n̄kpọ ẹdi ikpîkpu.” (Ecclesiastes 12:8) Ke akpanikọ, edi ata akpatre ikpîkpu n̄kpọ ndifụmi Akwa Andibot ke ini uyen, ndikọri nsọn̄ ye unana edinam n̄kpọ esie, ye edinyene usọn̄ kpọt nte n̄kukụre utịp edidu anyan uwem. Kpukpru n̄kpọ ẹdi ikpîkpu, m̀mê ukpọk, ọnọ utọ owo oro, idem ọkpọkọm enye akpa ọkpọn̄ inyene ye uwọrọetop ke ererimbot emi oro esịnede ke ubọk andidiọk, Satan kpa Devil.—1 John 5:19.
4. Ntak ẹkemede ndidọhọ ke idịghe kpukpru n̄kpọ ẹdi ikpîkpu?
4 Kpukpru n̄kpọ idịghe ikpîkpu inọ mbon oro ẹbonde n̄kpọuto ke heaven nte mme anam-akpanikọ asan̄autom Jehovah. (Matthew 6:19, 20) Mmọ ẹyọhọ kpukpru ini ke utom Ọbọn̄ emi ọnọde utịp, ndien mme utọ utom oro ikemeke-keme ndidi ikpîkpu. (1 Corinth 15:58) Edi edieke nnyịn idide mme Christian oro ima ikayak idem inọ, nte nnyịn ke isịn ifịk ke utom emi Abasi ọnọde ete ẹnam ke ukperedem ini emi? (2 Timothy 3:1) Mîdịghe nte nnyịn imọduọ idụk usụn̄ uwem oro okpụhọrede esisịt ọkpọn̄ eke mme mbọhọidụn̄ nnyịn? Mmọ ẹkeme ndibuana ye nsio nsio ido ukpono ẹnyụn̄ ẹkeme ndinen̄ede nnyene ifịk, ẹkade mme ufọk utuakibuot mmọ kpukpru ini ẹnyụn̄ ẹdomode ndinam se orụk utuakibuot mmọ oyomde oto mmọ. Nte ededi, mmọ idịghe mme anditan̄a etop Obio Ubọn̄. Mmọ inyeneke nnennen ifiọk nte ke “utịt ini” edi emi inyụn̄ inyeneke nte ini edide usọp usọp ke ekikere iban̄a eyo emi nnyịn idude uwem mi.—Daniel 12:4.
5. Edieke edibịne ọsọ usụn̄ udu uwem edide akpan n̄kpọ ọnọ nnyịn, nso ke ikpanam?
5 Jesus Christ eketịn̄ aban̄a ndiọkeyo nnyịn ete: “Nte mme usen Noah ẹkedide, kpasụk ntre ke edidi Eyen Owo oyonyụn̄ edi. Koro nte mmọ ẹdiade ẹnyụn̄ ẹn̄wọn̄de n̄kpọ, ẹdọde ndọ ẹnyụn̄ ẹdade owo ẹnọ ndọ ke mme usen eke ẹkebemde ukwọ iso, tutu esịm usen emi Noah odụkde ke ubom, mînyụn̄ ifiọkke tutu ukwọ edi edimen mmọ kpukpru efep; kpasụk ntre ke edidi Eyen Owo eyedi.” (Matthew 24:37-39) Inyeneke se ikwan̄ade ndidia n̄kpọ nnyụn̄ n̄n̄wọn̄ n̄kpọ ye mfaraidem, ndien edi Abasi ke idemesie ọkọtọn̄ọ ndutịm ndọ. (Genesis 2:20-24) Edi, edieke nnyịn ikụtde ite ke edibịne mme n̄kpọ oro ẹyomde ke uwem akabade edi akpan n̄kpọ ọnọ nnyịn, ntak emi nnyịn mîbọn̄ke akam iban̄a n̄kpọ emi? Jehovah ekeme ndin̄wam nnyịn ndinịm mme udọn̄ n̄kpọ Obio Ubọn̄ akpa, nnam se inende, nnyụn̄ nnam utom inyenede ndinam nnọ enye.—Matthew 6:33; Rome 12:12; 2 Corinth 13:7.
Uyakidem nnọ ye Utom Inyenede Ndinam nnọ Abasi
6. Ke ewe akpan usụn̄ ke ndusụk mbon oro ẹma ẹkena baptism ẹkpu ndinam se mmọ ẹnyenede ndinam nnọ Abasi?
6 Oyom ndusụk Christian oro ẹma ẹkena baptism ẹbọn̄ akam ifịk ifịk koro mmọ mîdụhe uwem aba ekekem ye utom asan̄autom oro mmọ ẹkenyịmede ke ini mmọ ẹkenamde uyakidem ẹnọ Abasi. Ke isua ke isua, ẹmenịm se ibede owo 300,000 baptism ke ediwak isua idahaemi, edi ofụri ibat Mme Ntiense Jehovah oro ẹsịnde ifịk isan̄ake ikekem ye ibat oro. Ndusụk owo oro ẹkekabarede ẹdi mme asuanetop Obio Ubọn̄ ẹtre ndika iso ntan̄a eti mbụk. Kpa ye oro, ana mme owo ẹnyene ọyọhọ ebuana ke utom ukwọrọikọ Christian mbemiso ẹnịmde mmọ baptism. Ntre mmọ ẹdiọn̄ọ ẹban̄a utom oro Jesus ọkọnọde kpukpru mme anditiene enye ete ẹnam: “Mbufo ẹka ẹkenam kpukpru mme idụt ẹdi mbet Mi, ẹnịm mmọ baptism ẹsịn ke enyịn̄ Ete ye Eyen ye Edisana Spirit: ẹnyụn̄ ẹkpep mmọ ẹnam kpukpru n̄kpọ eke n̄ketemede mbufo.” (Matthew 28:19, 20) Ibọhọke mmọ ẹnyene ata uwouwo mmeme ke ntak unana nsọn̄idem m̀mê mme ntak en̄wen oro mmọ mîkemeke ndikara, mbon oro ẹma ẹkena baptism ẹmi mînamke utom aba nte mme ifịk ifịk Ntiense Abasi ye Christ idụhe uwem ekekem ye ofụri utom emi mmọ ẹnyenede ndinam nnọ Akwa Andibot nnyịn.—Isaiah 43:10-12.
7. Ntak emi nnyịn ikposopde idem ọtọkiet kpukpru ini kaban̄a utuakibuot?
7 Israel eset ekedi idụt oro ẹkeyakde ẹnọ Abasi, ndien ke idak Ibet ediomi, mme andito do ẹma ẹnyene mme mbiomo ke iso Jehovah. Ke uwụtn̄kpọ, kpukpru irenowo ẹkenyene ndisop idem kaban̄a mme usọrọ ita eke isua ke isua, ndien ẹkenyene ‘ndisịbe’ erenowo ekededi oro okokoide-koi etre ndinịm Passover mfep ke n̄kpa. (Numbers 9:13; Leviticus 23:1-43; Deuteronomy 16:16) Man ẹse ẹban̄a mbiomo mmọ ke iso Abasi nte ikọt esie oro ẹma ẹkeyak idem ẹnọ, nditọ Israel ẹkenyene ndisop idem kaban̄a utuakibuot. (Deuteronomy 31:10-13) N̄kpọ ndomokiet ikodụhe ke Ibet emi ọkọdọhọde: ‘Nam emi edieke eferede fi ke idem.’ Kaban̄a mbon oro ẹma ẹkeyak idem ẹnọ Jehovah mfịn, emi enen̄ede anam mme ikọ Paul ẹnyene udobi: “Ẹyak nnyịn inyụn̄ ikere nte ikpedemerede kiet eken inọ ima ye nti utom; ikûnyụn̄ isịn ndisop idem ọtọ kiet, nte edu ndusụk owo edide, edi inọ kiet eken item; ndien mbufo ẹkpedọdiọn̄ ẹnam ntem, adan̄a nte ẹkụtde ẹte usen oro ke asan̄a ekpere.” (Mme Hebrew 10:24, 25) Ih, ndisop idem ye mme ekemmọ andinịm ke akpanikọ edi ubak mbiomo oro mme Christian oro ẹma ẹkeyak idem ẹnọ Abasi ẹnyenede.
Tịn̄ Enyịn Domo Mme Ubiere Fo Se!
8. Ntak emi ekpri eyen emi ama akayak idem ọnọ ekpenyenede ndikere ke akam mban̄a edisana utom esie?
8 Ekeme ndidi afo edi akparawa owo emi ama akayak idem ọnọ Jehovah. Uwak edidiọn̄ ẹyedi okwo edieke afo enịmde mme udọn̄ n̄kpọ Obio Ubọn̄ akpa ke uwem. (Mme N̄ke 10:22) Ebede ke akam ye eti ndutịm, eyedi afo eyekeme ndibiat ke nsụhọde n̄kaha mme isua uyen fo ndinam ndusụk orụk utom uyọhọ ini—eti usụn̄ ndiwụt ke afo emeti Akwa Andibot fi. Mîdịghe ntre, mme udọn̄ n̄kpọ obụkidem ẹkeme nditọn̄ọ ndida n̄kponn̄kan ini ye ntịn̄enyịn fo. Ukem nte ediwak owo ẹnamde, afo emekeme ndibabak ndọ ndọ onyụn̄ ọduọ odụk isọn man enyene mme n̄kpọ obụkidem. Uforo uforo ubọkọkọ ekeme ndida n̄kponn̄kan ini ye odudu fo. Edieke afo enyenede nditọ, afo edinyene ndibiom mme mbiomo ubon ke ediwak iduọk isua. (1 Timothy 5:8) Ekeme ndidi afo udufreke Akwa Andibot fi, edi owụt eti ibuot ndifiọk nte ke afo ndibabak nnam ndutịm, m̀mê nditre ndinam, ekeme ndiwụt nte uwem ini emi afo edide akwa owo editiede. Ke mme ukperedem isua, afo emekeme ndifiak nse edem nnyụn̄ n̄kere nte ekpekenen̄erede abiat ke nsụhọde n̄kaha ntọn̄ọ ntọn̄ọ ini akwa owo fo ke ndinam edisana utom nnọ Akwa Andibot nnyịn. Ntak mûtiehe ukere uban̄a idotenyịn fo ke akam idahaemi, man ekpenyene uyụhọ ke edisana utom anamde ọnọ Jehovah ke mme isua uyen fo?
9. Nso ikeme nditịbe nnọ owo emi ama ọkọkọri ọsọn̄ emi okonyụn̄ obiomde ndodobi mbiomo inikiet ko ke esop?
9 Kere ban̄a mme idaha efen—eke owo oro akanamde n̄kpọ inikiet ko nte andikpeme “udịm-erọn̄ Abasi.” (1 Peter 5:2, 3) Kaban̄a ndusụk ntak, enye ke unyịmesịt ama ọkpọn̄ mme utọ ifetutom oro. Edi akpanikọ, enye ọsọn̄ idahaemi, ndien ekeme ndinen̄ede ndi ọkpọsọn̄ n̄kpọ nnọ enye ndinam utom Abasi. Ndi ekeme ndidi akpana enye afiak anyanade ebịne mme ifetutom ukara Abasi? Nso mme edidiọn̄ ke utọ owo oro akpada ọsọk mbon en̄wen ntem edieke ekemede ndibiom mbiomo efen efen ke esop! Ndien sia baba owo kiet mîdụhe uwem inọ idemesie kpọt, mme ufan ye mbon ima ẹyekop idatesịt edieke enye ekpekemede ndikọri ke utom esie, ọnọde Abasi ubọn̄. (Rome 14:7, 8) Ke akande kpukpru, Jehovah idifreke se owo ekededi anamde ke utom esie. (Mme Hebrew 6:10-12) Ntre, nso ikeme ndin̄wam nnyịn nditi Akwa Andibot nnyịn?
Mme N̄kpọ Un̄wam Nditi Akwa Andibot Nnyịn
10. Ntak emi ọkwọrọikọ okodude ke mfọnn̄kan idaha ndinọ ndausụn̄ ke n̄kpọ aban̄ade editi Akwa Andibot?
10 Ọkwọrọikọ okodu ke ata eti idaha ndinọ nnyịn ndausụn̄ nditi Akwa Andibot nnyịn. Jehovah ama ọbọrọ akam ofụri esịt esie ebe ke ndinọ enye n̄wọrọnda ọniọn̄. (1 Ndidem 3:6-12) Solomon ama etịm odụn̄ọde ofụri mbubehe owo. Akan oro, Abasi ama ọnọ enye odudu spirit ndiwet kpukpru se enye okodụn̄ọrede ọfiọk nnịm man mbon en̄wen ẹbọ ufọn. Enye ekewet ete: “Ndien n̄ko-n̄ko, koro Ọkwọrọ-ikọ edide enyene-ibuot owo, enye osụk ekpep mbio-obio ifiọk; onyụn̄ odomo, onyụn̄ odụn̄ọ, onyụn̄ etịm ediwak n̄ke. Ọkwọrọ-ikọ esịn ubọk oyom edinem ikọ: ndien se ewetde edi ikọ akpanikọ.”—Ecclesiastes 12:9, 10.
11. Ntak emi nnyịn ikpọbọde ọniọn̄ ọniọn̄ item Solomon?
11 Nte ẹbonde mme ikọ ẹmi ke Septuagint usem Greek okot ntem: “Ndien akan oro, koro ọkwọrọikọ ekenyenede ọniọn̄, koro enye ekekpepde ubonowo eti ibuot; man utọn̄ okpokop se inemde ke mme n̄ke, ọkwọrọikọ ama anam ifịk ifịk ndụn̄ọde man oyom ndinem ikọ onyụn̄ ewet nnennen n̄kpọ—mme ikọ akpanikọ.” (The Septuagint Bible, emi Charles Thomson akabarede) Solomon ama odomo ndida ndinem ikọ ye mme n̄kpọ oro ẹnen̄erede ẹdemede udọn̄ ẹnyụn̄ ẹdotde nsịm esịt mme andikot n̄wed esie. Sia mme ikọ esie oro ẹkụtde ke N̄wed Abasi ẹtode odudu edisana spirit, nnyịn ye unana eyịghe imekeme ndinyịme mme ndụn̄ọde ye ọniọn̄ ọniọn̄ item esie.—2 Timothy 3:16, 17.
12. Ke mme ikọ idemfo, didie ke afo ekpetịn̄ se Solomon eketịn̄de nte ẹwetde ke Ecclesiastes 12:11, 12?
12 Idem kpa ye oro mme usụn̄ umịn̄n̄wed eyomfịn mîkodụhe, ediwak n̄wed ẹma ẹdu ke eyo Solomon. Ẹkenyene ndise mme utọ n̄wed oro didie? Enye ọkọdọhọ ete: “Uyo mbon eti ibuot ẹbiet n̄kpọ ukịm-enan̄: mme etubom mbon esop [“mmọ eke ẹtan̄de ikọ ẹbok,” NW] ẹnyụn̄ ẹbiet okpukwak eke ẹkọn̄de ẹsịn: ekpemerọn̄ kiet ọkọnọ mmọ. Ndien n̄ko-n̄ko, eyen mi, kop item: edinam ediwak n̄wed inyeneke edikụre; edikpep n̄kaha onyụn̄ esịn idem akpa mba.”—Ecclesiastes 12:11, 12.
13. Didie ke ikọ mbon oro ẹnyenede ọniọn̄ Abasi ẹkeme nditie nte n̄kpọ ukịmenan̄, ndien mmanie ẹtie nte “okpukwak eke ẹkọn̄de ẹsịn”?
13 Ikọ mbon oro ẹnyenede ọniọn̄ Abasi ẹtie nte n̄kpọ ukịmenan̄. Didie ke edi ntre? Mmọ ẹnụk mme andikot m̀mê mme andikop ẹnam n̄kọri nte ekemde ye mme ikọ ọniọn̄ oro mmọ ẹkotde m̀mê ẹkopde. Akan oro, mbon oro ẹsịnde idem mmọ ke ‘nditan̄ ikọ mbok,’ m̀mê mme ata ikọ ọniọn̄ ye mme utịn̄ikọ oro ẹdotde, ẹbiet “okpukwak eke ẹkọn̄de ẹsịn,” m̀mê ẹsịnde ọfọn. Emi ekeme ndidi ntre koro nti ikọ utọ mme owo oro ẹwụt ọniọn̄ Jehovah ndien ke ntre ẹkeme ndinam mme andikot m̀mê mme andikop ẹnyene iwụk ẹnyụn̄ ẹnọ ibetedem. Edieke afo edide ete m̀mê eka oro abakde Abasi, nte afo ukpusịnke ofụri ukeme ndisịn utọ ọniọn̄ oro ke ekikere ye esịt eyen fo?—Deuteronomy 6:4-9.
14. (a) Mme orụk n̄wed ewe mînyeneke ufọn ‘ndikpep n̄kaha’? (b) Mme n̄wed ewe ke nnyịn ikpọnọ akpan ntịn̄enyịn, ndien ntak-a?
14 Nte ededi, ntak emi Solomon eketịn̄de se enye eketịn̄de oro aban̄a mme n̄wed? Ọfọn, ke ẹmende ẹdomo ye Ikọ Jehovah, mme anana-utịt n̄wed ererimbot ẹmi ẹdọn̄ọ mme ekikere owo. Ata ekese ke otu mme ekikere ẹmi ẹwụt ekikere Satan kpa Devil. (2 Corinth 4:4) Ke ntre, “edikpep” mme utọ n̄wed ererimbot oro “n̄kaha” enyene esisịt ufọn oro ebịghide. Ke akpanikọ, akamba ubak esie ekeme ndinọ owo unan ke n̄kan̄ eke spirit. Ukem nte Solomon, ẹyak nnyịn itie ikere se Ikọ Abasi etịn̄de aban̄a uwem. Emi ọyọsọn̄ọ mbuọtidem nnyịn onyụn̄ odụri nnyịn ekpere Jehovah. Edinọ ntịn̄enyịn n̄kaha ke mme n̄wed en̄wen m̀mê mme ebiet efen ẹmi item ẹtode ẹkeme ndinam nnyịn ikpa mba. Mme utọ n̄wed oro idịghe nti ẹnyụn̄ ekeme ndibiat mbuọtidem ke Abasi ye mme uduak esie akpan akpan ke ini mmọ ẹtode ekikere ererimbot oro atuahade ye ọniọn̄ Abasi. Do, ndien, ẹyak nnyịn iti ite ke mme n̄wed oro ẹkenọde ufọn ẹkan ke eyo Solomon ẹnyụn̄ ẹnọde ẹkan eke eyo nnyịn ẹdi mbon oro ẹwụtde ọniọn̄ eke “ekpemerọn̄ kiet,” kpa Jehovah Abasi. Enye ọnọ n̄wed 66 eke Edisana N̄wed Abasi, ndien nnyịn ikpenyene ndinọ mmọ ẹmi n̄kponn̄kan ntịn̄enyịn. Bible ye mme n̄wed un̄wam eke ‘asan̄autom emi anamde akpanikọ’ ẹn̄wam nnyịn ndinyene “ifiọk Abasi.”—Mme N̄ke 2:1-6.
Ofụri Utom Inyenede Ndinam nnọ Abasi
15. (a) Didie ke afo ekpetịn̄ mme ikọ Solomon ẹban̄ade utom “eke kpukpru owo”? (b) Nso ke ana nnyịn inam edieke anade nnyịn inam se inyenede ndinam nnọ Abasi?
15 Ke nditịn̄ ibio ibio mban̄a ofụri ndụn̄ọde esie, ọkwọrọikọ oro, Solomon, ọdọhọ ete: “Yak nnyịn ikop utịt ofụri n̄kpọ emi: bak Abasi, nyụn̄ nịm mbet esie: koro emi edide eke kpukpru owo. Koro Abasi oyokot kpukpru n̄kpọ ẹmi ẹnamde ẹdi ikpe, ọkọrọ ke kpukpru ndịbe-ndịbe n̄kpọ, ẹdide eti, ẹnyụn̄ ẹdide mme idiọk.” (Ecclesiastes 12:13, 14) Eti ndịk aban̄ade, m̀mê uten̄e uten̄e ukpono ẹnyenede ẹnọ, Akwa Andibot nnyịn eyekpeme nnyịn, ndien ẹdori enyịn ke eyekpeme mme ubon nnyịn, ọbiọn̄ọ ndibịne ibụmede ibụmede usụn̄ uwem oro ekemede ndida akwa afanikọn̄ ye mfụhọ nsọk nnyịn ye mbon ima nnyịn. Eti ndịk Abasi edi edisana onyụn̄ edi ata ntọn̄ọ ọniọn̄ ye ifiọk. (Psalm 19:9; Mme N̄ke 1:7) Edieke nnyịn inyenede mbufiọk emi ọkọn̄ọde ke Ikọ Abasi eke odudu spirit inyụn̄ idade item esie isịn ke edinam ke kpukpru n̄kpọ, nnyịn iyanam utom emi ‘edide eke kpukpru owo’ inọ Abasi. Baba, iyomke ẹwewet udịm udịm utom. Utu ke oro, se oyomde edi nnyịn ndiberi edem ke N̄wed Abasi ke ini isede iban̄a mme mfịna uwem ndien inam n̄kpọ ke usụn̄ Abasi kpukpru ini.
16. Kaban̄a ikpe, nso ke Jehovah edinam?
16 Nnyịn ikpenyene ndifiọk nte ke idụhe n̄kpọ ndomokiet oro edịbede Akwa Andibot nnyịn. (Mme N̄ke 15:3) Enye “oyokot kpukpru n̄kpọ ẹmi ẹnamde ẹdi ikpe.” Ih, Ata Edikon̄ oyodụn̄ọde kpukpru n̄kpọ, ọkọrọ ye mbon oro ẹdịbede owo ke enyịn. Ndifiọk mme utọ n̄kpọ oro ẹkeme ndinụk nnyịn ndinịm mme mbet Abasi. Edi akakan n̄kpọ oro onụkde nnyịn ekpenyene ndidi ima inyenede inọ Ete nnyịn eke heaven, koro apostle John ekewet ete: “Ndima Abasi edi emi, ete, nnyịn inịm mbet Esie; ndien mbet Esie ibiakke owo idem.” (1 John 5:3) Ndien sia ẹtịmde mbet Abasi kaban̄a nsinsi mfọnọn̄kpọ nnyịn, ke akpanikọ idotke-dot kpọt edi n̄ko owụt ọniọn̄ ndinịm mmọ. Emi idịghe mbiomo inọ mbon oro ẹmade Akwa Andibot. Mmọ ẹyom ndinam se mmọ ẹnyenede ndinam nnọ enye.
Nam Ofụri Utom Fo
17. Nso ke nnyịn idinam edieke nnyịn inen̄erede iyom ndinam ofụri se inyenede ndinam nnọ Abasi?
17 Edieke nnyịn inyenede ọniọn̄ inyụn̄ inen̄erede iyom ndinam ofụri utom inyenede ndinam nnọ Abasi, ke adianade ye edinịm mbet esie, nnyịn iyenyene ukpono ukpono ndịk ediyat enye esịt. Ke akpanikọ, “uten̄e Jehovah edi editọn̄ọ ifiọk,” ndien mbon oro ẹnịmde mbet esie ẹnyene “eti ibuot.” (Psalm 111:10; Mme N̄ke 1:7) Ke ntre ẹyak nnyịn inam n̄kpọ ọniọn̄ ọniọn̄ inyụn̄ isụk ibuot inọ Jehovah ke kpukpru n̄kpọ. Emi edi akpan n̄kpọ akpan akpan idahaemi, koro Edidem Jesus Christ odude, ndien usen ubiereikpe esie nte Ebiereikpe emi Abasi emekde emekpere.—Matthew 24:3; 25:31, 32.
18. Nso ididi utịp nnyịn edieke inamde ofụri se inyenede ndinam nnọ Jehovah Abasi?
18 Abasi ke odụn̄ọde kpukpru nnyịn idahaemi. Nte nnyịn ke inyene udọn̄ n̄kpọ eke spirit, mîdịghe nte imayak odudu ererimbot anam itie ebuana nnyịn ye Abasi emem? (1 Corinth 2:10-16; 1 John 2:15-17) Edide idi ikpọ owo m̀mê n̄kpri, ẹyak nnyịn inam kpukpru n̄kpọ ndinem Akwa Andibot nnyịn esịt. Edieke nnyịn isụkde ibuot inọ Jehovah inyụn̄ inịmde mbet esie, nnyịn iyesịn mme ikpîkpu n̄kpọ eke akani ererimbot emi oro edibede efep. Do nnyịn imekeme ndinyene idotenyịn nsinsi uwem ke obufa editịm n̄kpọ emi Abasi ọn̄wọn̄ọde. (2 Peter 3:13) Nso utịbe utịbe idotenyịn ke mmọ ẹmi ẹdi ntem ẹnọ kpukpru mbon oro ẹnamde ofụri se mmọ ẹnyenede ndinam nnọ Abasi!
Didie ke Afo Ọkpọbọrọ?
◻ Ntak emi afo ọkpọdọhọde ke kpukpru n̄kpọ idịghe ikpîkpu?
◻ Ntak emi akparawa Christian ekpetiede ekere aban̄a edisana utom esie ke akam?
◻ Mme orụk n̄wed ewe mîkpọfọnke ‘ẹkpep ẹkaha’?
◻ Nso idi utom “eke kpukpru owo”?
[Ndise ke page 20]
Kpukpru n̄kpọ idịghe ikpîkpu inọ mbon oro ẹnamde n̄kpọ Jehovah
[Ndise ke page 23]
Ke mîbietke ediwak n̄wed ererimbot emi, Ikọ Abasi edemede ukpọn̄ onyụn̄ enyene ufọn